Am Fritigabig bini im Winterwunderland im Landesmuseum Züri gsi. Im Innehof vom Landesmuseum sind verschiedeni Schtänd ufgschtellt, Bar's, Glüehwiibude, Raclettehüttli und äs Iisfäld. Das Ganzä isch nu mit stimmigsvoller Wiehnachtsmusig und entsprächender Belüüchtig usgschtattet - mit eim Wort: Sensationell!

Mittwochmorgen wiederum in der Früh. Neben dem gastlichen Bahnhof Hardbrücke habe ich einen neuen Favoriten gefunden: Othmarsingen. Dank eines Zugsausfalles kenne ich jetzt auch die Flora und Fauna rund ums Gleis 4. Leider kam die Durchsage über den Zugsausfall erst nach ca. 12min, so dass man die Alternativrouten (z.B. via Aarau oder so) gar nicht mehr nutzen konnte und gezwungen war in der angenehmen Morgenkühle dahinzuvegetieren.

Der nächste Zug war neben der gemütlichen rustikalen Ausstattung auch zu allem Überfluss mit den anbrandenden Menschenmassen gut gefüllt, so dass sich der geneigte Schreiber in einer stehenden Position bis Zürich HB befand. Und da die S-Bahn wie immer nach der Formel "Fahrplanangabe + x Minuten Verspätung = Abfahrt" (x ist in diesem Zusammenhang eine Variable die jeden Wert zwischen 0 und unendlich annehmen kann) verkehrt, konnte ich heute folgendes Fazit ziehen: Arbeitsweg + 45min

Dienstagmorgen in der Früh. Man gewöhnt sich an die Verspätungen und auch der Bahnhof Hardbrücke (in diesem Zusammenhang von einem Bahnhof zu sprechen ist ja ein Wenig übertrieben, eher eine zugige Haltestelle unter einer Brücke, aber lassen wir das) kennt man langsam und man beginnt den Mäusen und Ratten zwischen den Geleisen bereits Namen zu geben während den Wartezeiten.

Dienstagabend in der Späte. Im Regionalzug erreicht man das heimatliche Dorf, doch als man die Türe betätigen will klebt doch ein richtig frecher Sticker an derselbigen der einem mahnt dass die Türe defekt ist. Kurz aufs Datum geschielt weiss der Betrachter nicht ob er lachen oder weinen soll: Der Kleber gibt Auskunft darüber dass der Defekt bereits am 25.10.2006 erkannt wurde (es war ja auch bereits vorvorvorgestern).

Montagmorgen in der Früh. Wie schon so oft stehe ich am Bahnhof in Sins und warte geduldig auf den für 05.56 angekündigten Regionalzug. Dieser kommt doch wie schon so oft 2 - 4 Minuten später, da sich immer wieder Güterzüge vor ihm über die zweispurige Strecke zwängen müssen.

Ca. eine Stunde später Bahnhof Hardbrücke, der selbe Pendler: Der für 7.04 gemäss Fahrplan angekündigte Zug nach Oerlikon kommt nicht. Keine Lautsprecherdurchsage dringt in das müde Hirn, einzig eine einsame Anzeige einer Abfahrtstafel zeigt an dass ein Zug für 7.09 erwartet wird. Es wird doch knapp 7.21 bis der Zug nach Oerlikon sich langsam in Bewegung setzt.

Fazit des Montags: Arbeitsweg + 15min.

Ich chas eifach nid la sii lah. Etz woni mal äs tuningfründlichs Auto muesi das natürli au chli usnütze: Ich ha mier nüüi Schiinwärfer (schwarz, mit Angel-Eyes), nüüi Rückliechter (schwarz) und die beide unsägliche Rückfahrlampe und Näbelschlusslüüchte (schwarz) bschtellt. So wird mis Baby au wider mal chli spezieller als äs etz schu isch Sobald de Umbuu gmacht isch, denn chömid d'Fötali *freufreu*

Wow, etz schriibi nu überne Wecker. De Adili isch ja nid ganz suuber, aber das isch ja bekannt Ich ha sit hüt en sackschtarchä Wecker, das muesi eifach brichtä. Also, wer kännt das nid am Morge früeh: *ringring* de Wecker schället (oder s'Handy) und me fühlt sich als ob mer underme Schtei mües usechrüüche, ganz eifach willmer im Tüüfschlaf gweckt worde isch.

Ich ha mier etz en Schlafphase-Wecker zuechetah. Das isch en Wecker wo gugget wenn dasi mich schier bi de Wachgränzä befinde und mich denn sanft weckt. Derzue gidmer eifach d'Ändziit i womer wett gweckt wärdä und denn tued de Wecker ufgrund vo de Bewegige schu 30min vorhär de beschti Ziitpunkt sueche zum d'Melodie schpile. Derzue tuedmer äs Armband trägä dur d'Nacht dure. Näbem wecke chaner au nu Iischlafmusig (oder Grüüsch) machä wo hörid wemer iigschlafä isch oder me cha sogar sin Schlafzueschtand via USB ufem PC analysiere.

Wers jetzt nu wundernimmt wiener usgsehd, de cha das mal under www.axbo.ch nöcher gu agugge und das au mal usprobiere (virtuell natürlich).

Herrlich, etz hanis doch au einisch mit eme PC über die magisch 2 GHz-Markä gschafft, sogar 2,8 GHz sinds worde. Wohär dass das plötzlich chund? Tja, de PC schtahd sid eim (!) Jahr under mim Pult und hed uf sini Volländig gwartet Etz motorät das Ding und isch im Vergliich zu mine bishärige PC (wo im Übrige all langsamer als 1,0 GHz gsi sind) ä wahri Fräsi

Hüt isches mal wider sowiit gsi: Ich bi uf d'Schliifschueh gschtandä. Und zwar ufem Open-Air-Iisfäld i de Herti z'Zug. Isch ja ganz aheimelig gsi, chalt und ungmüetlich, derzue nu so komischi Dinger a de Füess wo etz sit ca. 6 Jahr im Schrank vor sich anegammlet sind. Aber oh Wunder, ich has nid ganz verlenrt, so nach 20min isches wider gangä schier wie früehner

Leider isch d'Iisqualität nid so de Hit, denn so wies usgsehd chund d'Putzmaschine (aka Zamboni) nid flissig Uslauf ufem Ussefäld über

Wochenendzeit - Bastelzeit. Wie schu mängisch am Weekend heds mich i mini Baschtel- und Rumpelchammere (au bekannt als Heim-Büro) zogä. Ich ha mal mi alti Grümpel usegmischtet und bi dere Glägeheit nu mini nüüscht Errungeschaft in Betrieb gnu. Ich ha mier ä Netzwärch-Dateschpeicher (anderi sägid dem au NAS) zuecheta. Das isch äs Ding wo zwei Feschtplattä dinne hed und ab sofort mis Datelager mit 250GB (imene RAID 1) usfallsicher verwaltet. Äs isch hinder de APC USV agschlosse und wird im Momänt grad mit minere iTunes-Sammlig (40GB) befüllt. De Stromverbruuch liid bi voller Feschtplattälascht bi ca. 33 W und wenn d'Feschtplattä schlafid chunder grad mal uf ca. 15 W.

Meh Infos gids under www.thecus.com. Erhältlich isch das Ding z.B. bim Steg Computer in Littau.

Hüt am Abig hani d'Möglichkeit gha anere spezielle Vorpremiere vom nüüe James Bond - Casino Royal teil z'näh. Schu i de erschte Minute gads so richtig zu Sach - und zwar so wiemers suscht eigentlich nid vomene Bond gwöhnt isch nämli chli dräckig und bluetrünschtig. D'Stunts sind hammerhert und die digitale Effekt sind ender i de Underzahl (nid so wie im letschte Bond-Film, das isch ender kitschig gsi). De Darsteller isch allererschti Sahne, de macht öppis här und bringt chli en spezielli Atmosphäre i Film - für mich ischer en gueti Wahl, kei Fraag. Au dass de Bond mal chli verschlagä usgseht, mit Schnitt im Gsicht umelauft oder aber au nid immer wie us de Chleiderchammerä dahär chund, isch am Film zueträglich.

Fazit: Empfählenswärt *daumenhoch*

Samschtig, 20°C, sunnig und d'Regierig am schaffä: Was will de Huusmaa meh. Nach de Huusarbet schnell s'Auto gsattlet und Richtig Chur uf d'Autobahn. Am Blinkliecht z'Sihlbrugg hani nu chönne 6 Auto mit eme Blitzschtart abstaubä, aber denn isch s'schliiche dä Hirzel duruf losgangä. Unne acho isch de d'Autobahniifahrt ufem Programm gschtandä, au dette isch d'Poscht fett abgangä

Z'Chur acho bini nu i Mediamarkt gu ineluege und denn schnell i d'Länzerheid ufepfiffä. Dobe hani d'Natur und de Herbscht gnosse bevori de wider hinneabbä Richtig Tiefencastel grollt bi. De Heiwäg isch denn via Oberalp-Pass gsi, aso ja, leider isch de Pass chli churz gsi (oder äs chund mier mit dem Auto eifach so vor )

Nach 407km hani de s'Auto au wider i Underschtand gschtellt und dette warteds uf mich bisis mal wider füre nime.

Eigentlich söttmer ja erwarte dass Ändi Novämber s'Laub bereits dunne isch, de Schnee schu d'Bärgä befruchtet hed und alli Auto schu mit Winterpneu umefahrid. Aber d'Realität gsehd chli anderscht us: S'Laub hanget nu, i de Bärge heds meh Wanderer als Schiifahrer und d'Chromfelgefraktion tummled sich nu mit Summerpneu uf de Strassä.

Hüt isches denn Ärnscht worde: Mini erscht gross Uusfahrt mit em nüüe Autoli isch ufem Programm gschtandä. Früeh am Morge bini Richtig Bärn - Lausanne - Sion - Brig - Furka - Luzärn uf d'Rundreis. Mit eim Wort: "Hammerrattescharf!" Nid nume uf de Autobahn isch das Auto äs Träumli, au am Bärg isches de wahri Wahnsinn. Da ich nu am iifahrä bi hani s'Auto nie über 4'000 r/min drückt und bi suscht au pfeglich mit ihm umgangä

Aber wemer de Pass uf mues brämsä, denn hed das Auto wirklich Dampf under de Huube

Öhm ja, ufmerksami Läser vu dere in loser Abfolge veröffentlichte Sammlig vo Schnippsel us mim Läbä wüssid dasi Ändi Juni mal mit eme Ford Focus ST gu probefahrä bi. Leider hed die Probefahrt mich nid chönne vo dem innere Drang befriiä, äntli mal äs Turboauto z'ha - im Gägeteil, äs isch ender nu en schtärchere Drang worde (öppe so wie wemer dringendscht ufs Klo müesst).

Hüt isches sowiit gsi, ich ha döffe mi eigeti, persönlichi, massgschniideriti und voll geili ST gu abholä! Mann, da wirdmer schier wider zum Chind, allerdings wie eis das weiss dass am Abig Wiehnachte isch und Gschänkli überreicht wärdid. Ha drum au die ganz letscht Wuche nid so guet gschlafä, ganz i freudiger Erregig uf das Ereignis. Vielicht cha de eint oder ander mich verschtah

Am Namitag isches denn sowiit gsi: S'Ruumschiff wo mier die letschte drüü Jahr sehr gueti Dienscht erwise hed hani schweren Herzens müesse abgäh. D'Truur ud d'Freud hend sich de grad so abgwächslet, denn churz drufabä hani mi ST döffe i Empfang näh. Ich hane wie folgt la usstattä: Farb blau, Polschterfarb blau, Globalschliessig, Fänschterheber hinne, mp3-Aschluss im Handschuehfach, 2-Zone-Klimaautomatik, Frontschiibeheizig und die gross Heckflosse. Leider heds denn nümme füre Motor glanget, drum hani nume en 1,6 Liter-Mockä. Hehe, Scherz am Rande, sicher hani de gross Motor, das isch ja eh s'Geilschte am dem Auto

Bis etz bini mit em Auto umegflogä und has gnosse mal chönne chli "draussen zu spielen", defür isch s'Wätter ja ideal

Ja Du, heitere Cheib, ha mit Schreckä feschtgschtellt dass de Adili ja schu länger nüme gschribe hed. Sachä gids...

Aso ich bi nid i de Ferie gsi, neinei, ich bi flissig am wirke und Lüüt verruckt machä (wie chönnts au anderscht sii)

Sit em 03. Juli bini amene nüüe Arbetsort mich am Iiläbä. Sit denn schaffä nämli nümme offiziell uf de Planig sondern i de Beratig, genauer gseid bi ewz (Elektrizitätswerk Zürich) im schöne Örlikon vis à vis vu de Radrännbahn als Energieberater. Etz chund sicher nu d'Frag was macht en Energieberater?! Also, für alli g a n z l a n g s a m zum mitschriibe: En Energieberater beratet Chunde im Zämähang mit Energie, isch doch klar. Naja, das gahd nume als Oberbegriff dure, in Tata und Wahrheit tued en Energieberater nämli de Chundekontakt pflegä, är isch Aschprächperson, Blitzableiter und Uskunftsdienst, Ideeäbringer, Ratgäber, Sündebock und und und. Nei, im Ärnscht: En Energieberater macht de ganz Tag Beratige am Telefon, lauft i de Stadt ume und bsuecht Chunde, schriibt Bricht, tued d'Tarifrevision begleitä, kämpft mit em SAP, erarbeitet Vorlage und Konzept, wärtet Date us und macht Vorschläg, unterstützt Kampagn, vertritt s'ewz i Projekt, nimmt repräsentativi Pflichte wahr und und und.
Äs bitzli klarer? Ok, wenns das langet denn bini z'fridä. Alles in allem isches en abwächsligsriiche Job, kei Tag isch glich wie de ander und immer wieder trifft mer uf Problemstellige und Ufgabä wo eim useforderid. Au s'Iigwöhnä isch sone Sach: Vili nüüi Sachä, s'WC sueche, alli Trickli kännälehrä, nume Lüüt kännelehrä, Nämä bhaltä, Gsichter nid vergässä, Ablage erfragä und und und. Jede wo schu mal en Stell gwächslet hed weiss wasi meine
Mini Teamgschpänli sind sehr hilfsbereit und machid eim so de Iischtig au vil liechter. Mier sind sächs Lüüt i zwei Büro und das isch optimal. Au de Arbetsplatz isch optimal: Fänschterplatz (jaja, wie de woni i de Schuel schu immer gha ha), en schnelle PC, Internet, Telefon, Call-Center-Hörer, Ussicht uf s'World Trade Center, d'Radrännbahn und s'Hallestadion, en Cafeteria und und und.
Also, das wärs mal gsi vo mier. Wer mal i de Nöchi vo Örlikon isch söll doch schnell a de Tramstrass 35 gu lüüte, de chömmer en Kafi gu nah weni ume bi

So zwüschet Tür und Angel hani schnell welle mitteilä, dasi nu uf dere Chuglä bi und dasi schlichtwäg nu kei Ziit gfunde ha, öppis Schlaus hie ane z'schribe. Ich wirde das am Weekend nu nacheholä, denn i de Zwüscheziit sit em letschte Iitrag isch viel Nüüs passiert

De Summer isch ja fett warm. Drum hanis nid chönne underlah, en Pool z'chaufä Naja, Pool isch übertribä: Äs isch äs Chinderbassin mit schtolzä 2.40m Durchmässer und 60cm Tüüfi. Hend ja nume 700 Liter Wasser drinne Platz. Und mis 13-Jährige Gummiböötli. Irgend sone Frächdachs hed gmeint, weni im Böötli umetriibi gsächs us wie wenn äs Schwimmbuddha im Pool wär ("Komm, reib meinen Bauch!")

Für Manne ja nid nachvollziehbar, aber Fraue hend schmärzvolli Erinnerige a die Tätigkeit. Und jetzt chund die erfolgsbehafteti Massnahm zum schöner Usgseh au nu uf Welttournee...

Hüt bini mit em Hobbyschwager und sinere Fründin uf Rust i Europapark. Am Morge früeh isches losgangä, schnell is Ruumschiff ghüpft und via Prattälä (pipi- und Kaffeehalt) simmer schu am halbi 9ni ufem Parkplatz Sektion K / Reihe 16 iigfahrä. Wers kännt weiss dass das en Platz im vordere Viertel vom Parking isch. Schwupps zum Hauptiigang und dette hemmer au nume ca. 500 Nasä atroffä. Tja, äs sind halt nu niene Ferie gsi und am Abig am 5i hed Düütschland gägä Argentiniä gschpillt. So isch s'Bsuecherufkomme au de ganz Tag nie übermässig gsi und jedi Bahn hedmer under 10min Aschtaah chönne bewältigä. Mängisch hedmer sogar chönne i de Wägäli sitze bliibe will eifach niemert agschtandä isch. Vu de Attraktione här hed sich sit mim letschte Bsuech im Summer 2005 nid vil tah, höchschtens Detailverbesserige und das wars doch auch schon. Einzig d'Priise sind langsam happig: €28.50 fürnes Erwachsnigs (nei, mi Behinderteuswiis hani bi Gott nid mitgschleppt) und au im Park isches chli tüür, vorallem s'Trinkä und so. Aber defür wird au öppis botä, au wenn d'Bahnä wo mier nu Adrenalin bringid langsam dünn gsähet sind.
Nach de Öffnig simmer wie die Irre ab durch die Mitte und sind grad als Erschts uf dä Silver Star, natürlich i die erscht Reihe. Das isch halt schu immer wieder geil, das muesmer erläbt ha. Nacher simmer a allne suschtige Bahnä nachä und nachem Mittag wos de richtig heiss gsi isch, hemmer entdeckt dases bi de nüüe Atlantik Splash en Plattform gid womer sich vom Schiffli cha la vollsaue (und mit vollsaue meini das öppe 500 Liter Wasser Vollgas uf die Plattform sprützid und mer innerhalb vo Sekunde pitschärdänass bis uf d'Underhose isch. Aglockt vo üsem Gaudi hemmer plötzli 30 Nasä mit düütsche Flaggä dette gha wones riese Gaudi gha hend. Miss Wet T-Shirt-Wahl uf Deutschländerart halt... Ich ha de nach zig so Ladige Wasser mal müesse mis T-Shirt, d'Socke und au mini Schueh uswindä. Sone Abchüelig isch schu geil und im Summer chamer das doch machä.
Aschliessend simmer nu chli gu Bahnefahrä und wo de dä Park zueta hed simmer au hei, naja nid ganz, mir sind z'erscht nu i Burger King und denn heizu gflogä (zum Glück isch d'Autobahn unbeschränkt, de chamer au mal s'rächtä Pedal Richtig Bodebläch drückä *grins*).

Hie wär nu s'Video zum füechte Vergnüege, ufgnuh vo üsem Starfilmer: EuropaPark - Splash

Hehe, wer dem Link etz gfolgt isch, de erwartet chli *blabla* Nei, ganz so schlimm isches nid, mues doch dä Lüüt mitteile dasi Ferie ha und wiemer gsehd hani au vorig Ziit, suscht hätti ja nid a de Homapage umebaschtlet (So geil, s'Laptop ufem Sitzplatz). Die Wuche gahd nu Einiges, so under anderem en Usfluug uf Düütschland und en Usfluug i Europapark (au in Düütschland *grins*).

Hüt isch ja schu ä Hammergeile Tag gsi! Weisch, de Adili, gäll, de mal wider...de Adili isch gunes Auto probefahrä. Jaja, nid daser de Gäldschisser hätt oder so, nei aber ich ha nid chönne widerschtah und ha müesse (amene innere Drang folgend) mal chli gu schnuppere wie dases wär wemer äs nüüs Auto würd ha. Nid irgendeis, nei sondern de Ford Focus ST!!!!

Ich gäll, uf Chriens zur Garage Willy und ha dette döffe de blaui Focus ST uslehnä. Nach churzer Iifüehrig und äs paar Tips hed mier de nätti Herr de Schlüssel i d'Finger drückt und gmeint: "Viel Spass!" De Adili igschtige und mal vorsichtig de Motor aglah: *Wüdüdüdüdü - BROOOM* Vorsichtig das liechtgängige Getriebe igraschtet und de bini schu mit em typische 5-Zylinder-Grüüsch (tönt wemer gnau anelost wiene Audi-Motor, so vomen alte 80er oder so) Richtig Strass grollt. A de Usfahrt schu die erscht Überraschig: Churz ufs Gas und schu heds voreinne *Wuuuuusch - Pfiu* gmacht und furt bini gsi. Ich bi de dur Chriens dur (wunderbar, me cha sogar im 5te und 6te Gang im 50er fahrä, ohni dass würgsch und tuesch) Richtig Schappe-Center und denn Richtig Eigenthal über die schmal Schtrass. Ich sägä nume eis: Das Auto muesmer eifach erläbt ha, so viel Spass hani nu nie mit eme Auto de Hoger uf gha
Woni dobe gsi bi, bini wider Richtig Schwarzebärg/Malters durab und denn übers Ränggloch wieder schweren Herzens i d'Garage. Dette hani de Schlüssel wieder deponiert und nu chli plauderet.
Aschliessend isch de Adili wieder i sis schwarze Ruumschiff gschtige und schu bim Abfahrä heds mich dunkt daser a de Usfahrt nid furt chund

Etz isches doch tatsächlich schu drüü Mönet sider dasi kündt ha, ergo hani hüt min letschti Arbetstag gha. Pult ufruume, Schlüsselabgäh, de letschti Rapport schriibe und allne "Adieu" sägä, das sind so mini Haupttätigkeite hüt gsi. Irgendwie isches schu komisch dases nach knapp 6 Jahr bi de Firma Scherler mit mier z'Änd gahd, aber wie heissts so schön: "Die Veränderung ist die einzige Konstante in der Welt der Variablen!" I dem Sinn...

Wem de Titel bekannt vor chund de hed "Werner" gugget. So ähnlich ischsmer hüt vorcho. De Adili hed doch a sim Rännauto nu Allrad ibuue (man isch das ä Baschtlerii gsi und vorallem hani kei Aaleitig gha, aber das klappet au) und hed das müesse gu teschtä. Naja, was söli sägä: Das Ding gahd etz ab wie Sau, Traktion ohne Ende, d'Chraft chund also wirkli a Bodä und s'Fahrverhalte chamer nur als geil bezeichne. Me cha etz um Pylone drifte und fett Spass ha.

Wo Licht, da isch au Schattä.

Fahre chamer solang bis de Gummitod zueschlad. Z'erscht heds mier mal eine vu de fette Gummi abem hindere lingge Felgä grupft. Nachem Radwächsel uf die alte schmale Gummis isches de nid lang gangä bis de vorderi rächti Gummi vor de Hitz und dä Power kapituliert hed. Schnell numal en Boxestop gmacht und nach wiitere 10min und zwei Tankfüllige isches de passiert gsi: Kei Gummi meh wo heil gsi isch, so dasi uf Grund vu de Sicherheit mit em Ränner ha müesse abbrächä.

Fazit: De Conrad verdient etz schu wieder Fr. 50.- a mier Aber geil isches allemal und erscht mit em Allrad bringsch die immensi Chraft wo das Ding hed knapp a Bodä Weni etz nu sägä dasi 16% Methanolmoscht poschtet ha (bishär hani nume 10%ige verwändet) und dadur das Ding nu einisch meh lauft, denn chamer sich ja vorschtelle dasi gli wider mal uf Ämmäbrugg mues fahrä

Nach knapp 1 1/2 Jahre Planigs- und Buuziit isches hüt sowiit gsi: De Superhighway ufs Internet hed chönne i Betrieb gnu wärdä. Fragendi Blick? Jaja, ich weiss, de Adi drückts mal wider sehr bluemig us In Tat und Wahrheit hani nach 1 1/2 Jahrä äntli ä sinnvolli Verwändig für mini PC-Engines WRAP (Details siehe Link) im schicke rote Ghüüs gfunde. Sie wicklet etz under de Software m0n0wall de Zuegangsdienscht zum Internet ab. Folgendi Ufgabe übernimmt Sie:

- DHCP-Server für Netz 1 und Netz 2
- Traffic-Shaping und -queing
- Firewalling
- Trennung Netz 1 und Netz 2 in zwei separate Teile
- Mengendatenerfassung Netz 1 und Netz 2

Das alles und nu vil meh imene Ghüüs vo 16 x 16 x 2 cm

Och ja, was macht mer nid alles wemer i de warme Sunne am Abig im obligate Fiirabigschtau schtahd...me gugget use, geiferet a "Rollbratä" (Inlineskaterinnä hinnenachä und lost chli Musig *ümzäümzäümzä*. Tja, und da mer ja en Autoradio mit viiiiile Chnöpfli hed, muesmer halt mal dra umeschpile. Churz uf d'Taschte "SQEQZ" drückt und.........*BOOOOOOOOOOOOM* schlahd eim de erschti Bassschlag usem Subwoofer diräkt i Rügge. Und schu de zweiti Schlag drückt s'Ohreschmälzli diräkt is Trommelfääli. Sagehaft, sogar de Rückschpiegel zitteret

Und die Moral von der Geschicht: Tastendrückerei mag das Ohrenschmälzli nicht!

Am Samschtigabig hani mal wider öppis für mis Kulturgwüsse gmacht und bi d'Opere "Nabucco" vom Giuseppe Verdi uf Basel i St. Jakob Park gu gugge. Mit eim Wort: "Hammer!" So öppis chamer nid beschriibe, so öppis muesmer eifach mal gseh ha. D'Atmosphäre, s'Wätter, d'Lüüt - alles hed gschtumme.

Am Samschtig isches wider mal sowiit gsi: Mis Rännmaschineli hed wider mal döffe umesurrä und umeflitzä. Etz wirds de schu langsam geil, will etz dafi äntli heizä was s'Züüg haltet, denn s'Iifahrä isch meh oder weniger abgschlossä. Allerdings gids nu chli Verbesserigspotential: S'Überschtüüre (Heckschwänzler) muesi nu behebä (tüüferleggä vu de Hinderachs und Fäderverstellig uf "hert"), d'Radsicherig muesi überprüfe und ä Anti-Sabberschluuch am Uspuff abringä.
Suscht isch das Ding au gloffe wie die Sau und als Premiere heds s'erscht Mal chönne mit em Ghüüs umegurkä. D'Temperatur vom Motor isch trotz Ghüüs sehr moderat blibe, so dasi uf Lüftigsschlitz wahrschindli cha verzichtä.
Am Fritig söttid nu d'Stabilisatore für d'Vorder- und Hinderachs cho und de wäri mal wider parad für äs wiiters Umefresä

Eröffnungsmatch...

Ändli isch sie da, d'WM hed agfangä. Nid dasi de ultimativi Fuessballfan bi durs Jahr dure, aber anere WM da lahni mich doch chli la aschteckä vom Ganzä, wahrschindli au wills um öppis gahd und nid nur umekugelät wird

Summa Sumarum nach 90min (ok, 94min): Guets Spiel, vil Tor und ä düütschi Mannschaft wo vore guet und hinne nid so guet isch Das chönnt de schu nu äs paar heissi Momänt i nächschter Ziit gah.

Wer kännt schu s'Office Professional 2007? Hände hoch! Niemert? Sicher nid? Was, wer hed gseid dases das doch gar nid gid? Hehe, bim Adi (und wahrschindli au bi andere technikbegeischterte Baschtler) schu. Ha mich geschter als Betatester fürs nüüe Office 2007 regischtriert und etz lauft das bereits uf mim alt-ehrwürdige PC. Erschti Iidrück sind sehr positiv, also wenn das so chund, denn findi das schu genial: Vil eifacher und intuitiver, nümme sovil überladnigi Menu und vil meh grafischi Schaltflächä wo kei Zwiifel meh lönd la ufcho
Uf alli Fäll teschti wiiter und brichte wiiter...

Zum Glück isch Pfingschte gsi, de hani mal wider chönne äs paar Sachä machä womer schu lang ufem Härzä (oder am Bode) glägä sind. So hani mi "eidrien"-Server mit eme Väntilator "beglückt" wo mier d'Datefeschtplatte tued chüele, da ich äs Temperaturproblem im Bereich vo dene Feschtplattä vermuete. Etz lauft das Ding mal und ich bi ja gschpannt was passiert (oder äbe nid passiert).

Sodele, etz chund mal wider en Iitrag uf d'Siite

Sit einere Wuche bini schtolze Bsitzer vumene färngschtüürete Billigflüüger. Das Ding hed afigs Kultstatus erreicht dases en wahri Freud isch.

Ufmerksami Mitläser wüssid ja dasi en färngschtüürete Krachmacher (aka RC-Glattbahn-Verbrennerauto) ha. Etz hani au mal Glägeheit gha das Ding fertig z'stellä und diversi Abuuteili dra z'machä:

- Frontbumper us gschüümetem Kunststoff
- Herteri Fädärä
- 37mm-Profilpneu hinnä
- Blaueloxierti Radmuettere



Hie nu zwei Fötäli vom Ding:

Heilige Cheib, ich bi schu ä schlächte Siech. Nie schriibi öppis uf mini Homepage, tststs. Sit mim letschte Iitrag isch shcu mängs gangä:

- Ha s'Auto im Service gha
- Weiss jetzt weni mi letschti Arbetstag bi mim momentane Arbetgäber ha
- Ha mier ä Nachberschaftsärgerer kauft
- Ha müesse nüüi Pneu bschtelle
- Bi ä Buuschtell am fertigmachä


Naja, mis Auto isch au wider mal im Service gsi. Leider isch ussert äme kaputte Nummerliecht nid grad vil Spektakulärs gsi. Defür hani äntli wider d'Summerpneu druffä

I dem Zämähang hani mier etz nu müesse nüi Pneu bschtellä, da die Alte schlicht und eifach zwenig Grip hend und bi Rägä zimli gfährlich sind. Ich ha mich etz für Pirelli P Zero Nero entschide. Am Zischtig chani die gu druuf machä *freufreu*

Bim Schaffä heds grad vil Nüürige gäh: Wie vil ja vilicht schu wüssid, tueni uf Ändi Juni s'Kapitel Planig nach 13 Jahr ändgültig begrabä. De Bruef hed sich immer meh riichtig Güselplanig und Administrative Wahnsinn entwicklet und das macht mich nid grad glücklich. Und wenn eim d'Freud am Bruef fählt, denn isches für alli Beteiligte am Beschte me zieht en Schlussstrich, au wenns nid ganz so eifach isch. Ich bi etz sächs Jahr meh oder weniger i de gliiche Firma gsi und äs isch ä gueti Ziit gsi. Etz gahds nu drum zum en guete Abgang machä und bis a mi letschti Arbetstag (de isch am 23. Juni 2006 / 17.00 Uhr) nu Vollgas z'gäh.
Abem 03. Juli 2006 wirdi denn amen nüüe Ort schaffä, chli wiiter wäg als etz, aber imen ganz andere Metier. Halt, nid ganz andersch, eifach chli öppis anders. Am Strom als Solches blibi treu Meh gids de sobald ich mal dette agfangä ha...
Suscht bini etz langsam aber sicher am fertigmachä vu de gröschte Buuschtell im Momänt. Sie beschäftiget mich etz sit em Januar 2005 und etz gsehds langsam us als obs fertig wird, au wenn d'Gebäudeautomation nu nid ganz fertig isch und au d'Stromer nu ca. 22 Siite Pendänzä (Arial 7 isch d'Schriftart ) z'erledigä hend. Aber ich bi fescht überzüügt dases guet chund.

Mini Nachbuure hends ja nid grad immer liecht mit mier. Aber etz isch de wirkli langsam unerträglich mit mier Ich bi sit zwei Wuche schtolze Bsitzer vomene färngschtüürete Banzinauto. Das macht en Heidespass und au ä Höllekrach, hihi. Wirde de bi Ziit und Glägeheit mal äs Phöteli ineschtelleä. Die technische Date sind wie folgt:

Typ: Glattbahnrenner
Motor: 2,5ccm
Leistung: 1,8PS
Endgeschwindigkeit: ca. 60km/h

Bis etz hani ca. 4,5 Tänk dureglah, aber so richtig abstoffe chani nu nid, derzue muesi de Motor nu chli iifahrä

Sodele, etz isches grad gschafft: Alli Backup sind bereits ufem "eidrien"-Server glandet und mis iBook daf etz de langsam au sis Weekend gniesse. Denn mis iBook isch i dere Backupaktion de Dräh- und Angelpunkt gsi. Ohni Murre und Knurre heds alli Jobs erledigät
D'Bilanz gsehd wie folgt us:

iBook (Gerät) - Server: 12,7GB
IBook (LaCie) - Server: 32,7GB
iBook (Iomega) - Server: 19,3GB
iBook - eMac: 3,1GB
eMach - Server: 39,2GB

Nid schlächt und das Ganzä ohni Problem, das spricht a) für s'Serverbetriebssystem (FreeBSD 6-STABLE) und b) für d'Apple's.

Am Samschtig simme rmini nüüscht Errungeschaft abholä: Ä Beertender vo de Saeco! Etz chani mis Bier aligs sälber zapfä und d'WM cha cho. Strinrunzlä? Aber nicht doch, Erklärig chund grad: Ä Beertender isch äs Grät wo sogenannti Kegs chönd inegschtellt wärdä. Die wärdid küehlt und s'Grät haltet äs Fässli (Keg) 30 Tag frisch. Und s'Beschte isch nu: Äs stahd i minere Schtube! Für meh Informatione chamer under beertender.ch gu inespienzlä. Und nu öppis: De Mediamarkt hed grad Aktion!!

Am Abig hemmer nu "Batman Begins" gugget und derbii au nbu grad üsi Dot-It's s'erscht Mal bruucht: Dot-It's sind rundi LED-Lämpli vu de Osram womer schier überall cha anechläbä oder ane leggä und wo ufene Druck ufs Lämpli Liecht machid. Isch ganz frisch, aber cool. Ä Batteriefüllig langet für ca. 100h Duurbetrieb. Wer ganuer interessiert: osram.ch

Hüt am Abig hani mal überleid wie dasi mini Datä uf min wiederuferstandnigä Server tue am schlauschte Überspielä. Das drum, will der Server sit geschter ohni Problem vor sich anegsurret hed. Etz hani doch nu äs Progrämmli gfunde um mini 60GB a Date vu mine Apple's und vo mim Windows-Dategrab ufe Server (via NFS) z'schpile. Uf macuser.de bini denn fündig worde: Synk Das isch äs Progrämmli wo underschiedlichi Verzeichnis cha synchronisiere oder backuppe (was fürnes Wort). Aso für $20 isch das ächt de Hammer und derzue nu ganz in Düütsch. Vorallem chanis etz mal 30 Tag usprobiere bevori mues tugge.
Churzum, das Ding lauft und momentan bini grad dra, alli Föteli vo mine Reise etc. ufe "eidrien"-Server dure z'beame. Aber das kann dauern

Heilige Banane, isch ja schu schier wieder ä Wuche ume sit ich mi letschti Iitrag gmacht ha. Hüt am Abig heds mier kei Rueh gla und ich ha mis "eidrien"-Server mal wider gnauer under d'Lupe gnu. Ufmersami Läser wüssid dasi sit em Dezämber en nüüe Server ha, de aber leider ufgrudn vomene technische Mangel ha müesse usser Betrieb näh. Technisch isch mittlerwiile alles guet, nume dass sich ei Feschtplatte vom RAID-Verbund aligs willkürlich verabschidet. Hüt am Abig hani doch mal uf guet Glück äs Update ufem STABLE-Pfad von FreeBSD 6 gfahrä und siehe da: Mis Serverlein lauft wunderprächtig bis etz, die Problem sind nümme ufträtä. Ich las etz mal übers Wucheändi la tschäderlä und tues mal usgibig teschtä.

Etz heds mier au nu de Ärmel inegnuu: Lang hani mich gwehrt gägä ä VoIP-Aschluss (Voice over IP) und ich ha mich mit Skype begnüegt. Etz hani aber uf sipcall.ch ä Account fürnes SIP-basierts Telefonaschlüssli quasi übers Internet mal choschtelos eröffnet. Anderscht weder mit Skype chamer mit eme SIP-Konto underer richtige Telefonnummere erreichbar sii, i mim Fall isch das etz: 032 / 510 84 48. Wer mier wott alüüte egal woni bi, cha mit eme hundsgwöhnliche Telefon die Nummere ischtellä und wird prompt mit mim Laptop verbundä. Anderschtume chani mit dem SIP-Konto au allne Lüüt alüüte wones telefonartigs Grät ihres eigete nännid. S'Coole sind nu die günschtige Tarife z.B. ufs Swisscom Fixnet oder aber au ufs Swisscom Mobilenet. Churzum, d'Wält wird langsam äs Dorf, nid z'letsch au dur so Technologie.
Für meh Infos luegid doch uf de Siite vo sipcall.ch nachä. Ich für mi Teil sueche etz nu entweder en guete VoIP-Adapter für mis Schnuerlostelefon oder aber grad äs VoIP-Telefon, am beschte äs Schnuerloses

Sodele, etz isches au schu wider dure: Mi diesjährigi WK isch am letschte Fritig fertig gsi - juhu. Drüüehalb Wuche sind schu ä langi Ziit so in grüen. Aber jetzt hani äs anders Problem: Sit em Fritig muesi mich wider jedesmal frage wasi söll aleggä

Am Fritigabig simmer nu am Jodelklub Heimelig as Buffet gu hälfä. Isch nu luschtig, aber au schträng gsi.

Am Samschtig hani als Erschts mal wider mi jährlich Termin bi de Frau Zahnfee gha *schauder* Aber zum Glück bini ä schlächte Patiänt, ussert Zahnstei hed sie nüüd gfunde bi mier *Schweissabwisch* Nacher bini nu i Hornbach gangä und ha dette mal wieder Garteartikel gepöschtelt, nid nume Sachä zum hagä, nei au en Raseentmooser isch drunder gsi. Das isch sones Ding wo usem Rase s'Moos und abgschtorbnigi Sachä usegrüblet. Chum zrugg hanis de grad müesse usprobiere und siehe da: D'Maschine und ich hend innerhalb vu 2 1/2h ä ganzä Container voll Moos und suschtige Güsel usem Rase abtransportiert. Am Abig isches de cho gu rägnä und das hedem hoffentlich grad au numal guet ta. etz sötter wider Luft zum schnuufe ha

Sit mineletschte Iiträg isch ja au schu schier en Monet vergangä. Nid dasi sone fuule Sack worde wär oder so, nei, ich bi im Militärdienscht. Mier sind nu die Wuche in Bärn am Botschafte bewachä (oder besser gseid devor stah und luege dass niemert sone Botschaft mitnimmt ) Äs isch nid en schlächte WK, me isch immer um Lüüt ume und Bärn isch wunderbar. Negativ isch ender dass d'Schichte sehr unregelmässig sind (17h) und mer extrem vil Baggage uf die jewilige Pöschte mues mitschleppä: Schutzweschtä, Gewehr, Rucksack, Funkgrät, Maglite und suschtige Grümpel. Aber äbä, die bescht Motivation hani ganz am Afang vom Dienscht gha: Ich ha ghört wieviel Reschdienschttäg ich nu ha: Genau 16 nach dem WK, das heisst de nächschti WK isch min Letschti, aus, Ende, vorbei

Frohi Oschtere!

Mis tierliebende Härz heds eifach nid chönne überseh: Eines Mittags gsehni doch ufere Websiite en Wärbig für Huustierli und ich ha mier die grad müesse bschtellä. Neinei, nid grad wider über mich härfallä, die Tierli sind nu in Eiform imene Büütel inne. Komischi Sach nid? Ender weniger komisch, eifach cool. Ich ha mier Sea Monkeys kauft, das sind chli Chräbsli wo imene Aquarium umeschwimmid. Wer meh wett erfahre cha under folgendem Link mal gu gugge oder grad au bschtellä: geschenkidee.ch Sobald die Tierli mal mis Aquarium bevölkerid, denn wirdi mal äs Phöteli inestelle. Momentan sinds nu im Büütel und wartid druuf bisis Morn is nüüe Aquarium setzä. Aso mit im Büütel isch gmeint, dass dette d'eier dinne sind und denn wenns is Wasser chömid tüends de innerhalb vu 24h schlüpfe. Aber ich wett ja niemert langwiile, drum luegid am Beschte sälber mal drii

Neinei, das isch nid öppe so wiemer dänkt: Ich ha KEI nüüe Staubsuuger Ender meini dermit, dass im Zug vu de Bandbreiteufstockig bi Bluewin mini Leitig vo ADSL 1200 uf ADSL 3500 agschwulle isch. Bim surfe gmerkt mer nid vil dervo, au suscht isches ender unspektakulär. Aber immerhin schniidi bim Schwanzvergliich wider guet ab, denn "Ich ha eine mit 3500" tönt doch besser als "Ich ha nume eine mit 1200"

Sodele, etz gahni de wirkli mal is Bett. Ich bi ja nümme de Jüngscht und drum magi aligs au nümme so lang uf si. Mier hend im Gschäft i de letschte Nacht üses alte Netzwärch (Novell Netware) durne Migroschrott-Lösig ersetzt und sind bis am Morge am drüü mit de Clients frisch ufezieh, erschte Teschts und Vorbereitige für kommendi Arbetstag beschäftigt gsi. Am Morge am 7ni heds de wider gheisse atraabe zum d'Mitarbeiter i das nüüe Umfäld z'begleite. Ich mues sägä dass nid alles schlächt isch wo us Redmond chund, gwüssnigi Vorteil sind sicher da und au d'Kompatibilität mit em Rescht vu de Wält

Wie alli Jahr isches etz de wider so wiit, de Adili mues i Militärdienscht. Wie alli Jahr stahd die obligati Aaprob vom Material a. Und wie alli Jahr spannts da und dett chli meh oder weniger. Das Jahr muesi gu d'Hämmli umtuusche, die sind chli gar äng afigs (Naja, die hend mit mier schu d'RS gmacht, also bitte und das isch gli 10 Jahr sithäär). De Rescht sött gah, au d'Schueh (oh Wunder) Etz muesi demfall nächscht Wuche einisch is Züüghuus uf Zug gu de Schrott umtuusche. Hends ächt nu so Sachä i minere Grössi? Naja, uf alli Fäll muesis nümme solang agugge, nu de WK und nächscht Jahr nu schier en Ganzä und de hani mini Dienschttäg erreicht udn wirde pensioniert

Hüt bini am Autosalon in Genf gsi. Früeh am Morge bini mit em Grossmeister K i mim Ruumschiff gschtartet. Leider isch s'Wätter und d'Strassebeschaffeheit nid optimal gsi, so dass mier bis uf Dagmarselle en kannpi Schtund bruucht hend, normalerwiis gahd das vil schneller
Womer de am 10ni in Gänf iitroffe sind hemmer (Achtung, es folgt ein Geheimtip) under der Halle 7 parkiert und hend nur ei Stäg ob üs schu chönne i Salon iitauche. Z'gseh heds rächt vil gäh und vu de Lüüt här isches grad agnähm gsi. Was ufgfallä isch: Vili Lüüt wo fotografiert hend und dementsprächend Rücksicht druuf gnu hend öbs eim is Bild latschid oder nid. Das isch vor 6 Jahr bi mim letschte Bsuech ganz andersch gsi.
Ich bi de au nu i mis momentane Traumauto ghöcklet (nei, kei M4 oder so), nei en stinknormale Ford Focus. Naja, wemer en orangi Lackierig und 225PS under de Huube als normal aluegt...Leider wird das au äs Traumauto bliibe, ha äbe nu nid im Lotto gwunne. Nachem Bsuech i de VIP-Lounge vo BMW simmer de schu langsam wider heizue, so dass mier nachem obligate McDonalds-Halt, drüü mobile Radarkontrolle und 6 Blitzchäschte gäg die 7ni wider im Aargauerländli gsi sind.
D'Usbüüti vo dem Tag isch nid schlächt gsi: 150 Photeli. Nachem ussortiere hani die i d'Gallery inegwürgt. Wem eine äs Photeli sehr guet gfallt und är das gärn i 1600x1200 Pixel hät (HInt: Bildschirmhindergrund) denn eifach mäldä...

Am eim Tag zwitscherid d'Vögäli, d'Hormon machid sich au wider bemerkbar und schu *zagg* heds en Flatz Schnee dusse dases sogar de krise- und sturmerprobti Innerschwiizer im Aargau hinneuseschlahd. Sagehafti 51cm Nüüschnee hend sich i mim Garte iignischtet, meh weder alli drüü vorangegangnige Winter zämä. Sogar de Parkplatz hedmer nümme chönne befahrä, wemer nid en Rally-Usbildig i de Innerschwyz gnosse hed Gwüssnig sind glaubi etz nu taub und fragid sich warum dasi en schwarzi Pflueg-Fräsi als fahrbare Undersatz bsitze. Uf alli Fäll hemmer de Plesche gha mit de andere Quartierbewohner döffe mit em Traktor zämä üse Landeplatz frii z'schuufle.

So hed sich mi Garte präsentiert:

Hossa, etz muesmer ab sofort en Ghörschutz aleggä: Min Verschtärcher isch cho. Chraftvolli 200W, 9kg Läbiggwicht und en Hammersound, das fätzt. De Verputz ischmer bi de erschte paar Akkord grad am abberisle gsi und min Tinnitus hed au mal wider sini Party i de Ghörgäng gfiiret, alles in allem: VOLL GEIL!!!! NU chli üebe und denn hed Sins en Exportschlager meh...

Etz hani grad gseh wie lang dasi nüme gschribe ha...so öppis vu lahm. Sorry a alli wo öppedie inegluegt hend

I de Zwüscheziit isch nid absonderlich vil gloffe, ussert dasi en nüüe Mitbewohner i minere Wohnig ha. Nei, keis Tierli sondern öppis ohni Gschtank und Staub, defür mit Lärm. Was chönnt das ächt sii? Genau, en Elektro-Bass, au E-Bass gnännt. Das Prachtsding hani im Auktionshaus vo mim Vertruue ersteigeret und de passendi Verschtärcher chund nächscht Wuche au nu per Poscht. Denn heissts de für mini gsamt Nachberschaft: Ohre zu und füre Adi: 1, 2, 3, Soundcheck...Yeah!!! Let's rock...

Das vergangnige Weekend simmer i Black Forest (aka Schwarzwald) genauer uf Höchenschwand, ca. 25km vu Waldshut (D) entfärnt chli gu Wellnesse und relaxe. Am Areisetag heds gseicht, aber s'Hotel isch chli und putzig gsi und au s'Dörfli sehr härzig. Will aber das Dörfli uf 1015m obe gsi isch, isches de nid nume bim Rägä blibe. Äs hed plötzli afä Schnee abbelah dases en wahri Freud gsi isch Am Samschtig hemmer en Usfluug welle machä uf Waldshut, aber am Morge heds vorem Fänschter ä so usgseh:

Naja, nüd bsunders hemmer üs dänkt. Mier sind de gu z'Morge ässä und denn mal veruse gu gugge. Och, mier hend de z'erscht gluegt under welem Schneehuufe sich s'Auto verschteckt. So hed das nach ca. 15min Schneeschuufle afig usgseh:

Äs hed de nu en wiiteri halb Schtund bruucht bis s'Auto frii gsi isch udn wiiteri 10min bises uf de Schtrass gschtandä isch. Ander hend weniger Glück (oder fahrerisches Können?) gha, die hed nämli de Trax müesse friibäggerlen

Och, nachdem s'Wucheändi so richtig ereignislos i Sache PC gsi isch hani defür hüt müesse zueschlah. Ha uf mim bevorzugte Auktionsportal (Schleichwerbung: ricardo.ch) zwei Dualhead-Grafikcharte ersteigeret. Sündhaft tüür sind die gsi, je Fr. 9.60 pro Stuck. Wett dermit nämli en Kommandozentrale i mim Büro iirichte Leider hani nu kei zweite 17"-Bildschirm chönne ergattere und en nüüe - ich weiss ja nid...uf alli Fäll gids sone EIZO wieni schu ha nümme, obwohl, das Ding isch ächt de Hammer gsi (d'Leischtig und de Priis).
Mal luege, vilicht gfindi ja plötzli nu eine und denn chas de losgah mit em Surround-Guck-Erläbnis

Aso wemers nid würd gseh, würdis sälber nid glaube: I mim Büro inne gsehds au wider us. Ufem Schriibtisch stöhnd zwei Sun Ultra 5, am Bode wärchlet mi Eidrien-Server und näbem Windows-PC stahd nu s'iBook ume. Das Wucheändi hani ussert spaziere, Stägehuus putze und Verusse wüsche nume a mine chline Appärätli gschpillt.
De Eidrien-Server hed sich a einere vu de Feschtplatte verschlückt gha. Hane us breuflicher Ziitnot müesse abschtelle und ne das Wucheändi seziere. Als Ursach hani mal s'Kabel agnuh, has gwächslet und är lauft sit ca. 24h ruhig und ohni nännenswärti Problem. Um besser z'beurteile chönne wie dases i de Innereie usgsehd hani mier äs chlises Shellscript zämäghackt, wo mier d'Temperature vu de Feschtplattä azeigt:

[annenad@HAM] /usr/local/etc/> ./temp.sh

Folgende Temperaturen wurden registriert:

Temperatur Festplatte ad0: 30
Temperatur Festplatte ad2: 28
Temperatur Festplatte ad8: 38
Temperatur Festplatte ad10: 37

[annenad@HAM] /usr/local/etc/>


Wiiter hani mini zwei alte Sun Ultra 5 mit FreeBSD 6.0-Release "befruchtet". Bi de einte hani aber de Vogel abgschossä: Ich has nid chönne underlah und hanere en XOrg-Server igrichtet und s'KDE 3.4.2 drufgschpillt Ier chönd mier au chranke Siech sägä, aber etz lauft doch tatsächlich en Chischte mit Augeschmaus. Und so gsehd das Ding us:

Sachä gids! Zum mit mine vile Buddys i de ganzä Wält (nei, das isch etz aber ächt nid übertribe) in Kontakt z'bliibe hani mich sit geraumer Ziit bi MSN agmäldet. Sit letschter Wuche bini au bi ICQ derbii. Etz müessti aber zwei Chatprogrämmli ha, eis fürs MSN und eis fürs IQC. Das schiisst mich aber chli a. Drum hani mier etz d'Änte bsorgt. Eigentlich isch das ja nume s'Maskottchen / Logo fürs Programm, aber mier gfallt das Viech halt. S'Progrämmli nännt sich AudiumX und mer bechund das uf folgender Websiite: www.audiumx.com

I dem Progrämmli chamer underschiedlichi Protokoll ischtelle und hed denn eis Fänschterli für alli Messengers. Sehr empfählenswärt, au wenns am Afang chli äs Härzinfarktrisiko birgt, denn wenn sich öpper abmäldet oder amäldet, quakt das Ding eifach los. Vorallem in dunkler Nacht ==> *herzrasen*.

Ach ja, falls mich mal öppert wett kontaktiere:

ICQ-Nummer: 334098694

MSN Messenger Name: adrian.annen@adis-welt.ch

Skype-Name: adrianannen

Uf mim Heimserverli hani sit nüüschtem en Wätterbricht für Geeks (Hardcore PC-Jünger): En Wätterbricht wo d'Wättervorhersag und s'aktuelle Wätter uf Konsolebasis im Internet erfragt und darstellt. Guckst Du da: LINK

Aargh, mängisch isches ächt zum Haarusrisse (aso, naja, ich cha ja nümme vil, hihi). Etz hani doch en nüüe PC (vergleiche die letzten Meldungen) zämäklämpärät und denn, ei Start ufe ander NADA NIX SENSE. Das Ding nümme wellä. Ich ha de de Fähler bi de Astüürig vu de grosse, fette Feschtplattä lokalisiert. De interni RAID-Controller isch, man möge mir diese Ausdrucksweise entschuldigen, SCHEISSE gsi. Also, die beide Plattä abghänkt und denn hami mal uf d'Suechi nacheme nüüe PCI-Controller für mini SATA-Platte gmacht. Ha denn au äs Produkt gfunde wo mim Gäldseckel entsproche hed (Heisse Tip: Bim stegcomputer.ch gfindsch schier alles). Mini Ussedienschtmitarbeiter hend mier de das Ding au brunge. Am Sunntignamitag isches denn sowiit gsi: Chischte uf, Charte ine und.......NÜÜÜÜÜÜÜD. Sone Quark, s'Betriebssystem hed mi Controller nid erkännt. Was jetzt? Für mis Betriebssystem (flissigi Läser wüssid: FreeBSD) gids leider kei Triiber. Was macht de Unixbegeischteriti Baschtler? Richtig, är suecht nacheme Patch für das Manko und tued sin Quellcode sälber patche und denn kompiliere. Gesagt, getan, nach einere Schtund isch das Problem de au behobe gsi und de Controller hed d'Arbet ufgnuh und d'Platte hend afe rotiere und s'RAID 1 für mis Dategrab isch au wider voll da. D'Performance isch guet, etz wirdi glaubi definitiv glücklich mit mim Chischtli

Jaja, etz heds min Provider au verwütscht mit de Hardware. Sit em Mittwuch am Morge am 9ni heds kei eidrien.ch meh gäh (und öppe knapp 6000 wiiteri Siite) - d'Hardware im Serverzentrum isch abgraucht. Leider weis hüt nu nid was gangä isch

eidrien.ch isch sit knapp 8h wider online und wird hoffentlich nu länger bliibe

Hüt am Abig isch Updatetime gsi: Ha am mim Navi en nüüi Firmware, nüüi Software und en nüüi Charte verpasst. Vil besser isch das etz, ohni Zwiifel.

Pünktlich uf Afangs Jahr isch min nüüe Heimserver s'erscht Mal agloffe. Hamer das Ding us verschidne Einzelteili sälber zämäklämperet und folgendi Eggdate chani schtolz verratä:

- Motherboard: EliteGroup 661GX/800-M7
- CPU: Intel Celeron D336 2.8Ghz (Sockel 775)
- RAM: 512MB DDR-RAM PC333/PC2700
- System-HD: 2x Maxtor 80GB (IDE) » RAID1 mit gmirror
- Daten-HD: 2x Maxtor 250GB (SATA 150) » RAID1 mit gmirror
- Laufwerke: DVD-ROM Samsung SH-D162c

Ich bi etz das Ding laufend am Teschtä und Konfiguriere und äs wird nu mängä Abig is Land gah biser mini bisherig Lösig cha ersetzä