Reisetagebuch New York (25.08. -
28.08.2005)
Donnerstag 25.08.2005: Eigentlich isches ja en truurige Tag
gsi hüt, de Adili hed de Bob, de Danny und natürli au
d’Hundäli müesse verlah (obwohl vu de Hundäli hani nu
tuusig Souvenier übercho – Häärli). Ich ha relativ
früeh ufmüesse, dami ich ja rächtziitig bim Flughafä gsi bi
um die ganze Prozedure über mich la ergah. De Danny hed
mich de am 6i am Flughafä abgliferet und dette hani mi Fido
pack tund bi mal i die Abfertigungshalle inebeindlet.
De hani schu s’erscht Mal schräg gluegt: Ichecke
hedmer sälber müesse a so komische Maschine. Verdammt,
gfind mal z’erscht use weli Informationen dette
muesch i de Apparat inechnüüble, vorallem wenn nu sones
Papier-Magnetstreife-Ticket hesch. Mit vil flueche hanis de
au nu gschafft. Denn isches dra gangä de Frageboge für
d’Homeland-Security us z’fülle. Nachdem mer das
alles gha hed, hedmer döffe ä Schalter gu sis Gepäck und
sich ufgäh. Dette hedmer de Goffer aber nid chönne uf
s’Band schmeisse, nei, mer hed de Cheib wider müesse
mitnäh und isch zur Abfertigungs- und Befragigshalle
(nacheme wiitere Checkpoint) cho. Dette hedmer döffe
aschtah und warte, und warte und warte. Womer de a de Reihe
gsi isch, ischmer zumene Beamte vu de Homeland-Security
gschickt worde. Dette hedmer de ganzi Plunder mal anegleid
und gwartet. Leider bini ja Schwiizer und ich hätt nu eis
Formular meh müesse usfülle. Also das Formular gschnappet
und imene Egge wider usgfüllt. Wo de das gschafft gsi isch
hani wieder döffe aschtah und warte. Denn äntli hani wieder
a sone Schalter döffe. Ha dette mis Plünderli (Pass,
Frageboge, Visa Waiver, Tickets) wider amene (näättä?) Herr
gäh und mich la befragä. Wo’s de glaubi guet gsi isch
hani vom lingge Zeigfinger und vom rächte Zeigfinger nu en
Abdruck müsse mache und ine Kamera (Marke Logitech) lächlä.
Hihi, mit mine Fingerabdrück chönds glaubi nid vil afah, ha
doch chli trochnigi Huut gha und dementsprächend fählt chli
öppis...
Är hed de 4 Stämpfel gmacht (eine i Pass, eine ufs Billet,
eine ufs Visa Waiver und eine ufs Visa Waiver Abschnittli)
und das wars. Nachdem das dure gsi isch, hedmer wiiter
chönne i d’Gepäckabfertigung. Meh hed dette si Goffer
müesse sälber! Ufs Band rüehre, nachdem de us de
X-Ray-Maschine cho isch :-o Bi mier isches mal nid wider so
eifach gangä, ich ha nu zumene Spezialtescht gah. Sone
Tante hed mich wieder mitgnuh und nachdem ich de Goffer
ufenes Tischli ufegwuchtet ha, hed sie mit eme Staubsuuger
und eme Lumpe bewaffnet min Goffer gsuuget (ischmer ja au
rächt gsi, denn sind d’Hundehaar au verschwunde). Sie
hed mit dem Tescht nach Partikel vu Sprängschtoff gsuecht.
Leider hed sie nüd gfunde und ich ha chönne mit minere
Atombombe im Gepäck de Tescht verlah ;-) Nachdem hani de
Goffer döffe nu einisch sälber ufs Gepäckband schmeisse und
denn wiiter zur Personekontrolle. Dette hends de nu
s’Handgepäck usenand gnu und mich dure Metalldetektor
la spaziere, aber das isch afigs Routine. Denn isches
überschtandä gsi *freufreu* Ich ha de nu chli döffe warte
und denn pünktlich am 9.15 isch de Bomber abghobä. Ich ha
en Fänschter platz gha und ha de Flug richtig gnosse. De
Aflug uf New York isch saumässig kompliziert: Mer flüügt
z’erscht is Meer use, denn über Queens, denn um die
ganz Manhattan Insle ume, denn wieder über s’Meer und
denn am Schluss nu einisch über Queens bismer schliesslich
in La Guardia landet. D’Ussicht isch genial gsi, me
cha das schier nid beschriibe. Womer de glandet gsi sind
heds wider gheisse warte und Geduld ha, will kei Slot zum
parke frii gsi isch. Nachdem üse Flüüger denn chli spöter
au en Parkplatz gfunde gha hed hemmer döffe de heiligi Bode
vu de USA beträtä (Ich has de underlah wie de Papscht aligs
de Bode z’küssä, isch halt chli schmuddelig gsi).
Ohni Zollkontrolle (isch ja schu in Toronto gmacht worde)
bini de zügüg zum Gofferband gangä und ha dette uf mis
Göfferli gwartet, und gwartet und gwartet. Nach langem isch
de Goffer cho und churz drüberabä hends mier das Band
abgschtellt. Ich weiss ja nid was mit dem Goffer gangä
isch, uf allki Fäll lüüchtet är während de Nacht...
Etz hed eigentlich nur nu eis gfählt: En Möglichkeit zum is
Hotel z’cho. Ich bi de zum Ground Transportation
Service und ha dette en nätti jungi Dame aghaue öb sie mier
chöng behilflich si, ich sig s’erschti Mal da und und
und und. Ganz überraschend fründlich, hilfsbereit und nätt
isch sie gsi und mier hend üs guet verschtandä ;-) Sie hed
mier denn äs Shared Shuttle organisiert, das isch en Van wo
öppe 10 - 12 Lüüt inepassid, wo die einzelne Hotel diräkt
afahrt. Ich ha de nu chli müesse warte und ha Ziit gha
d’Lüüt chli z’schtudiere. De Vogel hed schu die
eint abgschosse, ihre Flüüger isch vu Kentucky cho:
Turnschlappä, 3/4-Hose, T-Shirt, en Strohuet ufem Chopf und
en Gang druffe wie de Jon Wayne himself (oder wie wenn sie
diräkt vom Brazilian Waxing chämt) - sones richtigs
Farmergirl. Zum schiesse sägi üch. Ich ha mier de nur
vorgschtellt dass de Alt derheime nui Hüehner hed und mit
de Schrotflinte Type tued verschüüche wo bi ihre chli gönd
gu fänschterlä...
Mi Van isch de au churz drüberabe cho und ich bi de zu mim
Hotel verfrachtet worde. Also was mier chli komisch vorcho
isch: Das Land hed Hightech-Waffä und nu vil meh, aber
d’Autbahne sind ächt en Graus. Löcher und Löcher,
Wällä und Wällä...zum Glück isch üse Fahrer Panzerfahrer
gsi im erschte Golfchrieg, de hed das locker gschafft.
Bim Hotel acho bini de usegrüert worde und ha die $15 für
d’Fahrt zahlt und am Fahrer nu $5 Trinkgäld gäh (die
Lüüt hie läbid äbä vu de Trinkgälder, nid so wie bi üs).
Denn icheckä und ab is Zimmer. S’Zimmer isch nid
leid, gfallt mier nu irgendwie, au wenn d’Ussicht nid
de Traum isch ;-)
Ha mich de schnell igrichtet und bi schu churz drüberabä
ufem Wäg zum Madison Square Garden gsi. Also, ich weiss ja
au nid, ich has ja schu gärn chli städtisch und nid ganz so
ruhig, aber hie isches sogar mier chli z’vil uf
einisch...Ha mi schier am Afang chli überforderet gfühlt!
Me mues das glaubi z’erscht Mal sälber erläbä wie die
Stadt uf eim wirkt, suscht chamer das nid nachvollzieh. De
Kontrascht zwüschet de einzelne Strassezüüg und die Lüüt
und und und, eifach gigantisch. Auto huupid, vil Verkehr,
Lärm und schtinke tueds hie teilwiis so öppis vu grässlich.
Obwohl, weni etz en Ranglischte vu de Städt woni schu
bereist ha müesst ufstelle, denn würd die so usgseh: 1.
Vancouver, 2. Toronto, 3. New York, 4. London, 5. Rom, 6.
Paris.
So gnueg vu dem, d’Lüüt wend ja nu öppis läsä. Ich i
de am Madison Square Garden i Undergrund abbä, ha ja
schliesslich mal welle wüssä wie die Subway funktioniert.
Ha de ä Metropass glöst, das heisst me zahlt amene Automat
$10 und chund äs Chärtli über womer 6x cha fahrä, me spart
also 20% (ei Fahrt isch, gliich wohii, $2). Bi de nacher
grad i erschti Zug ine und mal Richtig Downtown gfahrä.
Dette bini i de Nöchi vom Ground Zero wider usecho und ha
mier de Platz au nu z’Gmüet gfüehrt. Isch eigentlich
schu Wahnsinn, ufere Flächi vum12 Fuessballfälder eifach äs
Loch. Schu nu idrücklich und au nachdänklich stimmend. Ich
bi de wiiter gloffe ufem Broadway Richtig Battery Park, ha
chli d’Sunne gnosse und vo dette bini de i
Finanzdistrict a d’Wall Street. Vo dette a bini ufem
Broadway durufgloffe und gloffä und glöffä und bi de
Brooklyn Bridge hani gfunde dasi au die nu chönnt
beschtiige. Ich bi de schier bis uf die ganz ander Siite
gschuenet und ha geili Pics chönne machä. Isch allerdings
au sauschträng gsi. Ach ja, New York isch de alles anderi
als flach ;-)
Vo dette bini immer nu am Broadway nachä bis zu mim Hotel
gwatschlet, hamer nu öppis z’trinke kauft imene Ladä
und bi de völlig kaputt is Hotelzimmer gschliche. Dette
hani nu chli Färnseh gugget und am 7ni hed de Annä de
Schirm zuegmacht und hed bis hüt am Morge dureknurret.
Freitag 26.08.2005: Nachdem ich am Morge so schpat
verwachet bi und nu z’erscht mis Brichtli gschribe,
düschelet und mich expeditionsfertig grüschtet ha, bini mal
de Nöchi nacha, will heisse ich bi zum Empire State
Building (isch ca. 6 Blocks) vu da Wäg) gloffe, i de
Hoffnig dette ufe z’chönne. S’Empire State
Building isch das im Momänt höchschti Gebäude vo New York,
dem emtsprächend isch aligs au de Aadrang. Ich has ganz
guet breicht, bi nämli nume 15min unne agschtandä und 10min
obe. Äs gäb Täg womer insgesamt bis zu 4h Schtunde heig
bismer überhaupt dobe sig! Natürli heds au wider die
eigenartigä Sicherheitsteschts gäh, sogar s’iBook
hani müesse alaah...
Mier isches immer nu äs Rätsel wie dass s’Elektrische
i dem Huus funktioniert, denn anschtelle vo Rohr oder Kanäl
leggid/hänkid/murgsid die eifach d’Kabel und Dräht
chruz und quär dure Ruum. Ich wundere mich ab sofort nümme
wenns wider en Blackout oder en Wohnigsbrand söll gäh. Ich
bi de mit em Lift is 80th Stockwärch gfahrä, dette hedmer
wieder en Schlaufe müesse laufe und vu dette isches de nu 6
Etage ufe gangä. Dobe acho isches schu nid leid gsi zum
umegugge, wemmer allerdings en Platz am Gitter hed chönne
ergattere. Ich bi de rundume gloffe, ha d’Ussicht
gnosse und ha Föteli gmacht. Nachdemi alles gseh ha bini au
wider abe, au für das hedmer müesse aaschtah. Ganz dunne de
vil Ufregig: Uf de anderer Strassesiite Polizii, Füürwehr,
Ambulanz und Färnseh. Was isch ächt das was? Flugs schnell
gfragt und en Antwort übercho: Zwei vu de Hauptdarsteller
vo Sex&The City (s’rothaarige Lockechöpfli und en
Herr, weiss doch die Näme nid, isch halt kei Manneserie)
hend irgend en Kampagne für d’Hilfsdienscht vu de
Stadt understützt. Leider heds nid zumene Foteli glanget
;-) Ich bi de Richtig Broadway und vu dette durufgloffe
Richtig Times Square. Am Times Square hani z’erscht
mal müesse die vili Liechtli gniesse, i diversi Lädä ine
stächä und eifach eine uf Tourischt machä. Ich bi de wiiter
duruf gloffe und nacheme Ziitli im Central Park acho. Me
glaubt’s chum, chli i Park inelaufe und schu hedmer
s’Gfühl mer sig irgendwo, nur nid inere Grosstadt.
Sehr erholsami Wäägli, Raseflächene, Wald und Bäum, Seeä
usw. Au Tier heds ä Mängi, agfangä vo de Tuube übere Spatz
bis zum Eichhörndli. Nachdemi de Central Park bis ur Hälfti
durquert, bini use und unf de Siite wider durabgloffä,
immer a de 5th Avenue nachä. Dette sind au die beschte Lädä
und so Hüüsli wie Sony Wonderland, Nike Hall, Trump Tower
etc. Ich bi de durabgloffä und ha gluegt dasi uf die 5i
wider im Hotel bi. Im Hotel acho hani mich de frisch gmacht
und ha am 6i schu wider müesse ablaufe, ha ja ä Verabredig
gha mit de Simona, am nätte Bündnermaitli woni a de
Sprachschuel in Toronto känneglehrt ha. Das sind schu afigs
Sachä, machid zwei Schwiizer in New York ab, Egge 34th
Strass und 7th Avenue. Und siehe da, me hend üs i all dene
Lüüt inne troffä. Mier sind de mit de Subway uf Little
Italy womer d’Cousine vu de Simona, d’Raphaela
troffe hend. Gmeinsam simmer de dur Little Italy gloffe und
hend imene lauschige Hinderhof-Garte Znacht gässä. Nachem
Ässä simmer denn Richtig Canal Street gloffe und dette uf
s’Pier 17 (en Art en Vergnüegigstämpel mit Bars und
Food Corners) ufe gloffe und hend dette chli
d’Skyline vo New York, de Wind und d’Luft
gnosse und chli plauderet. Ich sägä üch, die Ussicht ufe
Hafä mit de Statue of Liberty, de Skyline oder au
d’Brooklyn Bridge: Eifach Wältklass! Irgenwenn simmer
de au wider zrugg gloffe und nachdem ich vu de Raphaela nu
mim Wäg hei erklärt übercho ha (numal Merci, ohni Dich
würdi etz nu vorem Plan schtah und Bahnhof verschtah
*grins*) und mier üs verabschidet hend, bini mit de Subway
au Richtig Hotel gfahrä. S’System vu de Subway isch
äbe äso. Me mues luege weli Nummere das bi de Station womer
anewett ahaltät. Usgehend vu dere Nummere lueg mer weli
Nummere das d’Startstation afahrt. Wenns nid die
gliich isch, muesmer uf de Strecki usstiige und i die ander
Nummere umstiige (äs gid drum express trains und local
trains, wobii d’express trains nid alli Statione
afaahrid). Damit mer möglichscht schnell a sis Ziil chund,
tued mer luege dasmer erscht so schpat als möglich ine
local train umstiigt. Isch eigentlich genial, nur mues eim
das z’erscht öppert erklärä (oder vilicht bini ja
eifach z’dumm derzue ;-)) Uf alli Fäll hani bini de
im Hotel acho und chli kaputt is Bett gflogä.
Samstag, 27.08.2005: Hüt am Morge isches chli länger gangä
mit ufstah, ha chli en unruhigi Nacht gha, d’Polizii
hed i de Strass vorem Hotel dure die ganz Nacht Absperrige
abgladä. D’Strass wird am Sunntig gsperrt, warum
weiss eigentlich keine so richtig. Anyway, ich bi de Mal
usem Zimmer usekroche uf mine Plattfüess und mal Richtig
Flatiron abgwatschlet. S’Faltiron wird vu de New York
äs Huus gnännt wo eigetnlich jede schu mal i sim Läbä gseh
hed: Das isch en drüüeggigs Huus wo a de Egge 5th Avenue
und Broadway staht und will de Broadway d’Insle
Manhattan diagonal durlauft isch das Huus halt drüüeggig.
Vo dette a bini mit de Subway Richtig Down Town Manhatten
underwägs gsi, also äs isch ender bim Versuech blibe, da a)
Samschtig gsi isch und b) relativ vili Sperrige wägä
Buuarbeite vorgnuh worde sind. Ich bi de entnärvt nachere
halb Schtund bi de City Hall usgschtige und dette i Park
ine gloffe. De Brunne wos dette hed wird nu mit Gasliechtli
belüüchtet, au das isch en foti wärt gsi. Ich bi grad
schier zum Park usegschuenet, da laufi anes Plakat ane:
„Sit out, go in!“ Hmmm, etz chamer tatsächlich
umesuscht i dem Park (und nu i 9 wiitere Parkalaage in Down
Town Manhattan) via WLAN ufs Internet. Ich natürli grad mis
iBook uspackt und ab ufs Internet. Woni so am umesurfe gsi
bi, isch en Herr z’laufe cho und hed interessiert
nachem iBook gfragt und so simmer is Gschpräch cho. De Alex
hed ganz interessanti Sachä z’verzelle gwüsst: Daser
i de Schwiiz als Ustuuschschtudänt gsi isch, daser imene
A-Team bi de Green Berets gsi isch, daser im Desert I (bi
üs au bekannt underem Name Operation Desertstorm 1991)
verdeckti Operation duregfüehrt hed und vo füf Chugle und
äme Huufe Granatschplitter troffe worde isch, är äs Master
Degree als Engineer hed, daser Gschichtsprofessor isch,
daser bi 9/11 huutnöch derbii gsi isch (und so ganz näbebii
hüt s’erscht Mal drüber mit öpperem gredt hed) und
und und. Mier hend ca. 2,5h mitenand gredt und d’Ziit
isch ume wie im Fluug. Schu nu cool wemer so Lüüt eifach so
kännälernt. Är hed mier au nu äs paar Iiblick i die
momentani Politik, sinere Haltig zum Ganzä im Irak und mier
au nu so vu Ingenieur zu Ingenieur über d’Ereigniss
am 9/11 äs paar Gedankeaschtöss zum drüber nachädänkä mit
ufe Wäg gäh. Är hed mier au gseid daser für so Gedankä und
Ideeä eigentlich nu is Gfängnis chäm wener nu bi de Army
wär (sovil zum Thema Freiheit und Recht auf freie
Meinungsäusserung). Uf alli Fäll bini wider äs paar
Erfahrige riicher und wemers so aluegt gschiider i
gwüsserlei Hinsicht.
Ich ha ja eigentlich immer Vorurteil gha gägeüber de
Amerikaner als solches, sigs vo verschiedene Erfahrige
nache vo früehner i de Ferie oder so und natürli au usem
politische Wältgscheh nachä. Wasi hie aber in New York
vorgfunde ha, sind üsserscht hilfsbereit Lüüt gsi, nätti
Lüüt, Lüüt wo für ihres wenige Gäld müend schträng schaffä,
Lüüt wo nid immer mit em politische System iiverschtandä
sind und und und. Ich bi zum Schluss cho dass nid de chlini
Amerikaner vo sim Land sovil Sachä verlangt, nei, äs isch
ender s’ganzä politische System wo die Lüüt nach usse
repräsentiert und so isch wie dases isch. Ich chönnt etz
das nu ändlos wiiterfüehre, aber hie söll s’sich ja
umene Reisebricht handlä und nid umene politische
„Rundschau-Diskussion“. Uf alli Fäll chani vu
minere Siite das Ganzä etz vil differenzierter aaluege.
Nach dere Begägnig bini wiiter Richtig Staton Island Ferry.
Das isch d’Fähri wo d’Insle Manhatten mit de
Insle Staton Island verbindet. Die Fähri isch gratis und me
cha dette eifach druuf gah und während de 30 Minütige
Überfahrt vom Schiff us d’Skyline und natürli au
d’Satue of Liberty fötele. Dännä acho, bini schnell
ums Gebäude ume und denn wider uf die gliich Fähri für
zrugg, will Staton Island isch eigentlich nid soooo
sehenswärt.
Woni zrugg in Donw Town Manhatten gsi bi, bini am Ufer nach
Richtig Pier 17 gloffe und ha mich dette mit Blick uf
d’Brooklyn Bridge chli erholt. Nach dere
Erholigsphase bini am Ufer nache ufem Hudson River Uferwäg
gloffe. De füehrt um d’Halbinsle Manhatten ume und
gahd nacher a dä alte Piers nache de Hudson River duruf.
Wunderbar zum laufe, beobachte und und und, aber leider
uhuere schträng zum laufe, vorallem wenns so warm isch wie
hüt ;-)
Am halbi 6i bini au wider im Hotel gsi, hami frisch gmacht
(schu geil wemer daf düschele) und bi de grad wider ufe Wäg
Richtig Times Square woni mit mim lokale Tourguide Simona
vorem nüü eröffnete Hardrock Café abgmacht ha. Dette acho
hani schu mal en Überraschig erläbt: Die guet Simona hed en
Tisch für üs im HRC reserviert und das amene
Samschtigabig!! So geil, mier hend ca. 15min gwartet und
während dere Ziit hemmer chönne ufeme Monitor verfolge
wemer ufgrüeft wärdid zum sitze. Womer denn dra gsi sind
simmer abe und a üse Tisch geleitet worde. Mier hend
richtig guet g’Ässä und sind nacher mit vollem Buuch
ufe hell erlüchteti Times Square gu Föteli machä. So
genial, das isch eifach hell und a jedem Egge chamer öppis
entdeckä. Au huufe Tourischte sind dette gsi, kei Ahnig was
die hend wellä ;-)
Schwären Herzens hani denn d’Simona müesse
verabschide, sie hed nu müesse s’Auto verwütsche
damit sie zu ihrem Wohnort in New Jersey chund (weisch
dette wo sich de Fuchs, de Hirsch, de Haas und s’Reh
guet Nacht sägid). Ich wünsche ihre nu en gueti reschtlichi
Ziit hie in N.Y. und wünsche ihre (und ihrne 2 Göffer) en
gueti und sicheri Heireis ;-)
Ich ha de nu äs paar Pics gschosse und bi de au gli mit de
Subway hei (obwohl d’Subway sött nid Subway heisse
sondern Saunaway - isch immer so heiss dett unne).
Sonntag, 28.07.2005: Sodele, hüt am Morge heds gheisse
Abschied näh vu New York. Isch halt schu en geili Ziit gsi
irgendwie, so älei chönne z’tue und z’lah
wasmer hed welle, azluege was grad ufem Wäg glägä isch.
Aber irgendwie isches au chli bemüehend wemer sich immer
ällei mues beschäftige. Aber nichts destotrotz isches
sensationell gsi hie in New York (und natürli au in
Toronto), ich ha wider vil gseh, erläbt und nume chönne
mitnäh, sigs a Gedankä, Iidrück und au Meinige.
Geschter am Abig hani nu woni heicho bi Independance Day
und en Dokumentation ufem Discovery Channel übers Tätowiere
(inkl. Gschicht, Entstehig und und und) gluegt. Leider gids
de Discovery Channel nid bi üs, das isch äbe schu chli geil
;-) Ich ha ded nu mini absolut Favoritereklame gseh: Zwei
Ehepaar bim ässä. Plötzli en Luftzuug und d’Cherze
bewegts. Denn gsesch en Olive übere Tisch rolle, wie vom
Schtaubsuuger azoge. Denn en Serviette, Denn gönd
d’Cherze us. Verwundereti Blick vo da Gäscht. Denn
Schnitt und mer gsehd wie d’Chatz übere Teppich
Richtig Färnseh zoge wird und Ziitige au Richtig Färnseh
flüügid. Denn d’Gäscht immer meh am stuune bis de
Huusherr seid: „Our T.V. sucks!“ Okay, das isch
etz chli verwirrend, aber wenn öppert hie seid „It
sucks!“ denn cha das heisse: „Das isch
Scheisse!“ oder aber au „Äs suuged!“ So
geil, isch grad mi Favoritereklame für die Wuche ;-)
Nachdemi mis Wäärli denn hüt am Morge packt ha und mi
Goffer chli au wider sini ursprünglich Form hed (irgend
öppis hed mi Goffer völlig verbüület, de ganzi Rand isch
verchrümmt, naja, mit vil Chraft und guetem Wille gseder
wieder us wie nüü) bini nachem Check-out de langsam zum
Hotel us Beindlet mit mim Fido. Dusse isches au saufüecht
und schwülwarm gsi (hed äbä gseicht i de Nacht) so dasi
(wili ja eh z’früeh gsi bi) nu äs Zmorge ha müesse ha
im Starbucks. Nachdem die letscht Starbucks-Füeterig uf
Amerikanischem Bode hinder mier gha ha, bini use uf
d’Strass und ha mal schüüch mis Händli glüpft und
prompt isch sones kanarievogelgälbs Taxi vor mine Füess
quitschend zum stah cho. De Fahrer isch useghüpft, mi
Goffer isch i Gofferuum ghüpft worde und ich ha im Fond vom
Taxi Platz gnu. Und denn isches nach de Agaab vom Ziil au
sehr rassig vorwärts gangä, so dasi en geili Rundfahrt nu
übercho ha und innerhalb vu 25min vorem Flughafä
usegschmisse worde bi. Ha de de gueti Maa au zahlt und chli
Trinkgäld (au Tip gnännt) isch au debii gsi. Flugs ine gu
icheckä und mit em nätte Fräuli hinderem Tresä chli
umepläuschled. Nacher so bald als möglich is Warteareal gu
warte und warte und warte (immerhin hani vier Schtunde
müesse z’Tod schlah). Ha de nu s’Highlight vu
de Reis gha, en landeswiiti Aasprach vom Goerg dem Zweiten
Bush über de Hurrican Katarina und die nüüe Verfassig im
Irak (und em drus resultierende mögliche Truppeabzuug). Au
bini etz topinformiert was de Hurrican füre Wäg tued
iischlah, wie dases denn usgsehd und überhaupt: CNN sei
Dank!
Nachdem das Wartä au ändli äs Änd gnu hed, isch de Adili de
schu imene schier nagelnüüe Flugi (Typ Embraer) gsässä wo
erscht si 4ti Flug gmacht hed. Isch schu nu erhebend,
schmöckt wie imene nüüe Auto ;-) Mier sind de sehr schnell
in Toronto gsi, ender chli z’schnell, mier hend de nu
müesse en Viertelstund ufem Rollfäld warte bis
s’Bodepersonal de ander Jet wägschobe gha hed. Etz
hed de langsam d’Ziit drängt, aber z’erscht
hani wider müesse bim immigration Office gu verbii luege
und dem Hase gu erkläre dasi uf de Durchreis bi. Denn hani
mi Goffer welle schnappä, aber das Band hed eifach kei
Goffer gha wo wie mine usgseh hed. Flugs bim Baggage Claim
Office gu fragä wo dass min Goffer sig. D’Ziit füre
Transfer isch au langsam knapp worde, ha äbe nu 15min i
ander Terminal gha und dette numal 15min füre Bustransfer
is Internationale Abflugcenter zmitzt ufem Rollfäld, und i
dene Ziite isch denn de Security Check nu nid derbii gsi!
Also, de Hase afäh umetelefoniere, aber niemert hed vo mim
Goffer öppis welle wüsse oder so. Naja, ha mich de müesse
mit de Antwort zfride gäh, dass de sicher in Züri achäm,
wenn nid hüt, denn morn oder de halt spöter. Nid grad sehr
erbauend, aber was sölls.
Ich bi de ab wie s’Bisiwätter und ha de Flughafä
leider nid chönne gniesse, nonstop bis zum Security Check
duregloffä. Dette isch mal wider en überkorräktä Vogel gsi,
sogar mini Uhr und mis Mineralwasserfläschli (Hmmm, mues
schu sägä, ganz ä gfährlichi Waffä!) hends welle röntge und
natürli (isch glaubi de nüüschti Gäg) mis iBook in Aktion
gseh. Bi de sehr fründlich blibe, obwohl d’Ziit chli
dervogloffe isch, aber wo de Depp nu min Pass isch
Chischtli gschmisse hed und de au hed welle röntge, denn
hani churz mal müesse eis vom Bob sine
„schlimme“ Wörter bruuche. Är hed de Wink
glaubi grad verschtandä und plötzli isches schnell und
vorallem au kulant gangä. Wasem gnau gseid ha verrati nid,
aber äs isch öppis zwüschet Armlüüchter und
Darmausgangsverschlussmöglichkeit gsi ;-)
Nachdem ender müehsame Intermezzo hani de Bus nu locker
verwütscht und schu bini au im International Center usgladä
worde. Dette isch denn de Bomber schu betankt umegschtandä,
leider mal wider em Boeing 767-300. Mit dere Sorte Flüüger
hani ja schu uf de Hiireis Bekanntschaft gmacht...
Nachdem denn mal alli al Bord gsi sind (ich ha ufeme
Gangsitz im mittlere 3er-Abteil Platz gnu), hemmer nu
müesse uf drüü Chind wartä. Hed mier chli Ziit gäh mit mine
Sässelnachbere Bekanntschaft z’machä. Grad näbe mier
hani eine Deutsche Staatsangehörige gha und näbe ihre au nu
ihri Kollegin. Nenene, isch nid min Fall gsi, so öppis vu
iibildet *brrrr*.
De Bomber isch de mit chli Verschpätig i Nachthimmel
gschtartet und s’Kinoprogramm isch nu schlimmer gsi
weder s’Ässä: Miss Cogneality II (au bekannt als Miss
Undercover II) und wider mit vil Staub und Verwesigsgruch
behaftet de zweiti Film (ich weiss ja au nid wo oder wer
dass de Seich usgrabt) Star Trek - Die Rache des Khan. Aber
easy, au die 8h müend dure gah. Ich ha mich de chli
schlaffertig gmacht und ha tatsächlich äs Nickerli vonere
Viertelstund anebrungä, da weckt mich doch de Herr
Stewardess und teilt mier mit dass d’Rüggelähne mües
ufgstellt wärdä und agschnallt si au kei Seich wär, mier
tägid etz de en Zone mit Turbulänzä durflüüge. Jaja, das
wars dann wohl mit schlafä, has de nu churz probiert
sitzend mit em Chopf am Vordersitz agläänt, aber das hätt
schier nu mit eme Gnickbruch gändet, da de huere Bomber
richtigi Gümp gnu hed. Also hani d’Ziit halt
irgendwie z’todgschlagä. Die nätt Schnägg usem
nördliche, grosse Kanton isch de i de Nacht richtig
zuetruulich worde, sie hed sich glaubi nachere schtarchä
Schultere gsehnt und churzerhand mini Schultere als
Schlafstell missbruucht...Sachä gids! Zum Glück hed sie nid
gsebberet...
Mier sind de pünktlich in Züri acho, und wie bschtellt isch
mis Heimattaxi aka Begrüessigskommitee dette gsi, au für
das numal vile Dank.
Ach ja, bevoris vergisse: Mi Goffer isch de doch in Züri
gsi! Aber was weniger schön gsi isch, är hed äs Sigel vu de
Homeland Security druffe gha und isch geöffnet und
durchsuecht worde. Hehe, nüd hends gfunde, ha nämli mi
Totschleger i de Hose gha *harrharrharrharr*