Sodele, etz isches dure: Äs Wucheändi volle Erfahrige, Fachsimpeleie, nätte Gschpräch und und und isch dure. Woni gsi bi? Hmmm, das verrati gärä: Ich bi a de EuroBSDCon 2005 in Basel gsi. Die wo öppe da ine luegid, wüssid dasi mit de Entscheidig zum gah oder nid gah lang grunge ha und dass am Schluss d'Nüügier gsiegt hed.

Also, ich bi am Fritigabig nachem Schaffä uf Basel mit em schwarzä Ruumschiff gflogä und ha dette mal müehsam mis Hotel gsuecht. Mis Adigaviationssystem isch leider infolge Ortsunkänntnis und Dunkelheit liecht gschtört gsi und kei richtigi Signal vu de Augesensore übercho, so dasi zweimal ha müesse durne Einbahn fahrä. Aber dank de AG-Nummer isch das keis Problem gsi Ha de im Hotel icheckt und nachdemi im Zimmerli gsi bi hani nu "Madagascar" ufem Laptop gugget.
Am Samschtigmorge isches denn schu am 8i a de Universität Basel losgangä mit de Registration. Me hed äs T-Shirt, en Badge und en Konferäzmappä mit allerlei Stuff becho. Ich ha de nu de Andreas (aka Rabbit) usem Forum troffe (www.bsdforen.de) und mier hend üs de am halbi 9ni d'Opening Session agguget und sind de de ganz Tag a de Vorträg nachä gangä. D'Vorträg sind uf Änglisch ghaltä gsi und technisch au sehr aspruchsvoll gsi. Aber ich ha nu nie sovil Lüüt gseh mit Laptops ume höcklä wie hie!
Am Abig isch denn nu de social event gsi, das heisst me hed sich imene Chäller troffe und hed dette de Event wo underem Motto "The night of the living dead" gschtande isch begangä. Wem de Titel chli schräg inechund, dem söll verischeret sii dases nüd mit Horror oder suschtige okkulte Macheschafte z'tue hed, sondern einzig und ällei uf de berüehtmi Satz "BSD is dieing" gmüntz isch. Äs isch wirklich sehr amüsant und lehrrich gsi, so mit underschidliche Lüüt mal chönne ungezwunge z'plaudere.

Am Sunntig isches denn schu früeh wider losgangä mit de Mischig us Vorträg losä und Kafi trinkä. Am Namitag isch denn nu d'Schlusssession gsi und schu bald hed sich de bunti Huufe zerstreut. Ich ha mich de au vom Andreas verabschidet und bi de au langsam ufe Wäg hei, aber nid ohni nu s'OpenBSD-Team mit äs paar T-Shirtchäuf z'understütze

Rückblickend muesi sägä dases sich wirklich glohnt hed, au weni nid de Entwickler oder de täglichi Arbeiter bi, nei au für mich als chlises Hobbybaschtlerliechtli isches sehr spannend gsi, nid nume vom technische här, sondern au vom mänschliche Faktor. Weni etz grad so müesst sägä wer oder was dasmer so am Beschte nu in Erinnerig isch denn isches sicher de phk (Paul-Henning Kamp) mit sinere unnachahmliche Art en Vortrag z'halte und de Ian McBride wo mit sinere Axt-Performance die Gschicht mit de redundante Firewalls am Fachpublikum präsentiert hed