Heute war wieder einmal „Tag der grossen Jungs“ - das heisst es war SMC Trophy „under the Bridge“ in St. Gallen. Anlässlich dessen wurde der 6x6 seiner ersten Schlammtaufe unterzogen, da es der PEST nach 5m die Antriebswelle zerissen hat

Tags: Bauteil1, 6x6, SMC

Heute war es soweit, das Kraftwerk für meinen Crawler (die PEST) ist aus den USA angekommen und eingebaut worden. Es handelt sich um einen handgefertigten (handgewickelten) Motor mit 45T (Turns) aus dem Hause Holmes Hobbies und ein TorqueMaster BR-XL Fahrtenregler ebenfalls aus dem Hause Holmes Hobbies. Ein wahres Prachtsgespann - und sooo selten!

Ebenfalls habe ich die Fahrmaschine auf 3S-Lipo’s umgestellt, so habe ich nun 11,1V zur Verfügung um Druck auf die Felsen zu machen

Tags: Crawler

Heute hat das Crawlen definitiv den Kanton Uri erfasst - wir haben die Steine dort gerockt und dies nicht zu knapp. bibi mit dem „Steifrässer“ und eidrien mit der Pest (Prähistorisch evolutionierter simpler Terrainkriecher).

Tags: Crawler, Uri

Hüt, nach langem Wartä hani mis nüüschte Schätzli äntlich übercho - mi 6x6 Laschtwagä für i Dräck. Heieiei, bin ich freudig erregt drübert

Tags: Bauteil1, 6x6

Da mier vom OK alässlich vom SMC nid zum Fahrä cho sind, hemmer en letschti Comp veraschtaltet und nu einisch die beschte Fahrer gholt und la mitfahrä. Für mich und mi Hobbyschwager isches en Supertag gsi, simmer doch im Vorfäld vo de Comp für üsi beide Autos mit Hohn und Spott iideckt wordä. Mis Auto heig en z’chline Akku und mier gieng de Saft us und s’andere Auto gsäch so massiv und schwär us dases chum de Schtei uf chäm. Aber wie immer, so Sache görid zumene Vorgeplänkel und ich sägä immer: „Abgrächnet wird am Schluss!“ Und so isches de au gsi. Im Gsamtklassemänt bini 3. wordä und im Einzeklassemänt bini 1. vo de Standard-Klass gsi. De Dani isch im Gsamtklassemänt 7. wordä und im Einzeklassemänt 3. Das hed üs und üsne Auto wieder rächt gäh und de andere hoffentlich au mal zeigt dass halt d’Technik nid immer ufe erschti Blick erkännbar isch, hihi.

Tags: Crawler

Hüt hemmer de ultimative Event vom jahr duregfüehrt: De SMC (Swiss-Mountain-Crawl). Nachdem mier am Fritig bi strömendem Rägä ufgschtellt hend und die drüü Sektione mit Brüggä, Abschrankigä und suschtigem Beigemüse ufbuuä hend, simmer hüt vom Aadrang und de positive Schtimme überwältiget wordä. Ca. 200 Lüüt, 70 aktivi Fahrer und äs Wätter wo sich vo de beschte Siite zeigt hed, hend de Tag trotz Stress für üs vom OK zumene Erfolg wärdä la. Sogar Fahrer us Düütschland und Öschterrich hemmer gha - fürne erschti Veranstaltig i dem Usmass und Rahmä i de Schwiiz ä beachtliche Erfolg.


Das Bild zeigt d’Sektion 2: The Garden...

Meh Infos und Bilder gfindid ier uf de Homepage vom SMC: www.swiss-mountain-crawl.ch

Tags: Crawler, SMC

Sodele, etz isch au s’Video vom First Swiss Crawler GTG online...viel Spass demit.

Tags: Crawler, Swiss, GTG

Sodele, etz bini grad zrugg vom erschte Swiss Crawler GTG wo sich so spontan im Forum (www.rccrawler.ch) organisiert hed. Äs hend sich am Sunntig am 10ni am Morgä doch tatsächlich 6 Lüüt und ä Hund gfunde und sind mit dene chline Schteikrabbler doch tatsächlich gu mitenend umefahrä. Äs isch g’fachsimplet, Ideeä und Informatione ustuuscht und au vil gfilmet wordä. Das schreit schier nachere Wiederholig!

Tags: Crawler, Swiss, GTG

Sodele, etz hani sit am Fritigabig ä nüüi Kamera wo bis zu 1’000 Bilder pro Sekunde cha machä. Ich ha etz mal die verschiednigschtä Fahrzüüg us mim Chäller la vor de Kamera posierä und das chline Video isch druus entschandä. Vil Spass...

Tags: Casio, Exilim, SlowMotion, SloMo, Gartechrüücher, Slash

Sit hüt bini schtolze Bsitzer vo mim langghegte Traumauto - amene Kyosho Rockforce 2.2 Crawler. Das Ding isch darum einzigartig, wills vo Huus us Schnäggägetriebe i de Achse hed und sini Hinderachs cha sperrä, entkopplä oder als 4x4 cha la fahrä. Ich ha das Ding als Occasion ufeme Chiesparkplatz im tüüfe Aargau chönne gägä Bargäld übernäh

Tags: Kyosho, Rockforce, Gartechrüücher

So imene Afluug vo Wahnsinn hani mal de Hilux wieder füregnuh und ha mal d’Schädä vom Supercrawl besiitiget. Woni grad so dra gsi bi, hani mier doch grad nu chli meh Müeh gmacht und das Auto nume la verroschtä. Mittel sind näbä Sekundechläber au Vogelsand, Farb und guete Willä gsi.

Etz gsehder wirklich „used“ us

Tags: Hilux, Ratbuild

Nachdem sich de Pinzi so wacker gschlagä hed am Scalerun alässlich vom Supercrawl, so hani beschlossä dem armä Schliicher nu chli äs paar Äxtras ane z’mechä resp. z’implantierä. So hanem die giftgrüene Links mattschwarz gmacht, d’Hinderachs modifiziert und ä schaltbarä 2WD/4WD-Getriebeteil iibuä

Tags: Pinzi

Nachdem ich mit de Fahrleischtige vom TCS-Tuber-Chassis nid so z’friedä gsi bi, hani useme Axial SWX Chassis, Traxxas Big Bores und vil Geduld de YACK (Yet Another Crawler Karre) ufbuuä.

Tags: YACK

Pfingschtä. Wer mag die paar friie Täg nid au. Mier um so meh, denn für üs Rockcrawler isches das Saisonhighlight schlächthin. A Pfingschtä finded nämli de Supercrawl statt - quasi d’Europameischterschaft im RC Rockcrawling. Mier also uf Fischbachtal (D) ca. 30km underhalb vo Darmstadt. Dette hemmer üs inere Gruppe vo 70 Lüüt mit de Beschte vo de Beschte gmässä. Leider heds ufgrund vo fahrtechnische Pannä nid so wiit füre glanget - Platz 24 und 25 sinds am Schluss. Aber de Spass zellt und die zwei Tag under Gliichgsinnte z’verbringä und Kontakt z’chnüpfä isch super. Und s’Beschtä: S’Material hed ghebt (hend sich also alli Schtunde im baschtelchäller glohnt, hihi).

Fötäli gids under folgendem Link: Flickr

Tags: Supercrawl 2009

Hüt simmer nu chli gu trainierä i Schteibruch, damit mier au am kommende Wucheändi fit und munter sind. Äs isch schweineheiss gsi, aber Spass hemmer gha. Und s’optimale Setup hemmer glaubi au gfundä für üsi Wägäli.

Tags: Training , Supercrawl 2009

Äs isch ja schu guet und rächt wemer mit de Gartächrüücher cha underwägs sii, aber mängisch muesmer eifach chli d’Sau uselah. Drum hani mier imene Afall vo Wahnsinn ä 1:8er Traxxas Slash Short Course Racing Truck zueche tah. Tja, und natürlich chas nid Original bliibä, nei, de Adili hed schu ä Brushless Motor, äs Carbon Chassis und anderi Pneu druffä

Das Ding flüügt mit rund 65km/h bi üs dure Rasä (nur mit Hinterradaatrieb) und verchlüpft nid nur de Nachber

Tags: Slash

I mim Lieblingsforum heds ä Wettbewärb gäh - wer buut s’rattigschtä Auto? Ich natürlich nid fuul und ha dette au mitgmacht mit mim Hilux. Gwunne hani nid, aber ufem füüfte Rang (vo 12 Teilnähmer) bini nach de Forumsumfrag und -bewärtig wordä. Nid schlächt, oder?



Fahrä tueds au, hihi.

Tags: Ratbuild, Hilux

Wies aligs so lauft im Läbä - unverhofft kommt oft! Ich ha mal im Januar binere Auktion i mim Lieblingsforum (Link) mitgmacht. Dette hed äs Mitglied ä Rohrrahmä verschteigeret und de Erlös isch amene Chinderheim zuegflossä. Ich ha de am Schluss nu de Zueschlag übercho und schu gli drübert abä isch de Rahmä bi mier gschtandä. Ich ha de mal chli baschtlet und am Schluss isch sogar ä fahrfertigi Maschine use cho









De „Jägermeister“-Crawler isch au wieder sehr guet und mit ämä guete Stand der Technik usgschtattet. Erschti Tescht’s hend ergäh daser extrem vil Potential hed. Bi de Fäderig isch dasmal äs Half-Droop-Setup zum Zug cho - das heisst, d’Fädere sind imene Zueschtand dass sie chönd iifädärä (also uf Druck reagierid) und zugliich au chönd usfädärä (also uf Zug reagierid). Hed nu chli Überleggigsarbet koschtet, aber äs isch schlichtwäg lohnenswärt gsi

Tags: ETFEGZ

Wasmer vo Kollegä nid alles überchund?! Hie äs Schätzli usem Jahr 1983 wo sis Dasii imene chalte, muffigä Chäller gfrischtet hed und jetzt sii zweiti Früehlig bi mier erläbt



Ich ha die Karosserie mal uf mi CR-01 druuf tah. Guet gsehder us de Subaru - nid?

Tags: Retro, Tamiya, Brat

Hani doch erscht chürzlich äs ganz äs heisses Süppli kochet damit mis nüüe Wägäli ganz guet usgsehd. Aber guggid doch schnell sälber.







Au absiits vo de Schtrassä mues zu Rächt und Ornig gluegt wärdä. De SCX-10 isch defür ganz guet grüschtet: Permanäntä Allrad, 1,9“ Proline Flatiron Reifä, ä Novak 55T-Motor und Fädärwäg mit doppletä Fädäpaket begränzt. Dezue chund nu Belüüchtig vorne und hinnä sowie äs Blinkliecht ufem Dach - Funktionsfähig verschtahd sich natürlich.

Tags: SCX-10

Sunntigmorgä. D’Vögel zwitscherid im Gartä und läärid s’Vogelhüüsli. De Schnee sünnelet au chli am Bodä und d’Sunne schinnt dases ä wahri Freud isch. Doch halt, was stört die Idylle? Ä sältsame Mänsch, nu sältsamer Bekleided isch au underwägs.



Was hed ächt de komisch Vogel vor (und nei, är gahd nid as Vogelhüüsli). Är chochet äs ganz heisses Süppli.



D’Zuetatä sind ganz eifach: Chli Abflussfrei vom Migros, ä Glasschalä und giftgrüen eloxierti Beadlock-Ring vomene Autöli. Das Grüen hed nämli nid so rächt wellä passä zum nüüe Projekt und bevormer mit de nüüe Farb dra hed chönne hends müesse blank sii. 45min la chöchelä, mit Wasser abschmöckä und fertig isches gsi.

Doch für was hed de Chefchoch ächt das bruucht? Aber nid schu wieder fürnes nüües Autöli? Aber logisch, us de USA isch schu wieder äs Päkli cho - dasmal mit em Axial SCX-10, amene 1,9“ Scale-Crawler im Massstab 1:10. Das wird äs Sahnehäubchen, drum au de Ufwand mit de Friiluftchuchi.

Hie nu zwei Fötäli vom aktuelle Schtand:



Das isch etz s’nüüe Projekt. Ä Leiterrahmä, Doppelfädärä mit Stossdämpfer, äs Getriebe mit Rutschkupplkig, ä 55T-Novak-Motor, äs Hitec-Servo und und und.



Und das sind etz mal d’Felgä. Die schwarzä Ringli sind mal Grüen gsi hüt am Morgä

Etz isch grad Baupause bis am nächschte Wucheändi. Mues die ganz Elektronik nu iibuuä und d’Karrosserie schprützä - s’Thema vom Wägäli isch „Old School Alert“. Me daf gschpannt sii

Tags: SCX-10

Wahnsinn, erscht hani ja nu gschribe vom Rohri - und etz, nachdem wieder mal äs Päckli us de USA iitroffä isch, ischer fix und fertig. Us de USA isch nu de letschti Schrei zu mier cho - ä Brushless-Motor und Regler - das Ding hed meh Chraft als de Huushaltmixer, cha aber im Milimeterbereich fahrä. Hammer das Ding. Die erschte Meter heder wägem Wätter halt im Chäller gmacht und siehe da - är gahd über 55° Schtiigig ufä (und bliibt au schtah dank de Handbräms). Aber luegid doch sälber:

Tags: Rohri

Etz hani uf Ändi Jahr erscht schu wieder äs Wägi fertiggmacht (wer sich erinneret - de Chäfi!), aber irgendwie hani immer nu Baschtelwuet i mier innä. Also hani mal wieder chli ume gschtöberet i de amerikanische Onlinelädä und schwupp-di-wupp hani ä Bschtellig abgsetzt gha. Irgendwenn heds de amene Samschtig glüütet a de Huustüre und äs Päckli nus de USA isch inegloffä. Was isch de drinnä gsi? Das da:



Was das söll gäh? Tja, ca. 8h Schtund schpöter hed das Ding so usgseh:





So gsehd also äs Tuberchassis us. Ich ha also en Axial RTR mit eme TCS Edge Chassis „verhüüratet“ und nu chli äs paar Änderige duregfüehrt:

- Umbuu uf 4-Link-Ufhängig hinne und vorä
- Umrüschtig ufene Skiplate mit inneliegende undere Links
- C-Hubs und Knuckles us Aluminium - verbesseret d’Länkig ungemein
- a de Vorderachs heds en CVD-Wällä dinnä
- s’ganzä mit eme Droop-Setup (negative Fäderwäg)
- Vorbereitig für Saddlepacks (2-teilige Akku uf de Vorderachs)

Etz fählt nu chli s’rundumä und d’Elektronik und schu isch en nüüe Schtar geborä.

Tags: Rohri

Sodele, etz hani au mal Ornig i mis Baschtelpuff brungä und wett das natürlich am gneigte Läser sehr gärn vorschtellä. Voilà:



Schön, oder? Und erscht die vile Autöli

Tags: Bastelkeller

Sodele, lang heds duuret, aber hüt hani mal Ziit gha zum am Pinzi äs paar nüüi Chleider...äh pardon, Hubä z’machä. De Underbuu isch de gliich wie wiiter unnä schu mal vorgschtellt, eifach d’Karrosserie hani ä anderi druffä.

Tags: Axial, Pinzi

Fascht de letschti Tag vom Jahr und wie alli Lüüt hani au nu äs paar Sachä wo müend fertig wärdä. Eis dervo möchti üch etz vorschtellä. Sägid „Hallo“ zum Chäfi!







S’Grundfahrzüüg isch ä Reely Crawler Conrad. Leider, das weiss schier niemert, hed nid de Conrad das Ding entwicklet, sondern ä Spezialfirma us Japan (enRoute) und s’Original wird i de amerikanische Meischterschaft sehr erfolgriich als enRoute Berg 2.2 iigsetzt. Leider isch sone enRoute Berg schu chli tüür, drum hani etz halt ä Kopie

Aber ier kännid mich ja, ich mues ja alles umbuuä (öbs zum Besserä isch weismer aligs nid). Folgendi Modifikatione duregeführt:

• Zwei LRP Crawler Motoren (55T)
• Bluebird-Servos mit 13kg
• Acoms 2,4GHz-Fernsteuerung
• Novak Rooster Crawler-Reglers
• Proline Moab-Reifen in M3 mit Memory-Foam
• Alu-Servohorns

Das langet im Momänt sowiit und är lauft wie Sau. Hie hani nu äs chlises Video gmacht => Link

Tags: Chäfi

De Pinzi hani üch ja schu einisch vorgschtellt. Wie ier ja wüssid, bini ja mit mim chline Krabbler sehr z’friedä gsi - obwohl, i letschter Ziit hani gmerkt dass da nu chli Verbesserigspotential vorhandä isch. Also hani mal wieder i de USA chli Teili bschtellt und inere längere Baschtelschtund hani die folgende Nüüerige iibuuä.

De Pinzi hed ä nüüi Skidplate (quasi de Buuch) übercho, die üssere Links sind nach ine gwanderet, de Lenkiischlag hani vergrösseret, d’Stossdämpfer sind fiinjustiert wordä, de ganzi Kabelbaum hani frisch verkablet und mit schwarzem Gwäbschluuch usgfüehrt, de Akku liid etz quär uf de Vorderachs (nümme längs), de Radschtand isch uf regelkonformi 31cm gwachsä (bringt meh Stabilität), ä Occasionsfrontrammer vomene Tamiya Ford F-350 schmückt und schützt etz d’Front und last but not least heds nu nüüi Felgä (Proline) und Reifä (Proline Hammer M3 mit Memory-Foam) gäh.

So grüschtet ziehd de Pinzi locker dervo...äh de Hoger duruf

Tags: Axial, Gartechrüücher

Sit am Samschtig isches sowiit - mi nüüschti Gartechrüücher hed s’Liecht vom Herbscht erblickt und hed au s’erscht Mal veruse döffe gu chli umesurrä. Aso chli umesurrä isch undertribä: Är hed grad wieder s’volle Programm döffe uf de Teschtschtrecki bewältigä und ich bi mier vorcho wiene schtolze Vater








D’Basis bildet ä Buusatz vo Axial, nämli de AX-10 Scorpion. Als bsunderi Useforderig hani de Leiterahmä vo TCS Crawler verwandet und de Buusatz dett drii verpflanzt. Äs hed schu chli Hirnschmalz und Geduld bruucht, aber äs hed sich glohnt. S’Fahrwärch wiist äs Droop-Setup uf, das heisst dass d’Fäderig uf Zug und nid uf Druck reagiert. Au hani die ganz Ufhängig ines 4-Link-System umfunktioniert und de Rescht wo mier chli schwach erschiene isch (C-Knuckles, Lockers und Servoarm) grad mit richtigem Material usgrüschtet. So ischer bereit für Schandtate aller Art.

Äs Filmli daf natürli au nid fählä => Klick mich sanft!

Tags: Axial, Gartechrüücher

Tja, d’Ferie sind ja schu länger durä und de Alltag isch schu wieder iikehrt. Ganz? Nu nid ganz, denn d’Ferie hend nu chli Schpure hinderlah. Vorallem was de Familiezuewachs anbetrifft. Neinei, nid de Zuewachs - mini Gartechrüücherlis hend äs nüüs Gschpänli übercho. Geschter heds de Schtorch...äh de Pöschtler glieferet. Das heisst sit geschter bewohnt ä Axial AX-10 Scorpion üses Canape. Tönt gfährlich, isches aber nid. Voilà:



Natürlich wirder nid so eifach ufbuuä, neinei. Ier gsehnd ja nu ä Huufä Teili im Vordergrund. „Nönö, der is nich’ original, des sag’der gleich!“ - das isch s’Motto. Denn eifach isch geschter gsi, hüt wirds richtig gmacht.

Tags: Axial, Gartechrüücher

De Adi heds mal nid chönne la sii la: Ufene Fraag hi im Forum hani de ganz Fritig lang mier Gedankä gmacht was würdi sii weni d’Karosserie vom Race-Touareg ufe Landcruiser würd montiere, geschweige denn öbs würd gah. Gedacht, probiert und s’Resultat chönder unnä bewunderä

Tags: Landcruiser, Tamiya, Tourag

Vor Unziitä hani doch mal gschribä dasi en Rock-Crawler, also äs Vehikel für unwägsamschts Gelände in Hong Kong bschtellt ha. De Buusatz isch au wirklich iitroffä und hüt am Namitag isches de passiert gsi - är isch fertig wordä und hed sini erschte Rundenä (oder besser gseid Chlätterpartie) im Gartä und uf de Teschtschtrecki gmacht.

Für alli vo üch wo chli älter sind und sich nu a so Toyota Landcruiser chönd erinnerä, sind die folgende Bildli sicher äs Déja-Vu

Tags: Landcruiser, Tamiya

Ich ha üch doch vor geraumer Ziit mal mi Nachwuchs, de Mellow Yellow vorgschtellt - und au sis Schicksal nach nur 10min i minere Hand Hüt, ja hüt chani öppis erfreulichs vermäldä: De Mellow Yellow isch wieder uferschtandä. Nach langem Kampf im Chäller hani hüt die letschte Teili chönnne transplantierä und ihn wieder uf d’Bei...äh Räder schtellä.

Äs handelt sich hie umene Tamiya CC-01 (Race Touareg) als Basis.

Folgendi Anpassigä hani vorgnu:
• Motor mit Untersetzig vo bauteil1
• Reifä VX98 inkl. Bliiring und Felgä vo bauteil1
• Regler T20 vo Servonaut
• Geänderti Fäderig mit Multilink und anderi Anlänkpunkte
• Dämpfer vo Conrad
• Hütte vo Bruder
• Pritsche us Polystyrol
• Unterfahrschutz us Aluminum
• Dekosatz vom Buusatz

Als Servo hani im Moment ä Hitec "High Torque" drinnä. Ä Belüüchtigsaalag isch au vorhandä, zwei Frontschiinwärfer, vier Zusatzschiinwärfer und zwei Rücklüüchte.

Was nu z’machä isch:
• Fernbedienung bsorgä und iibuuä
• Komplette Elektronik funktionsfähig machä
• Fahrerhaus kippbar machä
• Kippwegbegrenzungen für Fahrerhaus und Pritsche nachärüstä
• Unterfahrschutz vorne nu einisch überarbeite und flacher gestaltä

Sodel, das isches etz mal füre Momänt. Halt, nu nid ganz. Hie nu äs Bildli:

Tags: Mellow Yellow, Tamiya

Sodele, ich mues doch au mal wieder öppis über mis Hobby schriibä Geschter bini gu Mannäiichaufstag machä. Was das isch? Ganz eifach: Meh schliicht dur iischlägigi Lädä wo sicher kei Chleider und so Sachä hend Ich bi geschter is Modällbuuparadies, i Conrad und i Bau+Hobby zum die letschte Sachäfür mi Nachwuchs poschtä. Ja, ier hend richtig gläsä: Nachwuchs. Ich ha ä heimatlose CR-01 vo de Tamiya us Hong Kong „adoptiert“. Ier fragid üch etz sicher was das isch. De CR-01 isch de erschti Rock-Crawler vo de Tamiya uf Basis vomene Old-School Toyota Landcruiser. Das gsehd also wie folgt us:

Bild

Video

Das Ding isch wirklich knuffig und au d’Technik isch de Hammer. Hie isch nu s’Ergäbnis vo mim samschtägliche Poschtiwahn:



D’Farb hani nu nid ufem Fötäli - wett ja nu nid z’vil verrätä wiener usgsehd

Tags: Landcruiser, Tamiya

Letscht Wuche simmer mal Richtig Frankriich. Dezue hemmer üs am Morgä Früeh am 7ni uf de Autobahnraschtschtätt mit äs paar andere verrucktä Type troffe und sind mit de Auto uf Anneau du Rhin gu luege was üsi Auto so leischtid. Mier hend mit ca. 40 Auto die ganz Rännschtrecki (wo im Übrige imene schöne, lauschige Waldschtuck liid) de lieb lang Tag ganz für üs ällei gha. I drüü Gruppene isches de losgangä und me hend chönnä 20 Minute fahrä und 40 Minute zueluge. Herrlich wie das tönt hed! Leider hemmer au äs paar Usfäll z’bezeichne gha - me gsehd halt schu au dass die Auto nid für Rännä gmacht sind.
De blaui Blitz isch au uf de Pischte gsi und äs isch ä wahri Freud gsi mis Wägi chönne mal chli am Limit z’bewegä. Bi mier isch alles heil blibä, fascht jedefalls. Ussert de Pneu (siehe Bild) isch alles nu dra

Tags: Auto, Anneau du Rhin

Hihi, au uf d’Gfhar hi üch mit mim Gartechrüücher z’närvä - ich mues doch mi Schtolz zeigä. Ich ha mier useme Gedankä usä us mim Gartechrüücher ä richtigä Gartäschnägg gmacht - so langsam (und chraftvoll) ischer etz. Usem Düütschä hani äs 4:1-Reduziergetriebe bschtellt und is Auto inegwürgt. Leider hed de de Motor am Rad gschreift (oder umgekehrt) und de hani nu chli müesse de Radstand verlängere. Bohre, fluechä und lötä sind de ufem Programm gschtandä und gli drüberabä sind die erschte Fahrversuech gloffä. Herrlich, eifach herrlich wie das Ding sogar anere Wäschbetonplattä wo nahezue sänkrächt schtahd ufechräslät (de Bewiis chönder under de Rubrik „Movies“ gseh). Mini Kollegä usem Forum (www.modelltruck.net) sind au erschtuunt dasmer sones Standardmodäll so cha pimpä

Wer die ganz Gschicht dette wett verfolgä, cha hie klickä: Drück mich sanft!


Hie nu äs Bild vo mim Wärch:

Tags: Gartechrüücher

Sodele, etz hani au mal wieder gebäschtelt und was isch usecho? Genau, mi Gartechrüücher hed Liecht übercho, damit mier au i de Nacht chönd gu Chatzä jagä im Gartä...äh pardon...gu umefahrä

Tags: Gartechrüücher

Sodele, etz heds mich au verwütscht mit Nachwuchs Neinei, nid was ier etz dänkid, für das simmer nu zwenig lang ghüüratet. Mi Gartechrüücher hed äs Gschpänli übercho - Vater isch de Unkel ricardo.ch. Und hie schu s’erschte Bild, knapp 10min nachdem de Mellow Yellow s’Liecht vo Sins erblickt hed (und ca. 10min bevor är unglücklich gschtürzt isch und de „Chopf“ verlorä hed - Friede seinen Einzelteilen).



Aber kei Sorgä, är chund gli wieder uf d’Bei...äh Räder

Tags: Gartechrüücher, Mellow Yello

Sodele, etz hed mis Gartechrüücherli doch nu sini Finkli...äh pardon Pneu us Düütschland übercho. Eigentlich sinds us Spaniä, aber leider hed de Härsteller Lieferschwierigkeite gha, drum hanis im Düütsche ussä bschtellt. Ziitgliich hani am Chrüücher nu ä Spielplatz mit ca. 100kg Rindemulch baschtlet

Hie nu äs Bildli vo de nüüe Finkli in Action:

Tags: Gartechrüücher, Hobby

Sodele, hüt hani doch au nu churz Glägeheit gha mi Gartechrüücher nu einisch chli z'modifizierä. Etz hani s'vordere Differenzial ca. uf 80 - 90% gschperrt - Vorteil: de Wändechreis wird nid ganz so gross und s'Schtiigfähigkeit isch wesentlich besser. Nachteil: äs gid schu nu öppe de einti oder ander Hoger woner gliich chli duredreijät Die kommend Wuche söttid nu d'Pneu us Spanie cho

Tags: Gartechrüücher, Hobby

Sodele, etz isches passiert wasi akündiget ha: Ich ha mi Gartechrüücher gepimpt. Me weiss ja wies isch wemer ines Gschäft gahd und nu das und dieses gsehd

Hüt bini bim Racingmodellbau in Sevelen gsi und dementsprächend hani gnueg Material gfundä für mis Gartechrüücherli. Etz hani mi Ford F-150 mit folgende Sache ufgrüschtet:

- Felgä und Reifä vom Tamiya Ford F-350
- Fahrtregler S20 vo Servonaut
- ä Truckpuller II vo LRP

So cha das Ding schu sehr sicher und solid durs Gländ schliichä. Keis Grüüsch gids me vom Fahrtreegler wiler mit 16 kHz taktet und au de Motor gid am Chrüücherli zum afahrä gnueg Power und me cha wirklich milimetergnau umerangiere. Etz warfti nu uf d'Bliiring usem Düütsche und de luegemer de mal ufeme Waldschpaziergang wiener sich wacker schlahd

Tags: Gartechrüücher, Hobby

Etz ischer ändlich fertig und ich dafne hie s'erscht Mal de Öffentlichkeit vorschtellä - mi Gartechrüücher. Eigentlich isches en Buusatz vo Tamiya mit eme Ford F-150, aber das Ding chamer so geil la schliichä im Garte (und natürlich rockt är au mit 30km/h durs Gebüsch) daser de Schpitznamä gli gha hed.



Natürlich isch das Ding nid ganz Original (me kännt mich ja). Folgendi Veränderige hani duregfüehrt:

- Stossdämpfer mit 2 Tellerlöchern
- Stossdämpferöl Viskosität 500
- komplett kugelgelagert
- Fahrtregler 12V von Conrad
- Kugelköpfe blau eloxiert
- Stoppmuttern an den Felgen blau eloxiert
- Verkabelung mit UV-aktiven Spiralschläuchen in blau ausgeführt

Das Ding chönder under de Rubrik "Movies" uf youtube.com bi sinere erschte Usfahrt gseh

Tags: Gartechrüücher, Hobby

Sodele, wener etz guet ufpasst hend, de gsender uf de rächtä Siite ännä (aso nur uf de Websiitä dases dettä ä nüüi Kategorie "Movies" gäh hed. Wener dette druuf drückid wärdid ier automatisch uf mini Siite bi youtube.com gschpickt woner mini Videos chönd aguggä

Tags: Webseite

Och kuck mal, mis Auto hed nüüi Felgä übercho - nene, so schlimm isches etz au nid. Das sind ja nur d'Originalfelgä mit chli Farb Aber luegid doch sälber...

Tags: Auto

Will s'mier letschtmal in Ischgl so gfallä hed und ich unbedingt numal ha wellä d'Pischtesau usehänkä, simmer früeh am Sunntigmorgä mit em blauä Flüüger Richtig Ischgl abgfahrä. Schu ufem Hirzel hed sich zeigt dases sicherlich ä agnähmi Fahrt wird gäh - Schnee. Die Sorg hed sich de ca. 10km nach Feldkirch definitiv bewahrheitet wo d'Arlbergschnellschtrass chäch mit Schnee (25cm) bedeckt gsi isch. De Schneepfluegfahrer isch wahrschindli au nu im Bett glägä, drum hemmer die ganz wiis Pracht chönne gniesse. Churz bevormer dobä gsi sind isch de sone einsame Pflueg cho, aber de hemmer grad überholt: ESP usä und Bodebläch

Nach de Akunft simmer denn grad uf d'Pischtä: Schnee satt, aber schier kei Sicht. Defür simmer am Namitag de chli a d'Sunnä ghöcklät Am Mändig heds nu einisch chäch Pulver gäh gha und d'Sicht isch wältklass gsi. Mier sind ufä und abä wie d'Wältmeischter. Am Zischtig hemmer packt und sind nu einisch under traumhafte Bedingigä gu fahrä - eifach de Wahnsinn. Gäg die drüü isch de d'Abreis ufe Programm gschtandä und demit au s'Abschiednäh vom schöne Ischgl und em Team vom Almhof

Tags: Snowboard, Ischgl

Saisonal gseh bini ja mit mim Supersnowboard de Winter ja schu vil i de Wältgschicht umecho: Ängelbärg, Ischgl, Länzerheid. Etz chund nu en Destination meh dezue: Laax im schöne Bündnerland.

Am Dunschtigabig simmer grad nachem Schaffä abgfahrä und schnuerschtracks uf Laax gflitzt. Logiert hemmer im Riders Palace. Befürchtige dass i dem ender spezielle Hotel nume jungs Gmües us de Gegelfängerhosä-Szene a z'träffä sind hend sich nid bestätiget. Ender sind die anwesende Gescht so im Bereich 30gi gsi (au d'Chatzä. Au d'Receptions-Dame sind en zweite Blick wärt gsi. Nachdem mier üs am Dunschtig nu ordentlich d'Kantä gäh hend simmer de am Fritig fett uf d'Pischte. Leider hed d'Sicht nid so mitgschpilt, aber mier hends bis ufe Vorab (3018m) gschafft. Als Snöber mues halt chli viel traversiere, aber defür sind d'Pischte extrem breit.

Au am Samschtig simmer numal gu ride und hend am Namitag au nu die perfekt Talabfahrt gnossä und sind de ermattet heizue gfahrä. Fazit: Top Skigebiet, leider chli vil Skilift. Tip am Rande: Luegid mal d'websiite a - äs lohnt sich: www.laax.com

Tags: Snowboard, Laax

*buhuuu* Etz bini grad chli truurig Hüt am Namitag hani äs wiiters Mal i mim Hobbychäller gwirkt und a mim andere Schpilzüüg, em grasgrüene Elektro-Raupäsurri, die letschte elektronische Schpänderorgan vo mim Elektroränner iipflanzt. Wo de Alles parad gsi isch und au en knapp funktionstüchtige Akku (em nüüe Voltcraft-Akkuladegrät usem Conrad sei dank) gnueg Energie fürne Teschtlauf gha hed, bini veruse mit em Raupi. Geil, schu am Aafang voll is Gebüsch und wiene gschtochni Sau mit knapp 30km/h dure Rase gsauät. Leide rhed die Fahrt nume knapp 3 min duuret, denn heds churz tätscht und das Ding isch suuber usgrollt (oder wiemer au bimene Raupefahrzüüg wott sägä. Scheisse! Schnell gu guggä und tatsächlich: Ä Schruube hed sich verabschiedet und hed s'Aatriebsrad vo de Raupä la gah und etz isch Ende Feuer. Mal solang bis ich wieder Ersatzteili ha Aber das Ding chund schu wieder uf d'Bei...äh d'Raupä

Tags: Raupi

Hüt hani grad so mal s'Rissä gha und drum bini i Chäller abbä gu luege wies mim chline Surri gahd (für alli wo nid wüssid was mi chlini Surri isch: Das isch äs ufpimpts, färngschtüürets Autöli mit eme 1,2 PS-Verbrännermotor, Allradatrieb und ärä Pick-up-Verchleidig). Mi Surri schtahd etz sit em letschte Summer brav im Chäller und ich ha schnell wellä das Ding fahrfertig machä und mal gu umesurrä. Aber denkste: ha bi de Mechanikkontrolle feschtgschtellt, dass sich en Madeschruube am rächte Vorderatrieb glöst und sich dadurch de ganzi Aatriebsschtrang verzogä hed. Shit! Nüd mit fährä, sondern baschtlä heds gheisse. Ich ha de alles zerleid und mi Organschpänder (mis alte Elektrorännerli) hed müesse wieder mal äs Teili vo sich Schpändä. So wiit, so guet. Flugs alli Teili wieder zämäramisiert und numal müesse feschtschtelle dass mit grosse Aatriebsrad Karies mit Zahnusfall übercho hed. Etz muesi halt z'erscht gu Ersatzteili poschtä bevor das Ding wieder cha surrä. Aber ich ha döffä baschtlä und suuber ischer etz au wordä

Tags: Surri

Black Pearl, wer dänkt da nid a das verlauste Schiff us "Pirates of the Carribean"? Wenn ich das aber ghöre denn dänki a mini Felgä vom Auto woni sit hüt ha Nene, nid daser etz meinid ich heigs vörig und heig mier schu wieder öppis Nüüs fürs Auto agschafft. Nei, mini Garage hed mier mini Originalfelgä i de huuseignä Lackiererii mit em Original-Ford-Farbton "Black Pearl" lackiert. Zämä mit de nüüä Pneu (also doch öppis Nüüs) hani etz grad chli en Grund mich ufä Früehlig z'freuä.

Tags: Auto

Wüssid ier wiemer d'Lüüt im Zug cha la schtuunä? Nei, nid wemer etz mit churze Hose i Zug schtiig Nene, sondern wemer ganz dekadänt de iPod Touch i d'Finger nimmt und de langsam vors Gsicht bewegt und fahd afä Film luegä. Ja, genau, richtig gläsä, Film luege. Und de nid öppä irgendwelchi Film, sondern DVD's und so Gerümpel.

S'Gheimniss heisst "Handbrake". Das isch ä Software wos erlaubt ganzinigi DVD so uuf z'bereite dasmer die mit em iPod Touch cha guggä Was au immer wieder geil isch, wenn d'Lüüt wo näbädraa sitzid immer wieder so i Monitor ine schilid oder wenn eine schreit im Film dases au grad umeluegid

Ach ja, mi Arbetswäg eignet sich sehr guet zum pro Tag ei Folg vo "Band of Brothers" luege

Tags: iPod

I de Sektion "Kitchen" hani grad zwei nüüi Rezäpt inegschtellt, einersiits mini berüehmt-berüchtigte Asiatische Countryfries und anderersiits mini Pasta con Peperoni. Viel Spass bim luege und usprobiere

Tags: Küche, Hobby

Sodele, under de Sektion "Informations" hani etz nüü nu ä Siite iibuuä womer cha luege wasi so i letschter Ziit im iTunes Store pöschtelet ha.

Tags: Computer, Musik, iTunes

*DingDong* Was fürnes schtörends Grüüsch isch etz das a de Türe gsi? Schnell gu gugge und im Schtägähuus chund mier doch en nättä Herr vo de DHL entgägä. Was de ächt bi mier wott? Sicher heder sich am Lüüti vergangä (neinei, nid wasmer etz meint). Ah, äs Päckli mit mim Namä wädlät dur d'Luft. Was chönnt das sii? Nei, aber nid im Ärnscht - absudi Gedankä schwirrid dure Chopf. Aber tatsächlich, nachdem ich underschribe ha und ungeduldig de Lieferschiin usezehrt ha isch mini Vermuetig beschtätigt wordä - mi brand- und nagelnüüi iPod Touch mit 16GB Flash Speicher isch usem färnä China acho. *FreudentanzdurchdieganzeWohnung*

Ha das Ding natürlich grad müesse mit mine Füdlifinger atääplä und usporbiere. Isch ja de Hammer: Surfe, Youtube-Videos gugge, Musig losä und und und. S'Geilschte isch ja schier d'Bedienig mit de Finger - de Hammer. Aber au s'Display isch en Augeschmaus sondergliiche - ha nu nie sones klars und heisses Display gseh. Ua dasmer mit em Finger cha dur d'Titel und Albä scrollä und de Bildschrim sich au dreijet wenn sich s'Grät dreijet - de Burner. Nach 2h probiere und umedrücke heder aber schu usgseh als hättnä ä Ladig pubertierendi Teenager atääplät - voll Spure uf de chromige Rücksiite und au s'Display (natürlich immer nu mit de Adi-typische Folie druffä hani döffe mit em Microfasertüechli müehsam pützlen. Schnell uf Luzärn gflitzt und mier en supertruper Hülle gepöschtelt - etz chane au mitnäh i Zug

Ach ja: Dekandänt simmer ja au nu - uf de Rücksiite hani "eidrien.ch" la iigraviere

Tags: iPod, Gadgets

Etz hani doch grad nu ä nüüi Sektion uf de Homepage eröffnet: Sie heisst schlicht und ergriifend "Kitchen". Dette wirdi i Zuekunft öppe s'einte oder andere sälbschtkreiierte Rezäpt ineschtellä. Nachechochä, abänderä und so Sachä sind durchus erlaubt und erwünscht - wenns aber de Mal nid klappt mit dem Nachbarn übernimni de kei Haftig

Tags: Küche, Hobby

Ich chas eifach nid la sii lah. Etz woni mal äs tuningfründlichs Auto muesi das natürli au chli usnütze: Ich ha mier nüüi Schiinwärfer (schwarz, mit Angel-Eyes), nüüi Rückliechter (schwarz) und die beide unsägliche Rückfahrlampe und Näbelschlusslüüchte (schwarz) bschtellt. So wird mis Baby au wider mal chli spezieller als äs etz schu isch Sobald de Umbuu gmacht isch, denn chömid d'Fötali *freufreu*

Hüt isches mal wider sowiit gsi: Ich bi uf d'Schliifschueh gschtandä. Und zwar ufem Open-Air-Iisfäld i de Herti z'Zug. Isch ja ganz aheimelig gsi, chalt und ungmüetlich, derzue nu so komischi Dinger a de Füess wo etz sit ca. 6 Jahr im Schrank vor sich anegammlet sind. Aber oh Wunder, ich has nid ganz verlenrt, so nach 20min isches wider gangä schier wie früehner

Leider isch d'Iisqualität nid so de Hit, denn so wies usgsehd chund d'Putzmaschine (aka Zamboni) nid flissig Uslauf ufem Ussefäld über

Samschtig, 20°C, sunnig und d'Regierig am schaffä: Was will de Huusmaa meh. Nach de Huusarbet schnell s'Auto gsattlet und Richtig Chur uf d'Autobahn. Am Blinkliecht z'Sihlbrugg hani nu chönne 6 Auto mit eme Blitzschtart abstaubä, aber denn isch s'schliiche dä Hirzel duruf losgangä. Unne acho isch de d'Autobahniifahrt ufem Programm gschtandä, au dette isch d'Poscht fett abgangä

Z'Chur acho bini nu i Mediamarkt gu ineluege und denn schnell i d'Länzerheid ufepfiffä. Dobe hani d'Natur und de Herbscht gnosse bevori de wider hinneabbä Richtig Tiefencastel grollt bi. De Heiwäg isch denn via Oberalp-Pass gsi, aso ja, leider isch de Pass chli churz gsi (oder äs chund mier mit dem Auto eifach so vor )

Nach 407km hani de s'Auto au wider i Underschtand gschtellt und dette warteds uf mich bisis mal wider füre nime.

Hüt isches denn Ärnscht worde: Mini erscht gross Uusfahrt mit em nüüe Autoli isch ufem Programm gschtandä. Früeh am Morge bini Richtig Bärn - Lausanne - Sion - Brig - Furka - Luzärn uf d'Rundreis. Mit eim Wort: "Hammerrattescharf!" Nid nume uf de Autobahn isch das Auto äs Träumli, au am Bärg isches de wahri Wahnsinn. Da ich nu am iifahrä bi hani s'Auto nie über 4'000 r/min drückt und bi suscht au pfeglich mit ihm umgangä

Aber wemer de Pass uf mues brämsä, denn hed das Auto wirklich Dampf under de Huube

Öhm ja, ufmerksami Läser vu dere in loser Abfolge veröffentlichte Sammlig vo Schnippsel us mim Läbä wüssid dasi Ändi Juni mal mit eme Ford Focus ST gu probefahrä bi. Leider hed die Probefahrt mich nid chönne vo dem innere Drang befriiä, äntli mal äs Turboauto z'ha - im Gägeteil, äs isch ender nu en schtärchere Drang worde (öppe so wie wemer dringendscht ufs Klo müesst).

Hüt isches sowiit gsi, ich ha döffe mi eigeti, persönlichi, massgschniideriti und voll geili ST gu abholä! Mann, da wirdmer schier wider zum Chind, allerdings wie eis das weiss dass am Abig Wiehnachte isch und Gschänkli überreicht wärdid. Ha drum au die ganz letscht Wuche nid so guet gschlafä, ganz i freudiger Erregig uf das Ereignis. Vielicht cha de eint oder ander mich verschtah

Am Namitag isches denn sowiit gsi: S'Ruumschiff wo mier die letschte drüü Jahr sehr gueti Dienscht erwise hed hani schweren Herzens müesse abgäh. D'Truur ud d'Freud hend sich de grad so abgwächslet, denn churz drufabä hani mi ST döffe i Empfang näh. Ich hane wie folgt la usstattä: Farb blau, Polschterfarb blau, Globalschliessig, Fänschterheber hinne, mp3-Aschluss im Handschuehfach, 2-Zone-Klimaautomatik, Frontschiibeheizig und die gross Heckflosse. Leider heds denn nümme füre Motor glanget, drum hani nume en 1,6 Liter-Mockä. Hehe, Scherz am Rande, sicher hani de gross Motor, das isch ja eh s'Geilschte am dem Auto

Bis etz bini mit em Auto umegflogä und has gnosse mal chönne chli "draussen zu spielen", defür isch s'Wätter ja ideal

Wem de Titel bekannt vor chund de hed "Werner" gugget. So ähnlich ischsmer hüt vorcho. De Adili hed doch a sim Rännauto nu Allrad ibuue (man isch das ä Baschtlerii gsi und vorallem hani kei Aaleitig gha, aber das klappet au) und hed das müesse gu teschtä. Naja, was söli sägä: Das Ding gahd etz ab wie Sau, Traktion ohne Ende, d'Chraft chund also wirkli a Bodä und s'Fahrverhalte chamer nur als geil bezeichne. Me cha etz um Pylone drifte und fett Spass ha.

Wo Licht, da isch au Schattä.

Fahre chamer solang bis de Gummitod zueschlad. Z'erscht heds mier mal eine vu de fette Gummi abem hindere lingge Felgä grupft. Nachem Radwächsel uf die alte schmale Gummis isches de nid lang gangä bis de vorderi rächti Gummi vor de Hitz und dä Power kapituliert hed. Schnell numal en Boxestop gmacht und nach wiitere 10min und zwei Tankfüllige isches de passiert gsi: Kei Gummi meh wo heil gsi isch, so dasi uf Grund vu de Sicherheit mit em Ränner ha müesse abbrächä.

Fazit: De Conrad verdient etz schu wieder Fr. 50.- a mier Aber geil isches allemal und erscht mit em Allrad bringsch die immensi Chraft wo das Ding hed knapp a Bodä Weni etz nu sägä dasi 16% Methanolmoscht poschtet ha (bishär hani nume 10%ige verwändet) und dadur das Ding nu einisch meh lauft, denn chamer sich ja vorschtelle dasi gli wider mal uf Ämmäbrugg mues fahrä

Am Samschtig isches wider mal sowiit gsi: Mis Rännmaschineli hed wider mal döffe umesurrä und umeflitzä. Etz wirds de schu langsam geil, will etz dafi äntli heizä was s'Züüg haltet, denn s'Iifahrä isch meh oder weniger abgschlossä. Allerdings gids nu chli Verbesserigspotential: S'Überschtüüre (Heckschwänzler) muesi nu behebä (tüüferleggä vu de Hinderachs und Fäderverstellig uf "hert"), d'Radsicherig muesi überprüfe und ä Anti-Sabberschluuch am Uspuff abringä.
Suscht isch das Ding au gloffe wie die Sau und als Premiere heds s'erscht Mal chönne mit em Ghüüs umegurkä. D'Temperatur vom Motor isch trotz Ghüüs sehr moderat blibe, so dasi uf Lüftigsschlitz wahrschindli cha verzichtä.
Am Fritig söttid nu d'Stabilisatore für d'Vorder- und Hinderachs cho und de wäri mal wider parad für äs wiiters Umefresä

Sodele, etz chund mal wider en Iitrag uf d'Siite

Sit einere Wuche bini schtolze Bsitzer vumene färngschtüürete Billigflüüger. Das Ding hed afigs Kultstatus erreicht dases en wahri Freud isch.

Ufmerksami Mitläser wüssid ja dasi en färngschtüürete Krachmacher (aka RC-Glattbahn-Verbrennerauto) ha. Etz hani au mal Glägeheit gha das Ding fertig z'stellä und diversi Abuuteili dra z'machä:

- Frontbumper us gschüümetem Kunststoff
- Herteri Fädärä
- 37mm-Profilpneu hinnä
- Blaueloxierti Radmuettere



Hie nu zwei Fötäli vom Ding:

Hossa, etz muesmer ab sofort en Ghörschutz aleggä: Min Verschtärcher isch cho. Chraftvolli 200W, 9kg Läbiggwicht und en Hammersound, das fätzt. De Verputz ischmer bi de erschte paar Akkord grad am abberisle gsi und min Tinnitus hed au mal wider sini Party i de Ghörgäng gfiiret, alles in allem: VOLL GEIL!!!! NU chli üebe und denn hed Sins en Exportschlager meh...

Etz hani grad gseh wie lang dasi nüme gschribe ha...so öppis vu lahm. Sorry a alli wo öppedie inegluegt hend

I de Zwüscheziit isch nid absonderlich vil gloffe, ussert dasi en nüüe Mitbewohner i minere Wohnig ha. Nei, keis Tierli sondern öppis ohni Gschtank und Staub, defür mit Lärm. Was chönnt das ächt sii? Genau, en Elektro-Bass, au E-Bass gnännt. Das Prachtsding hani im Auktionshaus vo mim Vertruue ersteigeret und de passendi Verschtärcher chund nächscht Wuche au nu per Poscht. Denn heissts de für mini gsamt Nachberschaft: Ohre zu und füre Adi: 1, 2, 3, Soundcheck...Yeah!!! Let's rock...