Fascht de letschti Tag vom Jahr und wie alli Lüüt hani au nu äs paar Sachä wo müend fertig wärdä. Eis dervo möchti üch etz vorschtellä. Sägid „Hallo“ zum Chäfi!







S’Grundfahrzüüg isch ä Reely Crawler Conrad. Leider, das weiss schier niemert, hed nid de Conrad das Ding entwicklet, sondern ä Spezialfirma us Japan (enRoute) und s’Original wird i de amerikanische Meischterschaft sehr erfolgriich als enRoute Berg 2.2 iigsetzt. Leider isch sone enRoute Berg schu chli tüür, drum hani etz halt ä Kopie

Aber ier kännid mich ja, ich mues ja alles umbuuä (öbs zum Besserä isch weismer aligs nid). Folgendi Modifikatione duregeführt:

• Zwei LRP Crawler Motoren (55T)
• Bluebird-Servos mit 13kg
• Acoms 2,4GHz-Fernsteuerung
• Novak Rooster Crawler-Reglers
• Proline Moab-Reifen in M3 mit Memory-Foam
• Alu-Servohorns

Das langet im Momänt sowiit und är lauft wie Sau. Hie hani nu äs chlises Video gmacht => Link

Tags: Chäfi

Tja, das Jahr neigt sich au schu wieder am Ändi zue - obwohl, mier chunds vor als obs nie 12 Mönet gsi wärid. Vil isch gsi i dem Jahr, privat wie au brueflich. Bini doch Unkel wordä (ein böhser Onkel um gnau z’sii), ha mini Baschtelliideschaft entdeckt, bi uf Hochsigsreis gsi und ha geniali Snowboardferie gha.

Brueflich isches au äs Jahr vo de Veränderige gsi, mi Job bim ewz hani ufgäh und gah etz mis Glück wieder i de Planig gu suechä. Ich ha vili liebi, nätti, interessanti Lüüt kännäglehrt und mier isches nu nie so schwär gfallä amene Ort z’gah.

Ich wünsche allnä Bsuecher, Gschpänlis, Kollegä und suschtigi Personä woni kännä und schetzä fürs kommede Jahr alles Gueti, vil Glück, Gsundheit und Erfolg...und hoffä daser vilicht mal wieder ineluegid hie i de chline Wält vom Adi.



Das isch en originale Huuswurz usem eigete Gartä

Tags: 2008

Och wie schön isch doch das - Schnee heds gäh. Aber nid überall, sondern je nach Region ganz verschiedä vil. Schtellid üch vor, sogar bi üs uf 453m ü. M. heds für 30cm glanget - Grund gnueg für mich de armä Vögäli verussä ihri Vogelvilla mit Fueter z’montierä

Tags: Schnee

Sodele, was chamer nid alles erläbä wemer für s’ewz schaffet? Me daf sogar as 6-Tagerännä im schöne Halleschtadion zu Zürich und dette diräkt a de Bahn de Abig verbringä, de Sportler bi ihrne Höchschtleischtige zuelugä, fein Ässä und d’Schtimmig gniessä. Das muesmer mal erläbt ha.

Tags: Sechstagerennen

De Pinzi hani üch ja schu einisch vorgschtellt. Wie ier ja wüssid, bini ja mit mim chline Krabbler sehr z’friedä gsi - obwohl, i letschter Ziit hani gmerkt dass da nu chli Verbesserigspotential vorhandä isch. Also hani mal wieder i de USA chli Teili bschtellt und inere längere Baschtelschtund hani die folgende Nüüerige iibuuä.

De Pinzi hed ä nüüi Skidplate (quasi de Buuch) übercho, die üssere Links sind nach ine gwanderet, de Lenkiischlag hani vergrösseret, d’Stossdämpfer sind fiinjustiert wordä, de ganzi Kabelbaum hani frisch verkablet und mit schwarzem Gwäbschluuch usgfüehrt, de Akku liid etz quär uf de Vorderachs (nümme längs), de Radschtand isch uf regelkonformi 31cm gwachsä (bringt meh Stabilität), ä Occasionsfrontrammer vomene Tamiya Ford F-350 schmückt und schützt etz d’Front und last but not least heds nu nüüi Felgä (Proline) und Reifä (Proline Hammer M3 mit Memory-Foam) gäh.

So grüschtet ziehd de Pinzi locker dervo...äh de Hoger duruf

Tags: Axial, Gartechrüücher

Sit am Samschtig isches sowiit - mi nüüschti Gartechrüücher hed s’Liecht vom Herbscht erblickt und hed au s’erscht Mal veruse döffe gu chli umesurrä. Aso chli umesurrä isch undertribä: Är hed grad wieder s’volle Programm döffe uf de Teschtschtrecki bewältigä und ich bi mier vorcho wiene schtolze Vater








D’Basis bildet ä Buusatz vo Axial, nämli de AX-10 Scorpion. Als bsunderi Useforderig hani de Leiterahmä vo TCS Crawler verwandet und de Buusatz dett drii verpflanzt. Äs hed schu chli Hirnschmalz und Geduld bruucht, aber äs hed sich glohnt. S’Fahrwärch wiist äs Droop-Setup uf, das heisst dass d’Fäderig uf Zug und nid uf Druck reagiert. Au hani die ganz Ufhängig ines 4-Link-System umfunktioniert und de Rescht wo mier chli schwach erschiene isch (C-Knuckles, Lockers und Servoarm) grad mit richtigem Material usgrüschtet. So ischer bereit für Schandtate aller Art.

Äs Filmli daf natürli au nid fählä => Klick mich sanft!

Tags: Axial, Gartechrüücher

Tja, d’Ferie sind ja schu länger durä und de Alltag isch schu wieder iikehrt. Ganz? Nu nid ganz, denn d’Ferie hend nu chli Schpure hinderlah. Vorallem was de Familiezuewachs anbetrifft. Neinei, nid de Zuewachs - mini Gartechrüücherlis hend äs nüüs Gschpänli übercho. Geschter heds de Schtorch...äh de Pöschtler glieferet. Das heisst sit geschter bewohnt ä Axial AX-10 Scorpion üses Canape. Tönt gfährlich, isches aber nid. Voilà:



Natürlich wirder nid so eifach ufbuuä, neinei. Ier gsehnd ja nu ä Huufä Teili im Vordergrund. „Nönö, der is nich’ original, des sag’der gleich!“ - das isch s’Motto. Denn eifach isch geschter gsi, hüt wirds richtig gmacht.

Tags: Axial, Gartechrüücher

Sodele, uf de Websiite hed sich au nu chli öppis wenigs ta - äs hed ä nüüi Kategorie „Hobbies“ gäh und mini Links sind nüü online abrüefbar.

Under de Kategorie „Hoobies“ tue ich üch gärn mini chline Liebling vorschtellä. Luegid doch mal inä.

Mini Links sind nüü bi „delicious.com“ usglagerät - das hed de Vorteil dasi die au cha mit mim iPhone aktuell haltä und aluegä

Tags: Webseite

Hüt isch chli ä lockerä Tag gsi - d'Kanadier sägid zu dem "lazy day". Mier sind hüt für einisch nid so früeh am Morgä (äs isch ender schu 10ni gsi) usem Hotel usä und grad mit de Subway chli gu umefahrä. Mier sind bis zur Station "Bathurst" um vo dette a d'Bloor Street West ab z'laufä. Vili Sachä hemmer gseh und au vili Gschäft hemmer bsuecht. Wo de d'Yonge Street i Sicht cho isch, simmer rächts abbogä und die Strass durabgloffä. Churz schnell ä Verpflegig imene Wendy's gnossä und schu simmer mit de letschte Geschenke für die Deheiblibnigä is Hotel gschtüüret. Nachem abladä isches de wiederum per Subway wiitergangä um nu einisch d'Waterfront gu gniessä. A de Union Station hemmer nur s'Transportmittel gwächselt und schu gli drufabä isches miteme Streetcar wiitergangä. Äs paar Statione wiiter isch d'Waterfront i Sicht cho und schu simmer wieder imene Heated Outside Patio ghöcklet und hend mit em Laptop gschpilt und d'Sunne gnossä.
Nach soviel Erholig isch nu chli Laufä ufem Programm gschtandä und nach äs paar Minute (ender Schtunde) simmer via Rodgers Center vorem Hooters gschtandä.



Als Belohnig für soviel Laufä hed sich d'Dachterassä mit ämä Bierli abotä Frisch gschtärcht isch nu s'Eaton Center heigsuecht wordä und nacheme wiiterä churzä Zwüscheschtopp im Hotel hemer üs ufe Wäg dur d'Rushhour gmacht um a d'Gamble Avenue 169 z'cho, mim ehemalige temporäre Deheimä.
Chum acho simmer vomene völlig überraschte Bod und Danny empfangä wordä. De Abig hed de relativ lang duuret, so dass mier de nu i Gnuss vonere Taxifahrt cho sind - de Kasim isch üse nächtlichi Rännfahrer gsi

Tags: Ferien, Canada

De Wecker chreijät, de Vorhang uf d'Siite gschobä und was gsehd s'müede Hüehneraug? Wunderbars Wätter! Also schnell agleid und sich schwupps ufe Wäg zum Busterminal gmacht. Dette hemmer usegfundä, dasmer für $38 per Person chönd mit em CanadaCoach-Bus uf Niagara fahrä. Gehört, gemacht und schu bald simmer mit em Busli underwägs gsi. Underwägs hed s'Wätter leider uf "ZUE" gschtellt und so isches de au blibä bismer in Niagra gsi sind. dette heds de aber wieder langsam afä uftue und so hemmer chönne mit de "GreenLine" (am Shuttlebus vo de Busstation zu de Niagara Falls) grad diräkt zu de Falls abbä hötterlä. So simmer de grad vor de Falls usegschmissä wordä und dank relativ vil Wasser heds au chli spektakulärer usgseh als bi mim letschte Bsuech. Äs hed vilvil Tourischte gha, so simmer nid ufgfallä



Nachdem mier de alles agluegt gha hend, simmer z'Fuess zu Busstation zrugg gloffä (stellid üch vor: 25 Minute per pedes) und sind de mit em drüü Bus nach Toronto zrugg. Leider heds de Bus nid so pünktlich gnu und au de Verchehr isch dicht gsi wäg vilne Buuschtellä, so dasmer erscht am halbi 6i z'Toronto am Busterminal acho sind. Nacher simmer nu i nüüi Canadian Tire und de underirdisch zum Hardrock Café womer üs verpflegt hend, bevors de wieder is Hotelzimmer gangä isch.

Tags: Ferien, Canada

Eigentlich wär ja hüt chli ä früehe Morgäufbruch planed gsi, aber leider hed de Wecker sich nu nach B.C.-Time grichtet (oder besser gseid: Pacific-Time grichtet), so dasmer halt erscht am viertel ab 8i ufgschtandä sind und au s'Hotel erscht am nach de 9ne verlah hend. Aber defür simmer grad diräkt i d'Rushhour iitaucht und hend grad Hardcorerubbing i de U-Bahn (oder wies hie heisst: Subway - Ride the Rocket) gmacht. Aber das hed sich de nur füüf Statione hiizogä, denn mier sind bi de Union Station wieder usem Gwüehl usä und hend üs via Sky Walk Richtig CN Tower ufgmacht. Dette acho heds grad die erscht Wällä vo Tourischte abgfertiget gha und so simmer churz-lätz zwüschetinägschlüpft und hend grad diräkt bis ufä Skypod i 447m Höchi durebuechet Womer de dobä acho sind hemmer ä Superussicht uf Toronto und d'Umgäbig gha - Hammerwätter isch halt au gsi Mier sind de trotz Wätterwarnig (Wind über 25km/h) ufe Outside Walk und ufe Glasfloor gu abbäguggä
Nachdem mier gnueg Höhäluft gschnappt gha hend, heds üs Richtig Wasser zogä. Mier hend de de Wäg zur Waterfront und em Harbour under üsi Schueh gnu und sind schu gli drüberabä am Wasser imene Heated Outside Patio (oder uf Düütsch gseid: Garteterassä gsässä und hend mit em iPod und em Laptop und em Wireless-Netzwärch wo "per Zuefall" ume gsi isch, Nachrichte verschickt und d'Homepage updatet. Nachdere Kommunikationspausä simmer wiiter a de Harbourfront nachä Richtig Fährihafä womer de am eis d'Fähri nach Toronto Island gnu hend. Mier hend Center Island usgwählt und d'Überfahrt isch super gsi (und hed vili heissi Bildli gäh).



Uf Center Island simmer chli umegloffä und hend de wunderbari Herbschttag bi 22°C gnossä. Mit de nächschte Fähri isch de wieder d'Rückfahrt gmacht wordä und churzentschlossä isch nachere churze Schtärchig de Wäg mit de Subway is Yorkdale Center (s'gröschte Iichaufszentrum vo Toronto) aträttä wordä.
Chum dette isch chli schtuune und umeguggä agseid gsi - ussert em Bodyshop hemmer niemerem üses Gäld gäh De Bodyshop hed sit dere Wuchä äs nüüs Produkt namens "Deep Sleep" im Programm. Das chamer sich ufs Chüssi schprützä und söll eim hälfä bim guet Schlafä. Mal gugge wies wirkt.
Chli müed vom Umelaufä isch d'Rückreis de gli schu wieder ufem Programm gschtandä und so simmer bi de Osgoode Station us de Subway gschtige und mal zum Kinopalascht gloffä. Dette hemmer usegfundä dass "Batman: The Dark Knight" im IMAX-Kino am 7ni lauft. Churzentschlossä hemmer zwei Billet kauft und willmer nu chli z'früeh gsi sind, simmer i de Zwüscheziit wieder ines Heated Outside Patio zumene Bierli i de Sunnä ghöcklet. Uf die 7ni hemmer de de Kinopalascht g'enterät und de Film gnossä - mit eim Wort: Hammergeil! De isch de ächti Killerfilm gsi - schauen, schauen, schauen! Nachem Film isch nu chli schtrolchä dur s'nächtliche Toronto ufem Programm gschtandä.

Tags: Ferien, Canada

Willmer schu sehr früeh hend müesse am Flughafä fürs Checkin sii (07.00) simmer au sehr früeh ufgschtandä: 06.30 Das chamer nume machä wemer diräkt im Flughafä schlaft Also husch-husch usebeindlet und am Checkin-Automat chli Boardingchartälotto gschpilt. Das Ding hed nu gmeint dasmer nu einisch äxtra müend zahlä fürs Gepäck, dasmal $50 willmer 4 Göffer gha hend. Ich ha de mit em Automat nid wellä diskutierä und ha mich halt ohni sälbschtitscheggtä Gepäck schtur i d'Warteschlangä gschtellt. D'Boardingchartä hani am Automat chönne abluchsä, aber keis gälbs Gepäckbezeichnerli. I dem verdammtä Sälbschtbedienigsladä hed eh keine gwüsst was machä und de Groundstaff isch in Trance umebeindlet. Plötzlich hed üs de nu ä sone komatösi Staff-Damä agredt warum mier kei Tags heigid. Mier halt gseid dass de Automat das nid heig wellä gäh. Sie das also nid glaubt, aber siehe da wo sie mit em Herr Automat gredt hed, hed sie au kei Tag übercho Mier hend de plötzlich VIP-Behandlig gha und döffe näb de Warteschlangä fürebeindlä. Dette hemmer de wieder sone komatösi Frau Griesgram atroffä wo üs schu wieder hed wellä zruggschickä und nach Intervention nu hed wellä Gäld ha und nach erneuter Intervention und em Befragä vom Orakel vo Buechigssystem hemmer de die begehrte Tags übercho und döffe gu s'Gepäck ufgäh Nach soviel Erfahrig, hemmer grad äs A&W-Zmorgä bruucht.
Nachem Zmorgä hemmer nu d'Sicherheitskontrolle erläbt und sind pünktlich vorem Gate gschtandä. De Flüüger isch voll usbuechet gsi und keis friis Plätzli heds gäh. De Flug isch guet gsi und meh hed zwüschetinä vilvilvil usem Fänschter us gseh - wemer nid grad "Indiana Jones and the Crystal Skull", "MegaMaschines" und "MegaWorld" gugget hätt.
D'Akunft isch au duregangä und nachem obligatä Pipi ufem Pipiböxli nach de Landig und uf feschtem Bodä, simmer gu d'Göffer holä und hend üs um d'Transportmöglichkeit is Hotel kümmerät. Leider isch de Infoschalter (also s'Personal) irgendwie wagbeamet wordä, so hemmer halt churzentschlossä ä Limousine mit Chauffeur und allem Pi-Pa-Po bis is Hotel gnu. De luxuriösi Gschpass hed nume $60 koschtet (inkl. Tip) und so simmer sehr entspannt im Hotel acho und schwupps im 21. Stock iipfärcht wordä. Nachem Zimmerbezug simmer schu s'erscht Mal Richtig Eaton Center und City Hall beindlet und nach chli umeschliichä wieder im Hotelzimmer glandet.

Tags: Ferien, Canada

Etz isch schu de letschti Tag für üs in Terrace abrochä - chum zum glaubä wie schnell dass die Ziit duregangä isch. Ich ha am Morgä nu ä letschte Usfluug i d'Schtadt gmacht wili uf de Suechi nacheme vierte Goffer gsi bi. Leider isch de avisierti Goffer im Canadian Tire nid das Wahre gsi, so simmer de halt schnell i Liquidationsstore gu guggä. Und siehe da - ich ha ä 27" Goffer i verblasstem Ferrarirot, bruucht aber intakt für schlappi $15 übercho. So usgrüschtet hemmer die letschte Packarbete chönne i Agriff näh.
Mier sind de nach äs paar Abschiesprogies is Auto ghüpft und vom Tanti Emmy ufe Flughafä Terrace brungä wordä. Mit üsne vier Göffer hemmer usgseh wie Flüchtling, aber das isch üs doch glich gsi Am Schalter hemmer de nu döffä für jedä Goffer wo zvil gsi isch döffä $40, also einä (denn de Uri-Goffer hani per Zuefall als Handgepäck umgmodlet) und für jedes Pfund (450g) zvil $1.80 zahlä - grausam, ehrlich. Aber de Hammer isch de nu bi de Sicherheitskontrolle cho - ich ha nu nie sone huufä Amateure gseh wo sich wend professionell gäh - Horror! Mier sind 30 Minute i de Kontrolle gsi und wenn de Flüüger üs nid schu drüümal usgrüeft hätt würdemer immer nu dette schtah. Aber so hemmer doch döffe gah und mier hend müesse ufs Flugfäld use zum Flüüger beindlä. Mier sind mit HawkAir gflogä, aso so wies heissid, so gross sind au d'Flüüger Ich schnell-schnell i Bomber ine wellä (wo schu usbuechet gsi isch und nur uf üs gwartet hed) und *bums*-*tschätter*-*klirr*-*chlotter* hani bim mim rassigä Iischtigsversuech de schöni DeHavilland-Flüüger verbüület. Alli Passagier hend churz ufgluegt, d'Stewardess hed schu de Hörer i de Hand gha und versuecht "911" iztippä, de Pilot hed de Schlüüdersitz betätiget und de Wartigsmechaniker isch gu Ersatzteili holä. Nei, so schlimm isches nid grad gsi, aber d'Türe hed nacher chäch Schpiel gha bim zuetue und wärend em Fluug hemmer gnueg Frischluft gha. Mier sind de trotz dem Missgschick überpünktlich, das heisst 10 Minute vorem Ziitplan gschtartet und de Flug isch nid so spektakulär gsi wie de Iischtigsversuech vo mier. Defür isch d'Ussicht de hammer gsi, ehrlich. Ich bi die ganz Ziit nume am Fänschter kläbt und ha Bärgä, Bärgä, Bärgä, Seeä, Bärgseeä, Gletscher, Fjord und nu vil meh gseh. Pünktlich simmer de in Vancouver acho und schu bald mit em Shuttle ufem Wäg zum Internationale Flughafä gsi.
Dette acho hemmer üs wellä am Flughafähotel fürne Zimmerbezug mäldä. Leider, leider isch s'Flughafähotel s'Fairmont Vancouver, äs 5-Sternhotel.



Aber mier sind richtig unerschrockä gu fragä und mier hend äs Zimmer für sage und schreibe $379 übercho!!! Aber das Ding isch de Killer gsi: Ussicht uf Vancouver und d'Bärgä, im 13. Stock, ä Badwohnig - keis Badzimmer und alles perfekt. Das hemmer üs müesse leischte, schliesslich hemmer ja kei Hochsigsübernachtig gha Mier hend de üs gmüetlich iigrichtet und nu Batman:Begins gugget und sind de gu d'Augerollädä gu abefahrä

Tags: Ferien, Canada

De Sunntig wär ja eigentlich de Tag zum Entspannä - aber nid mit em Unkel Dieter (jaja, the famous Uncle Dieter). Mier sind hüt schu früeh mit em Pickup und de Flinte ufem Rückbank nach Kitimat ufbrochä. Dette heder üs nu s'ganzä Areal vo de Alcan und de Eurocan zeigt und au de Great Spruce hemmer agugget. Das isch en ca. 500 Jahrigä Spruce Tree (ä Art vu Tannä wo eifach riesig isch. Nachdem simmer nu gune Lizänz für Reh und Schwarzbär losä - me weiss ja nie wenn eim so einä vor d'Flintä lauft wemer im Busch underwägs isch.
Mier sind de mit em Pickup chli i Busch usegfahrä - 30km abem Highway sinds de schliesslich gsi. Aber leider hemmer kei Bär oder suscht äs Viech gseh - nume Bärescheisse ufem Waldwäg. Nachdem de de Waldwäg nu blockiert gsi isch dur Logging-Maschinä hemmer müesse umcherä. Bevor mier aber zrugg gfahrä sind, hani nu chönne mit sinere Flintä a Schuss i Wald ufe jagä - läck isch das geil gsi D'Ohrä pfiifid nu etz dervo und d'Hülsä hani bhaltä Mier sind de halt wieder zrugg gfahrä und chli uf andere Wägä quer durs Gehölz gröschtet mit em Pickup.
Nach äs paar Schtunde simmer de zrugg uf Terrace gu de Güsel ufladä und mit em Güsel gu ufe Dump fahrä. Chum dette (de hed au am Sunntig offä isch de Güsel i höchem Bogä vom Pickup gflogä und mier sind ufem Wäg gsi ufe Thornhill Mountain. Das isch de Bärg wo eigentlich üner Terrace trohnt. De Wäg dett ufä isch en absoluti Waldschtrass und sehr, sehr schlächt underhaltä. Aber das hed de Unkel Dieter nid dervo abghaltä de Pickup duruf z'schüüchä. Mängisch isches i de Schpitzcherenä so äng wordä, dasmer trotz 4x4 und Undersetzig hend müesse de Rückwärtsgang inehauä :-O Aber geil isches schu gsi und mit jedem Meter duruf isch d'Ussicht besser wordä. Mängisch hedmer d'Schtrass nid chönne vomene Bachbett underscheidä, aber das isch am Pickup gliich gsi Womer de ganz obä gsi sind, nämli bi de Sändealaage, hemmer ä wahnsinnigi Ussicht uf Terrace gha.



Ich glaube ja nid dass schu mängä Tourischt dett obä gsi isch. Nachdem mier äs paar Fötäli gmacht hend simmer wieder durab, aber dasmal au mit Undersetzig und ohni Bräms und nach 45 Minute simmer doch au dunne gsi. Am Abig heds de wieder fürnes Bierli uf de Terasse (z'Terrace) glanget

Tags: Ferien, Canada

Samschtig - genau vorere Wuchä simmer hie z'Terrace acho. Hei, wie die Ziit doch flüügt De Tag hemmer meh oder weniger hie uf de Terasse (z'Terrace), im Huus (am Wösche) oder aber bim Blue Jays alockä mit trochnem Brot im Gartä verbrungä. Leider sind die cheibe Blue Jays so hinderlischtig dases mier nid glunge isch nur eine dervo z'fötälä Defür hani d'Chatz ufem Apparat gha.
Am schpate Namitag simmer uf Kitimat gu s'Dörfli aguggä und chli dur d'Mall und de Homework Shop gu schtöberä. Kitimat isch d'Heimat vo Alcan (Aluminiumhärschtellig) und Eurocan (Papierhärschtellig). Die beide Firmene hend die Schtadt i de schpate 50ger-Jahr usem Nüd (aso usem Busch) gschtampft. D'Stadt isch sehr suuber, aber irgendwie tod.



Nachdem mier de d'Sehenswürdigkeite gseh hend, simmer nu am Chris sis Game mit de Ice Deamons im Iisstadion gu guggä. Das Game isch äs Teschtschpiel gsi - drüü Drittel vo 30 Minute mit Full Contact. Äs isch schu cool gsi zu luege (im wahrschten Sinn des Wortes, denn i de Hallä isch ca. -50°C gsi) und mier hend äs paar ganz geili Schpielzüüg chönne gseh. Nachem Schpiel simmer zrugg uf Terrace, aber fürnes Bier uf de Terasse heds nümme glanget.

Tags: Ferien, Canada

Hüt isch Premieretag gsi, drum hemmer i d'Stadt müessä (und das am Beschtä nur vo de 10ni). De Chris hed unbedingt s'NHL 2k9 für d'XBOX 360 müesse ha (das Game isch übrigens mit 9.5 vo 10 Pünkt bewärtet wordä und ich ha sehnsüchtig üf die nüü CD vo Metallica "Death Magnetic" gwartet. So sind s'Tanti Emmy und ich schu früeh underwägs gsi um im Walmart die Sachä z'ergattärä. Im Waltmart isches nu ruhig gsi, fascht die Ruhe vor dem Sturm, aber vom Game heds nur nu 20 Schtuck gha und vo de CD sind au nur nu ca. 35 Schtuck vorig gsi Nach dem mier erfolgriich gsi sind uf de Jagd nach sältene Sachä, simmer nu zur Beruhigig vo de Närvä verschiednigi Sachä gu poschtä und de wieder heizue. Nachdem mier deheimä üsi ergatterätä Sachä verschtaut gah hend, hani grad müesse d'CD probelosä - mit eim Wort "Hammergeil". Das isch Metallica wie früehner. Ich sägä nume "Kaufen, Kaufen, Kaufen!"
Wills so schön Wätter gsi isch am Namitag, hemmer en Fuessmarsch zu de Hot Springs gmacht. Das isch s'Erläbnisbad wo ca. 3km äwäg isch, drum simmer am Highway nachä dett hii gloffä. Eigentlich hättemer wellä de Wäldwäg näh, aber de isch im Momänt vo Bärä bevölkerät. Drum isches am Highway nachä sicherer (au wenn d'Laschtwägä nur Zentimeter a eim verbii surrid
I de Hot Springs hemmer de wältbeschti Lime-Margherita müesse probierä - äs sind de am Schluss 3 pro Person wordä



Nachem beschwingte Heiwäg isch de Tag de bimene Bier uf de Terasse (z'Terrace) usglüütet wordä

Tags: Ferien, Canada

Rägä, Rägä, Rägä - troschtlos wemer so useluegt. Aber mier sind hüt nu einisch mit em Tanti Emmy i d'Schtadt gu pöschtelen und Sache erledigä. Unter anderem simmer nu ine richtige Mannäladä - de Canadian Tire. Läck mier am Tschööpli, dette chamer sich au grad sälber äs Auto zämäbuuä, oder alles poschtä wases zum Fischä bruucht, oder ganz geili BBQ-Flammäwärfer (au Grill gnännt hie in Europa). So genial, ha schier nümme use wellä. Aber so vil Männlichkeit macht Hunger, so simmer nu i Mr. Mikes gangä gune Avalanche Burger ässä. Hammergeil das Teil und satt machts au im Quadrat
Uf de Suechi nach Mitbringsel heds üs nu is Souveniergschäftli im Hotel verschlagä und dette hed mich de Häuptling "schräger Irokese" agschprochä (de hed dette sini sälber gmachtä Silberschmückli wellä verchaufä öbi hie uf Bsuech sig. Ich ha de mal mit "Ja" g'antwortet (das hani voreme Jahr ja au schu mal gmacht *grins*) und är hed gmeint daser hüt i de Natur sägä wärdi dass für üs söll d'Sunne schiine. Tja, das isch doch flott gsi, oder? Ufem Heiwäg (äs hed immer nu grägnet denn) simmer nu a de Ruinä vom Hotel Skeena verbiigfahrä wo die vorder Nacht abbäbrunnä isch und sind gu d'Büchse i d'Sammelschtell zrugg gu bringä. Geili Sach, aber dette wetti nid Schaffä.
Mier sind de nacher hei (äs hed immer nu grägnet, wahrschindli hed de Häuptling nu kei Ziit fürnes Telefon mit de Natur gha) und so simmer heizue. Chum simmer deheimä gsi, hed de Häptling doch glaubi ä Aschluss mit de Natur gah, denn äs hed ufatah und d'Sunnä isch usecho. So hani doch hüt nu chönne äs Bier uf de Terasse (z'Terrace) ha

Tags: Ferien, Canada

Leider hed üs s'Wätter hüt chli im Schtich glah - chalt, windig und Rägä *brrrr* *grusel* Aber mier also Hardcoretourischte sind hert im näh und sind drum ufe Wäg nach Terrace. Also, mier hend wellä, denn churz nach de erschte Abzwigig isch im altä Ford Mustang äs verdächtigs, gälbs Lämpli agangä "Low Coolant". Scheisse, kei Chüelmittel meh. Also de Wägä ganz sanft kehrt und wieder langsam und vorsichtig vor s'Huus gschlichä. Dette hed de schu s'Tanti Emmy uf üs gwartet und gmeint mier sigid etz cheibe gleitig i de Schtadt und zrugg gsi
Aber das isch ja keis Problem, defür heds ja nu de 99er Mustang gha Mit dem simmer de i d'Stadt gsurrt und hend üsi touritische Iichäuf gmacht und hend üs im Safeway is WLAN igschnorrt Zrugg simmer de schwärbepackt und mit vil Gepäck und hend alles verläsä und verruumet. Wills grägnet hed hemmer dasmal ufenes Bier uf de Terasse (z'Terrace) verzichtä müesse

Tags: Ferien, Canada

Hüt isch en Usfluug vo de bsundere Art ufem Programm gschtandä - will s'Wätter so schön gsi isch hemmer en Usfluug nach Prince Rupert, de Hafestadt gmacht. Mier hend also üs döffe mit em Tanti Emmy zämä de nüüi 99er Ford Mustang V8 vom Chris schnappä und sind mit dem Autöli *grins* is 176km entfärnti Price Rupert gsurrt. De Wäg nach Prince Rupert gfindt au en durchschnittlich begabtä Europäer, äs gid äbä nume ei Schtrass dett anä Komisch, isch aber so.
In Prince Rupert isch usnahmswiis schöns Wätter gsi (bi normalerwiis 225 Rägätag pro Jahr) so dases wunderschön zum umeflanierä gsi isch. Mier hends a de Cow Bay so richtig gnossä und kei Souveniershop isch sicher gsi vor üs



Als krönende Abschluss hemmer en Lunch im Crest Hotel mit Sicht übere Hafä zu üs gnu - en Gheimtip sonderlgeichen!!! Ufem Rückwäg simmer vom Glück begünschtig wordä und hend doch nu en Bald Eagle (äs wunderschöns Viech) und en Seal (nid d'Schrotflintäzielfrässi vom Heidi Klum) gseh. Aso beidi Viecher sind läbig gsi und am richtige Ort (aso i de Luft und em Wasser) und nid uf de Schtrass - dette hemmer nur äs ca. 1,32mm dicks Porky Pine gseh
Nachdem de Ford wieder ufgfüllt wordä isch (40 Liter für die Schtrecki) simmer de au wieder zrugg uf d'Terrasse (z'Terrace) um üses wohlverdiente Bierli zu üs z'näh.
Am Abig hemmer de nu ä Lektion i Änglischer Schprach übercho - quasi ä diräkti Übersetzig vo "unorganisiert". Weiss das eine per Zuefall? Ich ha ä absolut passendi Übersetzig derzeu übercho vom Meischter höchschtpersönlich - "unable to organise a blowjob on a cocksucker convention" Das nänn ich doch mal praktische Unterricht...

Tags: Ferien, Canada

Mändig - wer hasst das nid? Ich schu nid, vorallem wener in Canada isch. Mier sind chli länger im Bett gsi und de nacheme feine Tanti Emmy-Zmorgä mit em Ford Escort GT i d'Stadt gheizt und dette chli gu Lädälä. Isch supi gsi und mier hend sogar äs paar Finkli übercho - herrlich warm!
Zrugg da anä simmer de nu chli z'Fuess nach Kin Camp am Lakeelse Lake gloffä und hend ufem Wäg mal d'Tierwält vo hie bewunderet. Ufem Wäg hend sich so geili, haarigi, schwarz-gälbi Raupe (Caterpillars) schliichend fortbewegt. Die Dinger sind nid so fotogen, aber heiss zum aluegä.



Wiiter hemmer näb de obligatä Hünd nu so öppis wie Elschterä gseh, so genannti Blue Jays. Das sind Vögel mit eme schwarz-blaue Fäderchleid und eme richtigä Kamm ufem Chopf. Die geilschte Viecher sind aber d'Suicide Birds. Kei Ahnig was fürne Sorte dass das isch, aber komisch sind die. Die schtönd uf de Schtrass und pickid Salz, Chiesel etc. uf und wenn äs Auto chund gönds nid eifach sofort wäg, sondern wartid bis zur letschte Sekundä. So machts halt aligs churz *flatter*-*bumm* und im Rückschpiegel vom Auto gsesch nur ä Fäderwolkä...tja, Suicide Birds halt. Womer de im Kin Camp acho sind hemmer üs chli am See verwiilet und sind de wieder zrugg beindlet und nach dem Schteiss hemmer üs uf de Terasse (z'Terrace) äs Canadian gnähmiget.

Tags: Ferien, Canada

De Sunntig isch au schu da gsi und s'Wätter isch immer nu wundervoll herbschtlich mit vil Sunneschinn ugschtattet verusse vorthandä gsi, dasmer üs schu früeh am Morgä uf de Terassen (z'Terrace) iigfunde hend. De Tag isch nacheme riichhaltige Zmorgä eigentlich ä richtigä Mannäsunntig wordä - de Unkel Dieter hed mich mit ufe Dump gnu (d'Güselhhaldä vo Terrace), mich mit em Ford F-350 Super Duty Pickup (8-Zylinder Turbodiesel mit 7.6 Liter Hubruum und ca. 400 PS / 1000 Nm Drähmomänt) la fahrä (ä Ehr wo nidemal sine suschtige Verwandtä zu teil wird), mier sind mit em Ford Mustang ufene schnelli Rundi (wirklich schnell, ender rasant, ja nei, ender superluutschnellgeil. Also alles in allem ä geile Tag mit eme hervorragende Abigässä.

Tags: Ferien, Canada

Nachere churzä Nacht isch die erscht Tätigkeit s'Ortä vom Auto gsi und d'Kontrollä öb nu alles anem draa isch. Aber die komische Lüüt (wo im Übrigä schu am Morgä am 8i wieder ihri Plätzli zum sich betrinkä vis-à-vis ignuh gha hend) sind offesichtlich meh am Schtoff (Feuerwasser) weder am Auto interessiert gsi Schwupps alles igladä, schnell mit em V8 d'Schiibe vom Hotel la erzitterä und denn nur ca. 150m wiiter wäg bim Tim Hortons fürne erschte Schtopp wieder anegfahrä - Kafitime! Nach dem härzhaftä Zmorgä isch de nu einisch s'beruhigende *Gluck-Gluck* vo de Zapfsüüle ufem Programm gschtandä und schu simmer ufem Wäg abä nach Terrace gsi. De Wäg isch prägt gsi vo vilne kaputte Bäum (killed by pine beetles) und vilne lange, gradä Schtreckänä und a so unsinnigä Tempoilimitä dases am durchschnittlich, raserisch begabtä Europäer schier d'Hamorhidä brungä hend. Läck mier, da hötterlisch mit offziell 90km/h (also mier mit em Mustang 115km/h) dur d'Gägend und äs gahd eifach nid vorwärts! Ich ha mängisch gseid, das weni mi Blaui Blitz hie hät sicher de Turbolader nid under 1,0bar würd ghiää und die Schtrecki mal im Tüüfluug würd erleid wärdä. Aber so isches halt chli langsamer gangä
In Burns Lake isch üs de au nu grad um d'Mittagsziit umä ä KFC is Aug gschtochä und äs hed ä Spici Burger Combo für de Fahrer und de Biifahrer gäh Au de Mustang hed sis Mittaghappi gha, ihm hemmer aber nume 87 Regular z'Frässä gäh
Gäg die 5i anä isch de langsam aber sicher Terrace i Sicht cho und schu bald hed äs einsams Schildli "Lakeelse Lake" verkündet. Chli Sueche und Würgä und schu bald hemer au die richtig Abzwiigig gfundä und sind prompt mit em Ford Pony...äh Mustang vorem Huus vom Tanti Emmy glandet
Ä paar Schtund schpöter simmer iigrichtet gsi, d'Wösch isch am Wäschä gsi und mier sind uf de Terasse (z'Terrace) am Bier suufä gsi

Tags: Ferien, Canada

Früeh am Morgä isch d'Kafimaschine agworfä wordä und schu bald isch de Duft vo Vanilla Coffee durs Chambre Separée gschlichä. Chum hemmer d'Türe nach Veruse uftah wärmer am liebschte wieder is warmä Bettli krochä - sauchalt isches gsi, schier nöch a null Grad Celsius. Schnell, schnell is Auto abä und ab ufe Wäg zum Lake Morraine. De isch ca. 14km usserhalb de Hoger uf und äs Bijou zum luegä. Mier sind so früeh dra gsi dases ufem Parkplatz schier kei Auto gha und ei Friede gherrscht hed.



Schnell äs paar Fötäli gmacht und zrugg durab zum Lake Louise. De isch nid halb so schön, aber chum simmer dette gsi sind d'Tourischte tonnäwiis anekarret wordä Au dette schnell äs paar Fötaäli gmacht und schu simmer ufem Wäg durab gsi und hend üses nächschti Ziil, de Highway Nr. 93 (au bekannt als Icefield Highway) avisiert.
Am Iigang zu dem Nationalpark hedmer müesse en Pass lösä wo ei Tag gültig gsi isch (also fascht, wemer dänkt dass de Tag 24 Schtund hed, aber de Pass nur bis am Abig am 4i gültig isch). Leider bruucht mer de Pass desmer überhaupt nur daf dure Park resp. übere Highway surrä. Also guet, hemmer die $20 halt im wahrsten Sinne des Wortes zum Fänschter usegrüehrt Leider hed de Day-Pass id d'Wättergarantie beinhaltet, so dases schu bald drübert abä afä schiffä hed und mier vo de Gletscher nid soviel gseh hend. Defür hani ä Schwarzbär us 2m Dischtanz gseh wiener Beeri knabbärät hed. Äs isch au trotz Rägä sehr imposant gsi dur de Park z'fahrä und äs hed doch s'einte oder andere Fötäli gäh.



Wie überall im Hochgebirge gids hunderti vo Warntafelä und eini hed üs zeigt dass d'Möglichkeit beschtahd dass Schtei uf d'Schtrass chönd ghiiä. Das isch de au passiert, allerdings hend die Schtei Bei gha und mier hend döffä wägere Mufflon-Familie z'mitzt ufem Highway ahaltä. Ich weiss nid öb die en Schtrasseblockade plant gha hend, aber sie hends gschafft dass de Verchehr fürnes churzes Ziitli schtill gschtandä isch
Gägä Mittag anähemmer üs Jasper gnöcheret und mier hend das Dörfli amene gnäuerä Augeschiin underzogä. Ohni Schnee isches nid soooooo schön, drum simmer au nach 2 Poschtchartä und 2 Briefmarkä wieder abgrauscht, so dasmer de Park sicher vorem 4i am Namitag hend chönne hinder üs lah (suscht hättemer numal $20 zahlt). Also ab wieder ufe Yellowhead Pass und dette hemmer au wieder d'Ziitzone vo Alberta hinder üs glah und en Schtund uf de lange Reis gwunnä.
Wills so guet gloffä und üs nu ä Schtund gschänkt wordä isch, hemmer als temporärs Tagesziel Prince George gha. Ca. 50km vorem Tagesziel isch de nu äs Kafipäusäli ufem Programm gschtandä, irgendwo zmitzt i de Wildnis imene Kafi-Hüüsli (also so abgsifft wie aligs die Hüüsli im Film, mit em chochende Kafipot und mit Mobiliar wo wahrschindli bi de letschte Kneipeschlägerii z'Bruch gangä isch. Aber de Kafi isch fein gsi *grins*). So frisch gschtärcht hemmer tatsächlich üses Tagesziel de nu vor de 6i erreicht, au wenn de Highway keis Ändi meh hed wellä näh
Mier sind de nach churzem Umesurrä i de Stadt (weis im Übrige eine wie ä 4-Way-Stop funktioniert i de Rushhour?) im Days Inn abgschtigä. Äs guets Hotel, nid z'tüür und mit eme Foodcorner und ämä Pub im Ärdgschoss. Leider hemmer dette au die erschte unliebsame Begägnigä mit de erschte Lüüt i dem Land gha wo schu am früehe Abig bsoffe umegschtrolcht sind, so dass mier s'Auto komplett usgruumet hend und nüd hend wellä dettä lah. Mier hend üs de churz Indisch verpflegt und hend im Pub uf d'Lindsey gwartet. Leider isches chli länger gangä, so dass ufem Tisch plötzlich vili lääri Fläschä mit Canadian gschtandä sind Wo de Lindsey cho isch, isches de richtig losgangä, so dasmer erscht schpat is Bett cho sind

Tags: Ferien, Canada

Eigentlich isches ä ruhigi Nacht gsi, abgseh vo de grosse Laschtwägä wo vorem Hotel de Retarder (Motoräbräms) ineghaue hend und da die kei Schalldämpfer hend bisch aligs im Traum ufeme Flugzüügträger gschandä wo de Jet de Nachbränner inehaut Aber au das isch duregangä und so simmer am Morgä ufe Wäg nach Kamloops gsi. Ufem Wäg dett anä simmer dur sone Art Prärie gfahrä und schu gli drübertabä simmer in Kamloops iitroffä.



Wills so guet gloffä isch hemmer als nächschts Ziil Salmon Arm gha. Dette isch au en chline Rundgang ufem Plan gschtandä. Äs schöns Näschtli, am See und so richtig verschlafä. Nach dere churze Pause mit eme Subway-Sandwich (mit vil Ranch dinnä isches de wiiter uf Ravelstoke-Golden gangä.
Wie ier sicher gmerkt hend sind mier guet i de Ziit glägä, drum hemmer Revelstoke (eigentlich üses Tagesziel) und Golden (mis persönliche Tagesziel) grad hinder üs glah und sind übere Rogers Pass und de Kickin' Horse Pass uf Alberta ine gsurrt.



Ufem Pass obä hemmer nu üsi Uhrä umene Schtund müesse füretrüllä, wills ab denn nach Alberta-Time gangä isch. Hed suscht ächt schu öppert erläbt dass wemer mit em Auto underwägs isch dasmer ä Ziitzone "überfahrä" hed? Wiiter isches gangä und am Abig simmer in Lake Louise iitroffä. Das isch soooo chli dases sogar nur ei Usfahrt hed
Äs Hotel hemmer de au gli gfunde und mier sin im "Lake Louise Inn" gu fragä was en Nacht choschtet. Tja, so chas gah, d'Offerte isch de bi $180 schtah blibä - aber was wotsch anders machä i dem touristische Dörfli? Ich ha defür de de ganz Abig döffe ghörä "Räuber, Räuber, eifach Räuber!" S'Zimmer isch guet gsi und als krönende Abschluss vom Tag simmer is "Mountain Restaurant" gunes feins Happi-Happi näh.

Tags: Ferien, Canada

Früeh am Morgä isches schu losgangä mit uscheckä und ufä Wäg zum Greyhound Terminal mit em Skytrain. Äs hed alles guet klappet bis zum Terminal, dette isch üs de mitteilt wordä dass de Bus chli Verschpötig hed. Schliesslich simmer dem halt am 20 ab 10ni mit eme uraltä Greyhoundbus (so alt dass sich d'Lähnä aligs selbschtändig gmacht hed und so alt dass de Busfahrer de Bus mit de antike Kupplig grad zweimal bim abfahrä abgwürgt hed). Aber anyway, mier sind de nach diverse friiwilligä und unfriiwilligä Zwüscheschtopp um die viertel ab 12i in Chilliwack aglangt.
Üs hed denn bereits d'Renate erwartet und üs mit em Pickup zu üsem nüüe Fortbewegigsmittel - em Mustang - gfahrä hed. Mier sind de churz verchlüpft will dette ä 92er Ford Mustang V8 mit 5 Liter Huubruum gschtandä isch. Sie hed üs de nu churz mit i A&W "Home of the Burger-Family" mitgnu, zrugg zum Auto brungä und denn isch sie nu üse Vorusfahrer gsi bis zum Highway. Mier also is de Mustang inä und de Zündschlüssel dreijät *wiuwiuwiu- vrooooooooooooooooooooooooooom* So ändgeil, ehrlich. Das Ding hed kei Kat, kei Schalldämpfer und gar nüd gha, dezue anä nu ä Coldair-Intake und ä Rännschaltig! So bini de mit ämä vorsichtigä Gasfuess bis uf de Highway gschlichä und denn nu chli wiiter



Mier sind denn anschtatt wie vorgseh via Hope uf Cache Creek gfahrä, nid über Whistler will die d'Strass immer wieder gschperrt hend. Mier also de Transcanadian Highway Nr. 1 duruf und äs isch wirklich atemberaubend gsi wasmer allse gseh hend: Vo Wald und Busch bis zu Schteppä und Bärgä - eifach geil.
Irgendwenn hemmer de nu Hunger und Durscht gha und beschlossä dasmer ä Halt machid. Mier also vor sone Imbiss anä, de Motor abgschtellt, aber de Zündschlüssel hemmer nid usebrungä. Tja, de hemmer halt äs paar Trucker gfragt, aber au die hend ca. 5 Minutä gwürgt bis de Trick 77 mit em verschtecktä Chnopf underem Länkrad gwirkt hed Nach dere Session simmer de froh um öppis z'trinkä gsi
Frisch gschtärcht simmer wiiter bis uf Cache Creek und hend dette im Thumbleweed Motel Underschlupf für d'Nacht gfundä, das aber erscht nachdem mier de Wägä tankt und kontrolliert hend.

Tags: Ferien, Canada

Au hüt simmer schu früeh am Morgä underwägs gsi - dasmal zum Zmorgä i Blenz grad unne am Eggä. Chli useguggä, Kafi trinkä und öppis Chlises häberlä - das isch wunderbar. Vorallem wenn uf de Chrüüzig vore ussä immer sovil los isch Nach de Schtärchig simmer mit em Skytrain zum Pacific Central gfahrä um dette üsi Billet füre Greyhound z'lösä.




Mier hend am Schalter de dä Huusdrachä höchschtpersönlich gha, aber mit guetem Willä und chli chalter Schulterä hemmer de au üsi Billet vo Vancouver bis Chilliwack übercho. Mier fahrid etz also morn am Morgä am 10ni hie z'Vancouver mit em Greyhound ab und chömid am 12i dette aa. De wärdid mier abgholt und chönd de üses Auto i Empfang näh. S'Auto sig tüüfer gleid, heig vier nüüi Pneu und är laufi guet Mal luege was de Ford Mustang fürne Wecker under de Huubä hed Aber gnueg vo dem, mier hend ja nu chli wellä vom hütige Tag brichtä.
Nachdem mier d'Billet gha hend simmer wieder mit em Skytrain zrugg a d'Robson Street und chli dur d'Lädä gschlichä bismer am Abig wieder is Hotel sind um z'packä und üs uf Morn am Morgä gu vorbereitä

I de nächste Tagä wärdid mier nid sovil is Internet chönne, drum hie ä churze Abriss vo de Routeplanig.

03.09.2008: Chilliwack > Whistler - 300km / 3:00 Fahrziit
04.09.2008: Whistler > Revelstoke - 500km / 7:00 Fahrziit
05.09.2008: Revelstoke > Jasper - 500km / 7:00 Fahrziit
06.09.2008: Jasper > Prince George - 400km / 5:30 Fahrziit
07.09.2008: Prince Geroge > Terrace - 600km / 8:00 Fahrziit

Das heisst, das mier öppä am Sunntig bi de nättä Verwandtä tüend iiträffä. S'Wätter söll guet sii und au uf de Strass sölls kei Schnee ha

Tags: Ferien, Canada

Früeh am Morgä simmer schu wach gsi und nach de Morgätoilettä gli schu mal über d'Schtrass ine Breakfast-Shop gschlichä. Mier hend üs dettä ä Breakfast-Wrap und en Turkey-Cheddar-Bagel gönnt, dezue nu ä grossi Tassä "Amercinao" (de H.P. würd etz wieder sägä "bagno di piedi"). Nach dem riichhaltige Zmorgä isch de Stanley Park s'Ziil gsi. Wo gids das ächt suscht das en Jogger (und Hobbyfotograf) ahaltet und vomene Päärli uf Hochsigsreis Fötäli macht und sie i Pose schtellt? Nume z'Kanada Nachem mier chli am Seawall entlang gloffä sind und nu d'Totem Poles beguetachtet, d'Seagulls und d'Mermaid gseh hend, simmer quer dure Park, entlang a de Vancouver Triathlon Route (wo ä huufä schwitzendi und chüüchendi Lüüt a üs verbii gsabbert sind) is Aquarium gangä. Im Aquarium hed de Adili wellä ja de hungrig Belugawal füeterä. Leider, leider isch das nid guet gangä, denn d'Belugas hend Nachwuchs gha un de simmer halt d'Familie gu aguggä. Isch schu nu härzig sones Belugä-Chälbli, eifach nid so handlich und liecht




Anderi Viecher heds au gha, aber nid alli sind so härzig wie de Seeotter gsi wo ufem Rüggä schwimmend sini Hodä gsünnelet hed



Ufem Rückwäg simmer nu um d'Lost Lagoon gwatschlet und nacheme churze Abschtächer is Hotel hed de Adili müesse vis-à-vis vom Hotel gu bequemi Airwalk-Schueh gu Poschtä, da är vor luuter Laufä Blaterä übercho hed. So usgrüschtet isches de numal Downtown gangä gu d'Public Library aguggä, im Foodcorner vom Pacific Centre gu Sushi schnabulierä und i de Bar vorem Hotel gu Poschtchartä schriibä, Canadian trinkä und de Serviertotsch gu ärgerä Nach dene Heldetatä simmer is Zimmer fürnes churzes Schläfli, aber das hed üs de so übermännt dasmer nidemal de Wecker ghört hend und erscht am Morgä am 4i wieder verwachet sind So gids au billigi Äbig

Vancouver: 17°C, sunnig und windig

Tags: Ferien, Canada

Früeh am Morgä simmer schu wiede runderwägs gsi und nacheme Morgäässä im Blenz-Coffeeshop simmer per pedes a English Beach und vo dette zum Aquatic Centre gloffä. Dette hemmer denn äs Watertaxi (so ä Art schwimmendi Badwannä uf Granville Island gnu, womer denn pünktlich uf die 9ni iitroffä sind. Mier hend welle de berüehmti Märcht bsuechä und mier sind nid enttüscht wordä: Unglaublich wasmer dette für Sachä gseh hend: Frücht, Fleisch, Blueme etc. Nach dem Sinnesruusch simmer de mit em Wassertaxi Richtig Plaza of Nations wo grad äs Drachebootrännä schtattgfunde hed. Vo dette via B.C. Dome und komische, zieliechtige Schtrassä nach Gastown. D'Gastown Steam Clock hed grad gwinslet womer cho sind und die erschte Bsüech i de Lädä gmacht hend. De Canadien Place isch s'nächschte Ziel gsi und s'Geniale isch gsi dases grad zwei Chrüüzfahrtschiff gha hed wo uf d'Abfahrt gwartet hend. Mier hend de nu chli d'Robson Street, d'Waterfront und diversi Reschtaurant unsicher gmacht bevormer is Hotelzimmer gschliche sind

Vancouver: 17°C, sunnig und windig

Tags: Ferien, Canada

Sodele, etz isches äntli losgangä mit üsne lang ersehnte Ferie. Am viertel ab 7ni hed üs üses Meyer-Taxi a Flughafä brungä. Dank em Vorabig-Checkin hemmer locker-flockig nid müesse schtressä und sind entspannt nach de diverse Kontrollä im Flüüger gsässä. De Flug isch geil gsi, vorallem will jede Sitz hed chönne uf sim eigete Monitor Film luegä oder Musig losä. Hamer schnell "The Bank Job" und "Iron Man" inepfiffä, allerdings uf Änglisch Nach 10h simmer au z'Toronto acho und bi schönschtem Wätter und 27°C hemmer üs müesse schleunigscht uf d'Sockä machä, suscht wärs ender knapp wordä mit em Aschlussflug Aber dank Ortskänntniss und schnelle Bei simmer überpünktlich im Bomber gsässä. Leider isch de Bomber ca.50 Jahr alt gsi und hed gmüffelet wienes Altersheim. Und s'Geilschte - fürs Ässä hedmer müesse zahlä! Aber easy, die $2 fürne Nissin Noudel-Soup hemmer au nu knapp gha Nach de Landig in Vancouver simmer mit em Airporter fascht vors Hotel anekarret wordä - aber nume fascht. S'Hotel hemmer de nach churzem Fuessmarsch erreicht und üsi Luxus-Suite bezogä (sie hed fascht meh Flächi als üsi Wohnig!). Nachdem mier mal s'Nötigschte usgladä hend (ganz wichtig: die füechte WC-Tüechli!) simmer nu churz chli d'Robson Street durabbeindlet und mier vili Autöli gseh und sogar en Prius wo sich wehemänt bemerkbar gmacht hed wosne abgschleppt hend Im Übrigä: Hie isch wirklich Prius-City! Jedes 10te Auto und jedes 2-3te Taxi isch en Prius. Mier hend de en lauschige Italiener gfundä und nacheme "Bellini" (eigentlich hätts söllä en Drink sii, mier hend aber je ä halbe Liter iiheimischs Bier übercho) und de Pizza simmer de todmüed is Bettli krochä

Zürich: 14°C, bedeckt
Toronto: 27°C, sunnig
Vancouver: 18°C, liecht bewölkt

Tags: Ferien, Canada

De Adi heds mal nid chönne la sii la: Ufene Fraag hi im Forum hani de ganz Fritig lang mier Gedankä gmacht was würdi sii weni d’Karosserie vom Race-Touareg ufe Landcruiser würd montiere, geschweige denn öbs würd gah. Gedacht, probiert und s’Resultat chönder unnä bewunderä

Tags: Landcruiser, Tamiya, Tourag

Geil!

Geil? Was wott de Schriiberling üs mit dem mitteilä? Ganz eifach, ich bi am Sunntig in Jonschwil (hinderschti Gmeind in St. Gallen - also für mich) am einzige, genialschte und erfüllenschtä Konzärt vo dem Jahr gsi Metallica hend sich d’Ehr gäh und das dafmer nid verpassä.

MIer hend üs am schpate Sunntignamitag ufe Wäg gmacht und sind de pünktlich zur drittletschte Vorgruppä iitroffä. S’Terrain isch super gsi, d’Priisä für sone Alass Wältklass und d’Lüüt sind bunt gmischt gsi (de alt Päpel mit wissem Bart am Tisch bim schlafä, s’Tussi mit de wissä(!) Tunrschueh und de falsche Gucci-Täschä, de Möchtegärnrocker wo nu nidemal bis a d’Bar ufe cho isch). Sogar gnueg und regelmässig gläärti (jaja, Grennfield und Frauäfäld hättid sich da nu einiges chönne abluegä Toi-Toi’s sind ume gsi, für d’Herrefraktion heds sogar 20m Pissrinnä gha

Am 8i isches de losgangä - Metallica hend d’Bühni beträtä. Was die nächschte zwei Schtund abgängä isch chamer amene Usseschtehendä schier nid beschriibä. Äs isch eifach zu geil gsi. Die hend so Spielfreud zeigt wie ich das nu nie erläbt ha. Au d’Wahl vo de Musigschtuck isch de Killer schlächthin gsi - nume Alts und Guets.

Bis da anä isch alles super gsi, aber au de Veranschtalter schaffts mit wenigä Chlinigkeitä dases eifach Scheisse isch am Schluss. Warum dasmer nid cha d’Notusgäng am Ändi vom Konzärt ufmachä und so d’Lüüt uf mehrerä Wäg chönd s’Stadion verlah wird mier äs Rätsel bliibä. Drum heds halt au chli anarchistischi Züüg agnu womer zum Gländ us hend wellä Aber easy, mier sind de mit em obligatä Schtau au heicho und schpat ide Nacht (oder isches schu früeh am Morgä gsi) is Bett glägä

Tags: Musik, Metallica, Open Air, Jonschwil

Vor Unziitä hani doch mal gschribä dasi en Rock-Crawler, also äs Vehikel für unwägsamschts Gelände in Hong Kong bschtellt ha. De Buusatz isch au wirklich iitroffä und hüt am Namitag isches de passiert gsi - är isch fertig wordä und hed sini erschte Rundenä (oder besser gseid Chlätterpartie) im Gartä und uf de Teschtschtrecki gmacht.

Für alli vo üch wo chli älter sind und sich nu a so Toyota Landcruiser chönd erinnerä, sind die folgende Bildli sicher äs Déja-Vu

Tags: Landcruiser, Tamiya

Ich ha üch doch vor geraumer Ziit mal mi Nachwuchs, de Mellow Yellow vorgschtellt - und au sis Schicksal nach nur 10min i minere Hand Hüt, ja hüt chani öppis erfreulichs vermäldä: De Mellow Yellow isch wieder uferschtandä. Nach langem Kampf im Chäller hani hüt die letschte Teili chönnne transplantierä und ihn wieder uf d’Bei...äh Räder schtellä.

Äs handelt sich hie umene Tamiya CC-01 (Race Touareg) als Basis.

Folgendi Anpassigä hani vorgnu:
• Motor mit Untersetzig vo bauteil1
• Reifä VX98 inkl. Bliiring und Felgä vo bauteil1
• Regler T20 vo Servonaut
• Geänderti Fäderig mit Multilink und anderi Anlänkpunkte
• Dämpfer vo Conrad
• Hütte vo Bruder
• Pritsche us Polystyrol
• Unterfahrschutz us Aluminum
• Dekosatz vom Buusatz

Als Servo hani im Moment ä Hitec "High Torque" drinnä. Ä Belüüchtigsaalag isch au vorhandä, zwei Frontschiinwärfer, vier Zusatzschiinwärfer und zwei Rücklüüchte.

Was nu z’machä isch:
• Fernbedienung bsorgä und iibuuä
• Komplette Elektronik funktionsfähig machä
• Fahrerhaus kippbar machä
• Kippwegbegrenzungen für Fahrerhaus und Pritsche nachärüstä
• Unterfahrschutz vorne nu einisch überarbeite und flacher gestaltä

Sodel, das isches etz mal füre Momänt. Halt, nu nid ganz. Hie nu äs Bildli:

Tags: Mellow Yellow, Tamiya

Sodele, ich mues doch au mal wieder öppis über mis Hobby schriibä Geschter bini gu Mannäiichaufstag machä. Was das isch? Ganz eifach: Meh schliicht dur iischlägigi Lädä wo sicher kei Chleider und so Sachä hend Ich bi geschter is Modällbuuparadies, i Conrad und i Bau+Hobby zum die letschte Sachäfür mi Nachwuchs poschtä. Ja, ier hend richtig gläsä: Nachwuchs. Ich ha ä heimatlose CR-01 vo de Tamiya us Hong Kong „adoptiert“. Ier fragid üch etz sicher was das isch. De CR-01 isch de erschti Rock-Crawler vo de Tamiya uf Basis vomene Old-School Toyota Landcruiser. Das gsehd also wie folgt us:

Bild

Video

Das Ding isch wirklich knuffig und au d’Technik isch de Hammer. Hie isch nu s’Ergäbnis vo mim samschtägliche Poschtiwahn:



D’Farb hani nu nid ufem Fötäli - wett ja nu nid z’vil verrätä wiener usgsehd

Tags: Landcruiser, Tamiya

Letscht Wuche simmer mal Richtig Frankriich. Dezue hemmer üs am Morgä Früeh am 7ni uf de Autobahnraschtschtätt mit äs paar andere verrucktä Type troffe und sind mit de Auto uf Anneau du Rhin gu luege was üsi Auto so leischtid. Mier hend mit ca. 40 Auto die ganz Rännschtrecki (wo im Übrige imene schöne, lauschige Waldschtuck liid) de lieb lang Tag ganz für üs ällei gha. I drüü Gruppene isches de losgangä und me hend chönnä 20 Minute fahrä und 40 Minute zueluge. Herrlich wie das tönt hed! Leider hemmer au äs paar Usfäll z’bezeichne gha - me gsehd halt schu au dass die Auto nid für Rännä gmacht sind.
De blaui Blitz isch au uf de Pischte gsi und äs isch ä wahri Freud gsi mis Wägi chönne mal chli am Limit z’bewegä. Bi mier isch alles heil blibä, fascht jedefalls. Ussert de Pneu (siehe Bild) isch alles nu dra

Tags: Auto, Anneau du Rhin

Hihi, au uf d’Gfhar hi üch mit mim Gartechrüücher z’närvä - ich mues doch mi Schtolz zeigä. Ich ha mier useme Gedankä usä us mim Gartechrüücher ä richtigä Gartäschnägg gmacht - so langsam (und chraftvoll) ischer etz. Usem Düütschä hani äs 4:1-Reduziergetriebe bschtellt und is Auto inegwürgt. Leider hed de de Motor am Rad gschreift (oder umgekehrt) und de hani nu chli müesse de Radstand verlängere. Bohre, fluechä und lötä sind de ufem Programm gschtandä und gli drüberabä sind die erschte Fahrversuech gloffä. Herrlich, eifach herrlich wie das Ding sogar anere Wäschbetonplattä wo nahezue sänkrächt schtahd ufechräslät (de Bewiis chönder under de Rubrik „Movies“ gseh). Mini Kollegä usem Forum (www.modelltruck.net) sind au erschtuunt dasmer sones Standardmodäll so cha pimpä

Wer die ganz Gschicht dette wett verfolgä, cha hie klickä: Drück mich sanft!


Hie nu äs Bild vo mim Wärch:

Tags: Gartechrüücher

Sodele, etz hani au mal wieder gebäschtelt und was isch usecho? Genau, mi Gartechrüücher hed Liecht übercho, damit mier au i de Nacht chönd gu Chatzä jagä im Gartä...äh pardon...gu umefahrä

Tags: Gartechrüücher

Sodele, etz heds mich au verwütscht mit Nachwuchs Neinei, nid was ier etz dänkid, für das simmer nu zwenig lang ghüüratet. Mi Gartechrüücher hed äs Gschpänli übercho - Vater isch de Unkel ricardo.ch. Und hie schu s’erschte Bild, knapp 10min nachdem de Mellow Yellow s’Liecht vo Sins erblickt hed (und ca. 10min bevor är unglücklich gschtürzt isch und de „Chopf“ verlorä hed - Friede seinen Einzelteilen).



Aber kei Sorgä, är chund gli wieder uf d’Bei...äh Räder

Tags: Gartechrüücher, Mellow Yello

Am vergangnige Wucheändi heds mal wieder geheisse „Let’s rock...!“ Ich bi am Greenfield OpenAir z’Interlakä gsi. Hammergeil, abgseh vo gwüssnige Sachä wo mich sehr schwär a s’letschtjährige OpenAirFrauäfäld erinneret hend. Aber au wemer i de Nacht chalt gha hed wie Sau im Schlafsack und am Sunntig schtinkig heicho isch - geil isches halt schu gsi (und weni nu Haar ufem Chopf gha hätt, so hätti die Cheibe gschwunge zum Takt vo de Musig).

Tags: Greenfield, Open Air, Party

Hender mal wellä öppis Nüüs gseh? Nid immer nume de Gartechrüücher? Voilà, da cha üch ghulfä wärdä. Ich präsentiere schtolz de...*ta-daaaaaaaaa*...de Lokichuechä:

Tags: Lokichuechä

Sodele, vilicht henders ja gmerkt: Mini Websiite hed wieder mal äs anders Ussehä übercho. De Zämähang isch da drinne z’suechä dasi ä nüüi Version vo mim bevorzugte Webeditor - Rapiweaver - zuechetah ha. Viel Spass.

Tags: Webseite , Rapidweaver

Sodele, etz hed mis Gartechrüücherli doch nu sini Finkli...äh pardon Pneu us Düütschland übercho. Eigentlich sinds us Spaniä, aber leider hed de Härsteller Lieferschwierigkeite gha, drum hanis im Düütsche ussä bschtellt. Ziitgliich hani am Chrüücher nu ä Spielplatz mit ca. 100kg Rindemulch baschtlet

Hie nu äs Bildli vo de nüüe Finkli in Action:

Tags: Gartechrüücher, Hobby

Hüt simmer iigladä gsi zum am Radio Pilatus-Event teil z'näh. Mier hend döffä am Morgä am 10ni i nüüi Citybeach in Luzärn gu brunchä. Isch schu nu edel gsi: Sand, Schtrandbett und ä Pool. Au s'Wätter isch de Hit gsi und so hemmers de locker mit de andere 300 Lüüt verlittä bises de am Namitag am 2 für alli Interessierte ufgangä isch. Ich chas nume empfählä und ich bi sicher nid s'letschtmal dette gsi

Tags: Citybeach, Luzern

Sodele, hüt hani doch au nu churz Glägeheit gha mi Gartechrüücher nu einisch chli z'modifizierä. Etz hani s'vordere Differenzial ca. uf 80 - 90% gschperrt - Vorteil: de Wändechreis wird nid ganz so gross und s'Schtiigfähigkeit isch wesentlich besser. Nachteil: äs gid schu nu öppe de einti oder ander Hoger woner gliich chli duredreijät Die kommend Wuche söttid nu d'Pneu us Spanie cho

Tags: Gartechrüücher, Hobby

Hüte hemmer ä Usfluug uf Einsiedlä gmacht um dette d'Sprungschanzä im Rahmä vomene Event vom ODEC Region Zentral azluegä. Wunderbarerwiis isch grad nu s'Internationale Gloggäschpringä gsi (nei, nid was ier etz dänkid). Jungi Nachwuchstalänt sind ab de K-77-er Schanzä gschprungä. Rundi 80km/h und Wiitenä bis 74m sind ufem Repertoir gschtandä. Womer de nu uf die ganz gross Schanzä uf 1001m gangä sind, hemmer au nu d'Ussicht chönne gniessä.

Tags: Sprungschanze, Einsiedeln

Sodele, etz isches passiert wasi akündiget ha: Ich ha mi Gartechrüücher gepimpt. Me weiss ja wies isch wemer ines Gschäft gahd und nu das und dieses gsehd

Hüt bini bim Racingmodellbau in Sevelen gsi und dementsprächend hani gnueg Material gfundä für mis Gartechrüücherli. Etz hani mi Ford F-150 mit folgende Sache ufgrüschtet:

- Felgä und Reifä vom Tamiya Ford F-350
- Fahrtregler S20 vo Servonaut
- ä Truckpuller II vo LRP

So cha das Ding schu sehr sicher und solid durs Gländ schliichä. Keis Grüüsch gids me vom Fahrtreegler wiler mit 16 kHz taktet und au de Motor gid am Chrüücherli zum afahrä gnueg Power und me cha wirklich milimetergnau umerangiere. Etz warfti nu uf d'Bliiring usem Düütsche und de luegemer de mal ufeme Waldschpaziergang wiener sich wacker schlahd

Tags: Gartechrüücher, Hobby

Etz ischer ändlich fertig und ich dafne hie s'erscht Mal de Öffentlichkeit vorschtellä - mi Gartechrüücher. Eigentlich isches en Buusatz vo Tamiya mit eme Ford F-150, aber das Ding chamer so geil la schliichä im Garte (und natürlich rockt är au mit 30km/h durs Gebüsch) daser de Schpitznamä gli gha hed.



Natürlich isch das Ding nid ganz Original (me kännt mich ja). Folgendi Veränderige hani duregfüehrt:

- Stossdämpfer mit 2 Tellerlöchern
- Stossdämpferöl Viskosität 500
- komplett kugelgelagert
- Fahrtregler 12V von Conrad
- Kugelköpfe blau eloxiert
- Stoppmuttern an den Felgen blau eloxiert
- Verkabelung mit UV-aktiven Spiralschläuchen in blau ausgeführt

Das Ding chönder under de Rubrik "Movies" uf youtube.com bi sinere erschte Usfahrt gseh

Tags: Gartechrüücher, Hobby

Sodele, wener etz guet ufpasst hend, de gsender uf de rächtä Siite ännä (aso nur uf de Websiitä dases dettä ä nüüi Kategorie "Movies" gäh hed. Wener dette druuf drückid wärdid ier automatisch uf mini Siite bi youtube.com gschpickt woner mini Videos chönd aguggä

Tags: Webseite

Juhu, sit em 28. April hani ä nüüä Namä (aso näb de übliche wie "Arschgiigä, Schtinker, Beamtä, Füdlibürger, Büffel" etc.). Ich daf mich ab jetzt offiziell "Unkel Adrian" nännä. Tönt alt, oder? Obwohl, abgseh vo de Faltä um d'Auge gsehni ja nid so alt us Aber zrugg zum Thema. Mini Schwägeri hed nach langem Kampf am Morge am 3 de Alexander Christian uf d'Wält brungä. Ä süesse Schnüggel, oder? Leider heder mich nu nid persönlich kännäglehrt, schliesslich mueser sich z'erscht uf derä Chuglä chli iiläbä und so bevor de "Böhse Onkel" verbii chund.

Wie hend Die Toten Hosen schu mal gsunge: "Hey, hey, hier kommt Alex, Vorhang auf für seine Horrorshow..." Vo daher passt de "Böhse Onkel" nu guet

Tags: Alexander, Christian, Neffe, Onkel

Vilicht isches ja niemerem ufgfallä, aber mini Webcam hed sit Wiehnachtä immer s'gliichä Bild azeigt. De Mangel isch mier schu lang ufgfallä, aber leider hani eigentlich ja nüd defür chönnä, will sit mi Webhoster is nüüä Rächäzentrum züglet hed hed mini Webcam d'Bilder nümme chönne umbenännä. Au de Support isch nid so supporterig gsi und hed für mis Problem kei Lösig gfundä.

Aber irgendwie hed mich das gnärvt und plötzlich hani d'Idee gha wasi chönnt machä. Gdacht, getan und siehe da: Es läuft wieder! Viel Spass bim ineguggä und d'Ussicht gniessä

Tags: Webseite

Och kuck mal, mis Auto hed nüüi Felgä übercho - nene, so schlimm isches etz au nid. Das sind ja nur d'Originalfelgä mit chli Farb Aber luegid doch sälber...

Tags: Auto

Vili, vili Jahr isches här dasi s'letscht Mal z'London gsi bi. Etz hanis mal wieder gschafft und ich mues sägä dasi positiv überrascht bi über d'Veränderigä. London isch nümme so dräckig wie früehner und au d'Luft chamer guet schnuufä Im Verglich isch Züri grad ä Dräckstadt Aber tüür isches immer nu - sehr tüür sogar. Bildli hani au gmacht, vil Bildli sogar, lueg eifach i minere Gallery

Tags: London, Reisen

Will s'mier letschtmal in Ischgl so gfallä hed und ich unbedingt numal ha wellä d'Pischtesau usehänkä, simmer früeh am Sunntigmorgä mit em blauä Flüüger Richtig Ischgl abgfahrä. Schu ufem Hirzel hed sich zeigt dases sicherlich ä agnähmi Fahrt wird gäh - Schnee. Die Sorg hed sich de ca. 10km nach Feldkirch definitiv bewahrheitet wo d'Arlbergschnellschtrass chäch mit Schnee (25cm) bedeckt gsi isch. De Schneepfluegfahrer isch wahrschindli au nu im Bett glägä, drum hemmer die ganz wiis Pracht chönne gniesse. Churz bevormer dobä gsi sind isch de sone einsame Pflueg cho, aber de hemmer grad überholt: ESP usä und Bodebläch

Nach de Akunft simmer denn grad uf d'Pischtä: Schnee satt, aber schier kei Sicht. Defür simmer am Namitag de chli a d'Sunnä ghöcklät Am Mändig heds nu einisch chäch Pulver gäh gha und d'Sicht isch wältklass gsi. Mier sind ufä und abä wie d'Wältmeischter. Am Zischtig hemmer packt und sind nu einisch under traumhafte Bedingigä gu fahrä - eifach de Wahnsinn. Gäg die drüü isch de d'Abreis ufe Programm gschtandä und demit au s'Abschiednäh vom schöne Ischgl und em Team vom Almhof

Tags: Snowboard, Ischgl

Karfritig - de ideali Tag fürne Bsuech bi de Elterä. Natürlich au en ideale Tag zum en PC ane nüüe Standort züglä. Und natürli au en ideale Tag zum sich grüen und blau ärgerä.

Flissigi Läser mögid sich sicher erinnerä dass bi mine Elterä ä schöne Dell-PC stahd und druffe me schlächt als rächt s'Windows Vista schaffet und derzue anä d'Internetverbindig immer wieder abbricht. Mier hend das Ding also äntlich mal züglet (kei Sach, Stecker use, hau-ruck und am nüüe Ort abgladä - fertig). Söttmer meinä. Aber am nüüe Standort hed sich a de Mackä vo de Internetverbindig nüüd gänderet. Frust pur! Ich has de mal gschafft s'Servicepack 1 fürs Vista abe z'suugä und so das Ding mal hoffnigsvoll gschtartet. Ich mues sägä - ich bi überrascht gsi. Das Ding fühlt sich etz äntli wirklich a wiene PC mit 3 GB Arbetsspeicher und är särblet au nümme so vor sich anä. Ich ha de WLAN-Adapter vo Zyxel (what a crap) nu ohni IPV6-Protokoll und ohni Energiesparfunktion konfiguriert und schu bald hed sich mini Minä ufghellt - it works! So geil, äntli lauft das Ding wies mues. So macht doch Oschtere Spass!

Tags: Vista, Dell

Etz heds mich doch au nu packt - ich ha müesse bimene Navigationsgrät zueschlah. Nid dasi verruckt gsi wär oder so, nei, ich ha mier äs TomTom One V3 Europe i de Migros inezogä. S'Adigationsgrät isch ja suscht nid schlächt, da mier aber vom Gschäft us hend döffe Zertifikat und Oschterhase i de Stadt Züri gu verteile isches ratsam gsi sich professionelli Hilf i Form vomene Grätli z'holä.

Schwupps hei und uspackt und das Ding am Mac (jaja) aghänkt. Schnell die nüü Software füre Mac abegladä und schu isch mis TomTom mit Updates, Chartekorrekture und vil chline Schpielsachä versorgt wordä. Geili Sach, ehrlich. Am andere Tag isches denn ready gsi fürs probiere und i de Stadt umesurre. Fazit: Top Ding, Strasse erkannt, wemer z'schnell isch gewarnt und en agnähmi Schtimm wo a d'Regierig deheimä erinneret

Tags: TomTom, Gadgets

Saisonal gseh bini ja mit mim Supersnowboard de Winter ja schu vil i de Wältgschicht umecho: Ängelbärg, Ischgl, Länzerheid. Etz chund nu en Destination meh dezue: Laax im schöne Bündnerland.

Am Dunschtigabig simmer grad nachem Schaffä abgfahrä und schnuerschtracks uf Laax gflitzt. Logiert hemmer im Riders Palace. Befürchtige dass i dem ender spezielle Hotel nume jungs Gmües us de Gegelfängerhosä-Szene a z'träffä sind hend sich nid bestätiget. Ender sind die anwesende Gescht so im Bereich 30gi gsi (au d'Chatzä. Au d'Receptions-Dame sind en zweite Blick wärt gsi. Nachdem mier üs am Dunschtig nu ordentlich d'Kantä gäh hend simmer de am Fritig fett uf d'Pischte. Leider hed d'Sicht nid so mitgschpilt, aber mier hends bis ufe Vorab (3018m) gschafft. Als Snöber mues halt chli viel traversiere, aber defür sind d'Pischte extrem breit.

Au am Samschtig simmer numal gu ride und hend am Namitag au nu die perfekt Talabfahrt gnossä und sind de ermattet heizue gfahrä. Fazit: Top Skigebiet, leider chli vil Skilift. Tip am Rande: Luegid mal d'websiite a - äs lohnt sich: www.laax.com

Tags: Snowboard, Laax

*buhuuu* Etz bini grad chli truurig Hüt am Namitag hani äs wiiters Mal i mim Hobbychäller gwirkt und a mim andere Schpilzüüg, em grasgrüene Elektro-Raupäsurri, die letschte elektronische Schpänderorgan vo mim Elektroränner iipflanzt. Wo de Alles parad gsi isch und au en knapp funktionstüchtige Akku (em nüüe Voltcraft-Akkuladegrät usem Conrad sei dank) gnueg Energie fürne Teschtlauf gha hed, bini veruse mit em Raupi. Geil, schu am Aafang voll is Gebüsch und wiene gschtochni Sau mit knapp 30km/h dure Rase gsauät. Leide rhed die Fahrt nume knapp 3 min duuret, denn heds churz tätscht und das Ding isch suuber usgrollt (oder wiemer au bimene Raupefahrzüüg wott sägä. Scheisse! Schnell gu guggä und tatsächlich: Ä Schruube hed sich verabschiedet und hed s'Aatriebsrad vo de Raupä la gah und etz isch Ende Feuer. Mal solang bis ich wieder Ersatzteili ha Aber das Ding chund schu wieder uf d'Bei...äh d'Raupä

Tags: Raupi

Wie ier ja sicher wüssid bini brueflich (also ender de Arbetswäg) viel mit em Zug underwägs. Damit ich i dere PC-lose Ziit au öppis z'tue ha, hani hüt mal mis iBook wieder mit i Zug gnu. Da aber das Ding nume halb soviel Spass macht ohni Internet, hani hüt grad nu mal d'Orange 3GMobileoffice-Chartä Gassi gfüehrt. Demit chani eigentlich überall Online gah wos au Handyempfang hed. S'Fazit nachem hütige "im-Zug-bin-ich-online-Tag": Cool, aber irgendwenn hedmers au gseh, denn ich wirde im Zug inne immer so müed

Tags: Gadgets

Hmm, ischmer grad hüt ufgfallä: Wenn mal wetsch Lüüt aller Couleur gu aluege, denn gasch am Beschte i de Rushhour i Tüüfbahnhof vom Züri-HB und fahrsch dette mit de Rollträppä (warum dass immer die vercherte zwei Rollträppänä müend in Betrieb sii das isch äs wiiters Mysterium woni mal wett ergründä vo unne nach ufe fahrä und derbii d'Lüüt wo uf de andere Rollträppä entgägä chömid chli i aller Seelerueh schtudierä. Mier isch wirklich i Sinn cho: Das mues s'Laufband des Lebens sii. Soviel Iidrück i dene knapp 45 Sekundä - Wahnsinn.

Tags: Zürich

Hüt hani grad so mal s'Rissä gha und drum bini i Chäller abbä gu luege wies mim chline Surri gahd (für alli wo nid wüssid was mi chlini Surri isch: Das isch äs ufpimpts, färngschtüürets Autöli mit eme 1,2 PS-Verbrännermotor, Allradatrieb und ärä Pick-up-Verchleidig). Mi Surri schtahd etz sit em letschte Summer brav im Chäller und ich ha schnell wellä das Ding fahrfertig machä und mal gu umesurrä. Aber denkste: ha bi de Mechanikkontrolle feschtgschtellt, dass sich en Madeschruube am rächte Vorderatrieb glöst und sich dadurch de ganzi Aatriebsschtrang verzogä hed. Shit! Nüd mit fährä, sondern baschtlä heds gheisse. Ich ha de alles zerleid und mi Organschpänder (mis alte Elektrorännerli) hed müesse wieder mal äs Teili vo sich Schpändä. So wiit, so guet. Flugs alli Teili wieder zämäramisiert und numal müesse feschtschtelle dass mit grosse Aatriebsrad Karies mit Zahnusfall übercho hed. Etz muesi halt z'erscht gu Ersatzteili poschtä bevor das Ding wieder cha surrä. Aber ich ha döffä baschtlä und suuber ischer etz au wordä

Tags: Surri

Hüt hani mier mal wieder en richtige Männersamschtig gönnt. Am Morgä bini am 20 vor 8i zu de Wohnig us und schnuerschtracks uf Ämmä i Conrad gu umeguggä. So früeh am Morgä isch de Ladä läär. Hamer natürli au nu öppis für mis chline Wägi kauft (Pneu mit Felgä und äs nüüs Haupt-Zahnrad). Denn bini i Hornbach, wo ja grad ume Egga liid, und ha au dette chli umegschtöberet. Bevor de d'Lüüt agschtrömt sind bini abgwütscht und am 10ni bereist wieder i de heimatliche Gefilde acho.

Elektronik und Gartegrät - wo Männer sich zu Hause fühlen dürfen

Tags: Hobby

Black Pearl, wer dänkt da nid a das verlauste Schiff us "Pirates of the Carribean"? Wenn ich das aber ghöre denn dänki a mini Felgä vom Auto woni sit hüt ha Nene, nid daser etz meinid ich heigs vörig und heig mier schu wieder öppis Nüüs fürs Auto agschafft. Nei, mini Garage hed mier mini Originalfelgä i de huuseignä Lackiererii mit em Original-Ford-Farbton "Black Pearl" lackiert. Zämä mit de nüüä Pneu (also doch öppis Nüüs) hani etz grad chli en Grund mich ufä Früehlig z'freuä.

Tags: Auto

Chum ischmer mal ä Wuchä wäg und chund wieder de gids so vil Nüüigkeitä. Eini hed au mi iPod tocu betroffä: Just bim Synchronisierä heder gmeint daser ä nüüi Software vorrätig heig. Okay, das Update mal installiert. De heder gmeint öbi mich mit Fr. 25.- wett finanziell a de Fa. Apple beteiligä. Gesagt getan und für das Gäld hani mier etz d'Möglichkeit kauft, dasi cha mi iPod touch afah ufrüschtä (aso softwaremässig wienes iPhone). Etz chani Mails abesuugä, Wätter aguggä und und und. Aber nume wenn äs WLAN ume isch

Tags: iPod

Sodele, etz bini au zrugg us mine Skiferie - ha doch diräkt müesse 30gi wärdä dasis mal i d'Skiferie gschafft ha. Und s'Beschte: Grad diräkt is Mekka nämlich Ischgl.

Logiert hemmer im Sporthotel Almhof diräkt hinder de Silvretta Seilbahn. S'Hotel isch perfekt gsi und au de Standort hed überzüügt. Ruhig isches au gsi, me hed nume de Schneepflueg (jaja, dette isch Winter gsi, nid so wie hie) öppe die ghört. Au d'Hotelchatzä sind sehenswert gsi.

De Usgang nachem Skifahrä, au Apres-Ski gnännt, isch au supi gsi und me cha sich locker ä Schteiläbärä asuufä während einerä Wuchä. Aber mier sind ja nid wäg de Party (aso nid ganz) uf Ischgl, sondern wägem Skifahrä resp. Snowboardä. Äs isch wirklich de Hammer i dem Skigebiet - voll geil. Vorallem wenn d'Pischtene perfekt präpariert sind, niene muesch aschtah und uf de Pischtä au kei so Vollarschlöcher vo Pischteraser wie i de Schwiiz underwägs sind.



Eis isch sicher - ich gangä wieder mal

Tags: Snowboard