Reisetagebuch Vancouver (11.12. -
19.12.2004)
11.12.2004: Sodele, etz isches schu gscheh, ha hüt am Morge
de Bob und de Danny und au die zwei Hundäli müesse
verabschide. Isch halt glich nu en schöni Zyt gsi und wemer
so zrugg luegt au en lehrrichi: Me hed glehrt sich sälber
z'organisiere, sich mit frömde Kulture und dene ihrne
Gepflogeheite usenand z'setzä und das au z'reschpektiere,
sich irgendwie dure z'moglä und natürli au nätti Lüüt känne
z'lehrä. So gseh isch das natürli guet gsi für mich ;-) De
Danny hed mich de a Flughafe vu Toronto, em
Pearson-Airport, brunge und mich dette mal usegrüehrt ;-)
Ich ha de mis Göfferli wo mal wider soooo richtig überlade
gsi isch welle zum Auto usehieve und denn ischmer der
Sauhund au nu a Bode trohled. Supi, natürli schu ei
Schnalle offe. Naja, chönnt ja nu guet wärde (ha mich schu
wie de Japaner i de Wärbig vorgschtellt: Stahd am Band und
denn chömid Einzelteili vom Gofferinhalt übers Band...) Bi
de gu iicheggä und siehe da: Min Goffer hed Übergwicht gha
(also ha nid nume ich gfeissed hie in Toronto *gg*) aber
easy, ha de mit dere nätte, ältere Frau hinderem Schalter
parliert und ha nüd müesse tugge ;-) Bi de nacher mal i
d'Zollkontrolle und dette hend etz alles usenandgnuh, dasi
nid nu ha müesse min Pimpel röntge isch alles gsi. Ha de
nach dere Prozedur mal s'Gate gsuecht, isch nu schwirig
wenns 500 Gates hed ;-) Pünktlich hemmer denn chönne
boarde, natürli heds uf dem Schlitzauge-Bomber (ja, das
Ding isch nacher wiiter uf Shanghai) zu 95% so Riisfrässer
gha, aber au das isch erträglich gsi. Wills g'schniit hed
und alles gfrohre gsi isch, simmer nu in Gnuss vum Entiise
cho, dank dem hemmer am Schluss ca. 35min Verspötig gha. De
Flug isch 6h gangä und meh oder weniger passabel gsi.
Leider heds chli Wolke gha, aber d'Rocky Mountains hani
glich gseh. Womer de Richtig Vancouver langsam abegschtoche
sind, hani gmeint ich heig wirkli de falsch Flüüger
verwütscht: Das hed usgseh wie d'Schwiiz! Und denn erscht
nu strahlende Sunneschiin und keis Wölkli bi 10°. Womer
denn dunne gsi sind bini voller schlächter Erwartige am
Gepäckband gschtandä. Bange Momente des Wartens...und
Wartens...und da, mi Goffer, heil, unversehrt und immer nu
zue ;-) Denn bini de mal mit mim Fido usebeindlet und ha
dette en Tante gfragt wägem Airportbus. Jaja, de Adi hed
grad glücklicherwiis eine gha und de hed mich de diräkt
vorem Hotel abgliferet. Ha grad au nu en Sightseeingtour
dur Vancouver gnosse, das Bussli isch vor jedes Hotel
anekärelet und das Zick-Zack dur d'Schtadt. Was mier
ufgfalle isch, dass die Stadt a) nid flach isch wie
Toronto, sondern hügelig b) extrem grüen isch, überall
Wald, Bäum, Rase, Pärkli und c) dases wunderbar isch mal
wider en schneebedeckte Bärg z'gseh ;-) Also de erschti
Iidruck isch schu mal guet gsi vu dere Stadt ;-) Mis Hotel
isch nid schlächt, was eifach gwöhnigsbedürftig isch,
dasmer anstelle vom Pass hie muesch en Kreditcharte zeige
;-) Ha äs Zimmer im 12 Stock (vu 49 Etage) mit Sicht uf
Downtown Vancouver (ich mag grad nu de B.C. Dome gseh).
D'Lag isch ideal, grad näbezue isch d'Robson Street, die
beschte Iichaufsstrass vu Vancouver ;-) Das hani hüt mal
müesse nütze und bi schu mal wiit durabtschumplet. Dami,
das isch glaubi s'Paradies für mich: Geili Auto, vili Lädä
füre Adi und hübschi Fraue (die sind etz uf all Fäll alli
hübscher gsi weder die woni z'Toronto aligs uf de Schtrass
gseh ha *ggg*). Hamer hüt schu en Rucksack fürs Laptop
kauft, will die Täsche nid sooo praktisch isch zum s'Laptop
immer aghänkt z'ha (cha äbe s'Laptop nid im Zimmer lah und
im Safe heds kei Platz). Ha de nu äs Internetcafe gsuecht
und au eis gfunde, grad vis à vis vum Hotel. Dami, da sind
etz sicherlich 40 PC dinne und a jedem PC isch eine am
Online-Zocke. Das sind schu Ballerspielfreaks! Ich ha de
für $2 en Schtund en PC gmietet, das isch rächt billig.
Leider hani chli müesse kämpfä zum Mail schriibe will a)
das Windows XP und Konsorte uf dem PC voll in japanisch gsi
isch und b) will uf dere Schweinetaschtatur keis ä, ö und ü
vorhande isch und s'Z und s'Y vertuuscht sind *würg*. Aber
easy, nu äs paar Schtund und ich cha au japanisch ;-)
Leider hani nu kei Möglichkeit gha zum Bildeli ufeladä, mal
gugge woni min Memeroystick cha aneschtöpsle, vilicht imene
andere Internetcafe.
Am Abig hani nu äs Bädli gnu und ha nu chli Färnseh gugget,
bevori denn am halbi 9ni de Schirm zuegmacht ha ;-)
Wetter Vormittag: k/a
Wetter Nachmittag: sonnig, wolkenlos, 10°
12.12.2004: Etzi sitzi grad imene BLENZ Coffee Shop (so
öppis wie de roti Brüeder vom Starbucks, d'Priise sind mal
die gliiche) und tue ganz schtolz uf mim Laptop umehäckärlä
;-) Chume grad vunere längere Shoppingtour, aber das
verzelli de am Schluss. Ich ha dänkt, wills chli müehsam
isch zum schriibe im Internetcafe, dasi aligs ufem Laptop
de Tag tue niderhackä und denn am andere Tag im
Internetcafe ufs Mail ghiä. Wenn ier mier schriibid isches
aligs schu nu chogä luschtig, ha aligs koreanische Zeiche a
de Stelle vu de ä,ö und ü ;-) So, aber gnueg vum
Internettle, ier wend ja sicher öppis vu mim Ufenthalt hie
ghöre. Also, hüt am Morge bini schu am 6i wach gsi und de
hani mich am Färnseh nu la wiiterbilde i Sachä Nüüigkeite i
de Chuchi und so. Die chönntid glaubi amene Blinde nu ä
Brülle verchaufe, so guet chönd die schnorrä. Uf die 8i
bini mal gu s'Zmorgebuffet inschpiziere und has für guet
befundä. Gäg di viertel vor 9ni bini Richtig Stanley Park
abmarschiert. Dami, isch -8 Grad gsi und de Wäg isch gfohre
gsi wie die Sau. Ca. 15min vu mim Hotel wäg fahd de km 0 vu
de Küschtelinie a. Die Küschtelinie hend en Steihauer i 32
Jahr erschtellt; sie isch ca. 9.5km lang und umfasst die
ganz Stanley Park Halbinsle. Ich bi also a dere
Küschtelinie entlang gschtartet. D'Sunne hed gschune und
ussert mier sind nu ca. 100 Jogger, Blader, Biker etc.
underwägs gsi. Herrlich säge ich üch: De Blick uf
d'Skyline, de Blick ufe Hafä, d'Bärgä und de Gruch vu Wald
und de Gruch vu Meer (sehr irritierend), d'Möwe wo schreiid
und d'Eichhörndli wo eim nachlaufid (jaja, sehr ahänglich
und fotogen). Ich bi de wiene Tourischt alles gu Phötele
und ha sogar nu äs Wasserflugzüüg bim Schtart verwütscht.
Im einte Hafä hends Schwäfel vu Alberta verladä, en gälbe
Huufe und schmeggi-feini. Leider hed de Mal wider
s'Batteriepack vu minere Kamera de Geischt ufgäh
*FluchworteamMorgen* Bi de grad zum Indianerschtammshop
zuechegschtoche (jaja, au dien hend en Shop, ihri Kultur
isch guet verträtä hie) und ha dette Batterie pöschtelet.
De Typ hed de gmerkt dasi nid vu da bi und hed mit mier afe
redä. Ich natürli Vollgas au gredt und är hed mier äs paar
Tips gäh vu wägä aluege und so wiiter. Ich bi de mal
wiitergangä und ha vili Sachä gseh und gfötelet. Bim
Kilometer 8 hani de mal s'Meer verlah und bi quer dur
d'Inslä tschumplet, zum Beaver Lake. Dette heds leider kei
Biber gha, aber derfür hunderti vu Äntä wo d'Lüüt gfüeteret
hend. Isch nu luschtig gsi zum luege. Au Meiseli chasch
füetere, die Sieche frässid dier us de Hand. Ich ha nu en
Fründ gfunde: äs Eichhörndli. Das Ding isch mier sicher
500m nachgloffe, i de Hoffnig uf happi-happi. Immer näb de
Füess, das hedmer langsam Angscht gmacht ;-) ("Squirrels
may bite" - Jaja, die Warnig hani gläsä, aber nid
"Squirrels are like dogs"). Nacher bini de mal zrugg is
Hotel, halt nid ganz, bi nu schnell gu mich verpflegä im
Mäc. Dette sitze ich so friedlich dinne gäll, und de gahd
d'Türe uf, ä Frau chund ine und plötzlich zwitscherets.
Hmmm, das isch doch en grosse Wällesittich wo schreit?! Wo
isch de Siech? Etz hed die Frau de Vogel uf ihrere
Schultere gha und isch mit dem gassi gangä, Horror wasmer
da alles gsehd ;-) De bini nu is Internetcafe und ha dette
mini erschte Bildli ufegladä. Jaja, isch au sone Sach gsi,
erklär mal amene ältere Koreaner dass du wetsch en
USB-Memorystick ischteckä ;-) Aber wiemer gsehd, das isch
gangä ;-) Ich glaube dasi etz aligs am Namitag oder am Abig
mal dette ine gah und mis Tagesgschäft erledigä, denn
sinder halt aligs en Tag hinnedri mit Info, aber das isch
glaubi z'verchraftä, oder? ;-) Nacher bini schnell gu en
anderi Jagge montiere und denn ab via Robson Street gu
shoppe, uf de Jagd nacheme Goffer und für de ander Goffer
en Sicherheitsgurt (me wott ja s'Glück nid
überschtrapaziere). Hüt isch ja mal wider Schaulaufe uf
dere Schtrass gsi, jede Typ hed sis Auto zeigt. Da heds
Viper GT, Chrysler Zuehälter-und-Drogedealer-SUV's mit
Chromfelge, Porsche GTA, Corvette, BMW's mit Type dinne wo
wissi Wulechäppli agha hend und au Hummers gha. Das isch nu
öppe öppis mit Stil, nid so wie z'Zug oder Luzärn ;-) Ich
bi mal i Sears ine (isch de Manor vu hie) und die hend doch
tatsächlich so Göffer gha. Ich ha denn en 29" kauft, das
isch de gröschti wo en Fluggsellschaft tued transportiere
(jaja, sicher isch sicher, und wenn mal eine wott uf blinde
Passagier machä, keis Problem). Das Ding isch vu de Firma
Wenger us de Schwiiz und hed nume schlappi $350 koschtet.
Aber da kännid ier de Adi ja schlächt wener meinid de heig
etz de Gäldschiisser ;-) De Sauhund hani für $90 becho *auf
die Schulterklopf* Erschtens isch hüt (und nur hüt) 70%
Rabatt uf dere Collection gsi. Und wies der Tüüfel hed
welle hani nu döffe äs Rubellösli ufrubble und ha dette au
nu $25 gha. So bini schier gratis zu dem Ding cho. Doch etz
chund s'Problem: De Sears isch ca. 25min vom Hotel wäg
gsi!!! De hesch also eine gseh das Ding dur alli Lüüt dure
is Hotel schleppä (jaja, lachid nume, hend ander au
gmacht). De bini nacher numal usgrückt gu Batterie poschte
und ha etz grad das lauschige Cafe entdeckt und sitze immer
nu da ;-) Morn muesi mal luege wies Wätter so isch, vilicht
gahni denn mal gu d'Stadt und s'Hafecenter erkundä. Uf alli
Fäll gahni die Wuche nu einisch mit em Greyhound uf
Whistler, mal gu luege wies dette so isch. Und öppe vilicht
nu ufe Grouse Mountain, das isch de Huusbärg vu Vancouver.
Uf alli Fäll wirdsmer nid langwilig ;-)
Wetter in der Nacht: sternenklar, -10°
Wetter Vormittag: sonnig, wolkenlos, -8° bis -2°
Wetter Nachmittag: bedeckt, 4°
13.12.2004: Hüt am Morge bini chli fuul gsi, erscht so gäg
die halbi 10ni bini frisch gedüschelt richtig Zmorgebuffet
mit em Lift kärelet. Nachem obligate Rülpserli bini de au
wider mit em Lift ufe, ha mini Sachä packt und bi über
d'Schtrass is Internetcafe. Dette hani alli mini Phöteli
ufegschpitzt und ha chli mit em MSN gschpilt. Nacher bini
Richtig Waterfront (Hafe) abe und ha dette welle Richtig
Canadien Place laufe. Leider isch s'Wätter nid so de Hit
gsi, hed aligs voll abbegläärt. Aber easy, für das gids ja
überdeckti Shoppingmalls ;-) Bi chli überall umegschtüret
und wills de nid ghört gha hed seiche, bini nu is Kino gu
"Blade: Trinity" gugge. Isch nu guet verschtändlich gsi,
vorallem isch das böse Wort mit f*** relativ viel vorcho
;-) Die bescht Frag im Film isch gsi: "Who is the President
of the United States?" Denn de Blade: "An asshole!" Voll
geil. Im übrige hends de Film gröschteteils in Vancouver
dreihet. Vancouver isch brühmt dass hie vil Film dreihet
wärdid, ca. 1Milliarde Dollar pro Jahr fliessid so i die
Schtadt. Hits wie X-Men, X-Men 2, Rambo I, Blade etc. sind
nur äs paar. Nachem Kino bini nu i Burgerking, dette hed
mich nu wider en Bättler aquatscht. Hanem de 25 Cent gäh,
aber das ischem nid gnueg gsi, drum heder mi afe amerde.
Ich nid fuul (ha ja öppis glehrt vum Bob) und hanem öppis
schöns gseid. Är hed de gmeint, daser mich derheime chäm gu
heimsueche. Ich ganz cool: "Then will you need a swimsuit!
Have a nice day!" Und tschüss... Ufem Heiwäg hani nu
schnell müsse im VIRGIN MEGASTORE halt machä, das isch de
gröschti Musiglade uf dere Siite vu Kanada. Dami, d'CD's
sind hie nume $14, also richtigi Schnäppli. Hamer de nu
zwei Nüerschinige gleischtet (wenns nü sind choschtids nume
$9.99 (+14% Taxe). Nach dem bini langsam a de Robson Street
nache hei und irgendwie ischsmer komisch vorcho, dass imene
BLENZ Kafishop vier Lüüt mit Laptop sitzid. Ich ine gäll,
und mal en verstohlnige Blick uf eis Laptop riskiert. De
Sauhund hed gsörft. Ich also en Capuccino beschtellt und
mal mis iBook uftah und brav am Mails suuge, leider nid
grad schnell, aber für zum gugge langets ;-) Mues de mal
gugge, also zum Föteli ufe schpitze muesi glaubi wiiterhin
is Inetcafe, isch nämli sensitiv wenn d'Verbindig abbricht
weni grad d'Datebank tue fütere ;-) Aber für Mails isches
sicher guet. Hello, Adi is back in Business ;-) Etz gahni
gunes Bädli näh und mini hütige Föteli gu bearbeite.
Wetter in der Nacht: Regen, 4°
Wetter Vormittag: teilweise Regen, 6°
Wetter Nachmittag: Regen, 7°
14.12.2004: Was fürne Morge: Rägä, Rägä und nu einisch
Rägä. So richtig zum devolaufe. Aber de Tourischt isch mal
gu Zmörgele und denn mal über d'Strass is Inetcafe. Dette
hani nid sovil z'tue gha, also bini nach 45min au wider
use. Äs hed immer nu gseicht und zwar meh weder vorethärä.
Ha ja eigentlich i Stanley Park is Aquarium welle gu
Belugas und Tittefisch gugge, aber 20min dure Schiff laufe,
nene ohni mich. Bi de mal i mis Beizli füre ghöcklet und ha
chli mit em Laptop umegschpilt. Leider hed
d'Internetverbindig z'wünsche übrigglah, also bini denn
nacheme milde Kafi wider verschwunde. Hamer denn mal
überleid dasi eigentlich nu nid vil gseh ha, also hani en
Skytrain beschtige. Das isch en vollautomatische Zug womer
für d'Expo äxtra buue hed. Isch schu nu luschtig, de Zug
chund und niemert sitzt dinne. Das Ding gahd teilwiis
underem Bode dure und die meischt Ziit überem Bode. Kurve
tueder wie en Bahn im Europapark mit Schräglaag durfahre,
isch nu cool. Da chamer äs Billet löse, ich ha etz mal für
ei Zone glöst, das choschtet $2. Mit dem Billet chamer
während 90min unbeschränkt umechärälä. Ich bi de zum
Hauptbahnhof gfahrä und ha dette am Greyhound Schalter äs
Billet für Whistler kauft. Ich gah etz also am Dunschtig de
ganz Tag mit em Bus uf Whistler, mal gu luege öbs a) Schnee
hed und b) öb das wirkli so guet isch wie alli immer sägid.
Whistler isch ca. 120km vu Vancouver wäg. Das Billet
choschtet nume $32, also äs rächts Schnäppchen ;-) Denn
bini mit em Skytrain wider zrugg und wills immer nu gseicht
hed bini is Tourischteinformationsbüro und ha churzerhand
en Sightseeing Tour uf Victoria Island (das isch die Insle
vor Vancouver) buechet. Die findet mit mier morn statt,
scheissegal wie s'Wätter isch ;-) Ich wirde am 09:00 vorem
Hotel abgholt und denn gahni mit eme Car via Fähri uf die
gross Insle. Dette luegemer de Butchart Garden a und machid
en City Tour dur Victoria. So gäg die 10ni am Abig simmer
au zrugg ;-) Naja, isch nid ganz billig ($119) aber das
gahd i Ornig, meh wett ja schliesslich au öppis gseh hie.
Woni use cho bi heds grad churz nid so fescht gschiffet und
de bini ufe üsserschti Punkt vom Canada Place (das isch das
Ding mit de wisse Sägel, normalerwiis landid dette die
grosse Chrüüzfahrtschiff) füre gloffe und ha äs paar Föteli
chönne machä. Bi grad so halbe zrugg gsi, heds doch schu
wider afe abbeläärä. Bi de chli de deckte Shoppinghüüser
nache und ha nu äs paar Mitbringsel chönne chauffe. Bi
nacher mal is Hotel gangä gu mich chli gu tröchne und mini
vile Sachä gu abladä ;-) Nacher bini mal i Safeway gu mich
mit Kraft Dinner ideckä und und i Mäc gu mis Zmittag/Znacht
gu iiwärfä. Etz sitzi grad im Inetcafe und maltretiere mini
Bildergallerie und s'Webmail. Ha doch nu müesse de Server
eidrien.ch ufschtocke lah, die Bildli und Datebank hend
s'Limit vom mim Server erreicht (jaja, wiene japanische
Tourischt *knipsknips*). Suscht chani de kei Bildäli meh
ufeschpitze ;-)
Wetter in der Nacht: Regen, 2°
Wetter Vormittag: Regen, 7°
Wetter Nachmittag: Regen, 9°
15.12.2004: De Tag hed öppe so guet agfangä wie nur
möglich, kei Rägä und gueti Luune. Abe as Zmorgebuffet.
Doch was gsehnd mini müede Auge: Kei Chääs, kei Fleisch,
kei Biilage *aaaaargh* Naja, denn halt d'Alternative
igschmisse. Ufe is Zimmerli, fuer mini Expedition alli
Usrüschtig montiert und vors Hotel anegschtandä. 10 vor
9ni, 9ni, 10 ab 9ni, 20 ab 9ni, halbi 10ni, viertel vor
10ni, kei Bus ume wo mich abholt :-( Ha denn mal de leisi
Verdacht gha dass die mich vergässä hend! Naja, wider ufe
ufs Zimmer, anderi Usrüschtig packt und mal Richtig English
Beach gloffe. Vo dette am Wasser nache bis zum Vancouver
Swimplace, das isch s'gröschte Indoorschwimmbad vu
Vancouver. Dette hani äs Wassertaxi beschtigä (das Ding
gsehd huere vertruenserweckend us, schier wiene Badwannä)
und bi denn uf Grandville Island gfahrä. Grandville Island
isch früehner de Güeterumschlagplatz gsi, Waarehüüser und
Gleisaschluss und alles wo derzue ghört. Hüt isch dette
näbeme Hotel au nu en Kulturstätte, ä Künschtlerschuel,
vili Lädäli und de berüehmti Grandville Island Market. Das
isch ä Markthalle mit allerlei Sache drinne. Da heds
Spezialitäte us Mexiko, Korea, Italie, Japan, USA, Kuba und
so wiiter. Die Farbe, die feine Gschmäckli i de Luft, die
vile Sachä (Fisch, Fleisch, Gmües, Frücht, Chääs, Brot
etc.) ==> Wahnsinn. Ich bi schier nümme zum schmöcke und
luege meh uscho. Bi de nu chli umegschliche uf dere Insle,
ha chli Lädäli agugget und bi de mit de "Badwanne" mal
wider zrugg gfahre. Vo dette bini Richtig Yaletown gloffe,
das isch äs modernisierts Quartier. Isch nu schön mal alles
gseh, vorallem schöni Hochhüüsli mit Appartments etc.
Nacher bini mal quer dur Downtown gloffe Richtig Gastown,
das isch s'ältischte Quartier vu Vancouver. Dette isch au
die berüehtmi Dampfuhr beheimatet. Das Ding isch aber nid
en richtigi Dampfuhr, das Ding isch 1977 erschtellt worde
und s'Zeigerwärch isch elektrisch und de Dampf chund vo de
Färnwärmeversorgig. Aber nichtsdestotrotz hani etz äs
Phöteli vu dem Ding und au äs Filmli ;-) Denn hani nu zwei
Souvenier pöschtelet und bi chli überall in Downtown
umegschliche. Im Aschluss dra bini nu is Tourischtebüro
(die hend mier ja die Tour verchauft) und ha dette mal
müesse Gas gäh (Dankä Bob für Dini guete Wort!). Etz hani,
so Gott will und die mich nid numal vergässid am Fritig
mini Exkursion nach Victoria Island. Glaubes zwar erscht
weni abgholt wirde, aber ich bi ja Optimischt ;-) Nacher
bini nu chli gu Zyt totschlah, ha vil Lädä bsuecht und nu
weniger kauft ;-) Bi nu is Cafe ineghöcklet und ha mini
Mails abegsuuget und nu äs paar gschribe und bi de is Hotel
zrugg gu de Tagesbricht verfassä und d'Phöteli gu
bearbeite. Nacher gahni de Mal is Inetcafe und tue mini
Phöteli ufeladae und nu de Tagesbricht verfassä. Morn am
Morge gahds de nach Whistler, de Bus chund mich sicher nid
gu holä vorem Hotel, da bini sicher. Mues defür a Greyhound
Terminal gu warte, isch ca. 40min vu mim Hotel wäg (per
pedes und mit em Skytrain). Das klappt sicher besser als
die organisiert Reis ;-) Abfahrt isch 8:00 mini Ziit
(Reisedauer ca. 2.5h) und Rückkehr je nachdem ;-) Morn söll
de schönschti Tag vu dere Wuche wärdä, mal luege. Wär ja
schu de Hammer wenns äs paar gueti Phöteli gäbt ;-)
Wetter in der Nacht: Regen, 1°
Wetter Vormittag: stark bewölkt, 6°
Wetter Nachmittag: bewölkt, 10°
16.12.2004: *RingRing* hed de Wecker am Morgä am 6i gmacht.
Jaja, isch früeh gsi hüt ;-) Ab is Bad gunbes Düschäli
risse und denn voller Elan as Zmorge. Aber was isch das,
das Füdlizmorge hed erscht abem 7ni offä *buhuuuu*. Tja,
halt wider rechtsumkehrt und ab is Zimmer mis Wärli gu
packe und mich ufe Wäg i d'Stadt gmacht. Dette bini i Tim
Hortons gu Zmorge näh ;-) Woni mich de gsättiget ha bini
mit em Skytrain i Hauptbahnhof gfahre, dette isch au de
Greyhound Terminal. Etz fragid ier üch sicher wie denn sone
Greyhound Terminal usgsehd? Das isch eigentlich en Halle wo
wiene Bahnhof usgsehd und anschtatt Gleis hed das Ding halt
32 Slots (das sind d'Plätz wo d'Büs stöhnd). Dette heds
also Büs vo uf Seattle, Toronto, Tichuana (jaja, schu
richtig, Mexiko), Washington, New York usw. gönd. Ich ha de
d'Nummere 13 müesse näh. Aber was gsehnd mini schwachä
Äugli? En Schlangä mit meh Lüüt als de Bus cha
transportiere! Ich mal agschtandä und siehe da, kei Platz
meh. Aber das isch ja schliesslich en Greyhound Firma und
kei eidgenössisch sanierti Bustransportlinie imene
Schwiizer Chuedorf. Die ganz cool nu zwei wiiteri Büs
anegschtellt. Das isch öppe Service. De hani mal Platz gnu
und pünktlich am 8i isch d'Fahrt losgangä. Mier sind de dur
Vancouver und de Stanley Park uüber d'Lions Gate Bridge
Richtig Nordvancouver gfahrä (Wahnsinn wenn uf dere Brügg
bisch und d'Sunne über de Schtadt ufgahd und Du das chasch
ab dere höche Brügg aluege!!). Vu dette a de Küschte nache
ufem Highway 99. Ha mich am Afang vu de Reis gwunderet für
was dases ächt i dem Bus sovil Chotzsäckli hed (i jedere
2te Reihe en Halter mit so Dinger dra). Has de nu cheibe
gli usefunde, de Highway 99 isch schlimmer als en Passfahrt
übere Julier ;-) Ufe und abe, links und rächts, mal uf
Meereshöchi denn wider ufe uf 300-400m, denn wide rmit 8%
Gfäll de Hoger abbe und das über 2h lang ;-) Mängisch isch
d'Schtrass 2-spurig gsi, denn wider 3- oder sogar 4-spurig.
Üsi Buschauffeur hed so richtig Schtoff gäh (käs Wunder, de
Fahrt die Schtrecki 2x täglich). Also mier isches nid
schlächt worde, aber anderne.... D'Ussicht isch Wahnsinn
gsi, mier hend d'Inselwält vu Vancouver gseh (Insle mit
Wald, Wald, Wald und rundume nume Meer), Papierfabrike,
Holzflöss wiemers aligs nume i de Dokumentarfilm gsehd,
Wald und schneebedeckti Bärgä, Urwald, verlassnigi
Bergarbeiterstädtli usw. Isch schu nu cool gsi. Aber ich bi
immer nu am rätsle wieviel Droge de Typ gha hed wo die
Schtrass gmacht hed, soviel ufe-abe-Kurve hani nu nie gseh
uf 140km! Wahrschindli isch eine mit Dynamit dure Wald
gloffe und hed en Schneise gmacht und hinnenache sind de
die flissige Buddelmändli cho und hend d'Schtrass gmacht
;-) Andersch chamer das schier nid erklärä. Paralell zur
Schtrass lauft nu d'Iisebahnschtrecki und die isch ender
elegant am Wasser nache buue. Naja, anyway, uf alli Fäll
heds kei einzige Tunnel uf dere Schtrecki, obwohls doch
einigi Abschnitt hed wos i de Schwiiz eine gmacht hend. Da
gsehds chli andersch us, man nehme einen selbstfahrenden
Bohrer (ha so Dinger gseh uf de Schtrecki, isch äbe ca.
15km Buuschtell gsi, die hend alti usrangierti
Panzerfahrgschtell gnu und die Bohrer drufgmechet) und
genug Sprengstoff und fertig ist die tunnellose Strecke
;-). Gäge Schluss ane isches de richtig ufegangä, vu
Meereshöchi uf 677m über Meer und denn simmer dette gsi,
Whistler. Naja, hamer schu schier chli usdänkt gha dases so
ähnlich isch wie St. Moritz oder so, aber das isch nu
besser gsi. Kei höchi Hotel (oder besser gseid Denkmäler)
sondern alles richtig gediegni Lodge mit maximal 5
Stockwärch und Wald drumume. S'Dörfli isch underteilt, ich
bi z'erscht chli im Village umegschtiflet und denn mal is
Upper Village gloffe, Dette isch nid sovil los, sondern
dette sind meh d'Bonzehotels. Bi de gli wider abbe und ha
s'Village meh erkundet. Das hed nu Stil, alles suuber und
härzigi Hüüsli, kei ufdringlichi Wärbig (z.B. de Mäc au
ganz dezänt, hani schier überseh, aber ich hane de
erschmöckt), kei Baschtelarbete a de Hüüser, alle
Installatione sind suuber versorget (z.B. Zu- und
Abluftalaage schön verschteckt) und d'Flaniermeile isch
Autofrii. Leider heds nid Schnee gha im Dorf, suscht wärs
nu chli schöner gsi. Isch halt aber au nu nid Saison, die
fahd halt erscht um Wiehnachte/Nüüjahr ume aa. Bi chli
umegschtrolchet und chli gu d'Lädä unsicher machä. Also ich
mues schu sägä, für d'Olympiade im Jahr 2010 hends glaubi
schu die richtig Wahl troffe. Die sind so richtig
iigrichtet und doch isch alles so schön Naturbelassä dases
en richtigi Freud isch. Kei Betonwüeschti, sondern Wald und
Bäum, so richtig öppis fürs Gmüet. So gäg die 1 heds afe
zuetue und die erschte Rägetropfe sind au schu abecho. De
hani halt beschlosse mit em halbi 2 Bus wider zrugg z'gah.
Äs sind doch schu wider zwei Büs dette gschtandä und das
isch s'verruckte: Beidi sind wider bumsvolle gsi. Ich ha de
Expressbus verwütscht, das heisst mier sind Nonstop uf
Vancouver gfahre und willmer de potänter Bus gha hend
hemmer nume 2h bruucht. Isch nid schlächt für die
Schtrecki, hihi. Ich bi de i de Schtadt usgschtige und
nacher z'Fuess is Hotel zrugg gwatschlet, ha dette d'Fötäli
bearbeitet und de
Bricht gschiibe. Nacher bini de nu is Inetcafe gu das ganze
i alli Wät verschicke ;-)
Wetter in der Nacht: Regen, 3°
Wetter Vormittag: Vancouver sonnig, 5°, Whistler Nebel,
später leicht bewölkt, 0°
Wetter Nachmittag: Whistler stark bewölkt und Regen 1°,
Vancouver stark bewölkt, 9°
17.12.2004: Nachere guete Nacht und vil Schlaf (ha halt
geschter am Abig nu en CSI-Marathon gha, vier Folge
nachenand vu de nüüe Stafflä) bini frisch fröhlich as
Zmorge (hed leider schu wider kei Biilage wie Fleisch und
Chääs gha) und denn mal voller Erwartig vors Hotel
anegschtandä. 5 vor 9ni, 9ni, 3 ab 9ni und plötzlich
chärrälät äs Chliibussli ume Egge. Naja, chli isches nid
grad gsi, aber für kanadischi Verhältniss sind Bussli mit
25 Sitz chli ;-) Üse Fahrer isch de Mike gsi, en ganz en
geile Siech, de Cheib hed gschnorret wienes Buech. Mier
hend de nu diversi Lüüt ufpickt und denn simmer gäg di
halbi 10ni komplett gsi. Üsi Reisegruppe hed sich wie folgt
zämä gsetzt: 2 Auschtralier (Männdli und Wiibli uf
Honeymoontour), 2 Amis us Kentucky (Männdli und Wiibli), 2
Kanadierinne us Montreal, 1 Nase us Pakischtan, 1
Philippinin (am Mike sini Fründin) und mini Wenigkeit. Mier
sind de nu en chlini Schtadtrundfahrt dur Vancouver gu
machä, damer vil z'früeh dra gsi sind für d'Fähri. Mier
hend Yaletown erkundet und sind nu dur Vancouver Highlands
gfahre, das beschte und tüürschte Quartier am Platz. Nach
dene Iidrück simmer de langsam Richtig Fährihafä gfahrä.
Vancouver hed zwei Fährihäfä, eine im Norde und eine im
Süde. Mier hend de im Süüde gnu, will vu dette d'Fähri nur
1.5h uf Victoria hed. Mier sind ca. 30min underwägs gsi und
am 10.15 simmer de au im Fährihafä gsi, naja Hafä isch
übertribe, ender en Landzunge mit öppe 50 Spure zum
ufkolloniere für uf das "Schiffli". Das "Schiffli" isch nid
so gross gsi, hed nume Platz für 2000 Lüüt und 500 Fahrzüüg
(und mit Fahrzüüg meini eigentlich au 50t Sattelschlepper
und so Gschmeus). Das Ding hed 18'000 BRT
(Bruttoregischtertonne), zum Vergliich, äs
Vierwaldstätterseeschiffli hed ca. 350 BRT. Mier hend de de
Bus im Deck 2 verschtaut, alli Auto sind i de Deck 3 und 4
gsi. Ich bi de ufe is Deck 5, dette isch Happi-Happi-Land
gsi. Also nüd für mich, da ich ja Zmorge gha ha, also bini
wiiter uf Deck 6, s'Relaxingdeck. D'Fähri hed pünktlich am
10.30 abgleid und denn isches losgangä. Die erschte 45min
isch d'Fahrt nid so spektakulär gsi, isch nume grad
usgangä. Die zweit Hälfti isch de interessanter gsi, denn
hed üsi Fähri nämli müesse verschidni Inseldurchfahrte
machä (Victoria Island isch die gröscht Insle vu dere
Inselgruppe, sie isch 550km lang ung 60km breit und hed
d'Form vunere Banane; die ganz Inselgruppe umfasst ca. 400
Insle, 150 ghörid zu de USA und 250 zu Kanada), das isch
sicher de beschti part vu dere Fahrt gsi. Ha nu Seehünd und
Robbe gseh wies am Schiff nache uftaucht sind und umegugget
hend (leider hani keini chönne Fötele, da die nur churz
aligs ufecho sind). Ich bi lang, lang verusse gsi und äs
isch chalt gsi ;-) Nach dene 1.5h simmer denn bereits in
Victoria Island acho. WISSENSWERTES: Victoria Island isch
en ehemaligi Kolonie vu de Ängländer, dementsprächend isch
au die ganz Insle rächt änglisch ghaltä, vili Pubs und
Victorianischi Hüüsli. D'Schtadt Victoria isch d'Hauptstadt
vu British-Columbia (jaja, nid Vancouver) und hed ca.
300'000 Iiwohner. Jede dritti Arbetsplatz isch vom
Goverment zahlt, das heisst jede driit Arbeiter isch en
Staatsagschtellte. Die ganz Insle hed ca. 900'000 Iiwohner.
Nach üsere Akunft simmer de mal dur die beschte Wohnlage
gfahre (die sind im Übrige vu de Gartearchitekte vum
Central Park in New York agleid wordä) und hend dette de
Flair mal chli beschtuuned. Verschidni Berüehmtheite vu
Kanada hend dette ihri Villene. Üse Wäg isch de a de
Küschte nach Richtig Victoria gangä. Dette acho, hemmer nu
schnell en Schtadtrundfahrt gmacht, damit au sicher keine
verlore gahd. De Mike hed üs de usegrüehrt und mier hend
ca. 2.5h Ziit gha alles a'zluege. Ha äs paar schöni Pics
chönne machä. Meh hed sich schier wie in Ängland gfühlt,
ischmer zum Teil wie London vorcho. Wunderbar die
Bachsteihüüser und de victorianisch Schtil überall. De Hafä
und au d'Tatsach dass kei Betonchlotz-Hochhuus die Schtadt
verschandlet isch sicherlich en Areiz fürne ernüüte Bsuech.
Ich ha mich denn nu verpflegt und chli umegshoppt, aber
ussert eme T-Shirt für mich isch nüd drinne glägä ;-) Am
viertel ab 4i simmer de grad mit Beginn vum Rägä abgfahre i
Butchard Garden. Das isch äs Areal ca. 30min usserhalb vu
Victoria wo sit 100 Jahr en Gartealaag sondergleichen
pflegt wird. Agfangä hed das Ganze nach em Abbruch vu de
Portland-Zementfabrik im Jahr 1894. Denn hed d'Frau vum
Bsitzer afä die ganz Tonmergelabbuuregion mit Pflänzä
verschönere. Das Ding isch mit de Jahr gwachsä und gwachsä
und isch hüt immer nu i de Händ vu dere Familie. Rund ums
Jahr ume sind dette 55 Gärtner vollamtlich beschäftiget, im
Summer sinds ca. 550 Mitarbeiter wo zum Garte luegid,
Tourischte ufpickid, Frage beantwortid, Rägeschirm
verteilid, Karpfe füeterid und und und. Doch was isch ächt
so speziell im Winter, grad vor Wiehnachte? Ja, das wirde
ich gärä verratä: De ganz Garte (und da redid mier vu 40min
Adi-Marschtempo füre Rundgang) wird mit 400'000 Liechtli
belüüchtet. HERRLICH, so öppis hani nu nie gseh. Farbigi
Lämpli da, wissi belüchteti Bäumli, roti Büschli, violetti
Tannä und und und. Das isch eifach sensationell gsi, du
laufsch dur de Gartä und überall sind Liechtli und vili
Sachä zum entdecke. De ganzi Wäg isch a de
Wiehnachtstradition us Ängland gwidmet, dette gids 12
Statione (cha nümme alli sägä, aber z.B. seven maids
milkin', eight dancers dancin', ten whistlers pipin',
twelve drummers drummin') wo de Spirit of Christmas söllid
verkörpere. Isch super gsi zum luege, das muesmer schier
gseh ha. Brassbands hend au gschpilt und äs isch binere
heisse Schuggi so richtig Wiehnachtsstimmig ufcho. So gäg
die 6i simmer de abgfahrä, pünktlich heds au wider afe
Rägnä. Mier sind de ufs halbi 7ni Schiff zrugg uf
Vancouver. Also weni gseh was das Usflügli koschtet hed und
wasi gseh ha was en Fährifahrt choschtet, denn isch das
glaubi billig gsi (eis Auto mit 2 Nase dinne $70). Und
wemer dänkt dasmer Gschichtsunterricht, Geografie- und
Geologiekunde, näbscht de nüüschte Sachä und Kommentär zum
Wältgschehe gha hend, denn isch das sehr en gueti
Inveschtition gsi. Obwohl de Mike nume Änglisch gredt hed,
hani sicher 90% ohni Problem sofort verschtandä, die
reschtliche 10% hani aligs müesse la wirke und chli
analysiere und usem Zämehang verschtah. Aber au das isch
wieder guet gsi zum lehrä verschtah ;-) Nachdem mier acho
sind im Fährihafä vu Vancouver hed de Mike üs wider zrugg i
d'Hotel brungä. Alles in allem isches en sehr en guete
Usfluug gsi, so richtig eine für Hardcore-Tourischte ;-)
Wetter in der Nacht: Regen, 2°
Wetter Vormittag: Vancouver neblig, 4°, Victoria Island
Nebel, später leicht bewölkt, 9°
Wetter Nachmittag: Victoria Island, stark bewölkt und
zeitweise Regen, 11°
18.12.2004: Mit was söli au de Bricht über min letschte
richtige Tag hie afah? Das vu wägä am fählende Beigemüse am
Zmorge hani ja schu paarmal bechlagt? Das hüt nümme el
Schnegge dunne am Zmorgebuffet betrüüe gsi isch sondern en
Bock? Dasi bis am halbi 9ni gschlafae ha und dasmi denn dä
Putztüüfel gweckt hed? Dases wide rmal Näbelgha hed und
gseicht hed? Alles Sachä woni schu mal duregäh ha, hmmm,
ich gseh mis Läbä isch langwilig ;-) Aber anyway, de Adili
isch de nach em Verlah vum Hotel mal für $4 Dollar...äh 2
Schtund is Inetcafe a mim SchtammPC, s'Nummere 24. Warum,
ganz eifach, ha mal usegfunde dass de de bescht Monitor hed
und usserdem uf Änglisch und nid uf Koreanisch isch ;-)
Nacher bini mal chli dene Schtrasse nachegschuenet woni
geschter nu usem Bussli gseh ha. Leider hed s'Wätter chli
g'Arschlöchled (Hahne uf, Hahne zue, Hahne uf usw.) Di de i
minere Dümmi inne nu is Drogeviertel gwatschlet (jaja, im
Michelin-Guide inne isches nu gschtandä, aber nei, de Herr
hed sich ja wiede rmüesse Gedankverlore dur d'Stadt
bewege). Bi de nid lang dette gsi, ha de mal d'Querschtrass
gnu und schu bisch wider bi de Tourischte gsi, tststs.
Naja, cha ja nume wider mier passiere ;-) Bi de nu chli de
deckte Hüüser nache und ha die letschte Mitbringsel für
d'Family kauft (und nei, ich verrate nid wases isch). Ich
ha mich de nu müesse belohne und en würdige Abschluss i
mini kulinarisch Wiiterbildig bringe, drum bini i Wendy's
gu häberle, das isch en Original-Hamburgerfrässbude mit de
beschte Burger. Ha grad müesse en Tripel-Burger ha, ich
weiss ja au nid was fürnes Viech dass hend müesse schlachtä
für das vili feine Fleisch (aso vu de Schtrass ufkratzed
hendses sicher nid *ggg*). Wills de immer nu
brünzled...pardon grägnet hed, isch de Adili is Kino
spaziert und ha de Film "Flight of the Phoenix" usgsuecht.
De Film hed geschter am Abig am 11i Premiere gha und hüt
bini am eis i die zweit Vorschtellig. De Film hends im
momentan gröschte THX-zertifizierte Kino vu Vancouver
gschpilt (THX isches Soundformat fürne umfassendi und klari
Soundkulisse im Kinosaal, jedes Kino wo das wett mues
entsprächend üsgrüschtet und zertifiziert wärdä). Chönd üch
öppe vorschtelle wie das grüttlet hed. De Film handlet
umenes Erdölbohrteam wo mit em Flüüger i de Wüeschti Gobi
abschtürzt und denn usem kaputte Flugi äs Ersatzflugi
baschtlet. De Dennis Quaid hed d'Hauptrolle. Isch nu guet
gsi so zum gugge, sicher en Kandidat fürne DVD-Abig. Nachem
Kino bini nu chli umetrohled und imene Tim Hortons nu gunes
letschts Vanille-Cappucino-Bächerli hinderekippe. Nacher
bini is Hotel gu packä und all mini Siebsachä zämäsueche,
Datesicherig gmacht, Schtrategie für morn z'rächtgleid und
nu chli Cold Case ufem CBC gluegt. Nacher bini de nu is
Inetcafe gu mis letschte Mail us Kanada verschicke und denn
mal is Bettli. Ach ja, bevoris vergisse: Ha nu s'offne
Mineralwasser ustrunke wo sid zwei Tag umeschtad (isch
wahrschindli ender bessers Bluemewasser gsi) drum rumplet
mim Buuch und gorpse muesi wiene Chueh ;-) Aber ich bi ja
älei im Zimmer, de schtört das nid so *bööööörk*
Für Morn gsehd s'Programm momentan wie folgt us:
- Tagwach: 08.30
- Duschen, frischmachen: 08.30 - 09.00
- Morgenessen: 09.00 - 09.30
- Safedeposit leeren: 09.30 - 09.45
- Fertigpacken: 09.45 - 10.30
- Reservezeit: 10.30 - 11.15
- Auschecken: 11.15 - 11.45
- Abfahrt des Airportbusses: 11.57
- Ankunft Vancouver International Airport: 12.40
- Einckecken: 12.50
- Abflug: 15.20
Das isch mal so de Ablauf wienis gärä hätt, mal gugge öbs
au so ablauft ;-) D'Göffer sind eigentlich schu ready,
fählt nur nu d'Dräckwösch vu hüt, s'Necessaire und chline
Grümpel und denn nu de Sicherheitsgurt drumume (a beidne
Göffer, sicher isch sicher *ggg*).
Isch eigentlich schu schad isch die Ziit sooo schnell dure,
irgendwie chunds mer vor als sigi ewigs schu da ännä und
andrersiits isch die Ziit huere schnell dure.
Wetter in der Nacht: Regen, 3°
Wetter Vormittag: Neblig und Regen, 5°
Wetter Nachmittag: Regen, 11°
19.12.2004: Meh sött aligs d'Plän nid so machä dases ufgahd
und schtimmt für eim sälber, nei, meh sött halt aligs au uf
höheri Gwaltä Rücksicht näh ;-) Ich ha ja geschter sone
schöne Ziitplan gmacht, aber meinsch de sig guet usecho?
Pustekuchen ;-) Also bis zum Zmorgeässä hed mal alles
klappt, bi de chli früehner gu uscheckä, will mich
d'Putzfrau usegrüehrt hed ;-) Bi de mal gäg di halbi 12i
vors Hotel usegschtandä und ha ufe Airporter gwartet. Das
Bussli isch de au tatsächlich cho und schwupps simmer au
schu ufem Wäg a Flughafä gsi. Leider hani de dette müesse
feschtschtelle, das üs de Typ vorem Ami-Terminal usgladä
hed und nid vorem Internationale-Terminal. Naja, schnappe
ich mier halt mini zwei Göffer und rolle mal mit dene i
Terminal ine. Dette mal gluegt wo's zum icheckä gahd. Ach
so, die Schlange vorem Schalter vu de Lufthansa isch also
länger weder die aligs vorem WC i de Schuel?! Naja, mal
Ziit z'todgschlagä und woni de dra cho bi hed mich doch
sone Gummihälsin bedient. Ha doch schier nümme gwüsst wie
hochdüütsch redä ;-) Uf all Fäll hends de Bomber
überbuechet gha und hend mich welle für $200 Prämie über
London schicke (ca. vier Schtund spööter). Ich ha de
dankend abglehnt wili ja mal Hei ha welle. Guet, isch das
au erlegt gsi. Bi de nu gunes letschts Mal en Burger King
aschtüüre und mini letschte Batzäli verrüehre. Nache rmal
wider dur die peinlich gnau Security-Kontrolle (Novum, ha
sogar müesse d'Chappä und d'Schueh abzieh ==> als ob ich
wo soooo lieb usgseh öppis böses würd im Schild füehre
*ggg*). Bi de chli gu wartä und wartä und wartä und de
Flüüger isch und isch nid ufgrüeft worde. Doch, ändli, da
seid en Schtimm dass de Bomber ca. 30min Verschpätet gahd,
naja, au das wärdemer nu überläbä. Bises de aber losgangä
isch hemer numal 1.5h gwartet, und denn isches de losgangä.
Ich ha wider mal en Gangsitz gha und näbe mier hed sich äs
Boarder-Girl (d'Nicole) inequätscht. Wis de Zuefall hed
welle, isch sie au Schwiizeri gsi und wohnt drüü Dörfer
wiiterwäg als ich und isch für drüü Mönet in Whistler gsi
gu Änglisch lehrä und gu boarde. Mier hend üs guet
underhaltä und sie hed a a mim iPod vil Freud gha. Füecht
isches mal au zue und härgangä, gwüssni Lüüt sind relativ
ufgregt wenn de Adi Kaugummi tued verteile und schlönd mal
schnell s'Mineralwasserbächerli abe und duschid so zimli
alles i üsere Sitzreihe *ggg*. Aber da macht doch nüd am
Morge am drüü, neinei, au de iPod und de Gameboy hend wider
möge tröchne bis Frankfurt ;-) De Flug isch alles anderi
als komfortabel gsi, will en schtarche Weschtschturm gsi
isch simmer glaubi über Fäldwäg "gfahre", das hed soooo
schön immer grüttlet. Defür hemmer vu üsne 1.5h Verschpätig
bis uf Frankfurt 1h guetgmacht, das isch immerhin öppis ;-)
S'Fuetter an Bord isch au nid so de Hit gsi, aber meh nimmt
ja alles wo gratis isch. En Bibelvorläsig uf Änglisch hani
au nu gnosse, die drüü Reihe vor üs hend en chrischtlichi
Rundreis dur Europa vor sich gha und sich au entsprächend
igschtumme ;-) In Frankfurt simmer denn chli dure ganz
Flughafä tschumplet, das mal wider chli unluschtig
d'Flüüger parkiert gha hend. Aber locker, mier hend de nu
grad en wiiteri Schwiizeri känneglehrt (naja, de Adi sött
aligs nid uf Mundart flueche, wenem d'Schwebebahn vor de
Nase abfahrt). Mier sind de also z'Dritte gu üse Flüüger uf
Chlote sueche und hends nu luschtig gha. D'Sandra, die
Dritt im Bunde isch au für drüü Mönet in Vancouver a de SGV
gsi, me hend also gnueg z'redä gha. Womer denn äntli au
hend chönne zum Flüüger hemmer mal wider müesse de Bus näh
und denn hani öppis erläbt, das glaubt mer schier nid: Will
sich de Crew-Bus verfahre hed simmer mit em
Passagiertransporter z'Erscht vorem Flüüger gschtandä. Zwei
Gangways sind anegsi, aber de Bomber isch bschlossä gsi!!
Niemert wone Schlüssel oder so gha hed und so hemmer müesse
ufem Rollfäld wartä bis mal d'Crew iigfahre isch! Sachä
gids..... De Flug uf Züri isch relativ churz gsi und was
s'Beschte gsi isch: Da heds meh Schnee gha weder in Canada
;-)