Ich wünsche allne ganz schöni Wiehnachtä und frohi Fäschttäg!

Ja hei, i zwei Tag isch schu Wiehnachtä. Und gli drufabe isch s'Jahr dure. Isch ja schu schnell gangä wemer so zrugg dänkt. Aber etz hani grad kei Ziit zum gross drüber nachädänkä, ha ja nu chli z'schaffä i de Buude Apropos Bude: Sit em letschte Mändig gfindi die am Morge au ohni dasi gross mues d'Auge uftue. De Adili hed nämli äs Navigationsssystem für is Auto gepöschtelt (jaja, isch ja gli Wiehnachtä und a mier wetti aligs au öppis schänkä ). Ich ha mier äs Mio 268 kauft. Das Ding isch chli grösser als en Palm und lauft uf Windows CE (neinei, ha nu kei Bluescreen gha). Isch schu nu cool, so de Suugnapf unufällig a d'Windschutzschiibe anegsuugeret und s'Navi ineklippt, churz warte, s'Ziil agäh und los gahts. "Links", "beim nächsten Kreisverkehr bei der zweiten Ausfahrt den Kreisverkehr verlassen", "in 60m links abbiegen" usw. Och, schu wider äs Spilzüüg

Nach langer dichterische Handschtänd hani d'Aleitig füre Mailhamschter im Wiki vo bsdforen.de fertiggschtellt und sie isch online erreichbar under folgendem Link: FreeBSD - Mailhamschter

Alli sind igladä, bi Bedarf das setup z'teschtä

Och, wer kännt das nid: Me hed eine oder zwei Computer derheime und me tued uf beidne obe öppedie (je nachdem womer grad dra isch) d'Mails abesuuge. Etz chund plötzli mal de Tag womer unbedingt sött äs Mail ha, aber meh weiss a) gar nid ufe welem PC dases isch und b) wills de Zuefall so wott ischmer grad a de falsche Chischte. Das hed mich etz au immer chli plagät, aber sid hüt am Abig isch Schluss dermit: De Adili hed en IMAP-Server gebaschtelt. Im Prinzip isches ganz eifach: Mi Server (wo ja eh de ganz Tag vor sich aneidlet) sammlet alli füüf Minute mini Mails vo allne mine Mailkontos ii und tued sie bis sich horte bis de Adili am Abig denn mal mit eim vo de PC uf das IMAP-Poschtfächli tued zuegriffe. Et voilà: Immer frischi Mails, immer und überall verfüegbar Das isch doch Musig...

Für alli wo das chli gnauer wend wüsse wie dases gahd, hie nu schnell chli en detaillierteri Erklärig:

- System: FreeBSD 6.0
- Mailsammler: getmail
- Mailverteiler: procmail (Damit au ja alles is richtige Poschtfach chund)
- Mailvorhalter (IMAP-Server): dovecot
- Mailprogramm: Mail.app (natürlich vo Apple, aber äs gahd au mit jedem andere IMAP-fähige Mailclient)

I de nächschte Tage wirdi im Wiki vo bsdforen.de nu en detaillierti Aaleitig ineschtelle.

Die letscht Wuche isch a Ereignisarmuet nid z'überbiete gsi: Kei luschtigi Erläbniss uf de Strass, kei Action i de Bude, kei Ärger mit Behördä, churz um = LANGWEILIG. Nid mal en kaputti Lampä däheimä. A propos Lampä: Ha am Mändig doch tatsächlich wider mal en Doppeltodesfall a mim Auto gha - die zwei Frontschiinwärfer hend sich grad synchron verabschidet. Also ja, und grad nachdem die nume knapp zwei Mönet alt worde sind. Was söll mer denn da dänkä? Nu besser isch de allerdings wemer so (Sch)Lampene mues gu poschte, dett erläbt mer denn ächt s'blaue Wunder: Fr. 72.- für zwei popligi H7-Lampä :O Und nu schöner isches wemer die Dinger inere chalte Nacht und bi völliger Dunkelheit mues im Autounderstand is Auto ine mechä. Bi mim schwarze Ruumschiff muesch a) mal de Gynäkologiegrundkurs I absolviert ha und b) dier alli Finger brächä dass mal a die Lampä anechunsch. Aber was sölls, dank dem hani doch nu öppis döffe schriibe über die Wuche

Sodele, etz isches dure: Äs Wucheändi volle Erfahrige, Fachsimpeleie, nätte Gschpräch und und und isch dure. Woni gsi bi? Hmmm, das verrati gärä: Ich bi a de EuroBSDCon 2005 in Basel gsi. Die wo öppe da ine luegid, wüssid dasi mit de Entscheidig zum gah oder nid gah lang grunge ha und dass am Schluss d'Nüügier gsiegt hed.

Also, ich bi am Fritigabig nachem Schaffä uf Basel mit em schwarzä Ruumschiff gflogä und ha dette mal müehsam mis Hotel gsuecht. Mis Adigaviationssystem isch leider infolge Ortsunkänntnis und Dunkelheit liecht gschtört gsi und kei richtigi Signal vu de Augesensore übercho, so dasi zweimal ha müesse durne Einbahn fahrä. Aber dank de AG-Nummer isch das keis Problem gsi Ha de im Hotel icheckt und nachdemi im Zimmerli gsi bi hani nu "Madagascar" ufem Laptop gugget.
Am Samschtigmorge isches denn schu am 8i a de Universität Basel losgangä mit de Registration. Me hed äs T-Shirt, en Badge und en Konferäzmappä mit allerlei Stuff becho. Ich ha de nu de Andreas (aka Rabbit) usem Forum troffe (www.bsdforen.de) und mier hend üs de am halbi 9ni d'Opening Session agguget und sind de de ganz Tag a de Vorträg nachä gangä. D'Vorträg sind uf Änglisch ghaltä gsi und technisch au sehr aspruchsvoll gsi. Aber ich ha nu nie sovil Lüüt gseh mit Laptops ume höcklä wie hie!
Am Abig isch denn nu de social event gsi, das heisst me hed sich imene Chäller troffe und hed dette de Event wo underem Motto "The night of the living dead" gschtande isch begangä. Wem de Titel chli schräg inechund, dem söll verischeret sii dases nüd mit Horror oder suschtige okkulte Macheschafte z'tue hed, sondern einzig und ällei uf de berüehtmi Satz "BSD is dieing" gmüntz isch. Äs isch wirklich sehr amüsant und lehrrich gsi, so mit underschidliche Lüüt mal chönne ungezwunge z'plaudere.

Am Sunntig isches denn schu früeh wider losgangä mit de Mischig us Vorträg losä und Kafi trinkä. Am Namitag isch denn nu d'Schlusssession gsi und schu bald hed sich de bunti Huufe zerstreut. Ich ha mich de au vom Andreas verabschidet und bi de au langsam ufe Wäg hei, aber nid ohni nu s'OpenBSD-Team mit äs paar T-Shirtchäuf z'understütze

Rückblickend muesi sägä dases sich wirklich glohnt hed, au weni nid de Entwickler oder de täglichi Arbeiter bi, nei au für mich als chlises Hobbybaschtlerliechtli isches sehr spannend gsi, nid nume vom technische här, sondern au vom mänschliche Faktor. Weni etz grad so müesst sägä wer oder was dasmer so am Beschte nu in Erinnerig isch denn isches sicher de phk (Paul-Henning Kamp) mit sinere unnachahmliche Art en Vortrag z'halte und de Ian McBride wo mit sinere Axt-Performance die Gschicht mit de redundante Firewalls am Fachpublikum präsentiert hed

Sodele, mit em Update vom Rapidweaver uf d'Version 3.2 hani doch grad au nu s'Design vu de Websiite chli modernisiert. Ich hoffe, alles funktioniere wider so wie dases funktioniert hed und s'Design gfalli au öppe am einte oder andere Bsuecher.

Och, etz isch das Weekend au schu wider dure. Obwohl, isch ja schu chli genial gsi.

Am Fritig hani chönne gunes heisse Vehikel hole, en Toyota Hilux 2,5 Di-D Pickup für üses Transpörtli am Samschtig. Schu nu cool gsi mit somene Fahrzüüg übere Asphalt z'naglä (jaja, isch halt chli en ruuche Motor gsi).

Am Samschtig hed de d'Aktion "Sofa" stattgfunde, das bi schönschtem Wätter. Füre Hobbyruum isch en Leihgaab anekarret worde. Etz wirds langsam gmüetlich dett unne, nid nur wägem Sofa, sondern au wäg de Lampe und de Vorhäng a de Wand.
Am Abig isch de grosse Büroputz ufem Plan gschtandä. Mis Büröööli heds mal wider nötig gha, so nötig dases bis am Morge am 2 gangä isch und drüü Güselseck gfüllt hed. Defür sind Sachä fürechoo...ha gar nid gwüsst was da alles kreucht und fleucht

Hach, schu wider Sunntigabig und s'Wucheändi schu wider dure. Vorallem, isch ja grad wider chli öppis gloffe das Wucheändi (also i vilerlei Hiisicht).
De Fritigabig isch chli mit rauchigem Aroma, garniert mit vil Informatione und nu meh Fachsimpeleie ganz am Afang vu dem Wucheändi gschtandä. Mier sind uf Seewe ane Whisky-Abig. Ca. 15 Sorte hedmer chönne deguschtiere, mit Profis und Afänger glichermassä Erfahrige ustuusche, vil Interessants über Schottland und d'Whiskyproduktion erfahrä und sich am Schluss nu a de chalte Platte verluschtiere. Obwohl, de "lahmschti" Whisky hed 40% Volume gha und de Möder-Whisky 58,3% Volume...ein Schelm wer böses denkt, aber zum Glück hani en Chauffeur gha

De Samschtig isch schu früeh wider arbetsriich gsi, mier hend nämli eine uf Entsorgigs- und Güselcrew gmacht. De ganzi Chäller (und die halb Wohnig) isch entrümplet worde: Elektrogüsel, Kartonschachtle, Feschtplattä, Meersüülichefi, Dolby-Surroundalaag, Plaschtik, Holz, Sagex und suscht nu Sachä - sovil dasmer glatt zweimal mit em Puma hend müesse uf Hünebärg i d'Sammelschtell fahrä :-O Ha gar nid gwüsst dasi sovil Platz im Chäller ha.

Am Namitag bini nu schnell uf Bärn ufegflogä mit em schwarze Ruumschiff, ha halt im ricardo.ch nu en Sun Ultra 5 (jaja, ich weiss, ich ha schu eini) erschteigertet. De Verchäufer isch sehr flott gsi und etz hani halt näb de Sun nu drüü Taschtature becho und en VGA-Adapter und das alles für Fr. 20.-. Allerdings wemer de Moscht rächnet

Am Abig bini mit mim "chline" Schwöschterli nu as Coldplay-Konzärt uf Züri. Leider heds i de Schtadt chli Schtau gha, so dasmer sicher z'schpat zum Konzert cho währid. Aber sigs drum, de Schliichwägschpezialischt hed äs erschts Mal zuegschlagä - Schwupps schnell uf Seebach und vu dette, quasi vo hinne dure Magä is Aug, simmer sehr speditiv (BTW: Was isch mit rote Amplä und rächts abbiege verbote gsi?), vilicht au dank de AG-Nummere pünktlich im nüüe (Qu)Hallestadion iitroffe. De erscht Iidruck isch nid leid, vil grosszügüger als früehner und dank de nummerierte Sitz nid so de Stress mit Plätz ergattere. Aber wo Liecht, da au Schattesiite: D'Sitzreihe sind ender verschisse, muesch aligs alli Lüüt ufschüüche zum durelaufe und de Hammer sind d'Bächerhalter uf Zechehöchi: Stolperfalle par excellence! Also wenn da i de Reihe 23 uf d'Schnorre ghiisch, machsch de Chäfer über alli Reihe ab...
Anyway, mier hend gueti Plätzli gha (Sektor G1, Reihe 34, Sitz 13 und 14 fallses eine interessiert) und s'Konzärt isch de au schu am 21.15 losgängä. Churzrevue: Liechtshow: eini vu de Beschte woni je gseh ha (und ja, ich bi schu as paarne Konzärt gsi), Performance: sackschtarch, de Sänger isch immer presänt gsi, abwächsligsriich und witzig, Fazit: jederziit gärä wider!
Nachem Konzärt heds de chli im Parkhuus Närvä bruucht bismer dusse gsi isch, aber gägeüber am Ghetto in Basel isch das ja grad ordentlich dureorganisiert gsi Leider hed de ufem Heiwäg de Schliichwägschpezialischt grad äs zweits Mal zuegschlagä, dasmal leider nid grad wirkli clever - me sött aligs luege wo Einbahn isch. Aber au das Hinderniss isch mit eme behärztä Manöver umschifft worde und schu simmer ufem Heiwäg gsi

De Sunntig isch nid so hektisch gsi. Ha chli "Final Destination" müesse luege (isch geschter ufem Pro7 gloffe, hane äbä ufem Harddiskrecorder ufzeichnet) und denn isches nu einisch schträng worde: D'Büsch im Garte hani nu döffe beschniide!! Sage und schreibe 2,5h hemmer im Garte gwirkt und de Container mit Grüenscheiss gfüllt. Jetzt isch de Garte defür wintersicher und vu mier us chas etz gu schniie

Sit am letsche Mändig simmer stolzi Bsitzer vum Baschtelruum under üsere Wohnig. Das Rüümli isch aber chli trischt gsi, kei Farb und drum au chli unfründlich. Mier hend de de Malermeischter Schlirrg und de Malermeischter Tropf engagiert wo üs das sensationell gschtriche hend: D'Dechi und ei Wand wiis, ei Wand pastell-uringälb und die ander Wand orange-apricot. Die viert Wand isch s'Tränngitter, das tümer denn mit eme Dekortuech verhänkä
Am Abig hemmer den nu die nüüscht Errungeschaft usprobiert: BUZZ! The Music Quiz für d'PS2. Das isch es Game für die ganz Familie: Me mues mit spezielle "Buzzers" wie inere Schpielshow die richtige Antworte zu Musikstückli errate. Bis zu vier Spiler chönd da mitmachä und ich mues sägä: Äs cha nu süchtig machä (de Autor isch dank de drüü andere Mitschpiler zweimal bis z'Nacht am eis vorem Färnseh ghöcklet - leider heds nid mängisch füre Sieg glanget, äs sind gwüssnig Lüüt eifach besser gsi )

En Sunntig i de Schwiiz. Blätter wirblid dur d'Luft, füechte Näbel chrüücht ums Huus ume und im Färnseh chund nüd gschiids. Was macht de gneigti Langwiiler also? Richtig, är gahd i Gartä gu Laub zämä näh (leider will Sunntig isch ohni Laubsuuger) und tued sini Schlingpflanzä (äh pardon: Wicke) abbeschniide. Ca. 1h später isches denn au vollbracht, das Ungetüüm isch suuber grodt und alli Fangarme sind au abem Balkon gschnitte. Etz liid das Ding im Rasä und wartet uf d'Entsorgig

Hmmm, mim Forscher- und Entdeckigsdrang chas aligs nid wild gnueg sii. Hüt hani doch bimeid schu wider mal öppis Elektronischs gepöschtelt: En Harddisc-DVD-Recorder vu de Firma LiteOn. Mit dem digitale Videorecorder chamer sini Lieblingssändige uf d'Harddisc ufnäh, aluege und wider lösche und wenns eim denn so guet gfallid, denn chamers sogar nu uf DVD brännä Was das Ding alles cha und was nid, das gsehd mer da: Homepage
Was eifach d'Hammerfunktion isch: Me cha d'Ziit im Programm ahaltä und umespuele, wie wenn z.B. d'Tagesschau en DVD wär. Wer kännt das nid? De Film isch soooo spannend und mer mues unbedingt ä Süessigkeit ha? Eifach uf "Pause" drücke und de Film haltet a und wenn wider parat bisch, denn chasch wider "Play" drücke. S'Gheimniss heisst hie "Timeshift"
Mal gugge weni das Ding definitiv cha iirichte, uf alli Fäll lauft är und die erschte Teschts hani au schu gmacht

Äs isch ja gli wider Winter und wenn Winter isch, denn heds n id sovil Liecht zum glücklich wärdä. Da mini besseri Hälfti gli Geburtstag hed und sie sovil Freud a Liechtli hed, hanere ganz öppis Speziells gschänkt (so quasi al Vorgeburtstagsgschänk): En Laserpod! Das isch en Aluminumzylinder wo mit Hilf vo Laser-LED äs Universum in blau a d'Dechi zauberet und wo roti Laserstrahlä immer wider Schtärnä i das Universum zeichnid. Ganz heiss! So chamer schtundelang ufem Bett ligge und dem ganze Liechtzauber zueluege. Uf alli Fäll isch das Gschänkli guet acho!

Sodele, etz isches mal wider sowiit gsi: Min Rächnerzoo hed Nachwuchs übercho! Und zwar grad im Doppelpack. Im Früehlig hani mal usere Luune use en SUN Ultra 5 (UltraSparc 64 - System) im ricardo.ch ersteigeret. Leider isch das Ding nie richtig gloffe, irgendöppis isch a de Feschtplatte fuul gsi. Au en Original-Solaris (Betriebssystem vu de SUN) isch nid zur Kooperation mit de Ultra 5 z'überredä gsi. So isch das altehrwürdige ding halt am Bode gschtande und hed uf besseri Ziitä gwartet. Hüt isches den sowiit gsi, de Adili hed ufgrund vu sinere Lektüre "Absolute OpenBSD" vom Michael W. Lucas dänkt är chönnti doch a de SUN äs OpenBSD (s'sicherschti UNIX wos gid, nöcheri Infos gids uf de Homepage) verpassä. Jaja, alles guet sowiit, nur leider hed sich de d'Feschtplatte während de Installation is Datenirvana verabschidet :-O Hani halt schnell müesse mini alt Teschtchischte usschlachtä und en 20GB-Maxtor inewürge (jaja, würge isch guet gseid, die Feschtplatte hed halt uf kei Schruubelöcher passt, also eifach Deckel druff und guet isch )
Nachdem ich d'Installation halt numal gmacht ha, hed mich d'Ultra 5 wie folgt begrüesst:

OpenBSD 3.7 (GENERIC) #431: Sun Mar 20 14:10:02 MST 2005

Welcome to OpenBSD: The proactively secure Unix-like operating system.

Please use the sendbug(1) utility to report bugs in the system.
Before reporting a bug, please try to reproduce it with the latest
version of the code. With bug reports, please try to ensure that
enough information to reproduce the problem is enclosed, and if a
known fix for it exists, include that as well.

A consultant is a person who borrows your watch, tells you what time it
is, pockets the watch, and sends you a bill for it.

openbsdultra5:annenad {20}


Etz chani am Buech nu besser folge, indem ich eifach alles 1:1 cha usprobiere und das ufere original SUN!

Am Abig hani de nu einisch Nachwuchs im Rächnerzoo erhaltä, ha vor einere Wuche nu einisch en SUN erschteigeret (au im ricardo.ch, wie chönnts andersch sii) und zwar dasmal ä Ultra 30. Das isch en grössere Brüeder vu de Ultra 5. Sie isch etz vier Jahr lang inere Grafikbude gschtandä und hed näbem Monitor au nu en Taschtatur derbii gha. Au die wird i naher Zuekunft mit enere OpenBSD-Installation gsägnet

Also, ier chönd mier au Superdepp sägä. Am Fritig hani mal wider gmeint so husch-husch öppis guets chönne z'machä. Ich ha mi Rächner welle ufene nüüi Version bringe (vergleiche unten: Der Marathonrechner). Jaja, peinlich genau nach Aaleitig mich verhalte und nichtsahnend en falsche Chnopf drückt. Denn mal s'Upgrade la fahre und mich ca. drüü Schtund schpööter gwunderet warum daser nümmer erreichbar isch vo usse. Denn mal i mis Schtaubchämmerli gschliche (immer mit meh unguete Gfühl), dette s'Keyboard füregrüblet und de Monitor aglah: Nume Fählermäldige am abbepurzle am Bildschirm! Guter Rat war da teuer...
Hami nümme chönne iloggä, weder als Benutzer nu als Superuser (wahrlich, de Titel hani mier au schier welle gäh, eifach i abgwandleter Form: Superdepp). Ha doch mit dem Taschtedruck d'Benutzerdatei (/etc/passwd) verschosse gha. Logisch kännt är mich nümme
Beschämt bini is Bett gangä und hüt am Morge hani de im Bett en Blitzidee gha wieni das Malheur cha löse. Ha mich de im Single User Modus igloggt und mit de CD en nüüi passwd-Datei drufgjasset, d'Passwortdatebank frisch buue und nacheme Nüüstart denn nu de alti benutzer iigrichtet und siehe da: Tatsächlich, nach 20min hani ohni Nüüinstallation wider chönne mit ihm schaffä und als Sahnehäubchen hani denn s'Upgrade grad au nu agworfä. Etz, 10h schpööter isches sowiit: FreeBSD 6.0-RC1 wärchlet uf de Chischte und isch parat für wiiteri Schandtaate

Hüt bini nu uf Olte a d'Delegierteversammlig vom SVTS (Schweizer Verband der Techniker TS) i minere Funktion als Verträter vu de Region Zentral gangä. Mier hend dette a dere usserordentliche Delegierteversammlig döffe übere nüüi Name für Verband abschtimme. Leider dafi bis alli Formalitäte erledigt sind nid verrate wie das de nüüi Name heisst, sovil sei aber verrate: Är hed mit em alte Name und de alte Namenskonvention (Übersetzig i drüü Landessprache etc.) nüme gmeinsam, vilmeh isches en eigeschtändigi Bezeichnig z.B. wie de vu de Gwärchschaft UNIA.
Bezeichnenderwiis isch die Namensänderig dank verschidnige Plädoyers eischtimmig vu de Delegierte agnuh worde, das seid ja schu vil us. D'Versammlig isch sehr speditiv duregangä, au wenns nu nüi Statute bruucht hed. Am spate Namitag hemmers de au gschafft und hend üs chönne wieder ufe Heiwäg machä.

Ich ha doch äs paar Iiträg wiiter unne mal gschribe dasi en heimliche Arbeiter ha. De Arbeiter wird langsam zum Marathonrächner, hüt isch d'Statusazeig wie folgt gsi:

[annenad@jail_master] ~/> uptime
8:11PM up 129 days, 21:27, 1 user, load averages: 0.00, 0.00, 0.00


Und so gsehd etz de aktuelli Status offiziell us (Quelle: uptime-project.net):



Mal luege wie lang dases nu gahd, ich ha mier vorgnuh, mit em Erschiine vo FreeBSD 6.0-Release de Webserver uf die Version ufe z'zieh. Debii machi zwar d'Uptime wider a Ranzä, aber das isches mier wärt, denn ufs 6.0 wartid alli Fans sehr sehnsüchtig, und da wetti doch mitmachä

Am letschte Samschtig isches mal wider sowiit gsi: De Adili hed äs nüüs Schpilzüüg füre Garte poschtet. Jaja, ä Kärcher Hochdruckreiniger, schwarz und gälb (passend zu de blaue Gummischtifel und em rote Pullover). Das Ding isch ja mal wider äs wahrs Schnäppli gsi - chraftvolli, sagehafti 1.02 PS, 4m-Schluuch und Fräsuatomatik; so magi au am gröbschte Dräck ufem Garteplättli zeige wer de Meischter im Huus isch. Ha defür das Ding grad grob iigfahrä, är hed mit mier müesse zwei Schtund alles putze womer i Wäg cho isch: Vom Garteplättli, zum Cheminée-Plättli, Wägplättli, Bodeplättli.....Gartemöbel, Gartetöpfli und zu gueter letscht nu mi Gartesarg. Alles suuber, alles fit, nur mini linggi Hand macht nümme mit (und nei, äs isch nid vom "kurble", sondern vom chraftvolle Düsewiderhebä *grins*).
Am Abig isch nu "Seiser"-Chilbi gsi, das heisst au wider mässige bis chli-meh-mässige Trinkgenuss im Kafizält. Zum Glück isches nöch gsi zur Wohnig...

Sodele, viellicht interessierts ja öppert wie dases mim Radio ergange isch und wie dass das nüüe iPod-Adaptergrät vu de Pioneer wirkt und chrampfet. Die liebe Lüüt vu de Garage hend de tatsächlich glaubi de halb Charre usenand grupft bis sie äntli de Radio wider us sinere missliche Laag befriit gha hend Uf alli Fäll gseder etz chli lädiert us, aber Musig chund immer nu gnueg luut usem use...
Das iPod- Adapterli (CD-IB100) isch nid leid, allerdings döfftmer für das Gäld chli meh erwartä. Äs spillt die Liedli vom iPod au ab, nur vorgeschter heds en Totalabsturz gha, so dass nume nu s'Ussteckä vom iPod ghulfe hed. D'Bedienig isch au nid grad sehr intuitiv, aber was sölls: Mini Musig chund usem Luutsprächer i mis Öhrli und das isch guet so. Fazit: Nur füre wirklichi Fan z'empfählä

Wie ich grad vorig uf mim Streifzug (oder Stichkontrolle) bemerkt ha, lauft mi Heimserver sit genau 116 Tag ohni Underbrächig dure. So geil, sone langi Ziit ohni Stromusfall hani glaub hie nu nie erläbt

[annenad@jail_master] /> uptime
8:13PM up 116 days, 21:28, 1 user, load averages: 0.03, 0.01, 0.00

Jaja, wer kännt das nid: Meh wott öppis machä und denn gratets eim nid so wie dases sött?! Am letschte Samschtig isches bi mier (am King of Bastel notabene) au mal wider passiert...
Samschtigmorge, wie immer chli rägnerisch i de Schwiiz. De Adili hed en Abholigsschiin im Briefchaschte gha, sis iPod-Pioneeradapterli isch iitroffe. Flugs uf d'Poscht, s'Päckli gschnappt und voller Vorfreud mit em Wärchzüüg ab is Auto. S'Auto i Position gfahre und schu heds chönne losgah. I Gedankä hani die Kabel schu iigschteckt gha und mit em iPod schu zum pöschtele fahre chönne. Doch weit gefehlt: Irgendwie hend die zwei Arretierlöserblöchsticks de Radio nid welle zur Fassig us bringe (defür hends mich zur Wiisgluet brunge). So nach 20min hed de de einti Stick tatsächlich de Radio chönne ent-arretiere, aber defür ischer nümme usecho. De ander Stick hed sich de us luuter Solidarität au entschlosse dinne z'bliibe. Jede Versuech, mit sanfter oder weniger sanfter Gwalt isch kläglich gschiiteret. D'Quintessänz vum Ganze isch etz, dass de Radio usgsehd als ob ich en Autoknacker bim usbuue gschtört hätt und dass die zwei Sticks immer nu drinne sind und de Radio chli usgsehd als ob ihn en Chueh i de Schnorre gha hed. Uf alli Fäll gahd de Adili morn i d'Garage und dette chönd d'Profis mal as Wärch.
Isch grad guet, denn chani grad d'Winterpneu druuf tue, me weiss ja nie wenns abbeschniit.
So Gott (oder mis Portemonnaie will) chani bi dere Glägeheit nu de lang ersehnti Heckflügel bschtelle. Äs gid nämli nur eine füre Galant wo i de Schwiiz ohni langwirigi Einzelabnahm cha montiert wärdä. Mal gucken...

Sodele, schu wider Sunntigabig und schu wider isch s'Weekend verbii. Vom Wätter här absolut ideal, schöner cha en Spatsummer gar nid sii. Das Wucheändi isch mal wider im Zeiche vom Ufruume und wie chönnts anderscht sii, baschtle gschtandä. Underem Ufruume isch derbi mis Bürööli dracho, Bärge vo Rächnige, vergammelnde Unterlage und suschtige Grümpel hend mier langsam aber sicher de Wäg zur Computertaschtatur versperrt und wer mich kännt, der weiss, dass das schier a Diktatur gränzt, mich vo mim gliebte PC färnzhaltä Also hani schweren Herzens de Shredder agworfe und Altpapier gmacht...
Baschtle isch au ufem Programm gschtandä, dasmal nid nume am PC (man staune) sondern au mal öppis kreativ-praktischs: Mier hend sovil Lüüt wo üs Asichtschartä tüend schriibe und die sind bis itz im Poschtcharte-Duschvorhang inne gsi. Da de Poschtcharte-Duschvorhang nümme so ansehnlich gsi isch (bösi Ziitgenosse würdid sägä daser churz vorem Eigeläbä gschtandä isch) hemmer us Holzchlämmerli und roter Schnuer en Poschtcharte-Wöschhänki im Korridor baschtlet. Etz chamer dette alli Poschtchartene a underschidlich lange Chettene bewundere Isch nu härzig usecho, au weni vu de Schlagbohrmaschine schier en Hörsturz übercho ha (Man glaubt es kaum: Zwei Löcher bohre und zweimal Armierigsiise verwütsche, das isch ächt ä Kunscht).
Am PC hani hüt au nu chli baschtlet, ha ufere c't-CD en Vollversion vu de VmWare-Workstation gfunde (das isch en Software wo ufeme PC en komplette PC cha simuliere, ideal für zum anderi Betriebssystem teschtä. Ich ha de grad mal so us Spass s'FreeSBIE (das isch en Live-Version vom bekannte und beschte Betriebssystem FreeBSD wo mer ohni Installation cha ufeme PC usprobiere, ich ha allerdings d'Version mit de Installation gwählt) i sonere virtuelle Maschine installiert. Schu nu cool

Jaja, etz isch schu wider Samschtigmorgä und s'Wuchäändi isch eh schier verbii Defür sind d'Arbetstäg immer lang - chum ufgschtandä gahd mer gu wärchä und nacher wider hei gu liggä. Wie chund de das erscht nu use wenn de Winter chund und s'Dusse nümme so hell isch?
Anyway, die Wuche hani mich nu für d'EuroBSDCon in Basel agmäldet. Das isch en Kongräss wo vom Fritig bis am Sunntig duuret und sich nume um die friie Unix-Derivat (Free-, Open-, Net- und DragonflyBSD) dreihed. Dette wärdid eim Vorträg und d'Möglichkeit zum Gedankeustuusch mit Gliichgsinnte bote. Ich ha lang überleid öbs für mich nid ender vom Niveau z'höch isch, immerhin bini ja nume FreeBSD-Awänder sid guet zweiähalb Jahr. Ich ha mich de erkundiget und bi dank gueter Zuesprach zum Schluss cho, eifach mal z'gah und hami etz agmäldet. Ich wirde de hie sicher brichte wie dases gsi isch

Jaja, me chamer ja vil sägä (ha ja au schu vil müesse ghöre wasi sig *grins*), aber Baschtler ghöri immer wider gärä, vorallem wenns um mini PC-Farm und mis Netzwärch gahd.
Hüt am Morge 07:00, me liid ja so schön im Bett, ghört de Rägä ruusche dusse und uf einisch im Halbschlaf en Geischtesblitz! De Gedankä kämpft gäg das schlaftrunkeni Hirni a und lahd eim nümme los. Idee rotierid um de Gedankä und plötzli haltet mers nümme us und gahd a PC gu bäschtele. Hüt isch en Netzwärchüberwachig uf mim Heimwebserver derzue cho. Under eidrien.kicks-ass.net bietet mi Heimwebserver öppis Wenigs a und für zum Testschte und Baschtle isch das mede rächt.
Ha mi also mit Shell-Scripts, absolute und relative Programmpfäd und mit em Cron umegärgeret, aber usecho isch ä Siite wo all füüf Minute en Übersicht über en Teil (nid alli Spillzüüg) i mim Netzwärch gid. Me cha die Siite hie gfinde: Drück mich!

Heieiei, das Wucheändi au schu wider dure. Vom Wätter här ideal, nume chli füecht gnueg zum dussesitze und sich schträng bewegä.
Hüt hani wider einisch mis Spilzüüg füregnu, mi WRAP (Wireless Router Application Platform). Das isch en vollwärtige PC us Schwiizer Fertigung womer cha als z.B. Firewall bruuche. Für das verwändi au äs Schwiizer Produkt, nämli m0n0wall. Isch halt chli lang umegschtandä, etz hanis hüt mal wider fürepakt und siehe da: It works! So geil, ich bis etz nu chli am teschtä und d'Fiinjustierig am machä, aber isch halt schu genial das Ding, vorallem wenns imene schicke rote Ghüüs mit 16x16x2cm inne wohnt, so richtig für d'Schtube. Dank dem heisse Ghüüs isch au de WAF (Women Aceptance Factor) sehr höch

Sodele, etz isches wirkli Tatsach worde: Alli Bildli vo minere Summereis 2005 sind i de Gallery abgleid. De aktuelli Datebestand umfasst 1298 Foteli insgesamt, vu New York hani 268 gmacht und vu Toronto 147. De gsamti "verschwändeti" Serverplatz isch mit 214MB ender moderat, wie gross dass d'Datebank allerdings isch weisi nid
Ha de grad im gliiche Ufwüsch d'Websiite chli umgschtaltet, ei nüüi Sektion "Travelnotes" installiert und zugliich s'Wätter und nüü au d'Webcam i d'Sektion "Informations" züglet.
Ich wünsche üch vil Spass bim Photeli luege, entdecke und gniesse.

Sodele, hamer dänkt das ab und zu chli paar Gedankä chönnt uf minere Siite veröffentliche, nid nume Feriebrichtli Hüt isch also s'normale Läbä wider losgangä, chli Autowäschä, usesuuge und suschtige Plunder machä.
D'Föteli vu New York sind au afigs zur Hälfti i de Gallery inne, äs lohnt sich also zum inegugge. Die zweit Hälfti folgt nu bis am Fritig.

Samschtigmorgä, churz na de Achte und schu wider isch umeseckle agseid. Packä, Vorbereite, Putze, Viecher mischte, Verusse ufruume und und und. Aber so gahds glaubi jedem wo einisch i d'Ferie cha. Stichwort: Ferie?! Jaja, ändli gids Ferie, isch ja schu speziell, s'erscht Mal hani drüü Wuche am Schtuck (Sorry a alli wo am Zischtig wider i Schtolle müend).
Hüt isch nu Hüürate agseid (neinei, kei Angscht, ich tue nid hüürate, das überlani am Märtel und de Petra) und morn am Morge isches de sowiit: Toronto und New York, ich chume...

Nett, nett, es ist soweit. Der bisher brachliegenden Seite wird endlich Leben eingehaucht
Stay tuned...