Reisetagebuch Toronto (14.08. -
25.08.2005)
Sonntag 14.08.2005: Sodele, jetzt woni die Ziile tue
schriibe bini schu fertig verpflegt am Schtubetisch vom
Danny und am Bob und luege mit eim Ohr und Aug chli CSI
– Las Vegas.
Hüt am Morge isches relativ guet uf Züri use gangä, alle
sguet, wenn nid unbedingt die vili Lüüt hättid müesse si
vorem Iicheckä und vorem Zoll. S’erscht Mal hani nu
döffe is Dock E use surre mit de
Undergrund-Superturbo-Schwebeseilziehbahn. Das Dock isch
halt schu schön (obwohl schön chamer ja immer elativ agseh,
mier gfallts vom Architektonische här, aber vom
Brandmäldertechnische Katastrophe! S’Stichwort isch
hie nume ESSER). De Flug isch de au meh oder weniger
pünktlich gangä, aber de Bomber woni gha ha *aargh* Ha schu
schier gmeint de Bagger-Päuli flüügi die Boing 767, das
Ding hed töönt wiene Menzimuck am Himmel würd umekurve
*surr* *miööög* *brrrr* *knarz* Voll geil gsi. Au de Sitz
isch schu chli a Altersschwächi erchrankt gsi, das Ding
isch immer unbemerkt nach hinne verreist. Während em Fluug
hani immer eis Ohr voll und ganz am Sitznachber gwidmett,
da mis Chopfhörerli en Wackeldackelkontakt gha hed. Aber en
Stromer cha doch das nid erschüttere, d’Stewardess
hed mier de nu welle s’Wärchzüüg bringe woni das Ding
mit de Gablä und em Mässer gflickt ha. Sie hed gmeint dass
s’einte Triebwärch aligs bim alaah chli hueschtet und
d’Brämsänä nid grad de Hammer sigid...
Apropos Gablä: S’Fueter isch guet gsi, hed feins
Chicken gäh und en Pizza am Schluss. Au
underhaltigstechnisch isch alles guet gsi, mier hend zwei
Kinofilm gluegt: „Million Dollar Babe“ und
„Red Sox“, wobii de erschteri Film chli ganz
truurig gsi isch. Denn hed sich plötzlich so eigeartige
Verwesigs- und Modergruch übere Flüüger gleid, die hend
doch tatsächlich de „Batman“ usem Jahr 1988
usgrabä (obwohl ich ja nu nid sicher bi öb
s’Gschtänkli us de AHV-Reihe hinder mier cho isch).
Aber au das isch duregangä und irgendwenn hemmer au kei
Tuirbulänzä meh gha und sind ufem Sinkfluug nach Toronto
gangä. As paarne isches glaubi chli schräng inecho dass
mier usgrächnet uf dere Pischte hend müesse landä wie de
ander Flüüger wo chli en z’lange Brämswäg gha hed ;-)
Aber mier hend das guet gmeischteret und am Schluss hend
alli so verdächtig klatschet...
Mier hend de ca. 1 1/2h Verschpätig gha, und ich ha immer
müesse a Danny dänkä wie är um de huere Fluughafä
umekurvet...
De Bomber hed üs de usegschpeutzt und mier hend de Bus
müesse näh für is Hauptgebäude. Dette isch das unsägliche
Leid mit de „Immigration-Control“ wider mal
losgangä. En Hundeblick da, en Verwiis uf mini spärliche
Känntnis vu de Sprach dette, hend mal wider Wunder gwirkt
(nid daser etz de Trick müend wiitersägä ;-))
Woni de min Goffer au nu abem Band zerrt ha, bini locker
usebeidlet und ha dusse müesse mal gugge öb de Danny schu
ume isch. Leider heds dasmal keis Schildli mit
„Andrin“ umegha, also bini use gloffe. Dusse
hani ganz verzwiiflet unegugget und plötzli seid eine.
„Hello young man!“ – de Danny. Mier sind
de mit em Auto nach168 Gamble Avenue gheizt, allerdings
simmer nu gu poschte und hend nu chli Schtau gha (sone Depp
hed mal wider sin 230er Mercedes zerleid a de Leitplankä).
Womer de acho sind, isches de losgangä mit Begrüesse und
die nüüe Schtudäntä kännälehrä (Jose 2 frrrrrrrrrrom Spain
und de Tobias from Germany) und Bier inelaah (ha ja schgu
gwüsst dass de Chüelschrank chalt isch, daser aber grad
Iismöckli im Bier produziert isch au mier nüü gsi) und
Znacht ässä (Lecker Gümel mit Rüebli, Chabis, Squish und
Fleisch ;-)
Als Schlafplatz hani an Danny sis Bett im Basement übercho,
sehr breit (so wie ich) aber nid sehr lang und mit
Mettalrahme obe und unne :-) Chunsch der ender vor wie
inere Bäärehöhli als wie imene Zimmer: Dunkel und nume 14°C
warm – d’Klimaalaag lauft Vollgas und zwei
Bääre schnarchlid um d’Wett. Aber etz chund nus
s’Beschte (und da isch de Casanova en Bettseicher
dranane: Chum hie, hani die erscht Nacht schu mit eme
wiibliche Wese verbrungä! An Danny sis Hundäli (Do you
remeber: Dakota) hed mich ufem Bett bsuecht und bi mier die
ganz Nacht d’Füess gwärmet.
Montag 15.08.2005: Nachere guete Nacht bini au nu schnell
verwachet: Auge uf und ich luege diräkt i d’Auge
vomene Hundäli *Herzrasen* Isch doch d’Dakota nümme a
de Füess sondern direkt ufem Chopfchüssi glägä. De bini de
Mal ufgschtandä und gu d’Chuchi nach ässbare Einheite
undersueche. Ha de au öppis Feins gfunde: Bagels mit
Wiiberi. Die hend grad müesse i Toaschter gschtopft wärde
und sind de mit Ketchup beladä Richtig Magä gwanderet. De
hani chli Schtaubgsuuget und chli mit de Hundäli gschpillt.
Bi de nu chli müed worde und hami nu zwei Schtündli ufs Ohr
ghaue.
So gäg die 11i bini de au wider ufgschtändä, hami parad
gmacht für chli i d’Stadt z’gah. Chum zur
Husstüre us überschlahds eim grad: S’Huus
klimatisiert und dusse en Affewärmi. Bi de z’Fuess
ca. 30min gloffe bisi a de Danfort Avenue acho bi.
D’Danforth Avenue isch insofärn speziell, dases die
gröscht Aasammlig vo griechische Uswanderer usch usserhalb
vo Griecheland sälber und dass alli Strasseschilder uf
griechisch und uf änglisch aagschribe sind. Ich bi de die
Strass entlanggloffe und ha vil chlini Lädeli agugget,
lauschigi Restaurant bewunderet und Lüüt beobachtet. Woni
de dure gsi bi, bini ab i d’U-Bahn. Dette die
nächscht Überraschig: D’U-Bahnwägä sind klimatisiert,
das hani weder in Rom nu in London bis etz erläbt. Dem sägi
„gueti Organisation“.
Ich bi de bis zu de Yonge Street gfahre und vo dett us dur
die ganz Strass abbegloffä, chli i d’Läde ine gugget,
de Summer gnosse und nur äs Bitzli gschwitzt bisi am Eaton
Center acho bi. Bi dette aber nur schnell duregloffä und uf
de Hindersiite zu de alte und nüüe Cityhall gangä und chli
imSchattä ghöcklet und äs paar Phöteli gmacht. Hamer de
dänkt dasi vilicht imene chüele Kino chönnt en Film gugge.
En Viertelschtund wiiter und äs paar Tropfe Schweiss ärmer
bini vorem Kinokomplex gschtandä – schnell ine und
dinnä grad gmeint äs chämid Eskimo nächschtens ume Eggä, so
chalt isches gsi *bibber*
Ha de äs Ticket für „Dukes of Hazzard“ (bi üs
besser bekannt us de alte Serie „Ein Duke kommt
selten allein“) erschtandä und schu füüf Minute
später isch de Film agangä. Isch ganz dienig gsi zum gugge,
meh hed sich grad wider wie früehner gfühlt: De heissi
General Lee, nu die heisser Daisy *sabbersabber*, abartigi
Stunts und frächi Sprüch. Wer d’Glägäheit hed sött de
sich au gu inezieh, chund ja gli au i de Schwiizer Kino ;-)
Nachem Kino bini de Heizueh, nid dasi nu i d’Rushhour
chume. Derheime hani de chli verusse gläsä, chli CityPulse
am T.V. gugget, am Bob ghulfe Znacht machä und mich mit de
Studäntä underhaltä. Nachem Znacht hani de gli nu
d’Augerollädä abeglah und bi artig is Bett, dasmal
ohni Hundäli ;-)
Dienstag 16.08.2005: Hmm, und schu wider neigt sich en
ereignisriiche Tag a sim Ändi zue. Nachdem ich
zuegänigermasse en unruhigi Nacht gha ha (ha nid so guet
pfuused, defür hani schiinbar nid geschnarchlet - hed de
Danny gmeint) bini so i mim morgendliche
sechsi-bis-sibni-Döserli umegschwebt, de hend die beide
Hünd wie die pickte Sieche umebulle und gjaulet. Ich
natürli grad gschtandä i dem Näscht inne. So fix bini
glaubi nu nid mängisch usem Näscht cho! Sofort ufe und die
Beide sind knapp am abdreihe gsi, ich also s’Türi
ufgmacht und Beidi sind wie d’Ragete ab i Garte und
hend dette chli umegschpunne. Wases gsi isch – kei
Ahnig! Aber wach bini gsi *herzrasen* De isches ja nu nid
ganz verbii gsi mit Tierli: Woni nach ca. enere Schtund us
de Höhli ufechume gsehni en Schatte übere Bode beindle und
underem Gschirrwäscher verschwindä – äs Müüsli. Ha
gar nid gwüsst dasi inere Zoohandlig übernachtä ;-)
Aber easy, ha de nu chli a de Websiite umebaschtlet, chli
gmailet und eifach nüd gmacht. Gäg di eis bini au mal
Richtig Downtown abgloffe. Hüt hani aber de Bus gnu bis zur
U-Bahn (mer wird schliesslich au älter) und vu dett us bini
schnuerstraks Richtig Dundas gfahrä. Vo dette a bini dure
Entertainment District bis is China Town gloffe und
unnedure wider retour. Ha de bi de HBO Towers nu chli i mim
Buech gläsä, bi zwüschetdure nu schnell ine HMV (en
CD-Ladä) gangä gune CD pöschtele und imene Tim Hortons
(jaja, genau de mit de rote Schrift und de feine Gutzi
Gutzi – Hed nid öppert ganz bsunders die Cinnamon
Rolls gärä?? *grins*) gunes Iced Cappucino holä. Ha nu mit
eme Verträter vu de Schwarze Minderheitspartei gredt (jaja,
au das gids) und bi de langsam wider mit de U-Bahn Richtig
168 Gamble Avenue gfahrä.
Hüt ischmer eigentlich nume ufgfalle dass a) de Moscht hie
au über $1 isch (= Fr. 1.10) und b) dass bi de grichische
Bäckerii am Ändi vo üsere Strass immer öbbe en Bullecharrä
oder en uniformierte Typ umeschtahd. Naja, schiinbar nüd
speziells hani dänkt, äs fahrid ja aligs so Spinner mit
Hondas wie die Chranke am Blinkliecht ab. De Bob hed mier
de öppis Anders verzellt: Am letschte Fritigabig sig eine
bim Abbiege ines anders Auto inekesslet. Die beide
Autopilote hend enand agmerdet und zwar solang bis äs
9mm-Argumänt die ganz Diskussion beändet hed. Bilanz: Zwei
kaputti Auto, en relativ tote Autofahrer und vil
Schlagziile i de Tagespräss! Schiinbar isch das afigs nüme
Ussergwöhnlichs hie i de Region (na ja, immerhin en Bereich
so gross wie d’Zentralschwiiz), aber dennoch chli
Speziell, so grad quasi vor de Huustüre.
Woni denn acho bi hani am Bob ghulfe de Rase z’mähe.
Ich sägä üch, das isch de ender äs Abentüür: En
Elektromäher mit 12 Ampere (bi 110V gid knapp 1500W), wo
aber tönt wiene Modällhelikopter und wo allpot Ware unne
useflüügt (Sache wie Hundesch...sse, Stei und suschtige
Schrott). Geil sägi da nume ;-) Nacher hani nu en Wurmkur
bi de beide PC gmacht (Unkel PC-Dokter Adili isch immer im
Dienscht, hihi) und nu suschtigi chlini Reparature
(mängisch bruucht das eifach Närvä wemer ane total
verwürgti Gurke anechund und das Ganze nu uf Änglisch isch
– HELP! Mer lehrt aber immer wider öppis.) Zum Znacht
heds de Chicken Wings à la Bob und Pizza gäh.
Mittwoch 17.08.2005: De hütigi Tag isch ganz im Zeiche vom
Baschtle gschtandä. Also, de Tim Taylor (aka
Handwerkerkönig) cha grad iipackä, au wenn mini
Baschtelsachä nid immer gaaaaanz so praktisch gsi sind. Ich
bi halt eine vu de dümmschte Sieche wo uf dem Planet
umebeindlid: Willmer hie in Kanada ganz anderi Steckdose
hed, bruuchts en Übergangsstecker und das isch ja au rächt
so. Ich ha au sone Übergangsstecker derbii, nur leider hed
mis Ladegrät für s’Notebook de falsch Stecker dra,
will ich Hirsch de vergässä ha nu derheime z’tuusche.
Etz heds halt äs Kabel dra wo en drüübeinige Stecker dra
hed und min Übergangsstecker hed nume zwei Löcher. Was
macht mer da? Z’erscht hamer mal de Chopf us luuter
Ärger öppe zwänzgmal uf d’Wand inegschlagä (okay, äs
sind nume 19 Mal gsi) und denn hani de absoluuti
Geischtesblitz gha: Ab i d’Wärchzüügchammere und
dette ganz cool ä Iisesagi gsuecht, nu cooler de
überzähligi Stift abgsagt und siehe da: It works!! Das isch
aber nu nid alles gsi, ich ha sit ich das iBook ha
miserable WLAN-Empfang. Chli umegooglet und irgendwie
isches mier schu gschpässig vorcho dass alli wo das gliiche
Problem gha hend meh oder weniger gseid hend dases am
Stecker vo de Antenne zu de Airportcharte (äs sautüürs
Teili mit de Agwohnheit sicher im falsche Momänt kaputt
z’gah) ligge tued. Ich ha das schu mal prüeft und nüd
gfunde. Und mich hed das ehrlich gseid nüd agmacht hüt nu
müesse mis halbe iBook gu usenandschruube (Anm. d. Red.: Da
musmer aligs die ganz Taschtatur wägfummle, das bruucht
Närve im Quadrat). Aber äs hed mer kei Rueh glah und nach
ca. 10min hani de au feschtgschtellt gha dass das Steckerli
tatsächlich nid ganz inegschtöpslet gsi isch. So geil, etz
hani sogar i de Bäärehöhli kabellose Internetzuegang (jaja,
ich bin drin). So macht doch s’Läbä immer wider
Spass.
Aber ier wend ja nid vo mim Baschteltalänt im Umgang mit PC
ghöre, sondern vu mim Läbä da. Die letscht Nacht isch ächt
de Hammer gsi, ha doch tatsächlich mis Bett mi ZWEI Hundäli
müesse teile und de Radio (Das isch en Eigeart vom Danny)
isch dasmal au die ganz Nacht gloffe. Dementsprächend hani
am Morge au usgseh (Also nu schlimmer als suscht) ;-)
Ich bi de gäg di 12i mal i d’Stadt und ha eigentlich
welle uf Toronto Island fahre mit de Fähri, aber woni dette
acho bi heds schu 100 Lüüt gha wo agschtandä sind. De bini
halt a de Waterfront entlang gloffe und ha chli umegugget.
Bi de nach ca. 2h Richtig CN Tower gwatschlet und woni dett
gsi bi heds doch dette au wider sovil Lüüt gha (ich bi
sicher, das sind genau die gliiche Lüüt gsi wie vorhär am
Ferry Port). De bini halt chli dur d’Gägend
gschuenet, ha imene Pärkli chli us mim Büechli gläsä, bi nu
einisch en CD (Soundtrack vo Kill Bill Vol. 1) gu
pöschtele, mini alt Schuel- und Lehrterschockierschtätt gu
heimsueche und denn mal wider langsam heizueh. Derheime
acho bini chli i backyard gsässä und ha mis Buech fertig
gläsä und chli Catwomen gugget (ohni Wärbeunderbrächig) und
Steak mit Krokettli gfrässlät.
Wer etz bis am Schluss dureghaltä hed mit läse, dem tueni
etz nu verrate dases nüüi Bildli gäh hed ;-)
Donnerstag 18.08.2005 : Was sölli hüt au so chli schriibe?
Ha schu chli Bedänkä dases dasmal chli en chürzere Bricht
gid. Aber warum nur? Ganz eifach, hüt hani nämli nid grad
vil gmacht. Kei Baschtelarbete, kei grossi Entdeckigsreise,
kei überraschendi Huustierli, rein gar nüd speziell
Ufregends. Ich chönnt ja chli vo minere Rasur verzelle und
dass nüi Chlinge ganz guet z’Bode mögid ;-)
Dementsprächend hani schier müesse de Bluetbank alüüte...
Nei, etz mal im Ärnscht: Nach dere Nacht mit dem
abdreihende Hündeli (ufs Bett, uf mich ufe, a mich
aneranznä, hinder mich aneranzne, de Arschbäse sprich
Schwänzli i mim Gsicht la umewädlä usw usw) hani ächt kei
Energie meh gha zum gross öppis ufrisse...äh äs Bei
usrisse. Ha de demtnsprächend chli pfüüselet, alles chli
gmüetlich agangä und chli mit mim Mämäli g’skypet.
Jaja, und da söll nu eine sägä dass Technik nur öppis für
jüngeri Lüüt sig ;-) So gäg die Eis hani ächt nüme
z’tue gha hie, d’Abwäschmaschine isch usgruumet
gsi, de Bode gsuuget, s’Bad putzt und de Garte
wättersicher verpackt (so wies chuutet hie chunds die Nacht
nu sicher gu rägnä). Also bini chli i d’Stadt gangä
(wie immer) und ha für mis Notebook äs Transporthülleli
gsuecht (sones Neoprengwändli dases nicht verchratzet). Das
glaubsch gar nid i wievil Lädä dass da chasch gah bis öppis
gfindsch, aber im Ändeffekt hani etz ganz äs geils Hülläli
gfunde. Wili grad so i Schtimmig gsi bi und will ich
Armlüüchter natürli uf Toronto au nu äs läärs
Parfümfläschli mitgnu ha, hani mier nu äs heisses Fampür
(pardon Parfüm) kauft. Aber s’Beschte, de Aktione-Adi
hed wider zuegschlagä: Hamer s’Hummer2-Parfüm kauft
und als Bonus heds mit chli nättem Redä und em
Schwiizer-Bonus nu äs Original Hummer2-Cap derzue gäh!! Etz
chani wider fein duftend dur Gägend dufte und i de U-Bahn
wider verdufte und de dufti Ufenthalt gniesse ;-)
Nach dem Shopping-Marathon (jaja, Manne sind halt nid für
so öppis gmacht) bini vor d’City Hall ufenes Bänkli
gsässä und ha ca. 1h i de Sunne i mim Buech gläsä und
d’Lüüt beobachtet. Nachdemi nümme ha möge, bini is
Kino gloffe und hamer „The Island“ ataah. Isch
nid leid gsi und au vom Verschtändnis här hanis guet
mitübercho (ha halt dasmal kei Fänschterplatz gha wie
suscht aligs i de Schuel) ;-)
Nachem Kino bini i rekordverdächtige 21 Minute hie a de
Gamble Avenue gsi, ha chli mit em Tobi „Sindbad
– The Master of the seven Seas“ und
„Coronation Street“ (en änglischi Kult-Serie,
ähnlich wie GZSZ, eifach viiiiiiiiel besser) gugget und
chli mit allne Awesende parliert.
Hmm, so betrachtet hed de Tag doch nu chli öppis fürne
Bricht anegäh und äs ischmer wahrschindli niemert bös wener
nid sooooo vil mues läsä ;-)
Freitag 19.08.2005: Hüt isches ganz en lässige Tag gsi, am
Morge früeh heds eifach nid welle höre mit Blitze und
Dunnere und natürli, wie chönnts au andersch sii, mit
Rägnä. Also isch chli fuulänzä und abhängä agseid gsi. Die
andere beide Schtudäntä sind au nid ume gsi, de Jose #2
isch mit em Bus uf New York und de Tobi isch am Namitag
miteme Cousin ufs Land gfahre ines Feriehüüsli (au Cottage
gnännt). Ich ha chli Huusdienscht gmacht und wos de langsam
ufghört hed mit Rägnä bini au langsam i mini Chleider
inekroche und de mal vorsichtig veruse trampet. Dami, das
hed eim schier überschlägä: 25°C und 98% Luftfeuchtigkeit.
Das isch schier wie im Dschungel gsi. Ha nid bis zum Bus
möge laufe, bini schu pitschenass gsi vor luuter
Feuchtigkeit. Hihi, isch ja zum Glück nid nume mier so
gangä, weni die einte ender beleibte Fraue gseh ha wo wie
Boxer äs Schweisstuech derbii gha hend...
Mit em Bus und mit de U-Bahn bini de einisch wider i min
Lieblingsiichaufstämpel gfahre. Neinei, nid de Mediamarkt
sondern s’Yorkdale Center, das riese Poschtiland. Sit
mim letschte Ufenthalt hendses komplett renoviert und alles
isch nu einisch grösser und heller worde und momentan
beherbärgt das Ding 312 Lädä, agfangä vomene Disneystore
bis zum Apple-Ladä ;-) Isch ganz schön gsi dette chli ume
z’schtrolche und im Apple-Ladä s’nüüschte
Powerbokk us z’probiere (äs Träumli inere
Aluminiumhülle mit allem drinne was das Herz begehrt!). Ha
ussert eme Vanilla Coke gar nüd kauft (und nei, ich ha kei
schottischi Vorfahrä).
Nachdem umeschliiche dette bini mit de U-Bahn wider zrugg i
d’Stadt. S’Wätter isch näbscht de Füechtigkeit
ganz unfründlich gsi, äs hed zwar (nu) nid grägnet aber
irgend öppis isch i de Luft glägä. Ich bi de ine Tim
Hortons inegangä chli gu Charte schriibe und chli gu läsä.
Wos de immer dünkler worde isch, isch de Adili per Pedes
dur d’Bloor Street gloffe und hed nu Märkli für sini
Charte pöschtelet. De bini nu einisch wider ines paar Lädä
ineschtüüret, aber jedesmal wemer us dene klimatisierte
Lädä usecho isch, isches immer schwüler und drückender gsi.
D’Auto sind i de Zwüscheziit au alli mit Liecht
umekarret und das heisst ja glaubi gnueg wie dünklich dases
gsi isch.
Ich bi de nu gli einisch mit de U-Bahn zrugg, ha nu knapp
troche welle heicho. Ha de im Bus vo „minere“
U-Bahnstation heizue nu de Bob atroffe. Mier sind grad
knapp derheime gsi, wo d’Musig losgangä isch. Das
muesmer mal erläbt ha, so eifach verusses schtah und imene
frömde Land ä Gwittersturm erläbä. En Premiere hani au nu
gha, ich ha ä Red Thunder gseh, das isch en Blitz vo ganz
rot lüüchtet – richtig imposant. Wos de immer meh afe
tue hed bini de au ine (ha ja nid welle nass wärdä, weisch
wie lang hätt mis Fääli bises wider troche wär?) Und denn
isch öppis passiert, das heisst, ich bi nu nie sooooo nöch
dra gsi min Läbenstraum erfüllt z’übercho wie hüt:
Für die ganz Stadt Toronto hends TORNADOWARNIG usegäh. Wär
das nid toll gsi, einisch en richtige Tornado dörfe
z’gseh? Leider hani bis etz keine vor de Huustüre
döffe begrüesse und s’Wätter lahd au chli nachä, aber
wer weiss, wer weiss (schlafä ja im Chäller unne wener doch
nu sött en Huusbsuech gu machä...). Jaja, so lauft das hie
;-) Ha de nu am Danny, am Bob und de Schtudänte ihre PC
entwurmt (isch ja wider ganz en geili Süüch ume, chund
sogar de Nachrichte) und dies und das Wünschli erledigt am
PC. Etz tueni chli Fernsehgugge und denn mal luege öbs
öppis Znacht gid, oder öbi mues öppis i Mäc gu erleggä oder
de Pizzabote überfallä ;-)
Vilicht hani aber etz de grad kei Hunger meh, de Levine hed
underem Tisch grad en fette Hundefurz la liggä...
Samstag 20.08.2005: Hüt hani grad gar nüd dure Tag dur
undernuh, äs isch au nid so undernähmigsluschtigs Wätter
gsi. Schwül und heiss, aber kei Sunne, da machts kei Spass
zum furtgah. Bi glich sit em 9ni uf, ha chli mit em Bob
gfuulänzt, mit de Hundäli gschpillt und mit em Bob au nu
d'Chuchi putzt. Nachdem schtränge Huusfraue-Ärbetli bini im
Garte ghocket und ha mis Buech fertig gläsä. Aber irgendwie
hedmer sich nid döffe bewege, suscht isch eim de Schweiss
grad abbegloffä. Hoffentlich chunds nu einisch gu Seiche,
sone füechti, schwüli Luft isch ja nid zum ushaltä (zum
Glück is s’Huus klimatisiert *grins*).
De Sturm geschter isch z’Nacht nu einisch chli zrugg
cho, aber ussert chli Rägä heds nümme vil agrichtet. Die
geschtrig Tornadowarnig isch wie im Film gsi, so en
Laufschrift uf jedem Färnsehsänder während em Programm.
Mier hend au äs paar Überschwämmige gha und de Don Valley
Expressway isch under Wasser gschtandä. Suscht hemmer
glaubi Schwein gha ;-)
Am Namitag hemmer nu welle chli Färnsehgugge, aber leider
hemmer en chlini elektrischi Schtörig, so dasmer
z’erscht die hend welle behebä. Ich sägä üch nume
eis: a) Luegid nie ine Steckdose ine b) fragid üch nid wie
dasmer ohni Ärdig cha läbä c) warum dass en Steckdose brav
2,5mm2-Dräht als Zuleitig hed und d) wie dass de ganzi
elektrischi Zauber uf Änglisch heisst. Mier sind de afig
sowiit cho, dass irgendöppis fuul mues sii, statt 110V
hemmer nume 83V uf de Steckdose gha. Komisch, komisch. Da
ich ja nid grad läbensmüed bi und mier au s’passende
Wärchzüüg fählt hani das de Danny la machä. De Bob he de
nume gmeint är sölli a) mal äs T-Shirt aleggä, oben ohne
gsäch chli komisch us wenn s’CSI (Crime Scene
Investigation) chäm und b) öber Epileptiker sig, nur füre
Fall daser denn wüssi wener am „Pfuus“ hangi.
Uf alli Fäll chund morn en „professionelle“
Stromer, was das au immer si mag (vilicht so eine mit
Gummistifel und 1000V-Antielektrohändsche, mit Helm und
Overall ;-) Mal luege, bi ja schu ganz gschpannt...
Am Abig bini nu i d’Stadt abbe gangä gu s’Kino
(jaja, schu wider, ich weiss) heimsueche. Geschter sind äbe
nüüi Film usecho: Red Eye, Supercross, Four Brothers, Deuce
Bigalow etc. Ich ha mich de für Red Eye entschide –
chani au nume empfählä, sehr scary, sehr unterhaltsam und
mit enere überraschende Schauschpileri. Obwohl,
d’Vorschaue uf die im Herbscht kommende Film sind au
nid ohne gsi: The Fog, Doom...(zum Glück hends i
s’Liecht nu nid abglösche gha, suscht wärid de öppe
äs paar Sässel nu nass worde...aso wenns de mier schu
schier fürchtet...).
Nachem Kino bini nu chli an Nathan Philipps Square as
Wasser zum Springbrunne gsässä, ha d’Seel la baumele
lah, bi mine Gedankä nachghanget und ha chli die tuusige vu
Liechtli a de Skyline bewunderet. Einmalig sägi da nume...
Ufem Heiwäg hed de mis Sälbschtvertruue schu chli en Knacks
übercho. Ich stah so ufem Bahnsteig vu de College-Station,
schön wie sich s’ghört näbem Güselchübel (pardon
Recycling-Center) und warte ufe Zug (Hie nu en Gheimtip für
alli Reisende: Immer näben Güselchübel heds meischtens
Platz zum locker leicht und fröhlich schtah und meischtens
schmöckt de Güsel um einiges interessanter als die meischte
Mitreisende *grins*), trampe vu eim Bei ufs andere und
luege chli d’Lüüt a wo chömid. Du chund plötzli Eini
und Einä d’Stägä ab. Ja, ich gibs ja zue, sie isch
nid leid gsi, drum hani au äs Aug riskiert und mier hend de
prompt eine uf Blickkontakt gmacht. Sie luegt wäg, ich
luege wäg, 10 oder 15 Sekunde später luegi numal und
plötzli chund sie uf mich zue z’laufe – ich
schu dänkt: JACKPOT, BIG DEAL! Ich ha grad nu en Schritt uf
d’Siite mache chönne, füllt das hübsche Ding doch
grad de 110 Liter-Güselsack *amUelrichrüef* näbe mier.
Heilige Cheib, was söll ich etz dervo haltä? Also, ich
weiss ja schu dasi nid grad meh de Hübschischt bi oder so,
aber was z’vil isch, isch z’vil...Hauptsach de
Schueh isch nid dräckig worde *grins*
Suscht isch de Heiwäg eigentlich gli verbii gsi und nu
gliner bini schu wider am Schtubetisch ghöcklet und ha
s’Erläbti niedergschribe und nu gliner gani nu i
d’Heia...oder ufs Klo ;-)
Sonntag 21.08.2005: Och ja, wo sölli hüt afah mit verzelle?
Hmm, fange glaubi mal mit de Nacht a: D’Dakota hed
mal wider mit mier eis Bett teilt, das isch nid leid gsi,
ha mal schön warmi Füess gha *grins*
Bi so gäg di 9ni ufgschtandä und hamer mal drüü Tassli vom
Bob sim lugge Morgekaffee gönnt, das Gschmeus isch nid
unbedingt als Wachmacher dänkt, aber beschlüüniget gwüssni
Verdauigsfunktione enorm ;-)
De Bob hed üs de Zmorge bröötlet (Späck, wissi Bohne und
Spiegeleier) und i de Zwüscheziit hani mal wider mit mim
technikbegeischterete Mamäli chli gskypet. Nachem Zmorge
hani de nu einisch die zwiifelhafti Ehr gha zum öppis
umebaschtlä und en ganz en geile Job gfasst: Wie ier ja vo
letscht Jahr nu wüssid, heds hie ca. 527 Färnsehsänder.
Doch das isch glaubi nid gnueg, de Danny hed en zweite
Chopf für sini Satelliteschüssle organisiert, so dases etz
ca. 1'000 Sänder söttid si. Doch de gueti Maa hed kei Ahnig
gha wiener das zweite Empfangschöpfli söll montiere,
verkablä und i die beschtehend Aalag integriere, immerhin
heds hie im Huus 5 Receiverstatione, ufteilt i zwei Gruppe
und und und. Zu allem Übel hed das Erwiiterigspäckli ussert
eme Bund Koaxkabel und zwei Splitter kei Aaleitig derzue
gha. Also hani mal wider eini uf Tim Taylor (aka der
Handwerkerkönig) gmacht. Stellid üch de Adi im Hämli, i de
Underhosä und barfuess i de Schueh inne ufere
Alu-Bockleitere vor wiener 5m über Bode amene Bell
ExpressVu-Satelliteschüsseli umemechet und das am
hochheilige Sunntigmorge (obwohl, geschter Samschtigabig
hani i de nöchi vom Eaton Center nu 10 Lüüt gseh imene
Nüübuu inne Komprässerä)! Aber d’Ussicht uf
d’Gamble Avenue isch nie besser gsi, wenns nur nid so
g’windet hätt ;-) Aber de Adi hed das vorbildlich
glöst, Alles hed grad bim erschte Mal funktioniert, obwohls
uf dere Leitere öbe glich Überlegigsarbet koschtet hed wie
ächt all die Kabeli müend g’schtöpslet wärdä. Und nu
öppis hani feschtgschtellt: Wenn üch de Spezialischt mal
wider seid dases langwierig und müehsam und nur füre
Techniker sig zum so Satellitesache iirichte, denn
vergässid das gli wider, das huere Gschmeus isch ja so
öppis vu nid heikel, anderscht chani mier das nid erklärä
dass chli rüttle und schruube a de Satelliteschüssle kei
Uswirkige uf d’Qualität vom Bild gha hend (ussert die
heigid so fetti Mikrowällä dases egal isch wohii dass die
Schüssle zeigt – etz womers überleggä, warum hani
plötzli nur nu so wenig Haar ufem Chopf?)
Aber easy, au das isch duregangä und alli sind
z’fride gsi. Gäg di 11i isch de nu dä Hadley verbii
cho, am Bob si Kumpel. Mier hend chli gredt und de isch de
Adili so gäg die Eis mal Richtig Ferry Dock (de Fährihafä)
verschwunde. Ha hüt bi dem stürmische Wätter (windig, aber
so wie wenns bi üs föhnig isch) uf Toronto Island welle. Am
Fährihafä isch de au de Tüüfel los gsi, aber de Adili isch
schnell dure gsi (oder weiss eine vo üch was
„Closed“ heisst? Also ich ha das eifach nid
chönne übersetzä und drum bini gu fragä *frechgrins*). Ich
bi de uf d’Fähri nach Hanlans Point und bi vu dette
Richtig Ward Island gschumplet (sind ja nume 5,75km, und
das alles uf mini Plattfüess). Äs isch eifach herrlich gsi
oder wies de Bob würd usdrücke: „Oh well, it was so
fuckin’ wonderfull!“. Ha diversi Föteli gmacht
und bi de uf Center Island ufenes Bänkli ghocket und ha
eifach nüd gmacht, nume d’Sunne gnossä und de Chopf
la lüüfte ;-) Irgendwenn bini de wiiter und plötzli hed de
Adili äs komischs Schidli gseh: „Warning, Disc Golf
Area!“ Was de Geier isch ächt das Nüüs? Ha de das nu
gli einisch usegfundä: Das isch wie Golf, eifach mit
Frisbees. Uf de Insle heds verschidnigi Bahne (ähnlich wie
Löcher ufeme Golfplatz) und s’Ziel isches sin Frisbee
mit möglichscht wenig Würf is Ziil z’bringe
(s’Ziil gsehd us wiene Güselchübel wo ufem Chopf
schtahd ). Isch nu luschtig zu z’luege gsi, aber de
schtarchi Wind isch chli unberechebar gsi, mänge Frisbee
isch ender als Passanteschreck denn als Zielfinder
duregangä ;-)
Ich bi de uf Ward Island rächtziitig itroffe um mit de
Fähri chönne zrugg z’gah und bi de nu chli dur die
ender ruhig Stadt gschtrolchet. Bi de per Zuefall nu anes
Filmset anegloffe. De Sänder CBS hed en
Dokumentation-Drama-whatever dreihet, wo am Ändi vom WW2
(2. Wältchrieg) in London spilt. Isch nu interessant gsi
zum gugge ;-)
Ich bi de langsam müed gsi und nu rächtziitig zrugg gsi zum
de Profistromer (man vergleiche den Bericht von gestern)
z’bewundere: En Griech wo probiert hed das ganze
Gschmeus zum laufe z’bewegä. Chöschtlich säge ich
üch. Uf alli Fäll chund morn nu Verschtärchig mit ihm mit,
är heds nicht chönne fixe, hihi. Das heisst ich mues am 8i
wohl oder übel ufgschtandä sii, will d’Hauptverteilig
näb mim Bett isch :-( Aber mal gugge, uf alli Fäll hani en
Logeplatz zum gugge und das isch d’Hauptsach.
P.S. Luegid mal d’Photeli a, äs lohnt sich...
Montag 22.08.2005: Soso, hüt isch wirkli nüd mit schlafä
gsi, da ja am 8i de Profistromer wider hätt müesswe
uftauche (mit Betonig uf hätt, aber das verzelli de am
Schluss). Ich bi de schu am halbi 9ni zum Huus us
gschtiflet und ha mich i dä Rushhour-Mängi gsuulet. Am
Punkt 9ni bini bereits i de Unionstation gsi und dette de
übere Sky Walk Richtig CN Tower gwatschlet. Am CN Tower
acho bini locker um die hunderte vu Pauschaltourischte
umekroche und ha mich diräkt vor de Kasse poschtiert. Nu
schneller bini schu ufem Wäg nach ufe gsi. Mis Ziil isch
hüt nid s’Observation Deck uf 327m gsi (das hani schu
letscht Jahr gnosse) sondern de Sky Pod uf 447m. Dami, isch
schu Hammergeil gsi, die Ussicht und sooooo wenig Lüüt (die
sind natürli alli nu dunne gsi). Ich ha bis uf Hamilton (i
de Nöchi vo Niagara Falls gseh) und sogar d’Küschte
vu de USA hani hüt gseh. De Sky Pod hed unne schrägs Glas
und meh cha, wemer ganz a d’Abschrankig anetruut
quasi ganz nach abe gugge. Gwüssni Lüüt sind ganz
verängschtiget am Turm nachgschliche und hend gar nid a
d’Abschrankig usetruut...Warum wohl? Ich ha de nu äs
chlises Filmli dreihet, langet aber nid fürne Oscar.
Ich bi de nacher mit em Lift wieder uf s’Observation
Deck abe und ha nu chli Föteli gmacht. Au vu dette bini de
wider ganz abbe und dusse hend sich d’Lüüt gschtaut.
Wie heisst so schön hie: „The early bird catches the
worm!“ Mittlerwiile isches halbi 11i gsi und de Tag
isch nu lang. Also bini näbem CN Tower zum Rodgers Center
gloffe und ha ganz spontan en Tour buechet. Jaja, hüt hani
eine uf Hardcore-Tourischt gmacht. Die Tour isch etz ächt
de Hammer gsi, mier sind inere 18er-Gruppe durs ganze
Center gschuenet und hend vu de Umkleidekabine bis zur
Firmenloge ALLES agluegt. Und was ganz speziell Genial gsi
isch: Mier hend ufs Fäld abbe döffe, das isch eigentlich
nur möglich gsi, wills grad am umschtelle gsi sind vo
fvootball du Baseball. De Rase (oder wiemer dem wott sägä)
isch au ganz speziell, en Art Gummirasä aber s’Gfühl
isch wie ufem Rasä hinderem Huus gsi. Sone Tour isch wirkli
empfählenswärt *daumenhoch*. Au vu dem Ort gids äs Filmli.
Nach dere Tour isch de Adili nu amene wiitere Mysterium vo
Toronto uf d’Schlich cho: The P.A.T.H. Hami ja schu
lang gfragt was die komische gälbä Linie uf mim Stadtplan
bedüütid. Etz weisis au. D’Stadt Toronto hed
s’gröschte unterirdische, durchgehende
Iichaufszentrum vu de Wält mit ca. 1'200 shops und 500
Restaurants und enere Längi vu 27km. Das heisst, mer cha
schier under em ganze Down Town vu Toronto shoppe.
S’Einzige womer mues mache, isch dene komische Tafele
folge. Me chund derbii vu Huus zu Huus, dur Gäng und über
Rollträppä immer wider a anderi Ort. Das isch ächt de
Hammer.
Nachdemi nu d’Geschenke für Bob und Danny pöschtelet
ha und en Bsuech imene Burger King gmacht ha, bini heizue
und ha uf de Terasse chli gläsä. De Stromer isch au grad
just zuechegfahrä woni heicho bi. Das isch ender en geili
Sach gsi, hihi. De hed ca. ä Schtund probiert d’Dräht
uszwächslä, doch de heder ufgäh. Är hed denn eifach en nüüi
Steckdose inegmechet und ca. vier Löcher i d’Wand
gschlägä zum s’Rohr gfinde. Die Löcher heder denn
grösszügig mit HILTI-Schuum usgschüümet. Zueschtänd wie im
alte Rom :-O
Nachem Znacht hani nu schnell müesse mit em Danny zum
Robert gu sis nagelnüüe (äs hed nu Folie druffe gha, so nüü
isches gsi) Laptop agugge und s’Problem mit em Office
fixe. So geil, etz chaufi mier denn nu äs Stethoskop und
fertig isch de PC-Doktor.
Etz gani de au langsam is Bett, das heisst z’erscht
machi de mal wider a de Hundäli klar wer de Herr vom
Furzchüssi isch. Ich kännä da en gemeine Trick, da
verschwindt jedä Hund vo mim Bettli...Oh nei, das isches
nid...Ohohoh, au das isches nid! De verrati de mal spöter
;-)
Dienstag 23.08.2005: Heieiei, etz isch de mi Ufenthalt schu
gli dure. Die Ziit isch aber au soooo schnell verfloge
dases eim schu schier übel wird i Spiegel z’luege:
Ich weiss de nid öbi schu graui Haar übercho ha –
kleiner Scherze am Rande – Ich ha ja gar kei Haar
meh, hihi. So fertig luschtig, d’Lüüt wend ja wüsse
wasi hüt so tribe ha.
Am Morge hanis laaaaaaaang im Bett gnosse und nu
lääääääääänger bini deheime umeghänget. Ha irgendwie kei
Luscht gha zum abschtifle. Ha mit em Mamäli nu äs längers
Skypofon gmacht und ha mich über d’Laag i de Schwiiz
la informiere. Ha natürli au d’Tagesschau und 10vor10
ufem Läppi gugget. He Guys @home, hebid d’Füess
troche...
Ha de nu chli mis Gepäck sortiert und mi Körper mit ärä
Duschi verwöhnt ;-) Woni de Ändli mal us de Bäärehöhli
ufecho bi hani vertruuti Grüüsch us Richtig Färnseh ghört:
En Stimm mit öschterichischem Akzänt – unverkennbar
de Arnie. Aber was s’Geilschte gsi isch (Achtung en
Insider!!): „Speak to the hand!!!!“ Thx Arnie,
you made my day! De Hadley hed äbe grad „T3 –
Judgement Day“ ufem Movie Network gugget.
Ich bi de so gäg die Eis mal richtig Down Town abgfahrä und
bi de nacheme längere Spaziergängli im Paramount Cinedom
(mim Lieblingskinopalascht) itroffä. Leider hend die
beschte Filmli schu agfängä gha, drum bini use und im
gliiche Gebäude i Chapters Buechladä ine und dette i
Starbucks ghocket (isch nu geil, jede Buechladä hed en
Starbucks dinne, de chamer Büecher gu holä und probeläsä
zumene Kaffee). Ha de mies Buech nu fertig gläsä und woni
fertig gha ha, hani mier au nu schnell en Fluglektüre für
Heizue gholt. Nid frage, äs isch mal wider äs englisches
Computerbuech (Cha doch aligs nid widerstah ;-)).
Nacher bini de gliich nu is Kino und ha mier quasi als
Abschiedsgschänk de „Batman begins“ gönnt.
Jaja, ich ghöre schu d’Kritiker wo sägid: „Aber
de isch bi üs schu lang dure...!“ Aber sicher doch
und alli hend ne ja schu gseh, aber ich, ich ha de Film im
IMAX gugget!! Stellid üch mal vor, de Film ufere Liinwand
wo vu unne bis obä 12m isch und i de Breiti 24m hed....ich
säge nume: „Mittendrin statt nur dabei...!“
Nachem Film bini de heizue gangä und bi grad rächtziitig
zum Znacht cho. Ha de nachem Znacht nu chli Tagesschau und
10vor10 am iBook gugget und mich über die nüüschte
Ereigniss la informiere.
Mittwoch 24.08.2005: Sodele, etz ischer da de Tag woni
eigentlich gar nid so schnell erwartet ha: De letschti Tag
hie a de Gamble Avenue in Toronto. Hmmm, wett ja gar nid
wäg hie, isch so öppis vo friedlich und entspannend gsi,
interessant und heimelig, churz gseid: Lönd mich da :-(
Aber s’Läbä gahd ja wiiter und etz wartid uf mich ja
nu vier Tag New York. Irgendwie freui mich uf New York,
andrersiits wetti au nu chli da bliibe.
So, gnueg Gfühl zeigt, etz gahds a letschti Bricht us
Toronto: Hüt hani chli pfuused, chli mini Waar gwöschet,
chli Hundehaar sortiert, chli umegfuuled und und und, halt
alles womer ei Tag vor de Abreis macht ;-)
Am Mittag bini de nu äs letschts Mal i d’Stadt, chli
durs Eaton Center gschliche, vor de City Hall chli
Starbucks Coffee gnosse (natürli mis Lieblingsgetränk:
Frappucino Caramel Blend with Cream, Size Tall), chli Buech
gläsä und s’Drumherum gnosse. Bi de nu chli gu
Konzärt losä und de Frischwaremärcht gu beschtuune vor de
City Hall. Alles in allem sehr friedlich und entspannend.
Nacher bini de nu einisch d’Bay Street duruf- und
d’Yonge Street durabgloffe (chli trainiere für New
York isch immer guet). Ich bi de nu gli vor de Rushhour
heizue und ha die letscht Fahrt mit de U-Bahn und em Bus
nid grad gnosse...will äbä, isch ja s’letschte Mal
gsi. Ha de ufem Heiwäg am Bob nu 24 Büchsli Pepsi poschtet,
är hed ja das soooo gärä.
Nacher isches de as Packä gangä, wemer wott i
d’Staate reise bruuchts halt chli Vorbereitig (nid
dasi nu als Osama-Symphatisant uffallä, weni de
Nagelknipser vergisse zum Neccessaire us z’näh).
Ich ha eigentlich nu welle dankä sägä Allne wo mini
Brichtli gläsä hend, en Kommentar derzue abgäh hend und
mini Bildli agugget hend. Danke Publikum, danke.
Ich weiss n u nid wie dases usgsehd in New York mit em
Internet, drum chani au n id versprächä dasi jede Tag öppis
cha is Blog schriibe oder Bildli ufetue. Söttis wider
erwarte für mich kei Möglichkeit gäh füre Internetzuegang
(au nid mit Bschisse), denn versprächi dasi alles vo
Däheimä us de tue manage und online stellä.
En letschte Gruess us de Gamble Avenue, Stammplatz
Chuchitisch vom Webmasta aka Rotkäppchen aka Sohnemann aka
Bröthili aka Schtinker aka Bürofurzer II aka Der Mann mit
dem schwarzen Colt...äh Mitsubishi