Ja heieiei, da isch wirklich nüd Nüüs uf de Siite...warum wohl? Ich bit sit ca. 1 Jahr flissig mit äs paar Gliichgsinnte dra d’Schwiizer Scalerszene mit unkonventionelle Ideeä uf z’mische. Lueg doch mal uf www.srcac.ch ine...

Tags: Webseite

6 Monate ist es her als ein kleines Menschlein unser Leben bereicherte - und heute ist der damals so kleine T.J. schon ein richtiger kleiner Racker: 9kg schwer, 70cm lang und quirlig unterwegs, so dass wir Abends kurz nach ihm ins Bettchen steigen.

Tags: T.J.

Und schon wieder neigt sich eine Woche im Lostorfer Energieberater-Bootcamp dem Ende entgegen...und nächste Woche heisst es wieder ab unter die Leute und Energieberatung machen *hopphopp*

Tags: Energieberater, Lostorf

Hüt hemmer de T.J. im Humpi-Bumpi la gumpä - schliesslich muesmer schu früh uf d’Schiene vomene Fasnächtler brungä wärdä

Tags: Narretanz, T.J., Bootcamp

Sodele, sit hüt am Morge sitzi wieder inere Klass und tue mini Hirnzällä dureblasä. Ä Wiiterbildig als Energieberater Gebäude mit eidg. FA sölls wärdä - 5 Blockwuche bis Ändi Juni und de d’Abschlussarbet. Man darf gespannt sein, schliesslich bini mal wieder i de Pilotklass

Tags: Energieberater, Lostorf

Ach herrje - etz sind mini Ferie ufem Brätt schu wider verbii. Ei Wuche Sunnä, Schnee und Snowboarding - ändgeil. Was wettmer au meh? Hmmm, ich weises: Zwei Wuchä

Tags: Ischgl, Snowboard

Hihi, hüt hed öppert grad rotiert wo de Papi heicho isch. Schnipp-Schnapp-Schnappschuss...

Tags: T.J.

De wottmer mal öppis guets für d’Familie machä und büessts augeblicklich. Ich ha mich, da ich vil mit em Zug und Bus underwägs bi, gäg d’Süüligrippe la impfä. Isch ja nur en Piiks, aber was nacher gsi isch wetti nid grad wieder ha: De rächti Arm chani nur under Schmärzä lüpfä und Fieber hani au gha, so dasi am Mittwuch ha döffe de Arbet färnbliibä. Aber äs gahd wieder besser und me fühlt ich wirklich wie wemer en Gripp hätt

Tags: H1N1, Impfung

Sodele, sit hüt bini au GEAK-Experte, da heisst ich daf als Experte sogenannti GebäudeEnergieAusweisederKantone usstellä. Ä Kurs hed das selektive Vorgeplänkel abgrundet und etz wirdi offiziell uf d’Mänschheit losglah

Tags: GEAK

Hüt isch en bsundere Tag gsi: Ich ha döffe mini chlii Familie heiholä. Schu nu komisch, me gahd als Paar i d’Klinik und chund als Familie hei. De T.J. hed sich guet iigläbt und tued etz d’Wohnig chli dr Schlafä erkundä.

Fötali gfindid ier under baby.eidrien.ch

Tags: T.J.

So isches tatsächlich: D’Wält staht sit hüt am Namitag 13.05 Uhr für mich und mini Regierig ufem Chopf. Mier sind nämli Elterä vomene gsunde Bueb wordä und hend im Spital Cham üse chlii Tyron John (T.J.) döffe i Empfang näh. Är isch 3’960 Gramm schwär und 52 cm gross. S’Mami und de Junior sind wohluf und Beidne gahds de Umständ vo 30 Schtund herter Arbet entsprächend guet.

Fötali gfindid ier under baby.eidrien.ch

Tags: T.J., Nachwuchs

Ich sitze also gmüetlich mit em Laptop ufem sitzplatz und was gsehd mis Holzaug: Äs Prachtexemplar vonere Schpinnä - so wie imene Wildtierpark und de Ranger Adi z’mitzt drinnä

Tags: Garten, Spinne

Da i mim Gartä immer öppä chli Arbet afallt, hani beschlossä dasi öppä chli Hilf bruuchä - me wird schliesslich au älter. Drum hani etz zwei Hälfer im Gartä: De Freddy the Shreddy und Buck the Sack

Tags: Gadgets, Garten

Das Wucheändi hed in Niederbipp s’Jeepträffä i de Chiesgrueb stattgfunde - Ehresach hani mis Gschpänli mit sim Jeepster dett anä begleitet. Äs tiptops Areal und au d’Lüüt sind nätt gsi. Mier hend de dä Jeepster ufem Trail rächt gforderet, aber äs hed Spass gmacht - är gsehd etz au us wiene ächte Jeept

Äs chlises Video heds au nu gäh dervo:

Tags: Jeep, Niederbipp, Treffen, 2009, Jeepster, Video

Sodele, etz hani au wieder mal chli a de Websiite bäschtelet. D’Siitelischtä und au d’Sektion mit de Hobbies hani erwiiteret resp. überarbeitet. Äbeso heds ä Siite mit „Latest Pictures“ gäh - dette chamer diräkt mini letschte Flickr-Uploads aluegä.

Vil Spass

Tags: Webseite

Sodele, etz hani au mini persönlich Siite uf facebook.com - www.facebook.com/eidrien

Eitel, nid?

Tags: Facebook

De Summer isch da und was isch schöner im Summer als Grillä? Numeh grillä!!! Was fürne Überraschig dass hüt a mim Freudetag äs sauschwärs Ding i mim Garte glandet isch - quasi „ab Laster gefallen“ - ä richtige Mannägrill! De BBQ Texas Ranger mit 180kg massivem Stahl und Holzfüürig. Etz cha de Grillsummer losgah

Tags: BBQ, Texas Ranger

„Wenn zwei sich eins sind und nicht acht geben, so wissen sie spätestens in neun Monaten dass sie zu Dritt sind“ - die magische Zahl 21893 wird so umschriebe. Banal, oder? Für üs bedüütets vil meh, schliesslich wärdid mier s’erscht Mal Elterä. Da üse Nachwuchs au schu weiss wie das mit em Internet funktioniert, schriibt är aligs grad sälber chli vo sim Läbä under üs - baby.eidrien.ch

Vil Spass bim Läsä

Tags: Baby

Tja, das Jahr neigt sich au schu wieder am Ändi zue - obwohl, mier chunds vor als obs nie 12 Mönet gsi wärid. Vil isch gsi i dem Jahr, privat wie au brueflich. Bini doch Unkel wordä (ein böhser Onkel um gnau z’sii), ha mini Baschtelliideschaft entdeckt, bi uf Hochsigsreis gsi und ha geniali Snowboardferie gha.

Brueflich isches au äs Jahr vo de Veränderige gsi, mi Job bim ewz hani ufgäh und gah etz mis Glück wieder i de Planig gu suechä. Ich ha vili liebi, nätti, interessanti Lüüt kännäglehrt und mier isches nu nie so schwär gfallä amene Ort z’gah.

Ich wünsche allnä Bsuecher, Gschpänlis, Kollegä und suschtigi Personä woni kännä und schetzä fürs kommede Jahr alles Gueti, vil Glück, Gsundheit und Erfolg...und hoffä daser vilicht mal wieder ineluegid hie i de chline Wält vom Adi.



Das isch en originale Huuswurz usem eigete Gartä

Tags: 2008

Och wie schön isch doch das - Schnee heds gäh. Aber nid überall, sondern je nach Region ganz verschiedä vil. Schtellid üch vor, sogar bi üs uf 453m ü. M. heds für 30cm glanget - Grund gnueg für mich de armä Vögäli verussä ihri Vogelvilla mit Fueter z’montierä

Tags: Schnee

Sodele, was chamer nid alles erläbä wemer für s’ewz schaffet? Me daf sogar as 6-Tagerännä im schöne Halleschtadion zu Zürich und dette diräkt a de Bahn de Abig verbringä, de Sportler bi ihrne Höchschtleischtige zuelugä, fein Ässä und d’Schtimmig gniessä. Das muesmer mal erläbt ha.

Tags: Sechstagerennen

Sodele, uf de Websiite hed sich au nu chli öppis wenigs ta - äs hed ä nüüi Kategorie „Hobbies“ gäh und mini Links sind nüü online abrüefbar.

Under de Kategorie „Hoobies“ tue ich üch gärn mini chline Liebling vorschtellä. Luegid doch mal inä.

Mini Links sind nüü bi „delicious.com“ usglagerät - das hed de Vorteil dasi die au cha mit mim iPhone aktuell haltä und aluegä

Tags: Webseite

Hüt isch chli ä lockerä Tag gsi - d'Kanadier sägid zu dem "lazy day". Mier sind hüt für einisch nid so früeh am Morgä (äs isch ender schu 10ni gsi) usem Hotel usä und grad mit de Subway chli gu umefahrä. Mier sind bis zur Station "Bathurst" um vo dette a d'Bloor Street West ab z'laufä. Vili Sachä hemmer gseh und au vili Gschäft hemmer bsuecht. Wo de d'Yonge Street i Sicht cho isch, simmer rächts abbogä und die Strass durabgloffä. Churz schnell ä Verpflegig imene Wendy's gnossä und schu simmer mit de letschte Geschenke für die Deheiblibnigä is Hotel gschtüüret. Nachem abladä isches de wiederum per Subway wiitergangä um nu einisch d'Waterfront gu gniessä. A de Union Station hemmer nur s'Transportmittel gwächselt und schu gli drufabä isches miteme Streetcar wiitergangä. Äs paar Statione wiiter isch d'Waterfront i Sicht cho und schu simmer wieder imene Heated Outside Patio ghöcklet und hend mit em Laptop gschpilt und d'Sunne gnossä.
Nach soviel Erholig isch nu chli Laufä ufem Programm gschtandä und nach äs paar Minute (ender Schtunde) simmer via Rodgers Center vorem Hooters gschtandä.



Als Belohnig für soviel Laufä hed sich d'Dachterassä mit ämä Bierli abotä Frisch gschtärcht isch nu s'Eaton Center heigsuecht wordä und nacheme wiiterä churzä Zwüscheschtopp im Hotel hemer üs ufe Wäg dur d'Rushhour gmacht um a d'Gamble Avenue 169 z'cho, mim ehemalige temporäre Deheimä.
Chum acho simmer vomene völlig überraschte Bod und Danny empfangä wordä. De Abig hed de relativ lang duuret, so dass mier de nu i Gnuss vonere Taxifahrt cho sind - de Kasim isch üse nächtlichi Rännfahrer gsi

Tags: Ferien, Canada

Eigentlich wär ja hüt chli ä früehe Morgäufbruch planed gsi, aber leider hed de Wecker sich nu nach B.C.-Time grichtet (oder besser gseid: Pacific-Time grichtet), so dasmer halt erscht am viertel ab 8i ufgschtandä sind und au s'Hotel erscht am nach de 9ne verlah hend. Aber defür simmer grad diräkt i d'Rushhour iitaucht und hend grad Hardcorerubbing i de U-Bahn (oder wies hie heisst: Subway - Ride the Rocket) gmacht. Aber das hed sich de nur füüf Statione hiizogä, denn mier sind bi de Union Station wieder usem Gwüehl usä und hend üs via Sky Walk Richtig CN Tower ufgmacht. Dette acho heds grad die erscht Wällä vo Tourischte abgfertiget gha und so simmer churz-lätz zwüschetinägschlüpft und hend grad diräkt bis ufä Skypod i 447m Höchi durebuechet Womer de dobä acho sind hemmer ä Superussicht uf Toronto und d'Umgäbig gha - Hammerwätter isch halt au gsi Mier sind de trotz Wätterwarnig (Wind über 25km/h) ufe Outside Walk und ufe Glasfloor gu abbäguggä
Nachdem mier gnueg Höhäluft gschnappt gha hend, heds üs Richtig Wasser zogä. Mier hend de de Wäg zur Waterfront und em Harbour under üsi Schueh gnu und sind schu gli drüberabä am Wasser imene Heated Outside Patio (oder uf Düütsch gseid: Garteterassä gsässä und hend mit em iPod und em Laptop und em Wireless-Netzwärch wo "per Zuefall" ume gsi isch, Nachrichte verschickt und d'Homepage updatet. Nachdere Kommunikationspausä simmer wiiter a de Harbourfront nachä Richtig Fährihafä womer de am eis d'Fähri nach Toronto Island gnu hend. Mier hend Center Island usgwählt und d'Überfahrt isch super gsi (und hed vili heissi Bildli gäh).



Uf Center Island simmer chli umegloffä und hend de wunderbari Herbschttag bi 22°C gnossä. Mit de nächschte Fähri isch de wieder d'Rückfahrt gmacht wordä und churzentschlossä isch nachere churze Schtärchig de Wäg mit de Subway is Yorkdale Center (s'gröschte Iichaufszentrum vo Toronto) aträttä wordä.
Chum dette isch chli schtuune und umeguggä agseid gsi - ussert em Bodyshop hemmer niemerem üses Gäld gäh De Bodyshop hed sit dere Wuchä äs nüüs Produkt namens "Deep Sleep" im Programm. Das chamer sich ufs Chüssi schprützä und söll eim hälfä bim guet Schlafä. Mal gugge wies wirkt.
Chli müed vom Umelaufä isch d'Rückreis de gli schu wieder ufem Programm gschtandä und so simmer bi de Osgoode Station us de Subway gschtige und mal zum Kinopalascht gloffä. Dette hemmer usegfundä dass "Batman: The Dark Knight" im IMAX-Kino am 7ni lauft. Churzentschlossä hemmer zwei Billet kauft und willmer nu chli z'früeh gsi sind, simmer i de Zwüscheziit wieder ines Heated Outside Patio zumene Bierli i de Sunnä ghöcklet. Uf die 7ni hemmer de de Kinopalascht g'enterät und de Film gnossä - mit eim Wort: Hammergeil! De isch de ächti Killerfilm gsi - schauen, schauen, schauen! Nachem Film isch nu chli schtrolchä dur s'nächtliche Toronto ufem Programm gschtandä.

Tags: Ferien, Canada

Willmer schu sehr früeh hend müesse am Flughafä fürs Checkin sii (07.00) simmer au sehr früeh ufgschtandä: 06.30 Das chamer nume machä wemer diräkt im Flughafä schlaft Also husch-husch usebeindlet und am Checkin-Automat chli Boardingchartälotto gschpilt. Das Ding hed nu gmeint dasmer nu einisch äxtra müend zahlä fürs Gepäck, dasmal $50 willmer 4 Göffer gha hend. Ich ha de mit em Automat nid wellä diskutierä und ha mich halt ohni sälbschtitscheggtä Gepäck schtur i d'Warteschlangä gschtellt. D'Boardingchartä hani am Automat chönne abluchsä, aber keis gälbs Gepäckbezeichnerli. I dem verdammtä Sälbschtbedienigsladä hed eh keine gwüsst was machä und de Groundstaff isch in Trance umebeindlet. Plötzlich hed üs de nu ä sone komatösi Staff-Damä agredt warum mier kei Tags heigid. Mier halt gseid dass de Automat das nid heig wellä gäh. Sie das also nid glaubt, aber siehe da wo sie mit em Herr Automat gredt hed, hed sie au kei Tag übercho Mier hend de plötzlich VIP-Behandlig gha und döffe näb de Warteschlangä fürebeindlä. Dette hemmer de wieder sone komatösi Frau Griesgram atroffä wo üs schu wieder hed wellä zruggschickä und nach Intervention nu hed wellä Gäld ha und nach erneuter Intervention und em Befragä vom Orakel vo Buechigssystem hemmer de die begehrte Tags übercho und döffe gu s'Gepäck ufgäh Nach soviel Erfahrig, hemmer grad äs A&W-Zmorgä bruucht.
Nachem Zmorgä hemmer nu d'Sicherheitskontrolle erläbt und sind pünktlich vorem Gate gschtandä. De Flüüger isch voll usbuechet gsi und keis friis Plätzli heds gäh. De Flug isch guet gsi und meh hed zwüschetinä vilvilvil usem Fänschter us gseh - wemer nid grad "Indiana Jones and the Crystal Skull", "MegaMaschines" und "MegaWorld" gugget hätt.
D'Akunft isch au duregangä und nachem obligatä Pipi ufem Pipiböxli nach de Landig und uf feschtem Bodä, simmer gu d'Göffer holä und hend üs um d'Transportmöglichkeit is Hotel kümmerät. Leider isch de Infoschalter (also s'Personal) irgendwie wagbeamet wordä, so hemmer halt churzentschlossä ä Limousine mit Chauffeur und allem Pi-Pa-Po bis is Hotel gnu. De luxuriösi Gschpass hed nume $60 koschtet (inkl. Tip) und so simmer sehr entspannt im Hotel acho und schwupps im 21. Stock iipfärcht wordä. Nachem Zimmerbezug simmer schu s'erscht Mal Richtig Eaton Center und City Hall beindlet und nach chli umeschliichä wieder im Hotelzimmer glandet.

Tags: Ferien, Canada

Etz isch schu de letschti Tag für üs in Terrace abrochä - chum zum glaubä wie schnell dass die Ziit duregangä isch. Ich ha am Morgä nu ä letschte Usfluug i d'Schtadt gmacht wili uf de Suechi nacheme vierte Goffer gsi bi. Leider isch de avisierti Goffer im Canadian Tire nid das Wahre gsi, so simmer de halt schnell i Liquidationsstore gu guggä. Und siehe da - ich ha ä 27" Goffer i verblasstem Ferrarirot, bruucht aber intakt für schlappi $15 übercho. So usgrüschtet hemmer die letschte Packarbete chönne i Agriff näh.
Mier sind de nach äs paar Abschiesprogies is Auto ghüpft und vom Tanti Emmy ufe Flughafä Terrace brungä wordä. Mit üsne vier Göffer hemmer usgseh wie Flüchtling, aber das isch üs doch glich gsi Am Schalter hemmer de nu döffä für jedä Goffer wo zvil gsi isch döffä $40, also einä (denn de Uri-Goffer hani per Zuefall als Handgepäck umgmodlet) und für jedes Pfund (450g) zvil $1.80 zahlä - grausam, ehrlich. Aber de Hammer isch de nu bi de Sicherheitskontrolle cho - ich ha nu nie sone huufä Amateure gseh wo sich wend professionell gäh - Horror! Mier sind 30 Minute i de Kontrolle gsi und wenn de Flüüger üs nid schu drüümal usgrüeft hätt würdemer immer nu dette schtah. Aber so hemmer doch döffe gah und mier hend müesse ufs Flugfäld use zum Flüüger beindlä. Mier sind mit HawkAir gflogä, aso so wies heissid, so gross sind au d'Flüüger Ich schnell-schnell i Bomber ine wellä (wo schu usbuechet gsi isch und nur uf üs gwartet hed) und *bums*-*tschätter*-*klirr*-*chlotter* hani bim mim rassigä Iischtigsversuech de schöni DeHavilland-Flüüger verbüület. Alli Passagier hend churz ufgluegt, d'Stewardess hed schu de Hörer i de Hand gha und versuecht "911" iztippä, de Pilot hed de Schlüüdersitz betätiget und de Wartigsmechaniker isch gu Ersatzteili holä. Nei, so schlimm isches nid grad gsi, aber d'Türe hed nacher chäch Schpiel gha bim zuetue und wärend em Fluug hemmer gnueg Frischluft gha. Mier sind de trotz dem Missgschick überpünktlich, das heisst 10 Minute vorem Ziitplan gschtartet und de Flug isch nid so spektakulär gsi wie de Iischtigsversuech vo mier. Defür isch d'Ussicht de hammer gsi, ehrlich. Ich bi die ganz Ziit nume am Fänschter kläbt und ha Bärgä, Bärgä, Bärgä, Seeä, Bärgseeä, Gletscher, Fjord und nu vil meh gseh. Pünktlich simmer de in Vancouver acho und schu bald mit em Shuttle ufem Wäg zum Internationale Flughafä gsi.
Dette acho hemmer üs wellä am Flughafähotel fürne Zimmerbezug mäldä. Leider, leider isch s'Flughafähotel s'Fairmont Vancouver, äs 5-Sternhotel.



Aber mier sind richtig unerschrockä gu fragä und mier hend äs Zimmer für sage und schreibe $379 übercho!!! Aber das Ding isch de Killer gsi: Ussicht uf Vancouver und d'Bärgä, im 13. Stock, ä Badwohnig - keis Badzimmer und alles perfekt. Das hemmer üs müesse leischte, schliesslich hemmer ja kei Hochsigsübernachtig gha Mier hend de üs gmüetlich iigrichtet und nu Batman:Begins gugget und sind de gu d'Augerollädä gu abefahrä

Tags: Ferien, Canada

De Sunntig wär ja eigentlich de Tag zum Entspannä - aber nid mit em Unkel Dieter (jaja, the famous Uncle Dieter). Mier sind hüt schu früeh mit em Pickup und de Flinte ufem Rückbank nach Kitimat ufbrochä. Dette heder üs nu s'ganzä Areal vo de Alcan und de Eurocan zeigt und au de Great Spruce hemmer agugget. Das isch en ca. 500 Jahrigä Spruce Tree (ä Art vu Tannä wo eifach riesig isch. Nachdem simmer nu gune Lizänz für Reh und Schwarzbär losä - me weiss ja nie wenn eim so einä vor d'Flintä lauft wemer im Busch underwägs isch.
Mier sind de mit em Pickup chli i Busch usegfahrä - 30km abem Highway sinds de schliesslich gsi. Aber leider hemmer kei Bär oder suscht äs Viech gseh - nume Bärescheisse ufem Waldwäg. Nachdem de de Waldwäg nu blockiert gsi isch dur Logging-Maschinä hemmer müesse umcherä. Bevor mier aber zrugg gfahrä sind, hani nu chönne mit sinere Flintä a Schuss i Wald ufe jagä - läck isch das geil gsi D'Ohrä pfiifid nu etz dervo und d'Hülsä hani bhaltä Mier sind de halt wieder zrugg gfahrä und chli uf andere Wägä quer durs Gehölz gröschtet mit em Pickup.
Nach äs paar Schtunde simmer de zrugg uf Terrace gu de Güsel ufladä und mit em Güsel gu ufe Dump fahrä. Chum dette (de hed au am Sunntig offä isch de Güsel i höchem Bogä vom Pickup gflogä und mier sind ufem Wäg gsi ufe Thornhill Mountain. Das isch de Bärg wo eigentlich üner Terrace trohnt. De Wäg dett ufä isch en absoluti Waldschtrass und sehr, sehr schlächt underhaltä. Aber das hed de Unkel Dieter nid dervo abghaltä de Pickup duruf z'schüüchä. Mängisch isches i de Schpitzcherenä so äng wordä, dasmer trotz 4x4 und Undersetzig hend müesse de Rückwärtsgang inehauä :-O Aber geil isches schu gsi und mit jedem Meter duruf isch d'Ussicht besser wordä. Mängisch hedmer d'Schtrass nid chönne vomene Bachbett underscheidä, aber das isch am Pickup gliich gsi Womer de ganz obä gsi sind, nämli bi de Sändealaage, hemmer ä wahnsinnigi Ussicht uf Terrace gha.



Ich glaube ja nid dass schu mängä Tourischt dett obä gsi isch. Nachdem mier äs paar Fötäli gmacht hend simmer wieder durab, aber dasmal au mit Undersetzig und ohni Bräms und nach 45 Minute simmer doch au dunne gsi. Am Abig heds de wieder fürnes Bierli uf de Terasse (z'Terrace) glanget

Tags: Ferien, Canada

Samschtig - genau vorere Wuchä simmer hie z'Terrace acho. Hei, wie die Ziit doch flüügt De Tag hemmer meh oder weniger hie uf de Terasse (z'Terrace), im Huus (am Wösche) oder aber bim Blue Jays alockä mit trochnem Brot im Gartä verbrungä. Leider sind die cheibe Blue Jays so hinderlischtig dases mier nid glunge isch nur eine dervo z'fötälä Defür hani d'Chatz ufem Apparat gha.
Am schpate Namitag simmer uf Kitimat gu s'Dörfli aguggä und chli dur d'Mall und de Homework Shop gu schtöberä. Kitimat isch d'Heimat vo Alcan (Aluminiumhärschtellig) und Eurocan (Papierhärschtellig). Die beide Firmene hend die Schtadt i de schpate 50ger-Jahr usem Nüd (aso usem Busch) gschtampft. D'Stadt isch sehr suuber, aber irgendwie tod.



Nachdem mier de d'Sehenswürdigkeite gseh hend, simmer nu am Chris sis Game mit de Ice Deamons im Iisstadion gu guggä. Das Game isch äs Teschtschpiel gsi - drüü Drittel vo 30 Minute mit Full Contact. Äs isch schu cool gsi zu luege (im wahrschten Sinn des Wortes, denn i de Hallä isch ca. -50°C gsi) und mier hend äs paar ganz geili Schpielzüüg chönne gseh. Nachem Schpiel simmer zrugg uf Terrace, aber fürnes Bier uf de Terasse heds nümme glanget.

Tags: Ferien, Canada

Hüt isch Premieretag gsi, drum hemmer i d'Stadt müessä (und das am Beschtä nur vo de 10ni). De Chris hed unbedingt s'NHL 2k9 für d'XBOX 360 müesse ha (das Game isch übrigens mit 9.5 vo 10 Pünkt bewärtet wordä und ich ha sehnsüchtig üf die nüü CD vo Metallica "Death Magnetic" gwartet. So sind s'Tanti Emmy und ich schu früeh underwägs gsi um im Walmart die Sachä z'ergattärä. Im Waltmart isches nu ruhig gsi, fascht die Ruhe vor dem Sturm, aber vom Game heds nur nu 20 Schtuck gha und vo de CD sind au nur nu ca. 35 Schtuck vorig gsi Nach dem mier erfolgriich gsi sind uf de Jagd nach sältene Sachä, simmer nu zur Beruhigig vo de Närvä verschiednigi Sachä gu poschtä und de wieder heizue. Nachdem mier deheimä üsi ergatterätä Sachä verschtaut gah hend, hani grad müesse d'CD probelosä - mit eim Wort "Hammergeil". Das isch Metallica wie früehner. Ich sägä nume "Kaufen, Kaufen, Kaufen!"
Wills so schön Wätter gsi isch am Namitag, hemmer en Fuessmarsch zu de Hot Springs gmacht. Das isch s'Erläbnisbad wo ca. 3km äwäg isch, drum simmer am Highway nachä dett hii gloffä. Eigentlich hättemer wellä de Wäldwäg näh, aber de isch im Momänt vo Bärä bevölkerät. Drum isches am Highway nachä sicherer (au wenn d'Laschtwägä nur Zentimeter a eim verbii surrid
I de Hot Springs hemmer de wältbeschti Lime-Margherita müesse probierä - äs sind de am Schluss 3 pro Person wordä



Nachem beschwingte Heiwäg isch de Tag de bimene Bier uf de Terasse (z'Terrace) usglüütet wordä

Tags: Ferien, Canada

Rägä, Rägä, Rägä - troschtlos wemer so useluegt. Aber mier sind hüt nu einisch mit em Tanti Emmy i d'Schtadt gu pöschtelen und Sache erledigä. Unter anderem simmer nu ine richtige Mannäladä - de Canadian Tire. Läck mier am Tschööpli, dette chamer sich au grad sälber äs Auto zämäbuuä, oder alles poschtä wases zum Fischä bruucht, oder ganz geili BBQ-Flammäwärfer (au Grill gnännt hie in Europa). So genial, ha schier nümme use wellä. Aber so vil Männlichkeit macht Hunger, so simmer nu i Mr. Mikes gangä gune Avalanche Burger ässä. Hammergeil das Teil und satt machts au im Quadrat
Uf de Suechi nach Mitbringsel heds üs nu is Souveniergschäftli im Hotel verschlagä und dette hed mich de Häuptling "schräger Irokese" agschprochä (de hed dette sini sälber gmachtä Silberschmückli wellä verchaufä öbi hie uf Bsuech sig. Ich ha de mal mit "Ja" g'antwortet (das hani voreme Jahr ja au schu mal gmacht *grins*) und är hed gmeint daser hüt i de Natur sägä wärdi dass für üs söll d'Sunne schiine. Tja, das isch doch flott gsi, oder? Ufem Heiwäg (äs hed immer nu grägnet denn) simmer nu a de Ruinä vom Hotel Skeena verbiigfahrä wo die vorder Nacht abbäbrunnä isch und sind gu d'Büchse i d'Sammelschtell zrugg gu bringä. Geili Sach, aber dette wetti nid Schaffä.
Mier sind de nacher hei (äs hed immer nu grägnet, wahrschindli hed de Häuptling nu kei Ziit fürnes Telefon mit de Natur gha) und so simmer heizue. Chum simmer deheimä gsi, hed de Häptling doch glaubi ä Aschluss mit de Natur gah, denn äs hed ufatah und d'Sunnä isch usecho. So hani doch hüt nu chönne äs Bier uf de Terasse (z'Terrace) ha

Tags: Ferien, Canada

Leider hed üs s'Wätter hüt chli im Schtich glah - chalt, windig und Rägä *brrrr* *grusel* Aber mier also Hardcoretourischte sind hert im näh und sind drum ufe Wäg nach Terrace. Also, mier hend wellä, denn churz nach de erschte Abzwigig isch im altä Ford Mustang äs verdächtigs, gälbs Lämpli agangä "Low Coolant". Scheisse, kei Chüelmittel meh. Also de Wägä ganz sanft kehrt und wieder langsam und vorsichtig vor s'Huus gschlichä. Dette hed de schu s'Tanti Emmy uf üs gwartet und gmeint mier sigid etz cheibe gleitig i de Schtadt und zrugg gsi
Aber das isch ja keis Problem, defür heds ja nu de 99er Mustang gha Mit dem simmer de i d'Stadt gsurrt und hend üsi touritische Iichäuf gmacht und hend üs im Safeway is WLAN igschnorrt Zrugg simmer de schwärbepackt und mit vil Gepäck und hend alles verläsä und verruumet. Wills grägnet hed hemmer dasmal ufenes Bier uf de Terasse (z'Terrace) verzichtä müesse

Tags: Ferien, Canada

Hüt isch en Usfluug vo de bsundere Art ufem Programm gschtandä - will s'Wätter so schön gsi isch hemmer en Usfluug nach Prince Rupert, de Hafestadt gmacht. Mier hend also üs döffe mit em Tanti Emmy zämä de nüüi 99er Ford Mustang V8 vom Chris schnappä und sind mit dem Autöli *grins* is 176km entfärnti Price Rupert gsurrt. De Wäg nach Prince Rupert gfindt au en durchschnittlich begabtä Europäer, äs gid äbä nume ei Schtrass dett anä Komisch, isch aber so.
In Prince Rupert isch usnahmswiis schöns Wätter gsi (bi normalerwiis 225 Rägätag pro Jahr) so dases wunderschön zum umeflanierä gsi isch. Mier hends a de Cow Bay so richtig gnossä und kei Souveniershop isch sicher gsi vor üs



Als krönende Abschluss hemmer en Lunch im Crest Hotel mit Sicht übere Hafä zu üs gnu - en Gheimtip sonderlgeichen!!! Ufem Rückwäg simmer vom Glück begünschtig wordä und hend doch nu en Bald Eagle (äs wunderschöns Viech) und en Seal (nid d'Schrotflintäzielfrässi vom Heidi Klum) gseh. Aso beidi Viecher sind läbig gsi und am richtige Ort (aso i de Luft und em Wasser) und nid uf de Schtrass - dette hemmer nur äs ca. 1,32mm dicks Porky Pine gseh
Nachdem de Ford wieder ufgfüllt wordä isch (40 Liter für die Schtrecki) simmer de au wieder zrugg uf d'Terrasse (z'Terrace) um üses wohlverdiente Bierli zu üs z'näh.
Am Abig hemmer de nu ä Lektion i Änglischer Schprach übercho - quasi ä diräkti Übersetzig vo "unorganisiert". Weiss das eine per Zuefall? Ich ha ä absolut passendi Übersetzig derzeu übercho vom Meischter höchschtpersönlich - "unable to organise a blowjob on a cocksucker convention" Das nänn ich doch mal praktische Unterricht...

Tags: Ferien, Canada

Mändig - wer hasst das nid? Ich schu nid, vorallem wener in Canada isch. Mier sind chli länger im Bett gsi und de nacheme feine Tanti Emmy-Zmorgä mit em Ford Escort GT i d'Stadt gheizt und dette chli gu Lädälä. Isch supi gsi und mier hend sogar äs paar Finkli übercho - herrlich warm!
Zrugg da anä simmer de nu chli z'Fuess nach Kin Camp am Lakeelse Lake gloffä und hend ufem Wäg mal d'Tierwält vo hie bewunderet. Ufem Wäg hend sich so geili, haarigi, schwarz-gälbi Raupe (Caterpillars) schliichend fortbewegt. Die Dinger sind nid so fotogen, aber heiss zum aluegä.



Wiiter hemmer näb de obligatä Hünd nu so öppis wie Elschterä gseh, so genannti Blue Jays. Das sind Vögel mit eme schwarz-blaue Fäderchleid und eme richtigä Kamm ufem Chopf. Die geilschte Viecher sind aber d'Suicide Birds. Kei Ahnig was fürne Sorte dass das isch, aber komisch sind die. Die schtönd uf de Schtrass und pickid Salz, Chiesel etc. uf und wenn äs Auto chund gönds nid eifach sofort wäg, sondern wartid bis zur letschte Sekundä. So machts halt aligs churz *flatter*-*bumm* und im Rückschpiegel vom Auto gsesch nur ä Fäderwolkä...tja, Suicide Birds halt. Womer de im Kin Camp acho sind hemmer üs chli am See verwiilet und sind de wieder zrugg beindlet und nach dem Schteiss hemmer üs uf de Terasse (z'Terrace) äs Canadian gnähmiget.

Tags: Ferien, Canada

De Sunntig isch au schu da gsi und s'Wätter isch immer nu wundervoll herbschtlich mit vil Sunneschinn ugschtattet verusse vorthandä gsi, dasmer üs schu früeh am Morgä uf de Terassen (z'Terrace) iigfunde hend. De Tag isch nacheme riichhaltige Zmorgä eigentlich ä richtigä Mannäsunntig wordä - de Unkel Dieter hed mich mit ufe Dump gnu (d'Güselhhaldä vo Terrace), mich mit em Ford F-350 Super Duty Pickup (8-Zylinder Turbodiesel mit 7.6 Liter Hubruum und ca. 400 PS / 1000 Nm Drähmomänt) la fahrä (ä Ehr wo nidemal sine suschtige Verwandtä zu teil wird), mier sind mit em Ford Mustang ufene schnelli Rundi (wirklich schnell, ender rasant, ja nei, ender superluutschnellgeil. Also alles in allem ä geile Tag mit eme hervorragende Abigässä.

Tags: Ferien, Canada

Nachere churzä Nacht isch die erscht Tätigkeit s'Ortä vom Auto gsi und d'Kontrollä öb nu alles anem draa isch. Aber die komische Lüüt (wo im Übrigä schu am Morgä am 8i wieder ihri Plätzli zum sich betrinkä vis-à-vis ignuh gha hend) sind offesichtlich meh am Schtoff (Feuerwasser) weder am Auto interessiert gsi Schwupps alles igladä, schnell mit em V8 d'Schiibe vom Hotel la erzitterä und denn nur ca. 150m wiiter wäg bim Tim Hortons fürne erschte Schtopp wieder anegfahrä - Kafitime! Nach dem härzhaftä Zmorgä isch de nu einisch s'beruhigende *Gluck-Gluck* vo de Zapfsüüle ufem Programm gschtandä und schu simmer ufem Wäg abä nach Terrace gsi. De Wäg isch prägt gsi vo vilne kaputte Bäum (killed by pine beetles) und vilne lange, gradä Schtreckänä und a so unsinnigä Tempoilimitä dases am durchschnittlich, raserisch begabtä Europäer schier d'Hamorhidä brungä hend. Läck mier, da hötterlisch mit offziell 90km/h (also mier mit em Mustang 115km/h) dur d'Gägend und äs gahd eifach nid vorwärts! Ich ha mängisch gseid, das weni mi Blaui Blitz hie hät sicher de Turbolader nid under 1,0bar würd ghiää und die Schtrecki mal im Tüüfluug würd erleid wärdä. Aber so isches halt chli langsamer gangä
In Burns Lake isch üs de au nu grad um d'Mittagsziit umä ä KFC is Aug gschtochä und äs hed ä Spici Burger Combo für de Fahrer und de Biifahrer gäh Au de Mustang hed sis Mittaghappi gha, ihm hemmer aber nume 87 Regular z'Frässä gäh
Gäg die 5i anä isch de langsam aber sicher Terrace i Sicht cho und schu bald hed äs einsams Schildli "Lakeelse Lake" verkündet. Chli Sueche und Würgä und schu bald hemer au die richtig Abzwiigig gfundä und sind prompt mit em Ford Pony...äh Mustang vorem Huus vom Tanti Emmy glandet
Ä paar Schtund schpöter simmer iigrichtet gsi, d'Wösch isch am Wäschä gsi und mier sind uf de Terasse (z'Terrace) am Bier suufä gsi

Tags: Ferien, Canada

Früeh am Morgä isch d'Kafimaschine agworfä wordä und schu bald isch de Duft vo Vanilla Coffee durs Chambre Separée gschlichä. Chum hemmer d'Türe nach Veruse uftah wärmer am liebschte wieder is warmä Bettli krochä - sauchalt isches gsi, schier nöch a null Grad Celsius. Schnell, schnell is Auto abä und ab ufe Wäg zum Lake Morraine. De isch ca. 14km usserhalb de Hoger uf und äs Bijou zum luegä. Mier sind so früeh dra gsi dases ufem Parkplatz schier kei Auto gha und ei Friede gherrscht hed.



Schnell äs paar Fötäli gmacht und zrugg durab zum Lake Louise. De isch nid halb so schön, aber chum simmer dette gsi sind d'Tourischte tonnäwiis anekarret wordä Au dette schnell äs paar Fötaäli gmacht und schu simmer ufem Wäg durab gsi und hend üses nächschti Ziil, de Highway Nr. 93 (au bekannt als Icefield Highway) avisiert.
Am Iigang zu dem Nationalpark hedmer müesse en Pass lösä wo ei Tag gültig gsi isch (also fascht, wemer dänkt dass de Tag 24 Schtund hed, aber de Pass nur bis am Abig am 4i gültig isch). Leider bruucht mer de Pass desmer überhaupt nur daf dure Park resp. übere Highway surrä. Also guet, hemmer die $20 halt im wahrsten Sinne des Wortes zum Fänschter usegrüehrt Leider hed de Day-Pass id d'Wättergarantie beinhaltet, so dases schu bald drübert abä afä schiffä hed und mier vo de Gletscher nid soviel gseh hend. Defür hani ä Schwarzbär us 2m Dischtanz gseh wiener Beeri knabbärät hed. Äs isch au trotz Rägä sehr imposant gsi dur de Park z'fahrä und äs hed doch s'einte oder andere Fötäli gäh.



Wie überall im Hochgebirge gids hunderti vo Warntafelä und eini hed üs zeigt dass d'Möglichkeit beschtahd dass Schtei uf d'Schtrass chönd ghiiä. Das isch de au passiert, allerdings hend die Schtei Bei gha und mier hend döffä wägere Mufflon-Familie z'mitzt ufem Highway ahaltä. Ich weiss nid öb die en Schtrasseblockade plant gha hend, aber sie hends gschafft dass de Verchehr fürnes churzes Ziitli schtill gschtandä isch
Gägä Mittag anähemmer üs Jasper gnöcheret und mier hend das Dörfli amene gnäuerä Augeschiin underzogä. Ohni Schnee isches nid soooooo schön, drum simmer au nach 2 Poschtchartä und 2 Briefmarkä wieder abgrauscht, so dasmer de Park sicher vorem 4i am Namitag hend chönne hinder üs lah (suscht hättemer numal $20 zahlt). Also ab wieder ufe Yellowhead Pass und dette hemmer au wieder d'Ziitzone vo Alberta hinder üs glah und en Schtund uf de lange Reis gwunnä.
Wills so guet gloffä und üs nu ä Schtund gschänkt wordä isch, hemmer als temporärs Tagesziel Prince George gha. Ca. 50km vorem Tagesziel isch de nu äs Kafipäusäli ufem Programm gschtandä, irgendwo zmitzt i de Wildnis imene Kafi-Hüüsli (also so abgsifft wie aligs die Hüüsli im Film, mit em chochende Kafipot und mit Mobiliar wo wahrschindli bi de letschte Kneipeschlägerii z'Bruch gangä isch. Aber de Kafi isch fein gsi *grins*). So frisch gschtärcht hemmer tatsächlich üses Tagesziel de nu vor de 6i erreicht, au wenn de Highway keis Ändi meh hed wellä näh
Mier sind de nach churzem Umesurrä i de Stadt (weis im Übrige eine wie ä 4-Way-Stop funktioniert i de Rushhour?) im Days Inn abgschtigä. Äs guets Hotel, nid z'tüür und mit eme Foodcorner und ämä Pub im Ärdgschoss. Leider hemmer dette au die erschte unliebsame Begägnigä mit de erschte Lüüt i dem Land gha wo schu am früehe Abig bsoffe umegschtrolcht sind, so dass mier s'Auto komplett usgruumet hend und nüd hend wellä dettä lah. Mier hend üs de churz Indisch verpflegt und hend im Pub uf d'Lindsey gwartet. Leider isches chli länger gangä, so dass ufem Tisch plötzlich vili lääri Fläschä mit Canadian gschtandä sind Wo de Lindsey cho isch, isches de richtig losgangä, so dasmer erscht schpat is Bett cho sind

Tags: Ferien, Canada

Eigentlich isches ä ruhigi Nacht gsi, abgseh vo de grosse Laschtwägä wo vorem Hotel de Retarder (Motoräbräms) ineghaue hend und da die kei Schalldämpfer hend bisch aligs im Traum ufeme Flugzüügträger gschandä wo de Jet de Nachbränner inehaut Aber au das isch duregangä und so simmer am Morgä ufe Wäg nach Kamloops gsi. Ufem Wäg dett anä simmer dur sone Art Prärie gfahrä und schu gli drübertabä simmer in Kamloops iitroffä.



Wills so guet gloffä isch hemmer als nächschts Ziil Salmon Arm gha. Dette isch au en chline Rundgang ufem Plan gschtandä. Äs schöns Näschtli, am See und so richtig verschlafä. Nach dere churze Pause mit eme Subway-Sandwich (mit vil Ranch dinnä isches de wiiter uf Ravelstoke-Golden gangä.
Wie ier sicher gmerkt hend sind mier guet i de Ziit glägä, drum hemmer Revelstoke (eigentlich üses Tagesziel) und Golden (mis persönliche Tagesziel) grad hinder üs glah und sind übere Rogers Pass und de Kickin' Horse Pass uf Alberta ine gsurrt.



Ufem Pass obä hemmer nu üsi Uhrä umene Schtund müesse füretrüllä, wills ab denn nach Alberta-Time gangä isch. Hed suscht ächt schu öppert erläbt dass wemer mit em Auto underwägs isch dasmer ä Ziitzone "überfahrä" hed? Wiiter isches gangä und am Abig simmer in Lake Louise iitroffä. Das isch soooo chli dases sogar nur ei Usfahrt hed
Äs Hotel hemmer de au gli gfunde und mier sin im "Lake Louise Inn" gu fragä was en Nacht choschtet. Tja, so chas gah, d'Offerte isch de bi $180 schtah blibä - aber was wotsch anders machä i dem touristische Dörfli? Ich ha defür de de ganz Abig döffe ghörä "Räuber, Räuber, eifach Räuber!" S'Zimmer isch guet gsi und als krönende Abschluss vom Tag simmer is "Mountain Restaurant" gunes feins Happi-Happi näh.

Tags: Ferien, Canada

Früeh am Morgä isches schu losgangä mit uscheckä und ufä Wäg zum Greyhound Terminal mit em Skytrain. Äs hed alles guet klappet bis zum Terminal, dette isch üs de mitteilt wordä dass de Bus chli Verschpötig hed. Schliesslich simmer dem halt am 20 ab 10ni mit eme uraltä Greyhoundbus (so alt dass sich d'Lähnä aligs selbschtändig gmacht hed und so alt dass de Busfahrer de Bus mit de antike Kupplig grad zweimal bim abfahrä abgwürgt hed). Aber anyway, mier sind de nach diverse friiwilligä und unfriiwilligä Zwüscheschtopp um die viertel ab 12i in Chilliwack aglangt.
Üs hed denn bereits d'Renate erwartet und üs mit em Pickup zu üsem nüüe Fortbewegigsmittel - em Mustang - gfahrä hed. Mier sind de churz verchlüpft will dette ä 92er Ford Mustang V8 mit 5 Liter Huubruum gschtandä isch. Sie hed üs de nu churz mit i A&W "Home of the Burger-Family" mitgnu, zrugg zum Auto brungä und denn isch sie nu üse Vorusfahrer gsi bis zum Highway. Mier also is de Mustang inä und de Zündschlüssel dreijät *wiuwiuwiu- vrooooooooooooooooooooooooooom* So ändgeil, ehrlich. Das Ding hed kei Kat, kei Schalldämpfer und gar nüd gha, dezue anä nu ä Coldair-Intake und ä Rännschaltig! So bini de mit ämä vorsichtigä Gasfuess bis uf de Highway gschlichä und denn nu chli wiiter



Mier sind denn anschtatt wie vorgseh via Hope uf Cache Creek gfahrä, nid über Whistler will die d'Strass immer wieder gschperrt hend. Mier also de Transcanadian Highway Nr. 1 duruf und äs isch wirklich atemberaubend gsi wasmer allse gseh hend: Vo Wald und Busch bis zu Schteppä und Bärgä - eifach geil.
Irgendwenn hemmer de nu Hunger und Durscht gha und beschlossä dasmer ä Halt machid. Mier also vor sone Imbiss anä, de Motor abgschtellt, aber de Zündschlüssel hemmer nid usebrungä. Tja, de hemmer halt äs paar Trucker gfragt, aber au die hend ca. 5 Minutä gwürgt bis de Trick 77 mit em verschtecktä Chnopf underem Länkrad gwirkt hed Nach dere Session simmer de froh um öppis z'trinkä gsi
Frisch gschtärcht simmer wiiter bis uf Cache Creek und hend dette im Thumbleweed Motel Underschlupf für d'Nacht gfundä, das aber erscht nachdem mier de Wägä tankt und kontrolliert hend.

Tags: Ferien, Canada

Au hüt simmer schu früeh am Morgä underwägs gsi - dasmal zum Zmorgä i Blenz grad unne am Eggä. Chli useguggä, Kafi trinkä und öppis Chlises häberlä - das isch wunderbar. Vorallem wenn uf de Chrüüzig vore ussä immer sovil los isch Nach de Schtärchig simmer mit em Skytrain zum Pacific Central gfahrä um dette üsi Billet füre Greyhound z'lösä.




Mier hend am Schalter de dä Huusdrachä höchschtpersönlich gha, aber mit guetem Willä und chli chalter Schulterä hemmer de au üsi Billet vo Vancouver bis Chilliwack übercho. Mier fahrid etz also morn am Morgä am 10ni hie z'Vancouver mit em Greyhound ab und chömid am 12i dette aa. De wärdid mier abgholt und chönd de üses Auto i Empfang näh. S'Auto sig tüüfer gleid, heig vier nüüi Pneu und är laufi guet Mal luege was de Ford Mustang fürne Wecker under de Huubä hed Aber gnueg vo dem, mier hend ja nu chli wellä vom hütige Tag brichtä.
Nachdem mier d'Billet gha hend simmer wieder mit em Skytrain zrugg a d'Robson Street und chli dur d'Lädä gschlichä bismer am Abig wieder is Hotel sind um z'packä und üs uf Morn am Morgä gu vorbereitä

I de nächste Tagä wärdid mier nid sovil is Internet chönne, drum hie ä churze Abriss vo de Routeplanig.

03.09.2008: Chilliwack > Whistler - 300km / 3:00 Fahrziit
04.09.2008: Whistler > Revelstoke - 500km / 7:00 Fahrziit
05.09.2008: Revelstoke > Jasper - 500km / 7:00 Fahrziit
06.09.2008: Jasper > Prince George - 400km / 5:30 Fahrziit
07.09.2008: Prince Geroge > Terrace - 600km / 8:00 Fahrziit

Das heisst, das mier öppä am Sunntig bi de nättä Verwandtä tüend iiträffä. S'Wätter söll guet sii und au uf de Strass sölls kei Schnee ha

Tags: Ferien, Canada

Früeh am Morgä simmer schu wach gsi und nach de Morgätoilettä gli schu mal über d'Schtrass ine Breakfast-Shop gschlichä. Mier hend üs dettä ä Breakfast-Wrap und en Turkey-Cheddar-Bagel gönnt, dezue nu ä grossi Tassä "Amercinao" (de H.P. würd etz wieder sägä "bagno di piedi"). Nach dem riichhaltige Zmorgä isch de Stanley Park s'Ziil gsi. Wo gids das ächt suscht das en Jogger (und Hobbyfotograf) ahaltet und vomene Päärli uf Hochsigsreis Fötäli macht und sie i Pose schtellt? Nume z'Kanada Nachem mier chli am Seawall entlang gloffä sind und nu d'Totem Poles beguetachtet, d'Seagulls und d'Mermaid gseh hend, simmer quer dure Park, entlang a de Vancouver Triathlon Route (wo ä huufä schwitzendi und chüüchendi Lüüt a üs verbii gsabbert sind) is Aquarium gangä. Im Aquarium hed de Adili wellä ja de hungrig Belugawal füeterä. Leider, leider isch das nid guet gangä, denn d'Belugas hend Nachwuchs gha un de simmer halt d'Familie gu aguggä. Isch schu nu härzig sones Belugä-Chälbli, eifach nid so handlich und liecht




Anderi Viecher heds au gha, aber nid alli sind so härzig wie de Seeotter gsi wo ufem Rüggä schwimmend sini Hodä gsünnelet hed



Ufem Rückwäg simmer nu um d'Lost Lagoon gwatschlet und nacheme churze Abschtächer is Hotel hed de Adili müesse vis-à-vis vom Hotel gu bequemi Airwalk-Schueh gu Poschtä, da är vor luuter Laufä Blaterä übercho hed. So usgrüschtet isches de numal Downtown gangä gu d'Public Library aguggä, im Foodcorner vom Pacific Centre gu Sushi schnabulierä und i de Bar vorem Hotel gu Poschtchartä schriibä, Canadian trinkä und de Serviertotsch gu ärgerä Nach dene Heldetatä simmer is Zimmer fürnes churzes Schläfli, aber das hed üs de so übermännt dasmer nidemal de Wecker ghört hend und erscht am Morgä am 4i wieder verwachet sind So gids au billigi Äbig

Vancouver: 17°C, sunnig und windig

Tags: Ferien, Canada

Früeh am Morgä simmer schu wiede runderwägs gsi und nacheme Morgäässä im Blenz-Coffeeshop simmer per pedes a English Beach und vo dette zum Aquatic Centre gloffä. Dette hemmer denn äs Watertaxi (so ä Art schwimmendi Badwannä uf Granville Island gnu, womer denn pünktlich uf die 9ni iitroffä sind. Mier hend welle de berüehmti Märcht bsuechä und mier sind nid enttüscht wordä: Unglaublich wasmer dette für Sachä gseh hend: Frücht, Fleisch, Blueme etc. Nach dem Sinnesruusch simmer de mit em Wassertaxi Richtig Plaza of Nations wo grad äs Drachebootrännä schtattgfunde hed. Vo dette via B.C. Dome und komische, zieliechtige Schtrassä nach Gastown. D'Gastown Steam Clock hed grad gwinslet womer cho sind und die erschte Bsüech i de Lädä gmacht hend. De Canadien Place isch s'nächschte Ziel gsi und s'Geniale isch gsi dases grad zwei Chrüüzfahrtschiff gha hed wo uf d'Abfahrt gwartet hend. Mier hend de nu chli d'Robson Street, d'Waterfront und diversi Reschtaurant unsicher gmacht bevormer is Hotelzimmer gschliche sind

Vancouver: 17°C, sunnig und windig

Tags: Ferien, Canada

Sodele, etz isches äntli losgangä mit üsne lang ersehnte Ferie. Am viertel ab 7ni hed üs üses Meyer-Taxi a Flughafä brungä. Dank em Vorabig-Checkin hemmer locker-flockig nid müesse schtressä und sind entspannt nach de diverse Kontrollä im Flüüger gsässä. De Flug isch geil gsi, vorallem will jede Sitz hed chönne uf sim eigete Monitor Film luegä oder Musig losä. Hamer schnell "The Bank Job" und "Iron Man" inepfiffä, allerdings uf Änglisch Nach 10h simmer au z'Toronto acho und bi schönschtem Wätter und 27°C hemmer üs müesse schleunigscht uf d'Sockä machä, suscht wärs ender knapp wordä mit em Aschlussflug Aber dank Ortskänntniss und schnelle Bei simmer überpünktlich im Bomber gsässä. Leider isch de Bomber ca.50 Jahr alt gsi und hed gmüffelet wienes Altersheim. Und s'Geilschte - fürs Ässä hedmer müesse zahlä! Aber easy, die $2 fürne Nissin Noudel-Soup hemmer au nu knapp gha Nach de Landig in Vancouver simmer mit em Airporter fascht vors Hotel anekarret wordä - aber nume fascht. S'Hotel hemmer de nach churzem Fuessmarsch erreicht und üsi Luxus-Suite bezogä (sie hed fascht meh Flächi als üsi Wohnig!). Nachdem mier mal s'Nötigschte usgladä hend (ganz wichtig: die füechte WC-Tüechli!) simmer nu churz chli d'Robson Street durabbeindlet und mier vili Autöli gseh und sogar en Prius wo sich wehemänt bemerkbar gmacht hed wosne abgschleppt hend Im Übrigä: Hie isch wirklich Prius-City! Jedes 10te Auto und jedes 2-3te Taxi isch en Prius. Mier hend de en lauschige Italiener gfundä und nacheme "Bellini" (eigentlich hätts söllä en Drink sii, mier hend aber je ä halbe Liter iiheimischs Bier übercho) und de Pizza simmer de todmüed is Bettli krochä

Zürich: 14°C, bedeckt
Toronto: 27°C, sunnig
Vancouver: 18°C, liecht bewölkt

Tags: Ferien, Canada

Am vergangnige Wucheändi heds mal wieder geheisse „Let’s rock...!“ Ich bi am Greenfield OpenAir z’Interlakä gsi. Hammergeil, abgseh vo gwüssnige Sachä wo mich sehr schwär a s’letschtjährige OpenAirFrauäfäld erinneret hend. Aber au wemer i de Nacht chalt gha hed wie Sau im Schlafsack und am Sunntig schtinkig heicho isch - geil isches halt schu gsi (und weni nu Haar ufem Chopf gha hätt, so hätti die Cheibe gschwunge zum Takt vo de Musig).

Tags: Greenfield, Open Air, Party

Hender mal wellä öppis Nüüs gseh? Nid immer nume de Gartechrüücher? Voilà, da cha üch ghulfä wärdä. Ich präsentiere schtolz de...*ta-daaaaaaaaa*...de Lokichuechä:

Tags: Lokichuechä

Hüt simmer iigladä gsi zum am Radio Pilatus-Event teil z'näh. Mier hend döffä am Morgä am 10ni i nüüi Citybeach in Luzärn gu brunchä. Isch schu nu edel gsi: Sand, Schtrandbett und ä Pool. Au s'Wätter isch de Hit gsi und so hemmers de locker mit de andere 300 Lüüt verlittä bises de am Namitag am 2 für alli Interessierte ufgangä isch. Ich chas nume empfählä und ich bi sicher nid s'letschtmal dette gsi

Tags: Citybeach, Luzern

Hüte hemmer ä Usfluug uf Einsiedlä gmacht um dette d'Sprungschanzä im Rahmä vomene Event vom ODEC Region Zentral azluegä. Wunderbarerwiis isch grad nu s'Internationale Gloggäschpringä gsi (nei, nid was ier etz dänkid). Jungi Nachwuchstalänt sind ab de K-77-er Schanzä gschprungä. Rundi 80km/h und Wiitenä bis 74m sind ufem Repertoir gschtandä. Womer de nu uf die ganz gross Schanzä uf 1001m gangä sind, hemmer au nu d'Ussicht chönne gniessä.

Tags: Sprungschanze, Einsiedeln

Juhu, sit em 28. April hani ä nüüä Namä (aso näb de übliche wie "Arschgiigä, Schtinker, Beamtä, Füdlibürger, Büffel" etc.). Ich daf mich ab jetzt offiziell "Unkel Adrian" nännä. Tönt alt, oder? Obwohl, abgseh vo de Faltä um d'Auge gsehni ja nid so alt us Aber zrugg zum Thema. Mini Schwägeri hed nach langem Kampf am Morge am 3 de Alexander Christian uf d'Wält brungä. Ä süesse Schnüggel, oder? Leider heder mich nu nid persönlich kännäglehrt, schliesslich mueser sich z'erscht uf derä Chuglä chli iiläbä und so bevor de "Böhse Onkel" verbii chund.

Wie hend Die Toten Hosen schu mal gsunge: "Hey, hey, hier kommt Alex, Vorhang auf für seine Horrorshow..." Vo daher passt de "Böhse Onkel" nu guet

Tags: Alexander, Christian, Neffe, Onkel

Vili, vili Jahr isches här dasi s'letscht Mal z'London gsi bi. Etz hanis mal wieder gschafft und ich mues sägä dasi positiv überrascht bi über d'Veränderigä. London isch nümme so dräckig wie früehner und au d'Luft chamer guet schnuufä Im Verglich isch Züri grad ä Dräckstadt Aber tüür isches immer nu - sehr tüür sogar. Bildli hani au gmacht, vil Bildli sogar, lueg eifach i minere Gallery

Tags: London, Reisen

Hmm, ischmer grad hüt ufgfallä: Wenn mal wetsch Lüüt aller Couleur gu aluege, denn gasch am Beschte i de Rushhour i Tüüfbahnhof vom Züri-HB und fahrsch dette mit de Rollträppä (warum dass immer die vercherte zwei Rollträppänä müend in Betrieb sii das isch äs wiiters Mysterium woni mal wett ergründä vo unne nach ufe fahrä und derbii d'Lüüt wo uf de andere Rollträppä entgägä chömid chli i aller Seelerueh schtudierä. Mier isch wirklich i Sinn cho: Das mues s'Laufband des Lebens sii. Soviel Iidrück i dene knapp 45 Sekundä - Wahnsinn.

Tags: Zürich

Hüt hani mier mal wieder en richtige Männersamschtig gönnt. Am Morgä bini am 20 vor 8i zu de Wohnig us und schnuerschtracks uf Ämmä i Conrad gu umeguggä. So früeh am Morgä isch de Ladä läär. Hamer natürli au nu öppis für mis chline Wägi kauft (Pneu mit Felgä und äs nüüs Haupt-Zahnrad). Denn bini i Hornbach, wo ja grad ume Egga liid, und ha au dette chli umegschtöberet. Bevor de d'Lüüt agschtrömt sind bini abgwütscht und am 10ni bereist wieder i de heimatliche Gefilde acho.

Elektronik und Gartegrät - wo Männer sich zu Hause fühlen dürfen

Tags: Hobby

Sodele, etz bini au zrugg us mine Skiferie - ha doch diräkt müesse 30gi wärdä dasis mal i d'Skiferie gschafft ha. Und s'Beschte: Grad diräkt is Mekka nämlich Ischgl.

Logiert hemmer im Sporthotel Almhof diräkt hinder de Silvretta Seilbahn. S'Hotel isch perfekt gsi und au de Standort hed überzüügt. Ruhig isches au gsi, me hed nume de Schneepflueg (jaja, dette isch Winter gsi, nid so wie hie) öppe die ghört. Au d'Hotelchatzä sind sehenswert gsi.

De Usgang nachem Skifahrä, au Apres-Ski gnännt, isch au supi gsi und me cha sich locker ä Schteiläbärä asuufä während einerä Wuchä. Aber mier sind ja nid wäg de Party (aso nid ganz) uf Ischgl, sondern wägem Skifahrä resp. Snowboardä. Äs isch wirklich de Hammer i dem Skigebiet - voll geil. Vorallem wenn d'Pischtene perfekt präpariert sind, niene muesch aschtah und uf de Pischtä au kei so Vollarschlöcher vo Pischteraser wie i de Schwiiz underwägs sind.



Eis isch sicher - ich gangä wieder mal

Tags: Snowboard

Heieiei, schu wieder äs Jahr durä. Ich wünsche allnä Bsuecher vo minere bescheidnä Websiite ganz frohi Fäschttäg und fürs kommende nüüe Jahr alles Gueti, vil Erfolg, Glück und Gsundheit!

Tags: Weihnachten

De Fahrplanwächsel isch ja au schu äs Ziitli dure und me sött ja meine daser au äs paar Nüüerige brungä hed reschpektive dass gwüssnigi Unzuelänglichkeite usgmerzt worde sind. Tja, eis Highlight hend die Chefschtratege vo de SBB ja nu nid i Griff über cho: Chund mer mit em Zug vo Züri uf Zug (de wo immer um die halbi dette achund) und me mues uf Rotchrüüz, denn söttmer z'Zug use und denn i die bepisst Schtadtbahn. Me schaffts ja nid dass de Zug vilicht churz nu chönnt z'Rotchrüüz en Schtopp ha! So chamer all Abig mal uf die unpünktlich Schtadtbahn z'Zug wartä und denn schliicht das Ding uf Rotchrüüz. Dette chunds sicher IMMER 3 - 4 Minute z'schpat a und de Regionalzug is Freiamt mues wartä (wener de wartet). Und das alles nume damit mer angesichts vo de vollkomme überfüllte Stadtbahn cha schtolz behaupte: "D'Frequänzä sind guet!"

Tags: SBB

Jawohl, äs isch dure. Ganz unbemerkt, schüüch und liislig isch mi letschti Dienschttag anegschliche, verbii gangä und schu hani döffe heigah mit mim Gwändli. Finito, aus, fertig, vorbei.

So eifach isches aber nid gsi, denn die letscht Wuche im grüene Gwändli heds nu in sich gha: Verschiebige i ungheizte Fahrzüüg vo 3h und länger, Schnee und ä Sauchelti verussä, unmotivierti Gsellä, unsinnigi Befähl und Nachtarbet sondergleichen - Armee 2007. Am Zischtig simmer uf Marly (ja genau, das isch de Ort wo afangs Jahr die Schturmgwehr gmugget wordä sind) und hend üs dette im Kommandobunker iignischtet und ghuuset bismer am Dunschtig wieder zrugg uf Auw / Sins sind. De Abig isch de aber die Härte gsi - will s'Oberkommando üsi Lüüt lieber im chalte Wald hed la wartä und de Fahnetürk ender de Sälbschtbefriedigung dient hed sinds dementsprächend schpat am Abig cho. Denn hemmer nu döffe s'ganzä Material iizieh, zellä und vorbereite für d'WEMA. Horror - vorallem wenn am Morge am 4i immer nu draa bisch und muesch afigs gu d'Stingerahänger vo Hand vom Parkplatz gu ufe zieh und au nu die muesch füllä. Am halbi 7ni sinds de schu pünktlich abgfahrä und meinereiner hed nu d'Underkunft in Sins gepützelt und isch de uf die 8i derheimä gsi

Tags: Army

Jaja, ich schriibe schu wieder vom Militär. Und nei, ich bi kein Fanatiker wägä dem Äs isch nume drum will das mi letschti WK isch. Ich ha am Mittwuch wieder döffä asuugä nachdem ich zwüschetinä chli Pausä ha döffä machä. Etz langets mier grad schüst ufs Loch dasi mi letschti Dienschttag am Ändi vom WK am nächschte Fritig ha *freufreu*

Am Mittwuch hani döffe uf Sins (welche Ironie des Schicksals) per pedes (aso z'Fuess) iirückä. Nacher isches de per Puch uf Auw gangä und mier hend üs dette i de Aula hüüslich niederglah. Schu gli heds de gheisse d'Wach z'organisiere. Nach em obligatä Chaos mit de Lüüt (wer isch etz bi mier; wer isch wo, wer hed sich verschlauft; schlaft etz de schu wieder etc.) hemmers de doch nu anebrungä. Aber schu am Morgen danach isch au de obligati Aschiss cho wills a gwüssne Lüüt nid passt hed wo die Wachlüüt gschlafä hend. Aber easy, gahd au dure. Am Dunschtig isch de au d'Üebig "Exodus" ufem Programm gschtandä: Einmal raus, rund ume Wald, nass wärdä und wieder rein. Tja, au so gahd de Tag nid dure. Am Fritig isch de nu d'Suechi nachere Halle für die ganz Batterie ufem Programm gschtandä - s'Wätter hed halt nid so mitgmacht und damit die arme Jungs nid nu meh verseicht worde sind (wärs wirklich wäg de Jungs gsi, nid nur wägem Material?). Mier hend de ä Halle gfunde und verdankenswärterwiis simmer de underem Dach gu retablierä, bald drüberabbä i d'Underkunft und de im strömende Rägä uf Sins gu abträtä.

Etz döfemer defür bereits am Sunntigabig früehner iirückä und i die letscht Wuche startä. Mis persönliche Ziil isch de Fritignamitag, denn wirdi mini Ufgab als Detachements-Chef hoffentlich abgschlossä ha und denn hani mini Dienschttäg erfüllt - ich chas chum erwartä, denn ich fühle mich langsam z'alt für de Verein

Tags: Army

Wer kännt das nid: Einisch im Jahr daf der geneigte Bürger der Schweiz sii obligatorischi Militärdienscht gu absolviere. Schtellid üch vor, de Adili wends au immer nu Aber nümme lang, etz sinds genau nu 12 Täg und de isch die Möglichkeit für Staatsferie de au für mich ändgültig verbii. De WK machi i zwei Etappä, die erscht Etappä isch etz dure. Die zweit Etappä isch de erscht so ca. inere knappä Wuche, das heisst de Adili hed etz Ferie vom Militär, daf aber defür gu schaffä gah Sachä gids...

Tags: Army

Sodele, under de Sektion "Informations" hani etz nüü nu ä Siite iibuuä womer cha luege wasi so i letschter Ziit im iTunes Store pöschtelet ha.

Tags: Computer, Musik, iTunes

Tja, wer de Titel etz nid cha entziffere, dem sei hie nu ä Erklärig darbrungä: Üsi Elterä hend üs Chinde immer gseid wemer uf de Polschtergruppe umegranznät (umegumpet und so) dasmer nid sölid rungussä - daher das schöne Wort

Aber ier läsid das ja alles nid wägem Wort, sondern wäg de Gschicht dehinder. Also, i de Nacht vom Dunschtig ufe Fritig, irgendwenn so zwüschet Zwei und Drüü hed sich das ganzä abgschpilt. De Adili ganz schön am schlafä wienes Velo (die ganz Nacht ufem Schtänder - aber das isch ä anderi Gschicht) is sim wunderbare, alte 120cm breite Bettli. Plötzlich ä Knall und Krach: De Lättliroscht hed sich spontan um drüü Mitglieder erliecheret. Scheisse, de Schläfer voll wach und irgendwie im Bereich vo de Ländä fählt ä ganzi Lättliroschtreihe. Angesichts dessen tueni etz mis Libido als ernüüerbari Energiequälle vermarktä - Spass bi Siite: Ich weiss dases komisch isch dases usgrächnet dette glah hed, aber ich cha ja au nu defür, vilicht isches en Ermüedigsbruch gsi. Genug dessen: Anes komfortabels Schlafä isch nümme z'dankä, irgendwie ischmer immer so am "hängää" gsi

Lang hani überleid wasmer cha machä und letscht Nacht ischmer während em schlafä die glorrich Idee cho wienis cha flickä, denn ä Nüüchauf vomene Lättliroscht liid momentan angesichts de fällige Stüürrächnig nid dinne. Was hani derzue bruucht: 24cm Tanneholz ide Mass 25 x 40mm und 6 Kabelbinder Aber luegid doch sälber ufem Fötäli. Ach ja, wenn öppert d'Konschtruktionszeichnige wett - eifach mäldä

Tags: Eidrien, Wohnung

Wer kännt das nid: Me wett gärn öppis frittiere, aber willmer das nume all Schaltjahr macht tuedmer sich schwär mit de Aschaffig vonere Friteuse will ja s'Öl immer völlig abgsifft isch wemers de wieder mal bruucht - davo abgseh schmöckts nachere Frittiersession aligs ja au nid grad gnüsslich i de Wohnig.

Ich hane Lösig für das Dilemma gfundä. Äs heisst "Actifry" und chund vo de Tefal. Das isch en Heissluftfriteuse wo ohni Öl (im Fall vo tüüfgfrornige Pommes Frites usem Sack) oder nume mit eme Mässlöffel voll Öl (im Fall vo sälbergmetztgete Pommes Frites) die lecker knuschprig tued "luftritiere"

Das Ding gsehd nid nume luschtig us, äs tönt au wiene chline Heissluftfön (oder besser gseid wiene Krümelschtaubsuuger)

Tags: Küche

Alli wo sich etz fragid warum dass de Adili trotz Ferie nid im Stande isch sini Websiite chli z'pflegä dem chani sägä dass im Hindergrund (also nid grad uf de prominäntä Startsiite) vil gscheh isch will ja morn ä wichtige Tag isch wo chli Ufmerksamkeit verdient hed. Wers interessiert der cha under de Rubrik "Hochsig" chli gu ineschneuggä

Tags: Eidrien

Heieiei, etz isch de Auguscht au schu schier dure und siehe da: de Adili hed nu gar nid vil gschribe. Irgendwie chund das Ganzä eifach chli z'Churz im Momänt. Aber ich gibe mier Müeh und versueche schu wider öppe de einti oder anderi geischtigi Erguss oder geischtigi Dünnschiss hie z'platziere

Tags: Eidrien

Ächz, me isch halt nümme 20gi Sones OpenA Air -Weekend zehrt schu a de Subschtanz. Aber was söli sägä: Äs isch de Killer gsi

Im Früehling 2007 hend äs paar Wagemuetigi beschlosse mitenand as Open Air Frauefäld z'gah. Gesagt, getan und so simmer am Fritig mit Sack und Pack und eim Auto z'vierte höch a das Open Air abgschwumme. Womer acho sind simmer grad schu um vier Schnäggä (Fr. 20.--) ärmer gsi, sovil hed s'Parkiere ufem Grasparkplatz (wichtig: Grasparkplatz und nid Schtrohparkplatz) koschtet. Schlau wie mier sind hemmer für die schwärä Sachä ä Sackwagä und äs Iichaufswägeli mitgnu und hend üs ufe langi Marsch zum Gländ gmacht. De Parkplatz isch bim Mond lings gsi, aso nid ganz, aber me hätt chönne meine daser schu z'Winterthur gsi wär - so wiit isches gsi.

Womer nach 40 Minute Laufä acho sind hed üs ä schtinkende Iigang und äs Chaos aglächlät. Nach de "Kontrolle" simmer de dinne gsi und hend üs äs Plätzli ufem Zältplatz welle sueche. Fehlanzeige - alles beleid. So simmer de mit Sack und Pack zum zweite Zältplatz und hend au dette "Full House" atroffä. Was nun? Mier hend wie tuusigi anderi au, gwartet bis die provisorischä Zältplätz ufgangä sind - zwei Schtund a de Hitz wartä isch nid de Hit. Uf alli Fäll hemmer de üse Zältplatz de schu nu erreicht und hend üsi Zält ufgschtellt und schu churz ddrübert abä isch alles bim erschte Bier vergässä gsi.

De Fritig isch de ender churz gsi, denn s'Bier hed die ziitlich Wahrnähmig ender chli verzerrt Uf alli Fäll isch s'nächschte Highlight de d'Entdeckig vom Diebschtahl vo üsne Friscoschtüehl gsi und s'letschte Highlight vom Tag isch de nu de Stagediver gsi wo uf mis Zält ghüpft isch während dem ich drinne gschlafä ha. Fazit: S'Zält dahin und de Wixer nid verwütscht...

De Samschtig isch de ender heiss gsi, einersiits s'Wätter und am Abig Prodigy. Au i dere Nacht isch schu wider Züüg wägcho - mi geliebti Zürischtuehl isch gmugget wordä *buhuuu*

Am Sunntig isches de numal heisser gsi, aber dasmal nur wägem Wätter Mier sind de gägä Abig ane au mal heizue und hend üs uf d'Duschi i de heimische vier Wänd gfreut.

Fazit: Ä geili Sach, nume isch d'Organisation völlig überforderet gsi. Wemer schu wett s'gröschte Open Air wärdä, de söttmer die zu erwartenden Leute au chli im Griff ha. Early Bird isch nid Drüütagespass und wenn pro Person 1 Quadratmeter Zältflächi rächnsich wirds au nid guet. D'WC-Situation isch au nid de Bringer gsi, zum Glück bini en Maa gsi und ha chönne aligs ufs ToiToi-Pissoir gah und ha nid müesse i sone ToiToi-Gaschammere

Tags: Frauenfeld, 2007, Open Air

S'Letschte Weekend isch ganz im Zeiche vom Zürifäscht gschtandä. Etz chamer sich fragä: "Warum schriibt de wo z'Sins wohnt vom Zürifäscht?" Nei, s'hed nid bis uf Sins mögä, aber de Adili hed döffä vom Gschäft us a Stand gu schaffä. S'ewz hend en Lounge gha wo über d'Promenade gangä isch und en Erläbniswält Energie wo d'Lüüt sich hend chönne ufem Wâdewatt (Elektrovelo) ustobä, am Hot Wire (heisse Draht) ihres Gschick teschtä und am FI-Goffer sich chönne elektrisiere lah

Ich ha ganz drüü Täg (Fritig bis Sunntig) dette usghaltä und s'Wätter isch ja de Killer gsi. Am Samschtig isches z'erscht chli zäch gsi zum afah - das sölls gäh wemer am Fritig wiene Airbus en Abschturz hed und erscht am Morge am 5i mit em Nachtbus heischliicht

Fazit: Äs schträngs Weekend i jeder Hinsicht, aber luschtig...

Tags: Arbeit, Zürich, Party

Unglaublich, sit zwei Mönet hani nüme gschribä was mier persönlich wichtig erschiint. Was chönnt de Grund sii? Kei Ahnig, aber mier schiint nid dass sovil Wichtigs vorgfallä isch dases sich glohnt hätt z'schriibe

Tags: Eidrien, News, Webseite

Sodele, hüt isch äs nüüs Kapitel a de Siite zuegfüegt wordä

Vil Spass bim schtöbere und luege

Tags: Eidrien, News, Webseite

Karfritigmorge, halbi 9ni, d'Sunne blinzlet durs Fänschter und weckt mich sanft us de Träum. Churz mal umegwallet und de doch mal de Rollladä ufegfahrä und usegeinet. Hmm, irgendwie heds doch Marderscheisse ufem Auto. Und Läärgfahrä hane ja geschter am Abig au nu. Und Gluscht uf Gipfeli isch au vorhandä - wär doch ideal weni etz chönnt zur Wohnig useschliiche und gu tankä, wäschä und pöschtele. So richtig en guete Start is Oschterweekend. Gedacht, gemacht.

5 Minute spöter bini ja schu underwägs gsi uf Cham. Dure Herrewald i die ufgehend Morgesunne inegfahrä, nid grad ufe Tacho gluegt und plötzlich schtahd doch sone Habasch mit ärä Chelle (oder isches äs Schtöckli gsi?) i de Hand uf de Schtrass und winkt mich use. Ich usegfahrä und mal d'Schiibe abbe glah. "Guete Morge, Kantonspolizii Zug. Fahrzüüguswiis, Füehrerschiin!" Scheisse, was quatscht de da? Ich glaub mich figgt gad en Elch. Bi de aber artig gsi und hanem das Gschmeus gäh. De heder de gmeint är gieng mal gu luege wie schnell dass de Unkel Adili underwägs gsi sig. HALLO!!!
Wone de wider zrugg choi isch und mier mini Sündekartei abbe bätet hed und am Schluss mier nu gseid hed dasem etz grad uf de Schtell Fr. 240.-- chöng blächä oder öbi en Iizahligsschin wett, hani de doch langsam churz mal müesse tüüf schnuufe und die ufschtiigend Wuet im Ranzä bekämpfä. Ich ha de dä Schriibkram über mich la ergah und hami eingetlich schu demit abgfunde, chund doch de ander Galosch ume Egge und figgt mich so vo de Siite a dasi eingetlich schu zwenig Biiblätter usegäh heig, a dem Charrä sig doch eh nüd Original. HALLO!!!
Heilige Scheisse, etz isch aber de Unkel Adili gad mal verwachet und hanem de müesse erklärä dasi vilicht nid grad i de Schtimmig sig zum etz über so öppis diskutiere (so under üs gseid: a dem Tüüfflüüger isch ALLES Original, us dem huere Luusbuebealter bini dusse womer da nu nid ganz legali Teili a Charrä gliimet hed). Nach chli Scharmützel isch de die Sach erledigt gsi wo mier de mini Papier zrugg gäh worde sind und de Iizahligsschiin fiirlich is Auto gwanderet isch. Ich ha mich de artig verabschidet und bi aschtändig devo gfahrä (aber au nume bisi ussert Sichtwiite gsi bi - *harrharrharr*).

Ich bi de so richtig deprimiert mi urschprünglich Plan gu umsetzä und woni so uf Cham gfahrä bi ischmer doch grad de Prediger am Speaker's Corner im Hyde Park z'London i Sinn cho wo mier einisch vo sim Chischtli obe abbä prediget hed: "Tut Busse, das Ende ist nah!" De Maa hed rächt gha: Ich ha Busse ta und s'Oschterwucheändi isch beändet gsi bevors überhaupt agfangä hed

Tags: Auto

Hüt woni heicho bi am Abig hani vo de modärnä mobile Raubritter Poscht im Briefchaschtä gha. Ich ha de Brief mal vorsorglich i d'Wohnig gnu, hamer äs Schtüehli gsuecht zum abhöckle und ha de de ganz vorsichtig und behuetsam UFZEHRT Drinne isch ganz nätt gschtandä dasi am Kanton Aargau nu Fr. 160.-- Expresszueschlag vo de Schtrass mües zahlä

Tags: Auto

Wehe äs lachet Eine vorem Bildschirm Hüt am Abig isches wider sowiit gsi, nach 6 lange, lange, lange Jahr - de Adili hed mal wider sone komische, rote Blitz useme guet am Wägrand tarnte Chaschte vo Nöchem gseh.
HIMMELHERRGOTSAKRAMENTVERRECKTVERDAMMTVERFLUECHTVERSCHISSÄ! Hend mier die moderne Raubritter vo de Schtrass vo im Name vo de Unfallverhüetig und Raserprävention a unschuldige Automobilischte ufluurid, de Schreck vom Abig chönd iijagä doch mal wider verwütscht.
Für mich absolut unverschtändlich wiemer am Abig am halbi 8i, ufere schnuergrade Schtrass, usserorts und de nu mit separatem Rad- und Fuesswäg cha uf d'Jagd nach zuesätzliche Iinahmä füre Kanton Aargau gah *pfui*
Die Burschte würdid gschiider mal am Morge früeh so ab de halbe 6i z'Sins innerorts die rassige Laschtwäge und Kurierbussli usenäh wo 500m nachem Beginn vom 50er nu mit 80 Sachä a eim verbii fahrid dases eim schier abem Trottoir blaset!!! Aber nei, me mues usgrächnet mich, ich arme Tropf, wo suscht immer mit em Zug underwägs isch und s'Auto nume mal hüt füregnuh hed zum äs Gschänk gu poschte, digital verewige *heul* *schnieff*

Weiss das öppert: Chamer so Buesse vo de Schtüüre abzieh - ich meine, schliesslich hani ja indiräkt am Kanton Aargau wider Iinahmä verschafft

Öppis Positivs heds ja glich nu: a) hani wider en Wisch für mini "wall of fame" (dette sind alli Buesse prominänt i de Wohnig ufghänkt) und b) wenn de Blitzi-Blatzi-Blutzi-Chaschtä nume dette gschtandä wär woner suscht aligs isch - denn - ja denn - HÄTTS DE CHEIB VOR LUUTER GEILEM 5-ZYLINDER-TURBOSUUGE GRAD I WALD USEBLASÄ! *harrharrharrharrharrharrharrharrharrharrharr*



Abbildung: Mobiles, modernes Radargerät der Kapo Aargau
(Quelle: Östereichisches Bundesheer)

Tags: Auto

Läck Du mier am Tschööpli - hüt hani chönne bi beschtem Wätter (eigentlich isch ja das nu undertribe: SUPERMEGASCHARFS Wätter) gu snowboarde uf Andermatt - Oberalp - Sedrun.
Am Morge simmer schu Biziite z'Andermatt gsi und pünktlich am 9.20 Uhr hed üs d'Sportbahn ufe Oberalppass ufegmännt. Dobe acho heds nume nu wisse Schnee und blaue Himmel gäh. Flugs ufe mit em Skilift und de schu hinneabbä Richtig Sässellift. Dett simmer sicher 6 Mal ufe und abe und jedesmal bim Usstiige heds komischi akrobatischi Iilage gäh
Spöter simmer de nu uf d'Sedruner-Siite und hend dette d'Pischte unsicher gmacht. Gäge Abig simmer de wider zrugg und mit de Bahn Richtig Nätsche gfahrä wordä womer nu chli uf de Sunneterrassä d'Sunne gnosse hend (drum heisst sie au Sunneterrassä bevor mier de uf de Passstrass Richtig Andermatt abegrütscht sind. Äs paar Schtelle sind ja schu schier ohni Schnee usgschtattet gsi, aber das haltet ä Snowboarder doch nid dervo ab mit Schwung drübert z'flitzä. Zämäfassend chamer sägä dass de Tag de pure Wahnsinn gsi isch!!!

Tags: Snowboard, Sun, Freizeit

Geschter isches sowiit gsi: Ich ha äntli wider äs Snowboard a de Füess gha und de Schnee isch is zittere cho. Warum denn das sone Mäldig wärt isch? Ganz eifach, ich bi sit 8 Jahr nümme ufem Brätt gschtandä und dementsprächend cool isch das Erläbnis gsi.

Am Fritigabig hani mi persönlichi Sportartikelberater i de Wohnig gha und är hed mini Usrüschtig amene Generalcheck underzogä. Schwups nu schnell d'Bindig verschtellt und äs paar Tips und schu bini Iisatzbereit gsi. Aso weni sini Usrüschtig aluege und mit minere Vergliiche, de gmerkt mer schu dasi 8 Jahr vom Fänschter wäg gsi bi Old School halt...

Am Samschtigmorge isches de bereits am halbi 6i losgangä, z'erscht mit em Zug uf Züri und de mit em Car i d'Länzerheid. Dobe acho isches leider bewölkt, chalt und windig gsi. Dezue ane isch de Schnee au nu abbecho. Aber nichtsdestotrotz hemmer üs ufe Skilift Fadail gwagt. Dette hani schu s'erscht Mal müesse schwär schnuufe, denn skiliftfahrä nach so langer Ziit isch nid grad easy-peasy Dobe isches de mit flueche und schwär schnuufe wiitergangä, denn bis zum Sässälilift isches en ender flachi Traverse gsi - Laufe, Laufe.

Bim Sässellift acho hani schu mal wider de Puls uf über 180 brunge: So saudummi, frächi und rücksichtslosi Lüüt: Schüpfe, schtosse und s'Brätt verchrätzä - keis Wunder lauft öppe mal wider eine Amok. Womer de mal dobe gsi sind isches de wider losgangä mit Traversiere und wie chönnts anderscht si - laufe. Uf de Alp Lavoz (nid lachä bi dem Namä bini de so deprimiert gsi, dasi am liebschte mis Brätt versagt hätt Aber dank de güetige Ufmunterig vo minere Begleitig hanis de doch nu mal gwagt und siehe da: Nach de zweite Abfahrt isch s'Feeling schu wider da gsi und je länger ich gfahrä bi, umso schöner isches worde. Vom Wätter hedmer das nid chönne behaupte: Schneefall, Wind und schlächti Sicht hend für mängä Schturz uf de Pischte (nid nur vo mier, sondern au vo vilne andere Ski- und Snowboardfahrer) gsorgt.

Am Abig isches de wider mit flueche und chrampfä über die wohlbekannte Traverse zrugg gangä und Punkt 5i simmer bim Car gsi. Denn is wohlig-warme Fahrschtübli igschtige und schu gli simmer in Züri gsi.

Ich glaube, ich mues mier wider chli meh Ziit fürs boardä näh - de Virus isch zrugg

Sodele, hemmer de Februar au wider hinder üs. Das isch halt schu ä komische Monet, so nume mit 28 Täg - defür bliibid am Ändi vom Lohn aligs nümme sovil Täg vorig

Ändlich ischer da - de Schnee! So schön, das macht grad Freud und Luscht uf chli Dusse sii

Hüt bini z'Örlike uf de Kunschtiisbahn gsi chli gu schlittschüendle. S'ewz und d'Stadt Züri hend d'Bevölkerig gratis uf d'Iisbahn glah, da hani doch au nid döffe fählä. Bi etz s'erscht Mal uf de KEBO gsi un d ich mues sägä: Nid leid. Äs hed äs Usse- und äs Innefäld und au d'Beiz isch choge gmüetlich. Vil Lüüt, vorallem Familie, hend das Agebot gnosse und äs isch richtig fridlich und familiär zuegangä.

Tja, etz isch das Jahr au schu ä Wuche alt und erscht etz schriibi mal wider öppis uf minere Homepage. Ich weiss, en fuuli Sau bini schu chli, ha ja über d'Fäschttäg chliFriiziit gha Aber so under üs gseid: Über die Täg hedmer doch eh kei Ziit, sondern ender anderi Verpflichtige: Gschänkli uspackä, Ässä, Schlafä etc

Ich ha die paar Täg gnosse und au @home vil Sachä chönne erledigä wo underem Jahr aligs chli liggeblibe sind Die letscht Wuche hanis au im Gschäft nu gnosse dass nu vil Lüüt i de Ferie sind, isch richtig schön gsi i de Cafeteria und au im Zug

Uf alli Fäll hani allne wo da mal wider ineluegid äs guets nüüs Jahr welle wünsche.

Am Fritigabig bini im Winterwunderland im Landesmuseum Züri gsi. Im Innehof vom Landesmuseum sind verschiedeni Schtänd ufgschtellt, Bar's, Glüehwiibude, Raclettehüttli und äs Iisfäld. Das Ganzä isch nu mit stimmigsvoller Wiehnachtsmusig und entsprächender Belüüchtig usgschtattet - mit eim Wort: Sensationell!

Mittwochmorgen wiederum in der Früh. Neben dem gastlichen Bahnhof Hardbrücke habe ich einen neuen Favoriten gefunden: Othmarsingen. Dank eines Zugsausfalles kenne ich jetzt auch die Flora und Fauna rund ums Gleis 4. Leider kam die Durchsage über den Zugsausfall erst nach ca. 12min, so dass man die Alternativrouten (z.B. via Aarau oder so) gar nicht mehr nutzen konnte und gezwungen war in der angenehmen Morgenkühle dahinzuvegetieren.

Der nächste Zug war neben der gemütlichen rustikalen Ausstattung auch zu allem Überfluss mit den anbrandenden Menschenmassen gut gefüllt, so dass sich der geneigte Schreiber in einer stehenden Position bis Zürich HB befand. Und da die S-Bahn wie immer nach der Formel "Fahrplanangabe + x Minuten Verspätung = Abfahrt" (x ist in diesem Zusammenhang eine Variable die jeden Wert zwischen 0 und unendlich annehmen kann) verkehrt, konnte ich heute folgendes Fazit ziehen: Arbeitsweg + 45min

Dienstagmorgen in der Früh. Man gewöhnt sich an die Verspätungen und auch der Bahnhof Hardbrücke (in diesem Zusammenhang von einem Bahnhof zu sprechen ist ja ein Wenig übertrieben, eher eine zugige Haltestelle unter einer Brücke, aber lassen wir das) kennt man langsam und man beginnt den Mäusen und Ratten zwischen den Geleisen bereits Namen zu geben während den Wartezeiten.

Dienstagabend in der Späte. Im Regionalzug erreicht man das heimatliche Dorf, doch als man die Türe betätigen will klebt doch ein richtig frecher Sticker an derselbigen der einem mahnt dass die Türe defekt ist. Kurz aufs Datum geschielt weiss der Betrachter nicht ob er lachen oder weinen soll: Der Kleber gibt Auskunft darüber dass der Defekt bereits am 25.10.2006 erkannt wurde (es war ja auch bereits vorvorvorgestern).

Montagmorgen in der Früh. Wie schon so oft stehe ich am Bahnhof in Sins und warte geduldig auf den für 05.56 angekündigten Regionalzug. Dieser kommt doch wie schon so oft 2 - 4 Minuten später, da sich immer wieder Güterzüge vor ihm über die zweispurige Strecke zwängen müssen.

Ca. eine Stunde später Bahnhof Hardbrücke, der selbe Pendler: Der für 7.04 gemäss Fahrplan angekündigte Zug nach Oerlikon kommt nicht. Keine Lautsprecherdurchsage dringt in das müde Hirn, einzig eine einsame Anzeige einer Abfahrtstafel zeigt an dass ein Zug für 7.09 erwartet wird. Es wird doch knapp 7.21 bis der Zug nach Oerlikon sich langsam in Bewegung setzt.

Fazit des Montags: Arbeitsweg + 15min.

Wow, etz schriibi nu überne Wecker. De Adili isch ja nid ganz suuber, aber das isch ja bekannt Ich ha sit hüt en sackschtarchä Wecker, das muesi eifach brichtä. Also, wer kännt das nid am Morge früeh: *ringring* de Wecker schället (oder s'Handy) und me fühlt sich als ob mer underme Schtei mües usechrüüche, ganz eifach willmer im Tüüfschlaf gweckt worde isch.

Ich ha mier etz en Schlafphase-Wecker zuechetah. Das isch en Wecker wo gugget wenn dasi mich schier bi de Wachgränzä befinde und mich denn sanft weckt. Derzue gidmer eifach d'Ändziit i womer wett gweckt wärdä und denn tued de Wecker ufgrund vo de Bewegige schu 30min vorhär de beschti Ziitpunkt sueche zum d'Melodie schpile. Derzue tuedmer äs Armband trägä dur d'Nacht dure. Näbem wecke chaner au nu Iischlafmusig (oder Grüüsch) machä wo hörid wemer iigschlafä isch oder me cha sogar sin Schlafzueschtand via USB ufem PC analysiere.

Wers jetzt nu wundernimmt wiener usgsehd, de cha das mal under www.axbo.ch nöcher gu agugge und das au mal usprobiere (virtuell natürlich).

Hüt am Abig hani d'Möglichkeit gha anere spezielle Vorpremiere vom nüüe James Bond - Casino Royal teil z'näh. Schu i de erschte Minute gads so richtig zu Sach - und zwar so wiemers suscht eigentlich nid vomene Bond gwöhnt isch nämli chli dräckig und bluetrünschtig. D'Stunts sind hammerhert und die digitale Effekt sind ender i de Underzahl (nid so wie im letschte Bond-Film, das isch ender kitschig gsi). De Darsteller isch allererschti Sahne, de macht öppis här und bringt chli en spezielli Atmosphäre i Film - für mich ischer en gueti Wahl, kei Fraag. Au dass de Bond mal chli verschlagä usgseht, mit Schnitt im Gsicht umelauft oder aber au nid immer wie us de Chleiderchammerä dahär chund, isch am Film zueträglich.

Fazit: Empfählenswärt *daumenhoch*

Eigentlich söttmer ja erwarte dass Ändi Novämber s'Laub bereits dunne isch, de Schnee schu d'Bärgä befruchtet hed und alli Auto schu mit Winterpneu umefahrid. Aber d'Realität gsehd chli anderscht us: S'Laub hanget nu, i de Bärge heds meh Wanderer als Schiifahrer und d'Chromfelgefraktion tummled sich nu mit Summerpneu uf de Strassä.

Ja Du, heitere Cheib, ha mit Schreckä feschtgschtellt dass de Adili ja schu länger nüme gschribe hed. Sachä gids...

Aso ich bi nid i de Ferie gsi, neinei, ich bi flissig am wirke und Lüüt verruckt machä (wie chönnts au anderscht sii)

Sit em 03. Juli bini amene nüüe Arbetsort mich am Iiläbä. Sit denn schaffä nämli nümme offiziell uf de Planig sondern i de Beratig, genauer gseid bi ewz (Elektrizitätswerk Zürich) im schöne Örlikon vis à vis vu de Radrännbahn als Energieberater. Etz chund sicher nu d'Frag was macht en Energieberater?! Also, für alli g a n z l a n g s a m zum mitschriibe: En Energieberater beratet Chunde im Zämähang mit Energie, isch doch klar. Naja, das gahd nume als Oberbegriff dure, in Tata und Wahrheit tued en Energieberater nämli de Chundekontakt pflegä, är isch Aschprächperson, Blitzableiter und Uskunftsdienst, Ideeäbringer, Ratgäber, Sündebock und und und. Nei, im Ärnscht: En Energieberater macht de ganz Tag Beratige am Telefon, lauft i de Stadt ume und bsuecht Chunde, schriibt Bricht, tued d'Tarifrevision begleitä, kämpft mit em SAP, erarbeitet Vorlage und Konzept, wärtet Date us und macht Vorschläg, unterstützt Kampagn, vertritt s'ewz i Projekt, nimmt repräsentativi Pflichte wahr und und und.
Äs bitzli klarer? Ok, wenns das langet denn bini z'fridä. Alles in allem isches en abwächsligsriiche Job, kei Tag isch glich wie de ander und immer wieder trifft mer uf Problemstellige und Ufgabä wo eim useforderid. Au s'Iigwöhnä isch sone Sach: Vili nüüi Sachä, s'WC sueche, alli Trickli kännälehrä, nume Lüüt kännelehrä, Nämä bhaltä, Gsichter nid vergässä, Ablage erfragä und und und. Jede wo schu mal en Stell gwächslet hed weiss wasi meine
Mini Teamgschpänli sind sehr hilfsbereit und machid eim so de Iischtig au vil liechter. Mier sind sächs Lüüt i zwei Büro und das isch optimal. Au de Arbetsplatz isch optimal: Fänschterplatz (jaja, wie de woni i de Schuel schu immer gha ha), en schnelle PC, Internet, Telefon, Call-Center-Hörer, Ussicht uf s'World Trade Center, d'Radrännbahn und s'Hallestadion, en Cafeteria und und und.
Also, das wärs mal gsi vo mier. Wer mal i de Nöchi vo Örlikon isch söll doch schnell a de Tramstrass 35 gu lüüte, de chömmer en Kafi gu nah weni ume bi

So zwüschet Tür und Angel hani schnell welle mitteilä, dasi nu uf dere Chuglä bi und dasi schlichtwäg nu kei Ziit gfunde ha, öppis Schlaus hie ane z'schribe. Ich wirde das am Weekend nu nacheholä, denn i de Zwüscheziit sit em letschte Iitrag isch viel Nüüs passiert

De Summer isch ja fett warm. Drum hanis nid chönne underlah, en Pool z'chaufä Naja, Pool isch übertribä: Äs isch äs Chinderbassin mit schtolzä 2.40m Durchmässer und 60cm Tüüfi. Hend ja nume 700 Liter Wasser drinne Platz. Und mis 13-Jährige Gummiböötli. Irgend sone Frächdachs hed gmeint, weni im Böötli umetriibi gsächs us wie wenn äs Schwimmbuddha im Pool wär ("Komm, reib meinen Bauch!")

Hüt bini mit em Hobbyschwager und sinere Fründin uf Rust i Europapark. Am Morge früeh isches losgangä, schnell is Ruumschiff ghüpft und via Prattälä (pipi- und Kaffeehalt) simmer schu am halbi 9ni ufem Parkplatz Sektion K / Reihe 16 iigfahrä. Wers kännt weiss dass das en Platz im vordere Viertel vom Parking isch. Schwupps zum Hauptiigang und dette hemmer au nume ca. 500 Nasä atroffä. Tja, äs sind halt nu niene Ferie gsi und am Abig am 5i hed Düütschland gägä Argentiniä gschpillt. So isch s'Bsuecherufkomme au de ganz Tag nie übermässig gsi und jedi Bahn hedmer under 10min Aschtaah chönne bewältigä. Mängisch hedmer sogar chönne i de Wägäli sitze bliibe will eifach niemert agschtandä isch. Vu de Attraktione här hed sich sit mim letschte Bsuech im Summer 2005 nid vil tah, höchschtens Detailverbesserige und das wars doch auch schon. Einzig d'Priise sind langsam happig: €28.50 fürnes Erwachsnigs (nei, mi Behinderteuswiis hani bi Gott nid mitgschleppt) und au im Park isches chli tüür, vorallem s'Trinkä und so. Aber defür wird au öppis botä, au wenn d'Bahnä wo mier nu Adrenalin bringid langsam dünn gsähet sind.
Nach de Öffnig simmer wie die Irre ab durch die Mitte und sind grad als Erschts uf dä Silver Star, natürlich i die erscht Reihe. Das isch halt schu immer wieder geil, das muesmer erläbt ha. Nacher simmer a allne suschtige Bahnä nachä und nachem Mittag wos de richtig heiss gsi isch, hemmer entdeckt dases bi de nüüe Atlantik Splash en Plattform gid womer sich vom Schiffli cha la vollsaue (und mit vollsaue meini das öppe 500 Liter Wasser Vollgas uf die Plattform sprützid und mer innerhalb vo Sekunde pitschärdänass bis uf d'Underhose isch. Aglockt vo üsem Gaudi hemmer plötzli 30 Nasä mit düütsche Flaggä dette gha wones riese Gaudi gha hend. Miss Wet T-Shirt-Wahl uf Deutschländerart halt... Ich ha de nach zig so Ladige Wasser mal müesse mis T-Shirt, d'Socke und au mini Schueh uswindä. Sone Abchüelig isch schu geil und im Summer chamer das doch machä.
Aschliessend simmer nu chli gu Bahnefahrä und wo de dä Park zueta hed simmer au hei, naja nid ganz, mir sind z'erscht nu i Burger King und denn heizu gflogä (zum Glück isch d'Autobahn unbeschränkt, de chamer au mal s'rächtä Pedal Richtig Bodebläch drückä *grins*).

Hie wär nu s'Video zum füechte Vergnüege, ufgnuh vo üsem Starfilmer: EuropaPark - Splash

Hehe, wer dem Link etz gfolgt isch, de erwartet chli *blabla* Nei, ganz so schlimm isches nid, mues doch dä Lüüt mitteile dasi Ferie ha und wiemer gsehd hani au vorig Ziit, suscht hätti ja nid a de Homapage umebaschtlet (So geil, s'Laptop ufem Sitzplatz). Die Wuche gahd nu Einiges, so under anderem en Usfluug uf Düütschland und en Usfluug i Europapark (au in Düütschland *grins*).

Hüt isch ja schu ä Hammergeile Tag gsi! Weisch, de Adili, gäll, de mal wider...de Adili isch gunes Auto probefahrä. Jaja, nid daser de Gäldschisser hätt oder so, nei aber ich ha nid chönne widerschtah und ha müesse (amene innere Drang folgend) mal chli gu schnuppere wie dases wär wemer äs nüüs Auto würd ha. Nid irgendeis, nei sondern de Ford Focus ST!!!!

Ich gäll, uf Chriens zur Garage Willy und ha dette döffe de blaui Focus ST uslehnä. Nach churzer Iifüehrig und äs paar Tips hed mier de nätti Herr de Schlüssel i d'Finger drückt und gmeint: "Viel Spass!" De Adili igschtige und mal vorsichtig de Motor aglah: *Wüdüdüdüdü - BROOOM* Vorsichtig das liechtgängige Getriebe igraschtet und de bini schu mit em typische 5-Zylinder-Grüüsch (tönt wemer gnau anelost wiene Audi-Motor, so vomen alte 80er oder so) Richtig Strass grollt. A de Usfahrt schu die erscht Überraschig: Churz ufs Gas und schu heds voreinne *Wuuuuusch - Pfiu* gmacht und furt bini gsi. Ich bi de dur Chriens dur (wunderbar, me cha sogar im 5te und 6te Gang im 50er fahrä, ohni dass würgsch und tuesch) Richtig Schappe-Center und denn Richtig Eigenthal über die schmal Schtrass. Ich sägä nume eis: Das Auto muesmer eifach erläbt ha, so viel Spass hani nu nie mit eme Auto de Hoger uf gha
Woni dobe gsi bi, bini wider Richtig Schwarzebärg/Malters durab und denn übers Ränggloch wieder schweren Herzens i d'Garage. Dette hani de Schlüssel wieder deponiert und nu chli plauderet.
Aschliessend isch de Adili wieder i sis schwarze Ruumschiff gschtige und schu bim Abfahrä heds mich dunkt daser a de Usfahrt nid furt chund

Och ja, was macht mer nid alles wemer i de warme Sunne am Abig im obligate Fiirabigschtau schtahd...me gugget use, geiferet a "Rollbratä" (Inlineskaterinnä hinnenachä und lost chli Musig *ümzäümzäümzä*. Tja, und da mer ja en Autoradio mit viiiiile Chnöpfli hed, muesmer halt mal dra umeschpile. Churz uf d'Taschte "SQEQZ" drückt und.........*BOOOOOOOOOOOOM* schlahd eim de erschti Bassschlag usem Subwoofer diräkt i Rügge. Und schu de zweiti Schlag drückt s'Ohreschmälzli diräkt is Trommelfääli. Sagehaft, sogar de Rückschpiegel zitteret

Und die Moral von der Geschicht: Tastendrückerei mag das Ohrenschmälzli nicht!

Am Samschtigabig hani mal wider öppis für mis Kulturgwüsse gmacht und bi d'Opere "Nabucco" vom Giuseppe Verdi uf Basel i St. Jakob Park gu gugge. Mit eim Wort: "Hammer!" So öppis chamer nid beschriibe, so öppis muesmer eifach mal gseh ha. D'Atmosphäre, s'Wätter, d'Lüüt - alles hed gschtumme.

Eröffnungsmatch...

Ändli isch sie da, d'WM hed agfangä. Nid dasi de ultimativi Fuessballfan bi durs Jahr dure, aber anere WM da lahni mich doch chli la aschteckä vom Ganzä, wahrschindli au wills um öppis gahd und nid nur umekugelät wird

Summa Sumarum nach 90min (ok, 94min): Guets Spiel, vil Tor und ä düütschi Mannschaft wo vore guet und hinne nid so guet isch Das chönnt de schu nu äs paar heissi Momänt i nächschter Ziit gah.

Heilige Cheib, ich bi schu ä schlächte Siech. Nie schriibi öppis uf mini Homepage, tststs. Sit mim letschte Iitrag isch shcu mängs gangä:

- Ha s'Auto im Service gha
- Weiss jetzt weni mi letschti Arbetstag bi mim momentane Arbetgäber ha
- Ha mier ä Nachberschaftsärgerer kauft
- Ha müesse nüüi Pneu bschtelle
- Bi ä Buuschtell am fertigmachä


Naja, mis Auto isch au wider mal im Service gsi. Leider isch ussert äme kaputte Nummerliecht nid grad vil Spektakulärs gsi. Defür hani äntli wider d'Summerpneu druffä

I dem Zämähang hani mier etz nu müesse nüi Pneu bschtellä, da die Alte schlicht und eifach zwenig Grip hend und bi Rägä zimli gfährlich sind. Ich ha mich etz für Pirelli P Zero Nero entschide. Am Zischtig chani die gu druuf machä *freufreu*

Bim Schaffä heds grad vil Nüürige gäh: Wie vil ja vilicht schu wüssid, tueni uf Ändi Juni s'Kapitel Planig nach 13 Jahr ändgültig begrabä. De Bruef hed sich immer meh riichtig Güselplanig und Administrative Wahnsinn entwicklet und das macht mich nid grad glücklich. Und wenn eim d'Freud am Bruef fählt, denn isches für alli Beteiligte am Beschte me zieht en Schlussstrich, au wenns nid ganz so eifach isch. Ich bi etz sächs Jahr meh oder weniger i de gliiche Firma gsi und äs isch ä gueti Ziit gsi. Etz gahds nu drum zum en guete Abgang machä und bis a mi letschti Arbetstag (de isch am 23. Juni 2006 / 17.00 Uhr) nu Vollgas z'gäh.
Abem 03. Juli 2006 wirdi denn amen nüüe Ort schaffä, chli wiiter wäg als etz, aber imen ganz andere Metier. Halt, nid ganz andersch, eifach chli öppis anders. Am Strom als Solches blibi treu Meh gids de sobald ich mal dette agfangä ha...
Suscht bini etz langsam aber sicher am fertigmachä vu de gröschte Buuschtell im Momänt. Sie beschäftiget mich etz sit em Januar 2005 und etz gsehds langsam us als obs fertig wird, au wenn d'Gebäudeautomation nu nid ganz fertig isch und au d'Stromer nu ca. 22 Siite Pendänzä (Arial 7 isch d'Schriftart ) z'erledigä hend. Aber ich bi fescht überzüügt dases guet chund.

Mini Nachbuure hends ja nid grad immer liecht mit mier. Aber etz isch de wirkli langsam unerträglich mit mier Ich bi sit zwei Wuche schtolze Bsitzer vomene färngschtüürete Banzinauto. Das macht en Heidespass und au ä Höllekrach, hihi. Wirde de bi Ziit und Glägeheit mal äs Phöteli ineschtelleä. Die technische Date sind wie folgt:

Typ: Glattbahnrenner
Motor: 2,5ccm
Leistung: 1,8PS
Endgeschwindigkeit: ca. 60km/h

Bis etz hani ca. 4,5 Tänk dureglah, aber so richtig abstoffe chani nu nid, derzue muesi de Motor nu chli iifahrä

Sodele, etz isches au schu wider dure: Mi diesjährigi WK isch am letschte Fritig fertig gsi - juhu. Drüüehalb Wuche sind schu ä langi Ziit so in grüen. Aber jetzt hani äs anders Problem: Sit em Fritig muesi mich wider jedesmal frage wasi söll aleggä

Am Fritigabig simmer nu am Jodelklub Heimelig as Buffet gu hälfä. Isch nu luschtig, aber au schträng gsi.

Am Samschtig hani als Erschts mal wider mi jährlich Termin bi de Frau Zahnfee gha *schauder* Aber zum Glück bini ä schlächte Patiänt, ussert Zahnstei hed sie nüüd gfunde bi mier *Schweissabwisch* Nacher bini nu i Hornbach gangä und ha dette mal wieder Garteartikel gepöschtelt, nid nume Sachä zum hagä, nei au en Raseentmooser isch drunder gsi. Das isch sones Ding wo usem Rase s'Moos und abgschtorbnigi Sachä usegrüblet. Chum zrugg hanis de grad müesse usprobiere und siehe da: D'Maschine und ich hend innerhalb vu 2 1/2h ä ganzä Container voll Moos und suschtige Güsel usem Rase abtransportiert. Am Abig isches de cho gu rägnä und das hedem hoffentlich grad au numal guet ta. etz sötter wider Luft zum schnuufe ha

Sit mineletschte Iiträg isch ja au schu schier en Monet vergangä. Nid dasi sone fuule Sack worde wär oder so, nei, ich bi im Militärdienscht. Mier sind nu die Wuche in Bärn am Botschafte bewachä (oder besser gseid devor stah und luege dass niemert sone Botschaft mitnimmt ) Äs isch nid en schlächte WK, me isch immer um Lüüt ume und Bärn isch wunderbar. Negativ isch ender dass d'Schichte sehr unregelmässig sind (17h) und mer extrem vil Baggage uf die jewilige Pöschte mues mitschleppä: Schutzweschtä, Gewehr, Rucksack, Funkgrät, Maglite und suschtige Grümpel. Aber äbä, die bescht Motivation hani ganz am Afang vom Dienscht gha: Ich ha ghört wieviel Reschdienschttäg ich nu ha: Genau 16 nach dem WK, das heisst de nächschti WK isch min Letschti, aus, Ende, vorbei

Mis tierliebende Härz heds eifach nid chönne überseh: Eines Mittags gsehni doch ufere Websiite en Wärbig für Huustierli und ich ha mier die grad müesse bschtellä. Neinei, nid grad wider über mich härfallä, die Tierli sind nu in Eiform imene Büütel inne. Komischi Sach nid? Ender weniger komisch, eifach cool. Ich ha mier Sea Monkeys kauft, das sind chli Chräbsli wo imene Aquarium umeschwimmid. Wer meh wett erfahre cha under folgendem Link mal gu gugge oder grad au bschtellä: geschenkidee.ch Sobald die Tierli mal mis Aquarium bevölkerid, denn wirdi mal äs Phöteli inestelle. Momentan sinds nu im Büütel und wartid druuf bisis Morn is nüüe Aquarium setzä. Aso mit im Büütel isch gmeint, dass dette d'eier dinne sind und denn wenns is Wasser chömid tüends de innerhalb vu 24h schlüpfe. Aber ich wett ja niemert langwiile, drum luegid am Beschte sälber mal drii

Wie alli Jahr isches etz de wider so wiit, de Adili mues i Militärdienscht. Wie alli Jahr stahd die obligati Aaprob vom Material a. Und wie alli Jahr spannts da und dett chli meh oder weniger. Das Jahr muesi gu d'Hämmli umtuusche, die sind chli gar äng afigs (Naja, die hend mit mier schu d'RS gmacht, also bitte und das isch gli 10 Jahr sithäär). De Rescht sött gah, au d'Schueh (oh Wunder) Etz muesi demfall nächscht Wuche einisch is Züüghuus uf Zug gu de Schrott umtuusche. Hends ächt nu so Sachä i minere Grössi? Naja, uf alli Fäll muesis nümme solang agugge, nu de WK und nächscht Jahr nu schier en Ganzä und de hani mini Dienschttäg erreicht udn wirde pensioniert

Hüt bini am Autosalon in Genf gsi. Früeh am Morge bini mit em Grossmeister K i mim Ruumschiff gschtartet. Leider isch s'Wätter und d'Strassebeschaffeheit nid optimal gsi, so dass mier bis uf Dagmarselle en kannpi Schtund bruucht hend, normalerwiis gahd das vil schneller
Womer de am 10ni in Gänf iitroffe sind hemmer (Achtung, es folgt ein Geheimtip) under der Halle 7 parkiert und hend nur ei Stäg ob üs schu chönne i Salon iitauche. Z'gseh heds rächt vil gäh und vu de Lüüt här isches grad agnähm gsi. Was ufgfallä isch: Vili Lüüt wo fotografiert hend und dementsprächend Rücksicht druuf gnu hend öbs eim is Bild latschid oder nid. Das isch vor 6 Jahr bi mim letschte Bsuech ganz andersch gsi.
Ich bi de au nu i mis momentane Traumauto ghöcklet (nei, kei M4 oder so), nei en stinknormale Ford Focus. Naja, wemer en orangi Lackierig und 225PS under de Huube als normal aluegt...Leider wird das au äs Traumauto bliibe, ha äbe nu nid im Lotto gwunne. Nachem Bsuech i de VIP-Lounge vo BMW simmer de schu langsam wider heizue, so dass mier nachem obligate McDonalds-Halt, drüü mobile Radarkontrolle und 6 Blitzchäschte gäg die 7ni wider im Aargauerländli gsi sind.
D'Usbüüti vo dem Tag isch nid schlächt gsi: 150 Photeli. Nachem ussortiere hani die i d'Gallery inegwürgt. Wem eine äs Photeli sehr guet gfallt und är das gärn i 1600x1200 Pixel hät (HInt: Bildschirmhindergrund) denn eifach mäldä...

Am eim Tag zwitscherid d'Vögäli, d'Hormon machid sich au wider bemerkbar und schu *zagg* heds en Flatz Schnee dusse dases sogar de krise- und sturmerprobti Innerschwiizer im Aargau hinneuseschlahd. Sagehafti 51cm Nüüschnee hend sich i mim Garte iignischtet, meh weder alli drüü vorangegangnige Winter zämä. Sogar de Parkplatz hedmer nümme chönne befahrä, wemer nid en Rally-Usbildig i de Innerschwyz gnosse hed Gwüssnig sind glaubi etz nu taub und fragid sich warum dasi en schwarzi Pflueg-Fräsi als fahrbare Undersatz bsitze. Uf alli Fäll hemmer de Plesche gha mit de andere Quartierbewohner döffe mit em Traktor zämä üse Landeplatz frii z'schuufle.

So hed sich mi Garte präsentiert:

Das vergangnige Weekend simmer i Black Forest (aka Schwarzwald) genauer uf Höchenschwand, ca. 25km vu Waldshut (D) entfärnt chli gu Wellnesse und relaxe. Am Areisetag heds gseicht, aber s'Hotel isch chli und putzig gsi und au s'Dörfli sehr härzig. Will aber das Dörfli uf 1015m obe gsi isch, isches de nid nume bim Rägä blibe. Äs hed plötzli afä Schnee abbelah dases en wahri Freud gsi isch Am Samschtig hemmer en Usfluug welle machä uf Waldshut, aber am Morge heds vorem Fänschter ä so usgseh:

Naja, nüd bsunders hemmer üs dänkt. Mier sind de gu z'Morge ässä und denn mal veruse gu gugge. Och, mier hend de z'erscht gluegt under welem Schneehuufe sich s'Auto verschteckt. So hed das nach ca. 15min Schneeschuufle afig usgseh:

Äs hed de nu en wiiteri halb Schtund bruucht bis s'Auto frii gsi isch udn wiiteri 10min bises uf de Schtrass gschtandä isch. Ander hend weniger Glück (oder fahrerisches Können?) gha, die hed nämli de Trax müesse friibäggerlen